विवेकशील नेतां जक विकास याइ

बरोबर जिगु लेख मार्फत धायेगु यानाच्वनागु दु, देश विकास जुइगु अथवा मजुइगु नेतातय्गु कारणं यानाः खः। छाय्धाःसा छुं नं देश गरिब जुइ मखु, देशयात माःगु माक्व प्राकृतिक श्रोतया सम्पत्ति थःगु हे देशय् हे दयाच्वनी । यदि थःगु देशया प्राकृतिक श्रोतया सम्पत्तियात सही ढंगं उपभोग याये फत धाःसा देश विकास जुइ ।

झीसं न्यनाच्वना, इजरायलयाके प्राकृतिक श्रोतया सम्पत्ति मेमेगु देशय् स्वयां अति कम जक दु । तर इजरायल धनी जक मखु, शक्तिशाली नं जुयाच्वंगुलिं वया जःलाखःला व मेमेगु मुस्मां देश नाप टक्कर कयाच्वंगु दु । चिकिचाधंगु इजरायल देशं विशाल मुस्मां देशतय्त ख्यानाच्वंगु दु ।

इजरायल धनीया नापनापं शक्तिशाली जुइफुगु कारण खः, इजरायलया नेतात देशभक्तया नापं विवेकी जूगु कारण । झीगु देश इजरायल स्वयां तकू, वया नापनापं प्राकृतिक श्रोतया सम्पत्तिं नं धनी खः । अथे खःसां झीगु देश धाःसा गरिब जुजुं वनाच्वंगु दु । कारण नेतात असक्षम, विवेकी व स्वार्थी जक मखु, विदेशी दलाल जुयाच्वंगुलिं यानाः खः।

मेखे हानं नेतातय्सं भ्रष्टाचार व कमिशन नयाः देशयात बर्बाद जक मखु देशया अस्तित्व तक नं समाप्त यायेत स्वयाच्वंगु दु । यदि नेतात भिंपिं जुल धाःसा देश धनी जुइ, नेतात मभिंपिं जुल धाःसा देश बर्बाद जुइगु खः । नेपाःया नेतातय्सं देश बर्बाद यानाच्वंगुलिं देशया युवा शक्ति विदेशय् पलायन जुजुं वनाच्वंगु दु ।

मभिंपिं नेतात सत्ताय् थ्यनाच्वन कि देश बर्बाद जुइसा भिंपिं नेतात सत्ताय् वनेफत धाःसा देशयात याउँक विकास यानाः क्यनेफु धकाः विश्वया राजनीतिक घटनाक्रमं नं प्रष्ट यानाच्वंगु दु ।

विदेशय् कठीन परिश्रम यानाः थःगु देशया आर्थिक स्थिति क्वातुकेत तिबः बियाच्वंपिं नेपाःमितय्त चयन मदु छाय्धाःसा न्ह्याक्व हे परिश्रम याःसां विदेशय् उमित घृणा व अपमान यानां तुं च्वनी । थ्वहे कारणं यानाः नेपाःया नेतात धाल कि स्वदेशी जक मखु, विदेशीतय्सं तक नं ख्वाः पाउँक तयेगु याइ ।

मभिंपिं नेतात सत्ताय् थ्यनाच्वन कि देश बर्बाद जुइसा भिंपिं नेतात सत्ताय् वनेफत धाःसा देशयात याउँक विकास यानाः क्यनेफु धकाः विश्वया राजनीतिक घटनाक्रमं नं प्रष्ट यानाच्वंगु दु । दसुया लागि मलेसियायात चमत्कारी ढंगं विकास यानाः क्यनेत सफल जूम्ह नेता डा. महाथीर ।

जब डा. महाथीर सत्ताय् वनाः देशया नेतृत्व काल, न्हापांगु ज्या धकाः जातिय सौहार्दता व मेलमिलाप हयाः फुक्कं जातियात देश सेवा यायेगु अवसर बिल । मलेशियाय् मलाया जाति ६५ प्रतिशत दु, चिनियाँ ३० प्रतिशत दुसा भारतीय मूलया १०प्रतिशत दु । बाँकी मेमेगु आदिवासी जातित दु ।

धर्मया हिसाबं ५५ प्रतिशत मुस्लिम माने याइपिं दुसा २० प्रतिशत बौद्धमार्गी दु । १० प्रतिशत जाति क्रिश्चियन धर्मय् विश्वास याइपिं दु । डा. महाथीर सत्ता वये न्ह्यः धर्म व जातीय नामं द्वन्द्व जुयाः आपालं धनजनया नास जुइधुंकूगु देश खः । विशेष यानाः मलाया जाति व चिनियाँ जातिया दथुइ सन् १९६५ पाखे जातीय द्वन्द्व जुयाः चिनियाँतय्गु व्यापार केन्द्र, भवन व उद्योग क्षेत्रय् आक्रमण यानाः चिनियाँ नागरिकतय्त हत्या यायेगु तक शुरु जुल ।

