नियम स्वयां अप्वः त्यासा बिउगु संस्थायात कारवाही यायेगु ख्याच्वः
येँ – पुँजी व निक्षेपया ८० प्रतिशत तक जक त्यासा बीदइगु बाध्यकारी नियमयात उल्लंघन यानाः त्यासा पितबिउगु वित्तीय संस्थायात कारवाही यायेगु नेपाल राष्ट्र बैंकं ख्याच्वः बिउगु दु । बैंक व वित्तीय संस्थाया निक्षेप, पुँजी व त्यासा अनुपात (सीसीडी रेसियो) औसतया नं उच्च विन्दूया तसकं सतिक थ्यंमथ्यं ७९ प्रतिशतय् खनेदयेवं राष्ट्र बैंकपाखें थ्व ख्याच्वः वःगु खः ।मेखे वित्तीय संस्थातय्सं धाःसा सीसीडी अनुपात सहज यानाबीत माग यानाच्वंगु दु ।
छुं महिना न्ह्यव लगानीयोग्य रकम, अथे धयागु तरलताया समस्या खनेदयेवं उकिया समाधान यायेत राष्ट्र बैंकं थीथी माध्यमं बजारय् तरलता हयेगु कुतः याःगु खः । अथे खःसां बैंकतय्सं निक्षेपया तुलनाय् अधिकतम त्यासा निकासा यायेगु मत्वःतू । गुकिं यानाः आः त्यासा पित बीत हे थाकुइगु अवस्थाय् थ्यंगु दु ।उकिं आः राष्ट्र बंैक अटेर याःगु वित्तीय संस्थायात कारवाही हे यायेगु मनस्थितिइ थ्यंगु खँ डेपुटि गभर्नर चिन्तामणी शिवाकोटीं कनादीगु दु ।
वय्कलं धयादीगु दु, ‘सीसीडी गुलि दु धकाः स्वयाबलय् ७९.९ थ्यनेधुंकूगु जुयाच्वन । जिमिसं बजारय् तरलता दयेमाः धकाः रिपो जारी यायेगु लिसें थीथी कुतः यानाच्वना । तर नं ध्यबा मगाः धकाः सीसीडी ह्वालुकेगु खःसां उपिं गुबलय् जक सचेत जुइगु ? न्ह्याब्लें उमिसं चाहे जूकथं जुइमखु । आः नं न्ह्यलं मचायेकल धाःसा अज्याःगु बैंकयात कारवाही यायेगु हे जुइ ।’मेखे वित्तीय संस्थातय्सं धाःसा रिपो जारी यायेवं बजारय् तरलता खनेदुसां उकिं निक्षेप अप्वयेकेत ग्वाहालि मयाःगु खँ धयाच्वंगु दु ।
उकिं आः राष्ट्र बैंकं सीसीडी अनुपात मचा ह्वालुका बिउसा जिउगु खँ नेपाल बैंकसं संघया अध्यक्ष ज्ञानेन्द्र ढुंगानां धयादीगु दु ।वय्कलं धयादीगु दु, ‘जिमिसं न्हूगु त्यासा बीमखु । तर सरकारं सरकारी याकनं यानाबीमाल, फाइनान्स विन्डो (पुर्नकर्जा सुविधा) भचा तःधंगु यानाबीमाल । थगुने बिउ थेंज्याःगु सुविधा बिउसा गाः ।’थगुने नं तरलता समस्या वःबलय् राष्ट्र बैंकं वित्तीय क्षेत्रं उत्पादनमुलक क्षेत्रय् बिउगु त्यासायात सीसीडी दुने गणना मयायेगु व्यवस्था याःगु खः ।
मेखे अर्थविद्तय्सं नं वित्तीय संस्थातय्सं आक्रामक ढंगं त्यासा विस्तार याःगुलिं हे तरलता समस्या वःगु खँ धाःगु दु । उमिसं त्यासा अप्वः पिहां वनाच्वंगु लिसें देशय् रेमिट्यान्स दुहां वइगु म्हो जूगुलिं अभाव अप्वःगु व थ्व समस्या याकनं ज्यनीगु खनेमदु धयाच्वंगु दु । छुं दँ न्ह्यवनिसें इलय्ब्यलय् खनेदइगु तरलता अभावं बैंकं त्यासा कयाः छेँ दयेकूपिं, गाडी न्याःपिं सर्वसाधारण नं बांमलाक पीडित जुयाच्वंगु दु । तरलता अभाव जुइवं बैंकया ब्याज नं थहां वनीगु जुयाच्वंगुलिं उमित नं बांमलाक लिच्वः लानाच्वंगु खः ।
LEAVE YOUR COMMENTS