All for Joomla All for Webmasters

ने.सं. ११३६ यंलागा अष्टमी

मेयर कर्मचारी मखु, जनप्रतिनिधि खः

स्वनिगःया सम्पदा न्हूपुखू (रानी पोखरी)या पुनर्निर्माणयात कयाः सम्पदाप्रेमीतय्गु सः तसः जुया वयाच्वंगु दु । न्हू पुखूयात गुकथं दोहन यानाः अनया परम्परागत प्रविधि व शैलीयात न्हंकेगु ज्या जुयाच्वन, उकियात कयाः सकल सम्पदाप्रेमीतय्सं चिन्ता प्वंकाहःगु दु । तर सम्बन्धित निकाय पुरातŒव विभाग व येँ महानगरपालिका धाःसा धेत्ताःफै जुयाः उकियात न्ह्याथे यानाःसां ब्यवसायीकरण यायेगु खँ पित हयाच्वंगु दु । न्हूपुखूया पुनर्निर्माणय् गुकथं येँ महानगरपालिका व पुरातŒव विभागं गैर जिम्मेवारी लिसः सार्वजनिक यानाच्वंगु दु उकिं पक्का नं थ्व पुनर्निर्माणय् तःधंगु घोटालाया आशंका यायेगु थाय् दु ।

दकले न्हापां ला २०७२ सालया भुखाचं रानीपोखरीयात क्षति यात धकाः गुकथं बय्बय् यात, व हे वास्तविकतापाखें तापाःगु खँ खः । भुखाचं अन दुनेया देगः व अन वनेगु ताँ जक प्रभावित याःगु खः । रानी पुखूयात प्रभावित यानाः अनया लः सुना वन धकाः छुं नं समाचार माध्यमं सम्पे्रषण याःगु मदु । थ्व हे मौकाय् लाकाः रानी पुखूयात पुनर्निर्माण यायेगु धकाः न्हूगु सोच व उगु लागायात ब्यावसायिक स्थलकथं विकसित यायेगु खँ उगु ईया येँ महानगरपालिकाया कार्यकारी प्रमुखं पितहःगु खः । जनप्रतिनिधित मदुगु इलय् कर्मचारीतय्सं थनया आपालं सम्पदा दोहन याःगु अनेक प्रमाणत दु ।

उगु हे इलय् अनया बालगोपाल देगः पुनर्निर्माण यायेत पिलर व सिमेन्ट छ्यःगु इलय् पुरातŒव विभागं देगः जक पुरातात्विक महत्वया खः, पुखू मखु धकाः देगःया पुनर्निर्माणयात पना बिउगु खः । आः पुनर्निर्माण जुयाच्वंगु रानी पुखूयात कयाः अन नक्सा विपरित ज्या जुयाच्वंगु अभिब्यक्ति पुरातत्व विभागया अधिकारीतय्सं यानाच्वंगु खःसा येँ महानगरपालिकाया मेयरं अन पुनर्निर्माण नक्साकथं हे जुयाच्वंगु दावी याःगु दु । अन ढलान यानाः पःखाः दनेगु नक्सा हे पारित जूगु खःसा उकियात सार्वजनिक यानाः येँ महानगरपालिका थः सुरक्षित जुइ फइगु थाय् दु ।

पुरातत्व विभागं सम्पदा पुनर्निर्माणया निंतिं सिमेन्ट व डण्डी छ्यलेत अनुमति बिउगु खः धयागु खँ सार्वजनिक यायेफु वा अज्याःगु नक्सा पारित हे जूगु मखुसा रानी पुखूया पुनर्निर्माणया जिम्मा कयातःम्ह येँ महानगरपालिकां जबर्जस्ती थः यत्थे निर्माण यानाः अन कफी पसः तयेत प्रपञ्च यानाच्वन धयागु खँ प्रमाणित याये फइ । तर वास्तविकताय् अन छुंकथंया नक्सा हे तयार मजूगु खँया नं ब्यापक चर्चा दु । आः पिदनाच्वंगु, पुरातत्व विभागं पित बियाच्वंगु नक्सा सुनां नं प्रमाणित यानातःगु मदु न त अन उगु विभागया छाप हे दु । उकिं थ्व नक्साया खँय् निम्हेसिनं जालझेलया कासा म्हिताः छथ्वः अज्ञात शक्तियात फाइदा बियाच्वंगु अनुमान याये फइ ।