यदि व इलय् चीन सरकारं मलेसियायात दबाब मबिउगु जूसां जातीय दंगा यक्व जुयाः देश बर्बाद जुइगु खः । देशया अर्थतन्त्र डाँवाडोल जुयाच्वंगु अवस्थाय् डा. महाथिर सत्ताय् वःम्ह नेता खः । महाथीर सत्ताय् वयेसातकि न्हूगु भिजन कथं हे न्हापां राजनीतिक समझदारीया लागि जातीय सद्भाव व मेलमिलाप बृद्धि यायेगु लागि फुक्क जातिया सक्षम बौद्धिक व्यक्तितय्त उच्च पदय् हयाः देश सेवा यायेगु मौका बिल ।

महाथीर छखे जातीय सद्भाव हयेगु ज्या यातसा मेगु देश सेवा यायेगु अवसर बियाः देशया नं विकास याकल । थ्वया अर्थ जातीय द्वन्द्व खत्तम यायेगु लागि भागबन्डा याःगु मखु, देश सेवा यायेगु मौका बिउगु खः । मेगु महत्वपूर्ण ज्या पुलिस प्रशासनयात चुस्त यानाः भ्रष्टाचार, गुण्डा व हाकुबन्जाःयात कानूनया दायराय् हल।

जब भ्रष्टाचार व कमिशनया चक्कर खत्तम जुइ, देश स्वाभाविक रुपं विकास जुइ । डा. महाथिर देशभक्त जक मखु, न्हूगु भिजन ज्वनाः देश विकास याःम्ह राजनेता खः । महाथीरया राजनीतिक थथ्याःक्वथ्याः नं उलि हे रोचक जू । सन् १९६४ य् राजनीतिइ प्रवेश जुयाः संसदया चुनाव त्याकेत सफल जुल ।

छुं दँ लिपा प्रधानमन्त्री टुकु अब्दुल रहमान नापं विचारय् मतभेद जुल, अले वय्कःयात पार्टीं निष्काशन याना हल । डा. महाथीरं सन् १९७० य् राजनीतिक सफू च्वयाः अति हे चर्चाय् वल । व सफुली राजनीति व आर्थिक समस्या समधानया लँपु क्यनेगु ज्या अथवा न्हूगु बिचार उल्लेख यानाः देशय् अति चर्चा जूगु खः ।

महाथीरया सफूया ज्ञान व बिचार ज्वनाः टुकु अब्दुल रजाकं मलाया व गैर मलायाया दथुइ आर्थिक असमानता कम यायेगु नीति ज्वनाः ज्या यात । सन् १९७२ सालपाखे डा. महाथीरयात प्रधानमन्त्री अब्दुल रजाकं हाकनं पार्टीइ लसकुस यात । सन् १९७४ पाखे महाथीर पार्टीयात शक्तिशाली यायेगु लागि सक्रिय जुल ।

दछि लिपा डा. महाथीर पार्टीया उपाध्यक्ष जुल । सन् १९७८ सालपाखे हानं प्रधानमन्त्रीं डा. महाथिरयात उपप्रधानमन्त्रीया जिम्मा बियाः उद्योग व व्यापार मन्त्री नियुक्त यात । सन् १९८१ सालय् प्रधानमन्त्री टुकु अब्दुलं स्वास्थ्यया कारणं प्रधानमन्त्री पदं राजीनामा बिल । डा. महाथीर प्रधानमन्त्री जुल ।

जब महाथीर प्रधानमन्त्री जुल, देश विकासया लागि न्हूगु भिजन ज्वनाः अति परिश्रम यानाः देशयात उच्च विकास यानाः थःगु देशय् जक मखु, विदेशय् नं अति प्रख्यात जुयादिल । पूर्व प्रधानमन्त्री नजिब रजाकं देशया अर्थतन्त्रयात डाँवाडोल याःगु कारणं यानाः जनतां अति क्रोधित जुयाः रजाकया विरुद्धय् सडकय् कुहां वल ।

डा. महाथीर नं जनताया आन्दोलनय् भाग कयाः आन्दोलनया नेतृत्व यात । रजाक बाध्य जुयाः आम चुनाव घोषणा यात । आम चुनावय् महाथीरया न्हूगु पार्टीं भाग कयाः त्याकेत सफल जुल । हानं छकः डा. महाथीर प्रधानमन्त्री जुल । थुकिया लिसें महाथीरं ९२ दँया वैंशय् प्रधानमन्त्री जुयाः रिकर्ड नं कायम यात ।

ज्याथ जूसां नं महाथीर अझ नं देशया आर्थिक अवस्था मजबूत यायेगुली कडा परिश्रम यानाच्वंगु दु । थ्वहे कारणं यानाः पूर्व प्रम रजाक चीन नाप २२ खर्ब ५० अर्बया ऋण कयाः चीन मलेसिया स्वायेगु ग्याँस पाइप लाइन जोडे यायेगु, हानं सिंगापुरं मलेसिया जोडे यायेगु परियोजना रद्दया लागि महाथीरं चीनय् वनाः घोषणा यात ।

डा. महाथीरं चीनया समकक्षीयात धाल, आःया अवस्थाय् तःधंगु ऋण देशयात आवश्यक मदु । महाथीरया धापू खः देशयात अति कम फाइदा, विदेशीयात यक्व फाइदा जुइगु परियोजना आवश्यक मदु ।

 

सम्बन्धित बुखँ

LEAVE YOUR COMMENTS