All for Joomla All for Webmasters

ने.सं. ११३६ यंलागा अष्टमी

येँया ओन्देय् नेवाः तजिलजि कथं पुजा तयेगु विधि, लप्ते, बोता सुइगु, यःमरि दयेकेगु छन्हुया तालिम जूगु दु । ओन्दे ल्याय्म्ह पुचःया ग्वसालय् ‘सयेके, स्यने व थःगु शीप इने’ धयागु नारा बियाः थ्व तालिम ज्या जूगु खः । सछिम्हेसिनं ब्वति काःगु तालिम पुलांम्ह स्वास्थ्य राज्यमन्त्री तीर्थराम डंगोलं उलेज्या यानादीगु खः ।


तालिमय् बाबुराजा वज्राचायं पूजा विधि स्यनादीगु खः सा यःमरि, चतांमरि, वः दयेकेगु, बोता, लप्ते सुइगु ज्या आन्दे लिधंसा मिसा पुचःया दुजःपिंसं स्यंगु खः ।


झिंस्वक्वःगु राष्ट्रिय ज्यापु दिवसया लसताय् लाकाः जूगु ज्याझ्वलय् ज्यापु सांस्कृतिक विकास कोषया निमित्त नायः मगलकृष्ण महर्जन, ज्यापु दिवस समारोह समितिया नायः राम महर्जन, ज्यापु महागुथि येँ महानगर समितिया नायः बाबुराजा महर्जनपिनि नं उपस्थिति दुगु खः ।
न्हूगु पुस्तायात थःगु संस्कार स्यनेगु ताः कथं थुगु ज्याझ्वः जूगु खँ ओन्दे ल्याय्म्ह पुचःया नायः अमिता प्रजापतिं धयादीगु दु ।

 

 

नेपाःया हे न्हापांगु एनिमेशन फिल्म द लेजेन्ड अफ शंखधर (शंखधरया बाखं) लन्दनं प्रदर्शन सुरु जूगु दु । नेपाल संवत् ११३७ न्हूदँया लसताय् लन्डनया गीनफोडर टाउन हलय् नेपालीतय् दथुइ न्हापांगु प्राइभेट शो याःगु खः ।

नेपाल संवत्या प्रवद्र्धक राष्ट्रिय विभूति शंखधर साख्वाःया बाखंयात कयाः दयेकातःगु थ्व फिल्मय् शंखधरं नेपाल संवत् गुकथं सुरु यात धयागु न्ह्यब्वयातःगु दु । फिल्मया निर्माता÷निर्देशक संयुक्त श्रेष्ठया कथं थ्व फिल्म येँ व ख्वपया सामाजिक स्वापुतिइ आधारित थ्व फिल्मय् थगुने ब्वःगु तःभुखाचं प्रभावित थौंकन्हय्या स्वनिगःया नं तुलना यानाः क्यनातःगु दु ।

यन्त्रकला स्टुडियोया ब्यानरय् दयेकूगु थ्व फिल्मय् एनिमेशन पुचलय् संयुक्त श्रेष्ठया लिसें अन्जना श्रेष्ठ, नियुक श्रेष्ठ दुसा विज्ञान प्रजापति व प्रंजल कक्षपतिं एनिमेशनय् ग्वाहालि याःगु दु ।
नेपाःया संस्कृति व सम्पदा न्ह्यब्वयेगु ताः तयाः थ्व फिल्मय् मौलिक नेपाली कलाकारिता व बाखंशैली दुथ्याकागु खँ निर्देशक श्रेष्ठं धयादीगु दु । एनिमेशन फिल्मय् मदनकृष्ण श्रेष्ठ, राजाराम पौडेल, किरण केसी, मदनदास श्रेष्ठपिंसं सः बियादीगु दु । अथेहे फिल्मय् विश्व शाहीया संगीत, निशा देसारया सः दुसा नृत्य निर्देशन सुनिता राजभण्डारीं यानादीगु दु ।


