लानिपुखू पुनर्निर्माणय् प्राधिकरणया रुची, पुनर्निर्माण मजूगु कारण खोजी

येँ – भुखाचं क्षति जूगु लानिपुखू आः गय् यानाः निर्माण यायेगु धइगु खँय् पिहां वयाच्वंगु विवाद समाधान यायेगु लागिं म्हिगः सहलह जूगु दु । लनिपुखूया विवाद ज्यंकेगु लागिं धकाः हे उगु सहलह जूगु खः । म्हिगः राष्ट्रिय पुनर्निर्माण प्राधिकरणया ग्वसालय् सिंहदरबारय् उगु सहलह जूगु खः ।

तर सहलह ज्याझ्वलय् येँ महानगरपालिकाया मेयर व उपमेयर धाःसा उपस्थित जुयामदीगु खँ सीदुगु दु । सूत्रतय्सं धाः कथं पुनर्निर्माण प्राधिकरणं लानिपुखू पुनर्निर्माण छाय् मजुल धइगु बारे मनपाया मेयर व उपमेयरयात स्पष्टीकरण काये थें ज्याझ्वः दयेकातःगु जुयाः मनपां अन उपस्थित मजुइगु मनस्थिति दयेकूगु खः ।

२०७२ सालय् ब्वःगु तःभुखाय् लिपा लानिपुखू पुनर्निर्माण यायेगु धकाः उकिया शिलान्यास राष्ट्रपति विद्यादेवी भण्डारीं यानादीगु खः । राष्ट्रपति शिलान्यास याःगु ४० ला मछि दयेधुंकाः नं लानिपुखू निर्माणय् ठोस ज्या न्ह्याये फयाच्वंगु मदु । पुरातत्व विभाग व महानगरपालिका दथुइ लानिपुखू गुगु शैलीं दयेकेगु धइगु विवाद ब्वलनाच्वंगु दु ।

पुरातत्व विभागं आः दुगु गुम्बज शैलीं हे लानिपुखू दयेकेगु धयाच्वंगु दुसा मेखे पुरातत्वविद्तय्सं धाःसा लानिपुखू मल्लकालीन शैलीं दयेकेमाः धकाः सुझाव बिउगु दु । लानिपुखू पुनर्निर्माणयात कयाः पुरातत्व विभाग, राष्ट्रिय पुनर्निर्माण प्राधिकरण, संस्कृति व पर्यटन मन्त्रालय व महानगरपालिकाया दथुइ तःक्वः हे सहलह जूसां नं ठोस निर्णय धाःसा याये फयाच्वंगु मदु ।

म्हिगः ज्याझ्वलय् न्ववायेगु झ्वलय् पुनर्निर्माण प्राधिकरणया प्रमुख कार्यकारी अधिकृत सुशील ज्ञवालीं लानिपुखू इलय् हे पुनर्निर्माणया ज्या न्ह्याके मफुगु सकलें नेपाःमिया निंतिं दुःखद् खँ जूगु बिचाः तयादिल । वय्कलं लानिपुखू पुनर्निर्माणया निंतिं पुरातत्व विभाग, संस्कृति मन्त्रालय, प्राधिकरण व सम्पदा विज्ञ दथुइ थप सहलह यायेमाःगु खँ नं कनादिल ।

 

सम्बन्धित बुखँ

LEAVE YOUR COMMENTS