यल मनपाया पर्यटक आकर्षित यायेगु योजना

यल – यल महानगरपालिकां पर्यटकतय्त आकर्षित याये फइगु योजना न्ह्यःने हःगु दु । मनपां पर्यटकतय् निंतिं धकाः खने दयेक छेँ, भवन लगायतया भौतिक संरचना पिनें हे खने दइगुकथंया योजना हयेगु तयारी याःगु खः । यल मनपाया थीथी थासय् च्वंगु ततजाःगु पःखा दक्वं चिइकाः पःखालं दुने च्वंगु संरचना अःपुक स्वये फइगुकथंया योजना हःगु खः ।

यल देय् सांस्कृतिक नापं धार्मिक व प्राकृतिक रुपं नं महत्वपूर्ण जूगुलिं गुलिखे सम्पदा व अज्याःगु धरोहर ततःजाःगु पःखाःया कारणं सीमित घेरा दुने लानाच्वंगु जक मखसे पर्यटकतय्त नं आकर्षित याये फइगु जूगुलिं पिनें हे स्वये जी कथंया योजना हयेत्यंगु खः ।

‘गुगु संरचनात क्यनाः पर्यटक आकर्षित याये फइगु खः, उकियात थःपिंसं थौंतक नं पःखालं ग्वयाः सुचुका तयेगु ज्या यानाच्वना’, यल मनपाया मेयर चिरिबाबु महर्जनं धयादिल, ‘आः तजाःगु पःखाः चिजाः यानाः पर्यटक आकर्षित यायेगु जुइ ।’यल मनपां थुगु योजनाया शुरुवात दकलय् न्हापां लगंख्यलय् च्वंगु बुद्धिविकास खेल मैदान व जाउलाख्यलय् च्वंगु ख्यःपाखें खने दइकथं यायेत्यंगु दु ।

थःपिं विदेश भ्रमणय् वनेबलय् सार्वजनिक थासं हे महत्वपूर्ण स्थलया अवलोकन याये फइगु जक मखसे किपा तकं कायेगु सुविधा दुगु वय्कःया धापू दु । ‘अमेरिकाया राष्ट्रपति भवन ह्वाइट हाउस न्ह्यःने हे च्वनाः न्ह्याम्हसिनं नं याउँक किपा काये दु, उकिं आः यलया ऐतिहासिक, सांस्कृतिक, धार्मिक व पुरातात्विक थाय्त नं पिनें हे स्वये फइगु व किपा नं काये फइगु कथं चिजाःगु पःखाः ग्वयेगु व्यवस्था यायेगु जुइ’, वय्कलं धयादिल ।

सम्बन्धित बुखँ

LEAVE YOUR COMMENTS