लोभयात वसय् तये फयेके

छगू इलय् वाराणसीया व्यापारीतय् छगू पुचः दयेकल । उपिं मध्ये छम्हेसित नायः ल्यल । अनंलि उपिं धन कमे यायेत पिहां वन । ववं उमि लँ दापा जुल । उखें थुखें लँपु माःजुल । तर लुइके मफुत । इमिके नसात्वँसा नं मन्त । कालान्तर लिपा उमिसं वंगलसिमा छमा लुइकल । अन सिचु तायेकल । उपिं सकलें अन फ्यतुल । उमिसं धाल, ‘अवश्य नं थ्व लखं प्याना च्वन । थुकि लः बाः वयाच्वंगु दयेमाः ।

उकिं थुकिया पूर्वपाखेया कचा ध्यनेमाः ।’ धात्थें इमिसं धाःथें जुल । अनं निर्मल लः बाः वल । थ्व खनाः उपिं लय्ताल । लुधंक लः त्वन । थःपिनि इच्छा कथं म्वः ल्हुल । भचा जायेकाः उमिसं दक्षिणपाखेया कचा नं ध्यनेगु बिचाः यात । उकियात नं उघ्रिमय् ध्यन । अनं आपालं मार्सि जाकिया जा पिहां वल । लः मदुगु पाय्स समानगु मरी नं वल । केँ व खाद्य पदार्थ नं पिहांवल । थ्व खनेवं उपिं झन लय्ताल ।

सकसिनं लुधंक नसा नल । नसा त्वंसां प्वाः जाल । अनं लिपा उमिसं पश्चिमपाखेया कचा नं ध्यन । अनं मिसात पिहां वल । अतिकं सुन्दरीपिं । बांलाक छाय्पिया तःपिं मिस्त । छम्ह छम्ह व्यापारीतय् थाय् छम्ह छम्ह मिस्त च्वंवल । सकसिनं अतिकं न्ह्यइपु तायेकल । थुलिं नं इपिं सन्तुष्ट मजुल । उमिसं उत्तरपाखे च्वंगु कचा नं ध्यन । अनं ला झन् आपालं मोति, बेलौर, लुँ, वह पिहां वल ।

थुलि जक मखु । अनं न्यापाः न्यापाः तुयुगु व ह्याउँगु लासा नं पिहां वल । अथेहे कासिया वसः, कम्बल नं पिहां वल । उमिसं थःपिंत माक्व बस्तु काल । दक्वं मुन । गाडाय् तल । गाडा जायेके धुंकाः नं उपिं सन्तुष्ट मजू । अझ आपा कायेगु बिचाः यात । उमिसं सिमाया हा नापं ध्यनेगु बिचाः यात । थ्व खँ न्यनाः नायलं इमित पन ।
वं धाल, ‘हे व्यापारीपिं, छिमित भिं जुइमाः । थुगु वंगलसिमां छिमित छु स्यंका बिल ।

मनू विवेकशील प्राणी । उकिं हरेक पल ब्वलनीगु इच्छा शक्तियात ध्वाथुइकेमाः । थुकिया लिच्वःया नं
बिचाः यायेमाः । थःगु आज्जु पुवंकेत याइगु इच्छा
बांलागु इच्छा जूवनेफु । सुयागुं घाट यायेगु इच्छा मखु । लोभयात वसय् तयाः स्मृतिवान जुयाः न्ह्याकूगु पलाखं सदां खुसी जुइ । मन सन्तुष्ट जुइ ।

ध्यने मते । पूर्वपाखेया कचां लः बिल, पश्चिमपाखेया कचां मिसात बिल । उत्तरपाखेया कचां रत्न बिल । थुकिं सकतां कथंया इच्छा पूवन । गुगु सिमा किचलय् फ्यतुल । ग्वतुल । उकिया कचा त्वथुले मजिउ । मित्रद्रोह यायेगु पाप खः । तर नायःया खँ सुनानं मन्यं । उपिं सकलें जाना हाकनं हानापं पालेत तयार जुल । हा ध्यनेत उपिं न्ह्यःने वन । थ्व अन च्वंम्ह नागराजां खन ।

वं बिचाः यात ‘प्याः चाःपिं उमित लः त्वंकेबिया । दिव्यभोजन शयनासन बिया । परिवार मिसापिं व न्यासः गाडा रत्न बिया । आः हाकनं उमिसं सिमाया हा नापं ध्यनेगु बिचाः यात । नायः छम्ह त्वःताः सकसितं स्यायेमाः । उकिं आः थ्व हां धनुषधारी ढाल तरवार दुपिं सेनात पिहां वयेमाः ।व्यापारीत सकलें जानाः सिमाया हाः ध्यन । धाथें अनं नीन्याम्ह शस्त्रधारी नागत पिहां वल ।

