खान हिरोत स्वयां न्ह्यःने

बलिउडय् खान हिरोतय् न्ह्यःने मेपिं हिरोत फुक्कं लिउने हे लाः धायेगु याः । दँय् निगू स्वंगू हिट फिल्म बिउसां बलिउड मिडियां अक्षय कुमारयात नं खान हिरोत स्वयां लिउने हे तयेगु याः । तर विश्वया धनाढ्यतय् धलः पिकाइगु लोकंह्वाःगु पत्रिका फोब्र्सया कथं स्वयेगु खःसा कमाइया मामिलाय् अक्षय कुमारं स्वम्हं खान हिरोतय्त लिउने लाकाबिउगु दु ।

फोब्र्सं नकतिनि पिकाःगु विश्वया दकलय् अप्वः कमे याइपिं अभिनेतातय् धलखय् बलिउडया निम्ह अभिनेता ‘टप टेन’य् दुथ्याःगु दु । उकी छम्ह अक्षय कुमार दुसा मेम्ह सलमान खान दु । अक्षय नं थ्व धलखय् सलमान खानयात लिउने लाकूगु दुसा मेपिं निम्ह खानत आमिर
खान व शाहरूख खान ला टप टेन दुने तकं दुथ्याःगु मदु ।

फोब्र्सया कथं दकलय् अप्वः कमे याःपिं अभिनेतातय् धलखय् अक्षय कुमार न्हय्गूगु थासय् दुसा सलमान खान गुंगूगु थासय् दु । अक्षयया वंगु दँया कमाइ जक ४०.५ मिलियन अमेरिकी डलर (४५२ करोड तका) दुसा सलमानया कमाई वंगु दँय् ३८.५ मिलियन डलर (४३० करोड तका) दु ।

फोब्र्सया धलखय् दकलय् अप्वः कमे याःम्ह धाःसा हलिउड अभिनेता जर्ज क्लुनी जूगु दु । क्लुनीया थगुनेया कमाई जक २३९ मिलियन अमेरिकी डलर (२६७५ करोड तका) दु । क्लुनी धुंकाः टप टेनया धलखय् छसिकथं ड्वेन जोन्सन, रोबर्ट डोउनी जुनियर, क्रिस हेम्सवर्थ, ज्याकी च्यान, विल स्मिथ, अक्षय कुमार, एडम सेन्डलर, सलमान खान व क्रिस इवान्स दु ।

सम्बन्धित बुखँ

LEAVE YOUR COMMENTS