न्यायाधीश जोशी विरुद्ध महाभियोगया तयारी, सांसदतय् हस्ताक्षर कायेगु सुरु
येँ – सर्वोच्च अदालतया पुलांम्ह कायम मुकायम प्रधानन्यायाधीश दीपकराज जोशी विरुद्ध महाभियोग तयेगु निंतिं हस्ताक्षर संकलन यायेगु ज्या न्ह्याःगु दु । थुकिया लागिं सत्तारुढ नेपाल कम्युनिष्ट पार्टीया सांसदतय्गु हस्ताक्षर संकलन न्ह्याःगु खः । नेकपाया प्रमुख सचेतक देव गुरुङं सांसदतय्त शंकर हलय् सःताः खाली भ्वँतय् हस्ताक्षर याकूगु खँ सीदुगु दु ।
नेकपाया अध्यक्ष पुष्पकमल दाहाल चीन भ्रमणं लिहां वयेवं संसदीय दलया उपनेता सुवास नेम्वाङं अध्यक्ष प्रचण्डलिसे परामर्श यानादीगु खः । परामर्श लिपा हस्ताक्षर संकलन यायेगु ज्या न्ह्याःगु खः । ओमप्रकाश मिश्र न्हूम्ह प्रधान– न्यायाधीश नियुक्त जुइवं सर्वोच्च अदालतय् लिहां वःम्ह भाजु जोशीं नेकपा लिसे जूगु भद्र सहमति त्वाःथःगु धासें महाभियोग तयेगु तयारी याःगु खः ।
थःत विरुद्ध महाभियोग प्रस्ताव वल धाःसा उकिया सामना यायेगु
न्यायाधीश जोशीया धापू
वय्कलं सहमति कथं छगू निगू मुद्दा स्वयाः वयां लिपा राजीनामा बीमाःगु खः । तर अथे मयासे मुद्दा स्वयेगु ज्या न्ह्याकां तुं यंकेवं सरकार समस्या वयेफु धासें महाभियोग तयेगु तयारी याःगु खः । मेगु छगू सूत्रं धाःसा हस्ताक्षर संकलन यायेगु ज्या महाभियोग तया हे छ्वयेगु सिबें नं जोशीयात राजीनामा बीकेत दवाव बीत जक जूगु खँ धाःगु दु ।
यदि राजीनामा मबिल धाःसा महाभियोग दर्ता जुइफइगु सम्भावना नं उतिकं दुगु खँ धाःगु दु । कायम मुकायम प्रधानन्यायाधीश जुयाच्वंगु इलय् न्यायपरिषदं जोशीयात प्रधानन्यायाधीशया निंतिं सिफारिस याःगु खःसां संसदीय सुनुवाई समितिं अस्वीकृत याःगु खः । उखे वरिष्ठतम न्यायाधीश जोशीं धाःसा यदि थः विरुद्ध महाभियोग वल धाःसा उकिया सामना यायेगु खँ धयादीगु दु ।
वय्कलं पत्रकारतलिसे खँ ल्हासें उगु खँ धयादीगु खः । महाभियोग दर्ता यायेत २५ प्रतिशत सांसदया हस्ताक्षर माःसा प्रस्ताव पारित यायेत दुई तिहाइ सांसदया समर्थन माः । जोशीयात महाभियोग तल धाःसा प्रमुख प्रतिपक्षी नेपाली कांग्रेसं उकिया बचाउ यायेफइगु खँ धाःगु दु । जोशीयात कांग्रेसं हे राजीनामा मबीकूगु आशंका नेकपां यानाच्वंगु दु ।
LEAVE YOUR COMMENTS