बोटलर्स नेपाःया लाभांस घोषणा

येँ – नेपालय् लोकंह्वाःगु पेयपदार्थ कोकाकोलाया उत्पादक बोटलर्स नेपाल व बोटलर्स नेपाल तराइ निगुलिं कम्पनीं नगद लाभांश घोषणा याःगु खः । बोलटर्स नेपालं २० प्रतिशत लाभांश बीगु जूगु दुसा बोटलर्स नेपाल तराई नं ४० प्रतिशत नगद लाभांश बीगु जूगु दु ।थुपिं निगुलिं कम्पनीं साधारण सभा नं सःतूगु दु ।

बोटलर्स नेपालं असोज १५ गते व तराईनं असोज १६ गते साधारण सभा याइगु जूगु दु । साधारण सभां लाभांश पारित जुइवं लाभांश इनीगु जुइ ।साधारण सभाया निंतिं बोटलर्स नेपालया असोज १ निसें १५ गते तक व तराईया असोज २ गते निसें १६ गते तक बुक क्लोज जुइगु जूगु दु । वगु आर्थिक दँय् बोटलर्स नेपालं छगू अर्ब नाफा याःगु खःसा तरार्ई नं ७१ करोड ५४ लाख नाफा याःगु खः ।

अथेहे समता माइक्रो फाइनान्स वित्तीय संस्थां नं २१.०५ प्रतिशत लाभांश बीगु घोषणा याःगु दु । संस्थाया आइतवाः च्वंगु संचालक समितिया बैठकं १० प्रतिशत बोनस शेयर व ११.०५ प्रतिशत नगद लाभांश बीगु क्वःछिउगु खः । आः थ्व लाभांस नेपाल राष्ट्र बैंकं स्वीकृत कयाः साधारण सभा पारित यानाः शेयरधनीतय्त बीगु जुइ ।

संस्थाया चुक्ता पुँजी थौंकन्हय् ३ करोड ७९ लाख थ्यनाच्वंगु दु । वंगु आर्थिक दँय् समतां ७४ लाख नाफा कमे याःगु खःसा थ्वयां न्ह्यः १ करोड ४० लाख नाफा कमे याःगु खः ।