थ्व फिल्म वइगु डिसेम्बर ११ य् लन्दनय् पासा पुचः गुथि युके पाखें व अमेरिकाया वाशिंगटनय् नेवाः अर्गनाइजेशन अफ अमेरिकां रिलिज यायेत्यंगु दु । अथेहे नेपालय् १७ डिसेम्बरय् ग्वाहािल नांया संस्थां व अष्ट्रेलियाय् गुथि अष्ट्रेलियां फेब्रुअरी २०१७ य् रिलिज यायेत्यंगु दु । अथेहे सन् २०१७ य् मध्ये एसिया व युरोपया थीथी शहरय् नं फिल्म रिलिज यायेगु ग्वसाः जुयाच्वंगु दु ।

४५ हजार पाउण्ड लागतय् दयेकूगु थ्व फिल्मया मू निर्माता संयुक्त श्रेष्ठ खःसा सह निर्मातापिं शशिधर मानन्धर, लोचन मानन्धर, महन्त श्रेष्ठ, बेबिना माली, सुशील प्रजापति, राकेश तुलाधर, राजु मृगेन्द्र जोशी, विमल व गंगा कक्षपति, शशी महाजु, सचेतन तुलाधर, रितादेवी सिंह, भुपेन्द्रमान शाक्य व विजय वज्राचार्य खः ।

 

अमेरिकाया वाशिंगटन डिसी महानगर क्षेत्रय् च्वना वयाच्वंपिं नेवाःतय्सं नं नेवाःतय् तःजिगु नखः म्हपुजा याःगु दु । अमेरिकाया हे नेवाःतय् प्रतिष्ठित संस्थाया रुपय् कयातःगु नेवाः अर्गनाइजेसन अफ अमेरिका (एनओए)या ग्वसालय् वंगु नेपाल संवत् ११३७ कछलाथ्व पारु कुन्हु म्हपुजा याःगु खः ।


सन् २००६ निसें एनओए भाषा केन्द्रया ग्वसालय् अमेरिकाया डिसी महानगर क्षेत्रय् थुकथं म्हपुजा यायेगु याना वयाच्वंगु खः । अमेरिकाय् हे जन्म जूपिं नेवाः मस्तय् नेवाः भाय् स्यनेकने यायेगु नापं थीथी नेवाः गतिविधि समर्पित यायेगु नापं क्रियाशील यायेगु ल्याखं एनओए भाषा केन्द्रं उकथं म्हपुजा यायेगु ज्याझ्वःयात निरन्तरता बिया वयाच्वंगु खः ।

 


संस्थाया नायः रामलाल श्रेष्ठं म्हपुजा ज्याझ्वलय् ब्वति कयादीपिं सकसितं सुभाय् देछानादीगु खःसा वल्र्ड नेवाः अर्गनाइजेसन (डब्ल्युएनओ)या नायः सिजन श्रेष्ठ लगायत नेपाःपाखें वंपिं पाहांपिनिगु नं सहभागित दुगु खः ।


अथे हे म्हपुजा ज्याझ्वलय् डिसी महानगर क्षेत्रया थीथी संघसंस्थाया प्रतिनिधिलिसें अमेरिकास्थिति नेपाली दूतावासया उपनियोग प्रमुख जीवनप्रकाश श्रेष्ठ, आर्थिक सल्लाहकार कैलाशराज पोख्रेलया सकल छेँजःपिनिगु नं सहभागिता दुगु खः । मुक्कं सछि व झिम्हेसिनं ब्वति काःगु म्हपुजा ज्याझ्वलय् लिपा ब्वति कयादीपिं सकसितं एनओएपाखें सगं बीगु नापं नेवाः भ्वय्या व्यवस्था याःगु खः । पुरोहित बासव राजोपाध्यायं च्वयादीगु पुजा विधि व निर्देशिका कथं सकसितं म्हपुजा याकेगु ज्या जूगु खः ।


