All for Joomla All for Webmasters

ने.सं. ११३६ यंलागा अष्टमी

राज्यधुकूया दोहण गवले तक्क ?

मुलुकय् न्हूगु संविधानकथं निर्वाचनत क्वचायाः न्हूपिं जनप्रतिनिधित वल धाःसा देय्या राजनीतिइ आमूल परिवर्तन वइ धकाः बिचाः यानाच्वंपि सर्वसाधारण नागरिक ज्यः जुइगु बाहेक मेता छुं जूगु अनुभव याये मफुनि । अर्बौ तका खर्च यानाः क्वचायेकूगु निर्वाचनया लिच्वः पिदनेधुंकूसां मुलुकय् न्ह्यानाच्वंगु यथास्थितिया कारणं छुं परिवर्तन महसुस याये फयाच्वंगु मदु । सत्ताय् च्वनाच्वंपिं व पहुँच दुपिं राजनीतिक पार्टीत थःपिं सत्ताय् अडिग जुयाच्वनेत व याकनं सत्तारुढ जुइगु निंतिं अनेक जालझेल व कसरत यानाच्वंगु दु ।

प्रतिनिधि सभा व प्रदेश सभाया निर्वाचनया परिणाम पिदने धुंकूसां न्हू निर्वाचित जनप्रतिनिधित सत्तारुढ धाःसा जुइ फुगु मदुनि । मेखे स्थानीय निर्वाचन क्वचायाः जनप्रतिनिधित थःथःपिनिगु ज्याय् वनेधुंकूसां कानूनया अभावया कारणं उमिसं थःपिनिगु अधिकार छ्यले फयाच्वंगु मदु । उपिं अधिकार सम्पन्न जुइ फयाच्वंगु मदु । थ्व हे कारणं आः सत्तारुढ जुयाच्वंपिंसं उमिगु अधिकारयात थःपिंसं हे छ्यलेगु यानाच्वंगु कारणं विवाद ब्वलनेगु ज्या नं जुयाच्वंगु दु । प्रतिनिधि सभा व प्रदेशसभाया जनप्रतिनिधि निर्वाचित जुइ धुनेवं हे न्हूगु सरकार निर्माण यानाः जनताया अभिमत कदर यायेमाःगु खः ।

क्वचाःगु निर्वाचन न्ह्याक्व हे अपवित्र गठबन्धनया लिधंसाय् जूगु धकाः धाःसां आः जनताया अभिमत वयाः वाम गठबन्धनयात नेतृत्व यायेत अभिमत बीधुंकूगु दु । तर बहुमतया अभिमत कायेधुंकूपिंसं हे राष्ट्रिय सभा निर्वाचनया अध्यादेश सम्बन्धी विषययात कयाः कचवं ब्वलंकेगु ज्या जुल । संविधानय् स्पष्टकथं न्ह्यथनातःगु बुँदाकथं सरकारं पारित याना छ्वःगु अध्यादेशयात राष्ट्रपतिं अनुमोदन यानाः जारी यायेमाः धका धयातःगु खँय् तक नं प्राविधिक विषययात कयाः कचवं ब्वलंकेगु ज्या जुल । गुकिं यानाः राष्ट्रिय सभा निर्वाचनया अध्यादेश जारी जुइगु लिबाना वन ।

तर अन्ततः संवैधानिक प्रावधानकथं हे अध्यादेश पारित जुया वयेगु बाहेक मेता छुं मजुल । आः निर्वाचनय् बहुमत वःगु, न्हू निर्वाचित सरकारं जक ज्या याये दइ धकाः गुगु कचवं वाम गठबन्धनं न्ह्यःने हल व मात्र मृगतृष्णाय् हिलेगु बाहेक मेता मजुल । न्हूू जननिर्वाचित प्रतिनिधित गुलि फत उलि याकनं सत्तारुढ जुयाः जनताया अभिमत कदर यायेमाःगु छखे वास्तविकता खःसा मेखे राजनीतिक दाउपेचया लिधंसाय् थःपिनिगु सत्ता अवधि ताः हाकयेकेगु व थःपिनि प्रतिनिधि फयां फक्व अप्वः दुथ्याकेगु कासाय् वर्तमान कामचलाउ सरकारया दाउपेच खनेदु ।

वर्तमान स्थितिया चित्रण न्हापा हे राजनीतिक पार्टीतय्सं यानाः थुकिया समाधान निक्र्यौल याना तयेमाःगु खः । आः सत्तारुढ जुयाच्वंगु नेपाली कांग्रेसया सरकारं सविधान प्रदत्त अधिकारकथं न्हापां प्रान्तीय प्रमुख व लिपा राष्ट्रिय सभाया निर्वाचन धुंकाः सरकारं मनोनित याइपिं दुजःत मनोनयन यायेधुंकाः जक सरकार हस्तान्तरण यायेगु खँ हयाच्वंगु दु । क्वचाःगु निर्वाचनय् बांमलाक हे पराजित जूसां आःया स्थितिइ सरकारय् सत्तारुढ जुयाच्वंगु कारणं थुकियात सशक्तकथं विरोध यायेगु लँपु नं मदुसा थुकिया हे लिधंसाय् सरकारं थःपिनिगु आयु ताःहाकयेकेगु ज्या यानाच्वंगु खः ।

