ने. सं. ११४४ चौलाथ्व द्वादशी -

ग्यास्ट्रिकया घरेलु उपचार

अथे ला ग्यासया समस्या धयागु सामान्य खँ खः । तर थ्व चर्को जुलकि प्वाः स्याइगु व मेमेगु नं समस्यायात जन्म बीफु । प्वाथय् ग्यास दयावइगुया मख्य कारण अनियमित कथं नये त्वनेगु यायेगु हे खः । ग्यास झीगु पाचन तन्त्रय् निगू तरिकां मुनेफु । नयेगु वा त्वनेगु झ्वल् झीसं उगु फय् नुनाछ्वयेगु याइ, गुगु अक्सिजन व नाइट्रोजन म्हय् दुने दुहां वनीगु कारण जुइ । थुकिं यानाः प्वाः झ्यातुइगु, म्वय्म्वय् द्याइगु व स्याइगु जक मखु, नुगःया धुकधुकि नं बढे जुइ ।

जी-

प्वाः स्याइगु व ग्यास्ट्रिक लंकेत जीलः तसकं गुणकारी जुइ । थ्व छगू बांलाःगु प्राकृतिक उपाय खः । थुकिया निंतिं छगू चम्चा जी कयादिसँ, अले निगू कप लखय् तयाः १०–१५ मिनेट दायेकादिसँ । अनंलि ख्वाउँकाः त्वनादिसँ । प्वाः याउँया वइ ।

इमू

प्वाः स्याःगु व ग्यास्ट्रिक लंकेगु घरेलु उपचारय् इमू दकलय् न्ह्यःने लाःवइ । इमुलिइ थाइमोल नांगु छताजि यौगिक दु, गुकिं पाचनय् ग्वाहालि याइ । न्हिनय् लःलिसे बागू चम्चा इमू भपियादिसँ । छितः यक्व हे फाइदा जुइ ।

पालु

पालु ग्यास व मेमेगु पाचन सम्बन्धि ल्वचय् छ्यलेगु याना वयाच्वंगु दु । प्वाः स्याःगु लंकेगु व ग्यास मदयेकेगु निंतिं थ्व तसकं बांलाःगु आयुर्वेदिक उपचार खः । थुकिया निंतिं छिं पालुइ कागतिया रस तयाः भपियादिसँ । पालुति तयाः च्या त्वनेगुलिं नं ग्यासया फाइदा याः ।

हिं

हिंलय् एन्टिब्याक्टेरियल व एन्टिसेप्टिक तत्व दु, गुगु प्वाःया थीथी समस्या व आतापुतिलिसे सम्बन्धित ल्वचय् लाभकारी जुय । प्वाः स्याःगु व ग्यास मदयेकेगु निंतिं घरेलु उपचारया छगू उपाय हिं खः । आयुर्वेद कथं हिं शरीरया वात दोषयात सन्तुलित यायेत ग्वाहालि याइ । हिं प्वाःया ब्याक्टेरिया विकास पनेत ज्या वः, गुकिं छिगु प्वाथय् ग्यास अप्वयेकेगु ज्या यानाच्वनी । थुकिया निंतिं छिं छगू गिलास लुमुलुमु धाःगु लखय् बागू चम्चा हिं तयाः त्वनादिसँ ।

बेकिङ पाउडर व कागति

प्वाः स्याःगु लंकेगु व ग्यास मदयेकेगु निंतिं थ्व नं छगू प्रभावशाली उपाय खः । थुकिया निंतिं छिं छगू कप लखय् छगू चम्चा कागतिया रस व बागू चम्चा बेकिंग सोडा ल्वाकछ्यानादिसँ । जा नयेधुंकाः थ्व त्वनादिसँ, छाय्कि थुकिं कार्बनडाइअक्साइड दयेकेत ग्वाहालि याइ । गुकिं पाचन प्रक्रियायात सुविधाजनक दयेकाबी ।

त्रिफला

हर्बल पाउडर त्रिफला प्वाःया ग्यासलिसे सामना यायेत नं तसकं सफल जू । थुकिया निंतिं ५–१० मिनेटया निंतिं ग्वाराग्वारा दाःगु लखय् थुकिया बागू चम्चा तयादिसँ । अले बहनी द्यने न्ह्यः थ्व त्वनादिसँ । थुकिया अप्वः मात्रा धाःसा काये मजिउ, मना वयेयः ।