थ्व हे झ्वलय् नेपाल संवत्या प्रणेता राष्ट्रिय विभूति शंखधर साख्वाःयात कयाः दयेकातःगु न्हापांगु सजीव (एनिमेटेड) संकिपा थ्व हे वइगु डिसेम्बर ११ कुन्हु क्यनेगु जानकारी नं ज्याझ्वलय् बिउगु खः ।

 

नेपाल संवत ११३७ कछलाथ्व पारुकुन्हु नेवाः नखः न्यूयोर्कया ग्वसालय् न्यूयोर्क शहरया एम्हर्सतय म्हपूजा व न्हूदँ तःजिक न्यायेकल । सच्छिम्हं मल्याक नेवाःत व थीथी जातजातिया नेपाली प्रतिनिधित नापं विदेशीतय्सं ब्वति काःगु उगु म्हपूजा ज्याझ्वलय् नेवाः नखः न्युयोर्कया न्ह्यब्वया कथं न्हूदँया लसताय् नेपाल संवत ११३७ या नेपालभाषाया क्यालेन्डर न पिदंगु दु ।क्यालेन्डरया विमोचन मूपाहाँ न्यूयोर्कय् च्वंगु नेपाली महावाणिज्यदूतावासया वाणिज्यदूत कृसु क्षेत्रीं यानादीगु खः ।
म्हपुजा ज्याझ्वःया लिसें नेपाल व नेपाली समुदायया निम्ति महत्वपुर्ण योगदान व ज्यायानादीपिं नेपाली व गैरनेपालीपिंत हनेगु ज्याझ्वः न्र जूगु खः । ज्याझ्वलय् जोली अमात्य, कञ्चन अमात्य, अलेक्जेण्डर गर्गिल, शेरी ओना हाडलिन, नातासा ओजनाइक, लुना रञ्जित, सन्जिता प्रधान, एलेन कून व नखःया न्हापायाम्ह नायः बिरेन्द्र प्रधानपिंत हनेज्या याःगुृ खः ।
नेवाः नखः न्यूयोर्कया नायः राजा शाक्यं म्हपूजाय् ब्वति कयादीपिंत लसकुस यानादीगु खःसा संस्थाया न्वकू विष्णुमान प्रधान सुभाय् बियादीगु खः । दिपिका श्रेष्ठं न्ह्याकूगु ज्याझ्वलय् अजय छोचूं पूजाविधि न्ह्याकादीगु खः ।

 

लन्दनय् पासा पुचः गुथिया ग्वसालय् म्ह पुजा व न्हूदँ ११३७या लसताय् साँस्कृतिक ज्याझ्वः जूगु दु । म्हपुजा कुन्हु हे लन्दनया प्लमस्टिडय् च्वंगु एसियन कम्युनिटी हलय् ज्याझ्वः याःगु खः ।
ज्याझ्वलय् बेलायतय् च्वंगु नेपाली दूतावासया उपनियोग प्रमुख शरदराज आरण मूपाहाँ कथं झायादीगु खः । वय्कलं बेलायतय् च्वनाः नं नेवाःतय्सं थःपिनिगु संस्कृति, परम्परा ल्यंकाच्वंगु खँ न्ह्यथनादिसें पुर्खापिंसं याना वःगु संस्कार, परम्परा बेलायतय् च्वनाः नं ल्यंकातयेगु धयागु तसकं च्वछायेबहःगु खँ खः धयादिल ।

wenepali.com

पासा पुचः गुथि साउथ इष्ट लन्दनया अध्यक्ष सुशील प्रजापतिया सभापतित्वय् जूगु ज्याझ्वलय् एनआरएनए युकेया अध्यक्ष मुछेन्न गुरुङ्गं नं भिंतुना देछायादीगु खः ।


ज्याझ्वलय् न्ववानादिसें अध्यक्ष प्रजापतिं नेवाः संस्कृति व परम्परायात ल्यंकातयेगु निंतिं न्हूगु पुस्तायात जागरुक यायेत थ्व ज्याझ्वः यानागु खँ कनादिल । ज्याझ्वलय् कार्यक्रम संयोजक सचिन श्रेष्ठं म्हपुजाया महत्व बारे न्ववानादीगु खः ।