थुकिया निकास आः बहुमत हयेत ताःलाःपिं वाम गठबन्धनं न्हापा हे बिचाः याःगु खःसा थुलि चलखेल मजुइगु जुइमाः ।आःया इलय् सरकार थुलि अराजक जुयाच्वंगु खने दइ कि प्रधानमन्त्री शेरबहादुर देउवां न्हापा माओवादी केन्द्रनाप गठबन्धन यानाः सरकार दयेकूगु इलय् मन्त्री नियुक्ति जुयाच्वंपिं माओवादी केन्द्रया मन्त्रीत बिना विभागीय जुइ धुंकाः नं इपिं यथास्थितिइ मन्त्रीया हे हैसियतय् च्वनाच्वंगु दनि । छुं ज्या नं मदु, मात्र पदया हैसियतय् मन्त्री जुयाच्वंपिंसं आः नं मन्त्रीया तलब, इन्धनया सुविधा व मन्त्री क्वाटरय् निवास यानाच्वंगु दनि ।

मन्त्री क्वाटर च्वनामच्वंपिंसं छेँ बहाः कयाच्वंगु दनि । थुलि जक मखु मन्त्रीकथं नियुक्ति जूगु इलय् नियुक्त जूपिं कर्मचारीतय्सं नं उकथं हे तलब भत्ता कयाः सरकारया लखौं तका अपचलन यानाच्वंगु दु । मन्त्रीत जिल्ला भ्रमणय् वंगु जक मखुसें अनावश्यक बिल भरपाईया भुक्तानी थःपिनिगु मन्त्रालय अन्तर्गत याकेत स्वयाच्वंगु समाचार पिदनाच्वंगु खंके फइ । उपप्रधानमन्त्री लगायतया मन्त्रीत नकतिनि क्वचाःगु निर्वाचनय् बांमलाक पराजित जुइधुंकाः नं थःपिं सरकारया मन्त्री धकाः घमण्ड यानाः राज्यया धुकू दोहन यायेगु ज्या गुलि पाय्छि खः धयागु ल्याःचाः जनता नं यायेमाःगु ई वयेधुंकूगु दु ।

उकथं हे आःया कामचलाउ सरकारया मन्त्रीतय्सं थःपिनिगु ब्यक्तिगत सुविधा व नातावादया लिधंसाय् धमाधम कर्मचारी भर्ना यायेगु व योजनात लःल्हानाच्वंगु समाचार पिदनाच्वंगु दु । प्रधानमन्त्री स्वयमं थः कार्यकर्तातय्त अनेक बहानाय् ध्यबा इना जूगु खँ समाचार पत्रिकाया मू समाचार जुयाच्वंगु दनि । थुज्वःगु ज्यायात पने माःगु खःसा आः सत्तारुढ जुइत स्वयाच्वंगु राजनीतिक पार्टी माओवादी केन्द्रया न्हापायापिं मन्त्रीतय्सं कयाच्वंगु अनाहक तलब, पारिश्रमिक कायेगु ज्यायात पनाः न्हू प्रतिनिधिपिंत सत्तारुढ यायेगु खँय् न्ह्यचिलेमाःगु खः ।

जनताया करं सुविधा व तलब नयाच्वंपिं थुमिसं जनतां पुलेमाःगु कर छन्हु जक लिबाक्क पुल धाःसां जरिवाना कयाच्वंम्ह सरकारं आः म्याद वनेधुंकूपिं सत्तारुढ मन्त्रीतय्त गबले तक्क लहिना तयेगु खः? चिन्तनया विषय जुइमाः । मेखे सत्ताय् च्वनेगु व थ्यंकेगु दाउपेच म्हिताच्वंपिं राजनीतिक पार्टीतय्सं जनताया अभिमतयात कदर यानाः राज्यपाखें फजुल खर्च मजुइकेगु निंतिं नं जिम्मेवार भूमिका म्हितेमाः धयागु आशा आम नागरिकं यायेगु नाजायज मखु । सकसिनं चिन्तन यानाः जिम्मेवारी बोध जुइमाः । लोकतन्त्रय् राज्यया धुकू बल्लानाः न्हूगु सकल अर्थतन्त्रया निर्माणय् न्ह्यचिलेमाः, राज्यया धुकूयात दोहन यायेगु ज्या दिकेमाः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.