साफ च्याम्पियनशीप सेमिफाइनलय् नेपाःया प्रतिस्पर्धी माल्दिभ्स

येँ – साफ च्याम्पियन्सशीपय् नेपालं माल्दिभ्स लिसे सेमिफाइनल कासा म्हितीगु जूगु दु । समूह ‘बी’इ गोलाप्रथा पाखें माल्दिभ्स उपविजेता जुइवं नेपाः व माल्दिभ्स दथुइ सेमिफाइनल धेंधेंबल्लाः जुइगु क्वःजिउगु खः । नेपाः समूह ‘ए’ या विजेता खः । समूह बीइ माल्दिभ्स व श्रीलंकां छगू छगू कासा बूगु व छगू छगू कासा बराबरीइ म्हितेवं गोलाप्रथापाखें उपविजेता ल्ययेमाःगु खः ।

थ्व समूहय् भारत धाःसा विजेता जुयाः सेमिफाइनलय् दुहां वंगु खः । बंगलादेशया ढाकाय् जुयाच्वंगु धेंधेंबल्लाखय् बुधवाः न्हिनसिया ३ः४५ बजे नेपाःया सेमिफाइनल कासा जुइ । मेगु सेमिफाइनल कासा भारत व पाकिस्तान दथुइ जुइगु जूगु दु ।

सेमिफाइनलय् माल्दिभ्सयात त्याकेफत धाःसा नेपाः न्हापांखुसी साफ च्याम्पियन्स–शीपया फाइनलय् थ्यनीगु जुइ । थ्व धेंधेंबल्लाखय् भारतं न्हय्क्वः त्याकेधुंकूगु दुसा माल्दिभ्सं छक्व त्याकेधुंकूगु दु । नेपाः व पाकिस्तान धाःसा आःतक छक्व नं फाइनल तक थ्यंगु मदुनि ।