नगेन्द्र श्रेष्ठ व काजल जोशीं संचालन याःगु ज्याझ्वलय् चुत्रबहादुर श्रेष्ठं नं न्ववानादीगु खः । म्हपुजा लिपा जूगु साँस्कृतिक ज्याझ्वलय् पञ्चकन्या, कुमारी, लाखे प्याखं, धिमे प्याखं, भैरव नाच, मञ्जुश्री प्याखःया लिसें थीथी नेवाः व नेपाली म्येँय् हुलाप्याखं नं न्ह्यब्वःगु खः । अथेहे पुलिकिसि जात्रा, भैरव रथ यात्राया साँस्कृतिक झाँकी नं न्ह्यब्वःगु खः ।
पासा पुचः गुथिं वइगु डिसेम्बर १७ य् योमरी पुन्हि नं हनेगु व उकुन्हु योमरि दयेकेगु धेंधेंबल्लाः कासा नं याइगु खँ धाःगु दु ।

 

 

wenepali.com

क्यानेडियन नेवाः गुथिं क्यानाडाय् च्वनाच्वंपिं नेवाःतय्त मुनाः मंकाः म्हपुजा याःगु दु । टोरोन्टोया ब्राम्टोन टावर हलय् मंकाः म्हपुजा याःगु खः । म्हपुजाय् क्यानाडाय् च्वनाच्वंपि. १५० म्ह नेपालीतय्सं ब्वति काःगु खँ धाःगु दु । म्हपुजाय् नेवाःत जक मखसे मेमेगु जातियापिं नेपालीत व विदेशीतय्सं नं ब्वति काःगु खः ।


म्हपुजाया लिसें नेपाल संवत् न्हूदँ ११३७या भिंतुना देछासें साँस्कृतिक ज्याझ्वः नं याःगु खः । क्यानेडियन गुथिं थन सन् २००५ निसें थुकथं मंकाः म्हपुजा याना वयाच्वंगु दु ।
विदेशय् च्वनाः नं थःगु संस्कृतियात निरन्तरता बीमाः धयागु भावना थुकथं म्हपुजा याना वयाच्वनागु खँ क्यानेडियन नेवाः गुथिया महासचिव विमल श्रेष्ठं धयादीगु दु ।

किपा साभार- क्यानेडियनखबर डटकम
किपा साभार- क्यानेडियनखबर डटकम

 देन्यंकं थीथी ज्याझ्वः यासें नेपाल संवत् ११३७ न्हूदँ हंगु दु । स्वनिगःया येँ, यल, ख्वपया लिसें स्वनिगः पिने नं साँस्कृतिक र्‍याली यासें न्हूदँ हंगु खः ।

इटहरी

नेपाल संवत् ११३७ या लसताय् नेवाः पुचः इटहरीया ग्वासलय् न्हूदँया लसताय् भिंतुना कालबिल ज्याझ्वः जूगु खः । थन च्वनाच्वंपिं आदिवासी जनजाति समुदायं मंकाः कथं थीथी ज्याझ्वः नं याःगु खः ।
थ्व झ्वलय् इटहरीया नेपाः बहुउद्देश्यीय सहकारी संस्थाय् च्वंगु नेपाल संवत्या प्रवर्तक शंखधर साख्वाःया किपाय् स्वांमाः क्वखायेकाः आदिवासी जनजाति सकसिनं भिंतुना कालबिल याःगु खः । ज्याझ्वलय् न्ववानादीपिंसं संयुक्त राष्ट्र संघय् नेपाःया न्हापांम्ह निर्वाचित प्रधानमन्त्री विश्वेश्वर कोइरालां नेपाःया मौलिक संवत् नेपाल संवत् बारे न्ह्यथनादीगु व उकियात राष्ट्र संघं समेत मान्यता बिउगुलिं थ्व संवत्यात चलनचल्तीया संवत् यायेमाःगु खँय् बः बिउगु खः ।


