भुखाय् पीडित जनतायात राष्ट्र बैंकया राहत

येँ (नेपालभाषा टाइम्स)÷बैंकं काःगु त्यासा पुले मफुपिं भुखाचं पीडित जनताया छेँ तत्काल लिलामी प्रक्रियाय् मछ्वयेत नेपाल राष्ट्र बैंकं वाणिज्य बैंकतय्त निर्देशन बिउगु दु ।

राष्ट्र बैंकं मेगु व्यवस्था मजूतले भुखाय् पीडित जनताया सम्पत्ति लिलाम प्रक्रिया मन्ह्याकेत बैंक व वित्तीय संस्थायात निर्देशन बिउगु खः । भुखाचं पीडित जनता व अर्थमन्त्री डा. युवराज खतिवडा दथुइ जूगु

अनौपचारिक बैठकय् अर्थमन्त्री खतिवडां भुखाचं पीडित जनताया समस्या प्रति थः गम्भीर जूगु धासें समस्या समाधान यायेगु बचं बियादीगु खः । वयां लिपा छुं न्हिं न्ह्यः जक वय्कलं राष्ट्र बैंकया गभर्नर चिरञ्जीवी नेपालयात सःताः भुखाचं पीडित जनताया त्यासाया बारे सहलह यानादीगु खः । उकिया हे लिच्वः कथं राष्ट्र बैंकपाखें थ्व निर्देशन जारी याःगु खँ सूत्रं धाःगु दु ।

भुखाय् पीडित जनतायात थीथी वाणिज्य बैंकपाखें आः तक १ अर्ब ७७ करोड त्यासा बिया तयेधुंकूगु दु । राष्ट्र बैंकं भुखाय् पीडित जनतायात न्यादँ निसें झिदँया निंतिं धकाः २ प्रतिशत ब्याज दरं थ्व त्यासा बिउगु खः । तर थ्वया दथुइ हे थुगु आर्थिक दँय्

राष्ट्र पुनर्कर्जा ऐन संशोधन यानाः निदँया निंतिं जक पुनर्कर्जा बीगु धइगु न्हूगु नीति हःगुलिं भुखाय् पीडित जनता समस्याय् लाःगु खः । यदि थ्व न्हूगु नियम कार्यान्वयन जुया वन धाःसा ब्याज पुले मफयाः यानाः पीडित जनताया छेँबुँ हे लिलामय् वने फइगु बारे पीडिततय्सं राष्ट्र बैंकया गभर्नर नेपाल जानकारी बिसें ज्ञापनपौ लःल्हाःगु खः ।

निदँया म्याद फुइधुंकूपिं भुखाय् पीडित जनतां स्वलाय् छकः पुलेमाःगु किस्ता मपुलेवं बैंकतय्सं उमित छेँबुँ लिलाम यायेगु प्रक्रिया न्ह्याकूगु खःसा आः राष्ट्र बैंकया निर्देशन लिपा उगु प्रक्रिया स्थगन यायेत बैंकत बाध्य जूगु दु । मेखे राष्ट्र बैंकया निर्देशन लिपा बैंकं कायेमाःगु किस्ता आः गुकथं उठे यायेगु धइगु बारे धाःसा वाणिज्य बैंकत अलमल जूगु दु ।

सम्बन्धित बुखँ

LEAVE YOUR COMMENTS