रेलमार्गया पूर्वसम्भाव्यता अध्ययनय् सहलह जुइगु

येँ – चीनं नेपालय् रेल हयेगु सम्बन्धी वइगु वालय् नेपाः व चीनया सरकारी अधिकारीतय्त दथुइ सहलह जुइगु जूगु दु । थ्व सहलहय् केरुङ जुयाः येँ तक रेल थ्यंकेगु निंतिं जूगु पूर्वसम्भाव्यता अध्ययन प्रतिवेदनयात अन्तिम रुप बीगु खँ धाःगु दु ।

चिनियाँ कम्पनीं तयार याःगु प्रतिवेदनय् तसकं कठीन भूगोल दुसांं रेलमार्ग दयेकेगु सम्भव दु, तर उच्चस्तरया प्रविधि छ्यलेमाःगु खँ न्ह्यथनातःगु खँ धाःगु दु । आः थ्व प्रतिवेदनयात अन्तिम रुप बी धुनेवं निर्माण ज्याया निंतिं आवश्यक जुइगु विस्तृत परियोजना प्रतिवेदन दयेकेगु ज्या न्ह्याइगु खँ सरकारी अधिकारीतय्सं धाःगु दु ।

नेपाः व चीन दथुइ रेलमार्ग स्वायेगु बारे निगुलिं देय्या सरका दथुइ सहमति जुइधुंकाः चिनिया कम्पनीं पूर्व सम्भाव्यता अध्ययन याःगु खः । चिनियाँ कम्पनीं जेठया न्हापांगु वालय् नेपाः वयाः रेलमार्ग निर्माण यायेगु थाय्या अध्ययन याःगु खः ।

कम्पनीं सम्भावना अध्ययन प्रतिवेदन तयार जूगु जानकारी छ्वया हये धुंकूगु दु । प्रतिवेदन तयार जूगु जानकारी वःगुलिं नेपाली रेल अधिकारीत चीन वनाः थुकियात अन्तिम रुप बीगु खँ भौतिक पूर्वाधार तथा यातायात मन्त्रालयया सचिव मधुसुदन अधिकारीं बिबिसीयात कनादीगु दु ।

वय्कलं धयादीगु दु, ‘उमिसं तयार याःगु प्रतिवेदन स्वयेगु जुइ, अले नेपाः सरकारपाखें जूगु अध्ययनया जानकारी नं अन न्ह्यब्वयेगु जुइ । थ्व धुंकाः प्राविधिक पुचःलिसे सहलह यानाः अन्तिम रुप बीगु जुइ ।’थ्व बैठकय् ब्वति कायेगु निंतिं सचिव अधिकारीया हे नेतृत्वय् छपुचः वइगु शनिवाः चीन वनेत्यंगु दु ।

सम्बन्धित बुखँ

LEAVE YOUR COMMENTS