All for Joomla All for Webmasters

ने.सं. ११३६ यंलागा अष्टमी

पृथ्वीनारायण शाहया विरोध छाय् ?

दँय्दसं पुस २७ गते थें थौंया पुस २७ गते नं पृथ्वीनारायण शाह व वं याना थकूगु ज्यायात कयाः तर्क वितर्क शुरु जूगु दु । थुगुसीया पुस २७ गते अझ चर्चाय् वःगुया मेता कारण धइगु देशय् गणतन्त्र स्थापना जुइधुंकाः सार्वजनिक बिदा बीगु बन्द जुइधुंकूगु पुस २७ गतेया न्हि थुगुसीनिसें हानं बिदा बीगु जक मखु सरकारी निकायतय्सं थ्व न्हियात अझ तःजिक न्यायेकेगु ज्या समेत याना हःगु दु । साहित्य थेंज्याःगु विशुद्ध लेखनया ज्या जक याइगु नेपाल (न्हापा राजकीय) प्रज्ञा प्रतिष्ठान थेंज्याःगु निकायं तकं थःलिसे छुं स्वापू मदुम्ह व्यक्ति पृथ्वीनारायण शाहया बुन्हि न्यायेकेगु कार्यक्रम पित हःगु दु ।

वास्तवय् पृथ्वीनारायण शाहया बुन्हियात छाय् थुगुसी थपाय्सकं तःजिक न्यायेकेगु ज्या याना हल ? वास्तवय् धाथें विरोध यायेमाःगु पक्ष धइगु थ्व खः । पृथ्वीनारायण शाहया बुन्हि तःजिक न्यायेकेमाःगु व वय्कःयात राष्ट्रिय एकताया प्रतिक माने यायेमाः धइगु बिचाः थौंकन्हय् अज्याःपिं मनूतय्सं समेत प्वंका हयाच्वंगु दु गुमिसं थ्व स्वयां न्ह्यः गबलें नं पृथ्वीनारायण शाहयात माने याःगु मदु । नेपालय् जब फुक्क उत्पीडित जाति व भाषिक समुदायया मनूतय्सं आः थःपिनि पहिचानया आधारय् संघीय व्यवस्था लागू यायेमाः धइगु सः पिकायेवं वयां लिपा पृथ्वीनारायण शाहं ‘बडो दुःख सियाः एकीकरण यानातःगु’ थ्व देय्यात कुचा कुचा याये दइ मखु धइगु सः थ्वयेका हःगु खः ।

उगु सलय् थःत राष्ट्रवादी धकाः दावी याइपिं राजनीतिक दलया नेता कार्यकर्तातय्सं ब्वति कायेगु शुरु याना हःगु खः । थ्व ल्याखं स्वयेबलय् छु स्पष्ट दु धायेबलय् थुगुसी पृथ्वीनारायण शाहया पक्षय् गुगु सः थ्वयेकेगु याना हःगु खः, व वास्तवय् पृथ्वीनारायणया गुणगान यायेत थ्वःगु सः मखु । व मूलतः आदिवासी जनजाति व मधेसी समुदायं थःगु पहिचान सहितया संघीयता माः धकाः सः थ्वयेका हयेवं उकियात काउन्टर बीत जक थ्वयेका हःगु सः खः । आदिवासी जनजाति, मधेसी समुदायं यानाच्वंगु माग पूरा यात धाःसा देश कुचा जुइ, विखण्डन वइ, संघीयता धइगु देशयात केक ताये थें ताना छ्वयेगु ज्या खः धकाः दावी याइपिं मनूतय्सं थ्व पहिचानया खँयात त्वपुना छ्वयेगु लागिं पृथ्वीनारायण शाहया प्रशंगयात न्ह्यःने तयेगु ज्या याःगु खः ।

थ्व ल्याखं स्वयेबलय् छु धाये फइ धायेबलय् आदिवासी जनजाति व मधेसी समुदायं ल्ह्वनाच्वंगु मागयात मजिउ धकाः विरोध याइपिं मनूतय्गु छगू प्रतिकात्मक व्यक्तित्वया रुपय् पृथ्वीनारायण शाह न्ह्यःने दं वःगु दु । उमिसं जनजाति व मधेसी समुदायया मागया विरोध यायेगु लागिं पृथ्वीनारायण शाहया खँयात न्ह्यःने हःगु स्पष्ट दु । वास्तवय् अथे जुयाः हे आदिवासी जनजाति व मधेसी समुदायं पृथ्वीनारायण शाहया बुन्हि हनेगु ज्यायात विरोध यायेमाःगु खः । सुं मनुखं सुं नेता वा राजा महाराजाया जयजयकार याना जुल व जग्गे यानाः वयागु बुन्हि न्यायेकल धकाः मेपिं सुनां कपाः स्याके माःगु आवश्यकता मदु ।

