ख्वपया फि खानी संचालनया तयारी

ख्वप – थनया फि खानी हाकनं संचालनय् वइगु जूगु दु । थनया फि व चा खानी हाकनं संचालनय् वयेत्यंगु खः । खानी संचालनय् अनियमितता जूगु धकाः उजुरी लायेवं थनिं प्यदँ न्ह्यः दक्वं खाली बन्द जूगु खः । प्यदँ न्ह्यः खानी संचालनय् अनियमितता जूगु धासें अख्तियारय् उजुरी लाःगु खः ।

उजुरी वयेवं अख्तियारं अबलय् हे खानीसम्बन्धी दरक्वं फाइल नियन्त्रणय् कायेवं फि व चाया खानी बन्द जूगु खः । अबलय् बन्द जूगु खानी आः हाकनं संचालनय् हयेत्यंगु खः । उगु इलय् खानी संचालकं हे अनियमितता जूगु धासें उजुरी तयेवं अख्तियारं खानी संचालन सम्बन्धी फाइल नियन्त्रणय् काःगु खः ।

अख्तियारं नं फाइल दक्वं नियन्त्रणय् काःसां आतक छुं नं कथंया छानबिन मयासे तयातःगुलिं दक्वं फाइल जिल्ला समन्वय समिति (जिसस)यात लित बियाबिउगु खः । फाइल लित बीवं प्यदँ न्ह्यवंनिसें बन्द जुयाच्वंगु खानी संचालनय् हयेगु तयारी जुयाच्वंगु खः ।

थ्व सम्बन्धय् चाँगुनारायण नगरपालिकां छगू सार्वजनिक सुचं जारी यासें खानी संचालकयात आवश्यक भ्वं नगरपालिकाय् लःल्हायेत आह्वान नं याःगु दु । जिल्लाय् जक निगू दर्जन स्वयां अप्वः चा व फि खानी संचालन जुयाच्वंगु सीदुगु दु । ख्वप जिल्ला विकास समितिया छगू प्रमुख आयस्रोतया रुपय् दयाच्वंगु खानी वइगु मोहनि व स्वन्ति धुनेवं हे संचालन यायेगु तयारी जुयाच्वंगु नगरपालिकां न्ह्यथंगु दु ।

सम्बन्धित बुखँ

LEAVE YOUR COMMENTS