करय् कडाइ यायेवं त्यासा काइपिं म्हो
येँ – कर प्रशासनं त्यासा काइपिंत कडाइ यायेवं बैंक व वित्तिय संस्थाय् त्यासा काइपिं म्हो जूगु दु । सरकारं चालु आर्थिक दँया बजेटपाखें व्यवसायीं बैंक व कर कार्यालय पेश याःगु वित्तिय विवरण छगू हे जुइमाःगु व्यवस्था याःगु खः । अथेहे मौद्रिक नीतिइ नेपाल राष्ट्र बैंकं कर चुक्ता याःगु विवरण बुझे यायेधुंकाः जक त्यासा बीगु व्यवस्था कार्यान्वयनय् हयेवं व्यवसायीं असारं स्वीकृत जुइधुंकूगु त्यासा तकं मयंकूगु खँ बैंकतय्सं धाःगु दु ।
छगू बैंकया म्यानेजरया कथं थौंकन्हय् राष्ट्र बैंकं व्यक्तिगत त्यासाय् नं ५० लाख तका स्वयां अप्वः बीमदइगु जूगुलिं यानाः नं थीथी बैंकय् तरलता अप्वया वनाच्वंगु खँं कनादीगु दु । वय्कलं धयादी, ‘आः बैंकय् ध्यबा दु न्हापा थें त्यासा बीत खास हे समस्या मदु ।’कर कार्यालय व बैंकय् बुझे यायेमाःगु विवरण छगू हे जुइमाःगु जुइवं आपालं व्यावसायीं तत्काल त्यासा कायेत इच्छुक मजुयाच्वंगु खँ धाःगु दु ।
न्हापा व्यवसायीतय्सं बैंकयात बुझे याइगु विवरण व कर कार्यालयय् बुझे याइगु विवरणय् आपालं पानाच्वनिगुलिं यानाः राष्ट्र बैंकं बजेट मार्फत हे थज्याःगु व्यवस्था याःगु खँ राष्ट्र बैंक स्रोतं धाःगु दु । बैंकरतय् कथं राष्ट्र बैंकं छ्वयाहःगु छगू परिपत्रया कारणं त्यासाया बारे व्यवसायी जक मखु बैंक तकं अलमल जुयाच्वंगुलिं नं त्यासा काइपिनिगु ल्याः म्हो जूगु अनुमान याःगु दु ।
राष्ट्र बैंकया परिपत्रय् व्यक्तिगत त्यासाया लिसें अन्य त्यासाया अन्तिम न्हिं पुस मसान्त जुइधकाः न्ह्यथनातःगु दु । थुकिं यानाः ताः ई तक व्यवसायिक त्यासा काइपिंत नं अलमल जूगु खँ उम्ह बैंकया म्यानेजर कनादीगु दु । वय्कःया कथं व्यवसाय यायेगु निंतिं काःगु त्यासा दछिया दुने पुलेमाल धाःसा पुले फइगु अवस्था मदु ।
सुं नं व्यवसायी दछिया दुने करोडौं तकाया त्यासा गथे यानाः पुली ? वय्कलं न्ह्यसः तयादी । थ्व बारे स्पष्ट जुइमफया आः नेपाल बैकर्स एसोसिएसनं नेपाल राष्ट्र बैंकयात पौ हे छ्वयाः स्पष्ट यायेत माग यायेधुंकूगु जानकारी नं उम्ह म्यानेजरं बियादीगु दु । न्हापा ग्राहक पहिचान (केवाइसी) भरे यायेमाःगु व्यवस्था अनिवार्य यायेवं निक्षेप परिचालन म्हो जूगु थें आः वित्तिय कर्जाय् छगू हे विवरण बुझे यायेमायेवं त्यासा काइपिनिगु ल्याः नं म्हो जुइगु अवस्था ब्वलंगु खँ बैंकतय्सं धायेगु यानाच्वंगु दु ।
राष्ट्र बैंकया थुगु व्यवस्था लिपा ततःधंगु कर्पोरेट हाउस नं आः पारदर्शी जुयाः ज्या यायेमाःगु अवस्था ब्वलनीगु खँ धाःगु दु । उम्ह म्यानेजरया कथं सरकारया थुगु नीति सकारात्मक जूगु धासें उकियात सरकारं गुलि तक कार्यान्वयन याइगु खः धइगु धाःसा स्वये ल्यं दनीगु बिचाः प्वंकादिल ।
सरकारया थुगु निर्णय लिपा दकलय् अप्वः प्रभावित टे«डिङ व्यवसाय जुइगु खँ धाःगु दु । टे«डिङ व्यवसायी थीथी देशं सामान आयात यायेगु यानाच्वंगु दु । तर उमिसं विदेशं सामान आयात यायेगु झ्वलय् वास्तविक विल विजक स्वयां म्हो जक विल विजक न्ह्यब्वइगुलिं यानाः आः धाःसा थज्याःगु कथं म्हो विल विजक जारी यायेत समस्या जुइफुगु खँ सम्बन्धित सूत्रं धाःगु दु ।
व्यवसायी त्यासा मकायेवं आः बैकिङ प्रणालीइ अधिक तरलता जुयाच्वंगु दु । बैंकिङ प्रणालीइ अधिक तरलता जुइवं राष्ट्र बैंकं मौद्रिक उपकरणपाखें बजारं ३.२ प्रतिशत ब्याजदरं ५७ अर्ब तका साला काःगु दु । असारय् विकास निर्माण खर्च अप्वःगु हुनिं यानाः नं बैंकिङ प्रणालीइ तरलता अप्वःगु खँ धाःगु दु ।
LEAVE YOUR COMMENTS