तर गन तक पृथ्वीनारायण शाहया जयजयकार यायेगु ज्या दु, व जयजयकार धइगु हे आदिवासी जनजाति व मधेसी समुदाययात याःगु दुत्कार खः । उकिं पृथ्वीनारायण शाहया थ्व बुन्हियात जनजाति व मधेसी समुदायं विरोध याये माःगु खः । थ्व इलय् पृथ्वीनारायण शाहया गुणगान यायेगु धइगु हे आदिवासी जनजाति व मधेसी समुदायं ल्ह्वनाच्वंगु माग गलत खः धकाः उमित ब्वः बीगु खः । जनजाति व मधेसी समुदायं ल्ह्वनाच्वंगु माग पूरा यायेगु खःसा पृथ्वीनारायण शाहं निर्माण यानातःगु थ्व देशया अस्तित्व दइ मखु, थ्व देश कुचा जुया वनी धकाः धायेगु लागिं हे उमिसं हे थौंया न्हि पृथ्वीनारायणया भूत थनेगु कुतः यानाच्वंगु खः ।

पृथ्वीनारायण शाहया ज्यायात आधार दयेकाः नेपाःया राष्ट्रियता बारे गुगु संकथन निर्माण यानातःगु खः, उकियात आदिवासी जनजाति व मधेसी समुदायं ला सदियौंनिसें हे अस्वीकार याना वयाच्वंगु खः । उकियात राजनीतिक रुपं समेत हाथ्या बियाः न्ह्याः वयेगु ज्या दकले न्हापां माओवादीं सुरु याःगु जनयुद्धय् खने दुगु खः । अबले माओवादी नेतातय्सं पृथ्वीनारायण शाहया राज्य एकीकरणया ज्यायात ‘खुनी हमला’, ‘जनजातिया राज्य लाका कायेगु ज्या’ धकाः व्याख्या यानाः भाषण बिया जूगु खःसा पृथ्वीनारायण शाहया कारणं यानाः हे देय्या आदिवासी जनजाति व मधेसी समुदाय लिउने लाःगु धकाः धायेगु याना हःगु खः ।

तर थौं विडम्बना छु जुल ले धायेबलय् पृथ्वीनारायण शाहया बुन्हि कुन्हु सार्वजनिक बिदा बीगु निर्णय माओवादी समेत दुथ्याःगु शेरबहादुर देउवाया सरकारं याना बिल । अले पृथ्वीनारायण शाहया योगदानयात माने यायेमाः धइगु सन्देश तत्कालिन माओवादीया बुद्धिजीवी नेता डा. बाबुराम भट्टराईनं फेसबुकय् पोष्ट यानाः थःगु विद्वता प्रकट यानाच्वंगु दु । माओवादी व पूर्व माओवादी नेतातय् थ्व रंग परिवर्तन जनजाति व मधेसी समुदाय प्रति याःगु छगू तःधंगु व्यंग्य हे खः । थौं गणतन्त्रवादी व छगू वंशया जक शासन लादे यायेगु ज्याया कट्टर विरोध यानाच्वंपिं मनूतय्सं समेत पृथ्वीनारायण शाहया जयजयकार याना जूगुया छता हे जक कारण जनजाति व मधेसी समुदायं ल्ह्वनाच्वंगु माग प्रति थःगु असहमति क्यनेत खः ।

म्हिगः आन्दोलनया इलय्, संघर्षया इलय् पृथ्वीनारायण शाहयात देशय् शाहवंश लादे यानाः निरंकुश शासन कायम याःम्ह धकाः विरोध याना जूपिं नेतात तकं थौं आदिवासी जनजाति व मधेसी समुदायया माग प्रति असहमत जुइवं पृथ्वीनारायणया कित्ताय् दं वनाच्वंगु दु । उमिगु आसय पृथ्वीनारायणया जयजयकार स्वयां नं उत्पीडित समुदाययात अधिकार बीम्वाः धइगु अभिव्यक्ति खःसा उत्पीडित समुदायं यानाच्वंगु प्रतिकार नं पृथ्वीनारायण नांयाम्ह सुं व्यक्तिया विरोध मखुसें थःपिंत अधिकार बी मजिउ धइगु बिचाः प्रति तयाच्वंगु छगू विरोधया सः जक खः । पृथ्वीनारायण शाह थौं जनजाति मधेसी विरोधी बिचाःया प्रतिनिधि जुयाच्वंगु खँ ल्वःममंके ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.