रानी पुखू मात्र शहर सौन्दर्यया खँ मखु । थ्वनाप थ्व शहरया निर्माता नेवाःतय्गु शहर विकासया प्रविधि स्वानाच्वंगु दु । शहर दुने लः ब्यवस्थापनया इतिहास स्वानाच्वंगु दु । न्हापा तीर्थकथं निर्माण जुयाच्वंगु थ्व पुखू लिपा प्रताप मल्लया कायया मृत्यु लिपा जक थुकियात पुखूया रुप बिउगु खः धयागु मान्यता इतिहासविद्तय्गु दु । आः पुनर्निर्माण जुयाच्वंगु रानीपुखू थथे हे पुनर्निर्माण जुल धाःसा थुकिं रानीपुखूया ऐतिहासिकतायात न्हंका छ्वइगु निश्चित दु । येँ शहरया लःया वितरण प्रणालीयात थुइके मफुगु कारणं हे येँया लुँहितिया लः सुनावंगु खँयात सुना नं मखु धकाः धायेफूगु स्थिति मदु ।

शहरया कलात्मक व पौराणिक येँया लुँहिति आः फोहर थाय्कथं ल्यनाच्वंगु दु । लिपा थुकिया औचित्यय् न्ह्यसः थनाः व गाः हे जायेका छ्वइगु सम्भावनायात नं नकारे याये फइ मखु । शहरया सम्पदा बांलाकेगु नामय् लुँहितिया सिथय् च्वंगु धरहरा नं ब्यवसायिक कम्पनीयात बालं बियाः येँ महानगरपालिकां सम्पदायात तहसनहस याःगु दसि आः नं न्ह्यःने दु । धरहरायात बालं बीवं अन पार्कया नामय् अनुचित ब्यापार ब्यवसायं थाय् कयाच्वंगु व अनया हुलयात आः तकं चीके फयाच्वंगु मदु । रानीपुखूयात मनोरञ्जन यायेगु पार्क दयेकेगुया औचित्य छुं खंके फइ मखु ।

आःया सोचकथं रानीपुखूयात स्विमिङ्ग पुलया प्रविधिं विकसित यायेगु खःया अनया लःया ब्यवस्थापन गुकथं जुइगु ? न्हापा प्राकृतिकरुपं वयाच्वंगु लःया निकास बन्द जुइवं अन अनेककथंया समस्या वइगु निश्चित दु । वर्तमान इलय् रानीपुखूयात न्हापाया हे परम्परागत शैली व प्रविधिइ पुनर्निर्माण यायेमाः धयागु खँयात कयाः येँ महानगरपालिका दुने नं मेयर व उपमेयरया दथुइ विवाद जुयाच्वंगु खँ सार्वजनिक जुयाच्वंगु दु । आःया जनप्रतिनिधित वये न्ह्यः हे कर्मचारी तन्त्रं येँया सम्पदा दोहन यायेत तयार याःगु कार्यविधि येँ महानगरपालिकाया मेयरं थःगु जिम्मेवारी कथं कायेमाःगु आवश्यकता मदु ।

येँ महानगरपालिकाया मेयर जनप्रतिनिधि खः, सरकारया कर्मचारी मखु । राष्ट्रपतिं पुनर्निर्माणया शिलान्यास याःगु कारणं व ज्यायात पूवंकेमाः धयागु मान्यता कायेमाःगु आवश्यकता मदु । स्वयं राष्ट्रपतिं हे नं रानी पुखूया पुनर्निर्माण परम्परागत प्रविधि व शैलीं जुइमाः धयागु अभिब्यक्ति बियाच्वंगु दु । सम्पदाया संरक्षणयात कयाः न्ह्यसः ब्वलनेधुंकुसेंलि उगु विषयय् थम्हं जिम्मेवारीपूर्वक समाधान यायेमाःगु मेयरया कर्तव्य जुइ । येँ महानगरपालिकाया हे उपमेयरं अन गलत तरिकां ज्या जुयाच्वन धयागु अभिब्यक्ति बियाः तालाबन्दी तकं याइगु, अले मेयरं वयाः नक्साकथं निर्माण जुयाच्वंगु दु धकाः ताःफ्वः तछ्यानाः ज्या याके बीगु धयागु जग हसाइँया ज्या खः ।

थुज्वःगु विवाद न्हंकेमाः । न्हापा न्ह्यागुकथं हे ज्या जुयाच्वंगु खःसां छम्ह जिम्मेवार जनप्रतिनिधिया हैसियतं न्हापा गलत ज्या जुयाच्वंगु खःसां उकियात पनेमाः । तर छम्ह वफादार कर्मचारीं थें द हे मदुगु नक्सायात कयाः ‘नक्सा कथं हे निर्माण जुयाच्वंगु’ धयागु अभिब्यक्ति जनतां मतदान यानाः विजयी याना बिउम्ह मेयरयात ल्वःगु आचरण मखु । रानी पुखूया सम्पदा व मौलिक प्रविधिया संरक्षण सुं पक्ष वा विपक्षया खँ मखु, थ्व नेपाःया धरोहर ल्यंका तयेगु गौरवया खँ कथं कायेमाः ।

 

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.