खुद्वः ढाल तरवार दुपिं सेनात पिहां वल । ‘थुमित कयेकी, चिउ, सुयात नं म्वाःम्वाकं त्वताः छ्वयेमते । नायः छम्ह बाहेक मेपिं सकसितं भष्म याः ।’ नागराजं सकसितं उजं बिल । नागराजया उजं कथं नागतसें अथे हे यात । सकलें व्यपारीतय्त स्याना बिल । नायः छम्ह जक ल्यन । अनंलि लायेगु लासा धन रत्न दक्वं न्यासः गाडाय् तयेके बिल । नायः नापं नागराज स्वयमं दक्व गाडा न्ह्याकल ।

वाराणसीं नायःया छेँ तक तयाबिल । अनं विदावारी कयाः नागराज थःगु नागभवनय् लिहां वन । हरेक प्राणीया इच्छा दइ । नये पित्यासा प्वाः जायेक नयेगु इच्छा । प्वाः जालकि बांलाःगु वसः पुनेगु इच्छा । अनंलि चाःहिउ वनेगु इच्छा । चाःहिउ वनेबलय् न्यासि वने थाकु । उकिं हवाइजहाज गया जुइगु । बांलाःगु छेँय् च्वनेगु । भौतिक सामानं सम्पन्न जुइगु । थुकथंया इच्छां गबलें त्वःती मखु ।

छगू धुंकाः मेगु इच्छा दना वइ । छता धुंकाः मेता स्वाना वइ । जातकय् नं थुकथं हे लकस ब्वलंगु खः । न्हापा छफुति लः दुसा जीवन म्वाये फइ थें तायेकूपिं । लः ला दत । थन सीत्यंपिं व्यापारीतय् ज्यान बचे जुल । वृक्ष देवताया प्रभावं जीवन दान प्राप्त जुल । तर उपिं सन्तुष्ट मजू । इमिसं सुन्दरीतलिसें न्ह्यइपुकल । थःत माःगु स्वयां आपालं भौतिक सामान मुन । अझ नं बृक्षदेवताया हा तक नं ध्यनेत स्वत ।

थुगु घटनां सीदु । अति याःसां अन्त्याचार याये मजिउ । जब अत्याचारी जुइ । थःया अस्तित्व नं तनी । थौं संसारय् अतिवादीत आपालं दु । न्ह्याक्व दःसां मगाः । न्ह्यागुं थःत माः । थःगु इच्छा पूवंकेत, थः सम्पन्न धायेकेत कतःया हत्या याइ । हत्या नं छक्वः जक मखु तःक्वमछिं याइ । तर थ्व ताः ई तक न्ह्याके फइमखु । गथे वृक्ष देवतां थःगु छचालंया कचा त्याग यात ।

कचा कथं थीथी सामान बिल । तर जब हा हे चायेत स्वल, अनं नागराज पिहांवल । अथेहे अत्याचारी जुल कि वया अन्त्य स्वाभाविक खः । जातकय् भिं याःसा भिं जुइ धइगु खँयात नं ध्वाथुइका तःगु दु । मखुगु ज्याखँ यायेत पंम्ह व्यापारीयात नागराजं साथ बिल । सह यायेगु नं छगू निश्चित सिमा दु । थुगु खँ जातकं क्यं । थन वंगलसिमायाके यक्वः सहनशीलता दु । वया छचालंया हः चाल ।

तर नं अनं व्यापारीतय्त माः कथं ज्वलं बिल । तर जब वया अस्तित्व हे संकटय् लात । अनं सह यायेगु लागा मत । थुकिं सीका कायेफु, सह जक यानाः सुम्क च्वनेगु नं व्यर्थ जुइफु । यक्व सह यायेगु थःगु लागिं जक घाटक जुइगु मखु, असत्य ज्याखँ याइपिंत साथ बीथें नं जूवनी । मनू विवेकशील प्राणी । उकिं हरेक पल ब्वलनीगु इच्छा शक्तियात ध्वाथुइकेमाः । थुकिया लिच्वःया नं बिचाः यायेमाः ।

थःगु आज्जु पुवंकेत याइगु इच्छा बांलागु इच्छा जूवनेफु । सुयागुं घाट यायेगु इच्छा मखु । लोभयात वसय् तयाः स्मृतिवान जुयाः न्ह्याकूगु पलाखं सदां खुसी जुइ । मन सन्तुष्ट जुइ । उकिं थुगु महावाण जातकय् नं धयातःगु दु, ‘थःगु हितयात ध्यानय् तया पण्डितपिं लोभया वसय् वने मजिउ । बरु मनय् दुने खने दइगु थीथी प्रकारया लोभादीयात स्याना छ्वये फयेकेमाः ।

सम्बन्धित बुखँ

LEAVE YOUR COMMENTS