भिंतुना देछायेगु झ्वलय् नेवाः देय् दबूया केन्द्रीय दुजः पूर्णकृष्ण श्रेष्ठ, नेवाः पुचः इटहरीया संस्थापक व सल्लाहकार राजेश श्रेष्ठ, इश्वर सुनुवारपिंसं नेपाल संवत् नेवाःतय् जक तायेके मजिउ, थुकियात नेपाःया हे संवत् कथं हनेमाःगु खँ धयादीगु खः ।
देबनारायण श्रेष्ठया अध्यक्षताय् जूगु ज्याझ्वः लिपा लाखे प्याखं सहित इटहरी उपमहानगरपालिकाया थीथी थासय् भिंतुना र्‍याली चाःहिउगु खः ।

धरान

न्हूदँया लसताय् धरानय् नेवाःतय् मंकाः संस्था नेवाः एकता समाजं नं थीथी ज्याझ्वः यासें न्हूदँ हंगु खः ।

 

लमजुङ्गय् पिदंगु न्हूदँ र्‍यालीइ सहभागीपिं                                                                                                                                                                                                     किपा साभार- कान्त्पिुर

लमजुङ्ग

लमजुङ्गया बेसींशहरय् नं छगू र्‍याली यासें नेपाल संवत् ११३७ न्हूदँयात लसकुस याःगु दु । थनया मनाङ्गे चौतारां थीथी नेवाः बाजं सहित र्‍याली पिथंगु खः । लमजुङ्गय् नेवाः खलः बेसीशहरया ग्वसालय् स्वदँ न्ह्यवनिसें औपचारिक ज्याझ्वः जुया वयाच्वंगु खलःया नायः धर्मराज श्रेष्ठं कनादीगु दु । ज्याझ्वः लिपा सहभागीपिंत समयबजि नं नकूगु खः ।


पोखरा

न्हूदँया लसताय् पोखरा नेवाः खलः कास्कीया ग्वसालय् भिंतुना र्‍याली जूगु दु । पोखराया तिंख्यलं पिहां वःगु ¥याली मोहरिया त्वाः, तेर्सापट्टि, चिप्लेढुंगा, पालिखे चोक जुयाः भिंद्यःत्वालय् थ्यंकाः क्वचायेकूगु खः । पोखराय् दँय्दसं थुकथं भिंतुना र्‍याली यायेगु याना वयाच्वंगु दु ।


धादिङ्ग

झीगु नेवाः समाज धादिङ्गया ग्वसालय् धादिङ्गबेसीइ साँस्कृतिक झाँकी सहित न्हूदँ ¥याली पिथँगु खः । ¥यालीं थीथी जातजातियापिं लिसें राजनीतिक दल, सुरक्षा निकाय, निजामती कर्मचारी, नागरिक समाजयापिनि सहभागिता दुगु खः ।
थनया पुल्चोक बजारं पिदंगु ¥यालीं धिमे बाजं, टाकटुके व लाखे प्याखं न्ह्यब्वयावःगु खः । ¥यालीइ ब्राह्मण, क्षेत्री, मगः, गुरुङ्ग, तामाङ्ग समुदययापिं थःथःपिनिगु भेषभुषाय् ब्वति काःगु खः ।

म्याग्दी

नेपाल संवत न्हूदँयात लसकुस यायेत बेनीइ नेपालभाषा मंकाः खलःया ग्वसालय् छगू ¥याली यासें भिंतुना कालबिल ज्याझ्वः जुल । ज्याझ्वलय् थीथी व्यक्तित्वपिंत सम्मान नं याःगु खः । थनया संगमचोकं सुरु जूगु र्‍यालीइ थीथी झाँकी सहित परम्परागत वसः पुनावःपिं सहभागी दुगु खः । र्‍याली लिपा जूगु ज्याझ्वलय् निजामती सेवापाखे हुलाक अधिकृत साधनाकुमारी श्रेष्ठ व २०७२ या एसएलसीइ उत्कृष्ट ल्याः हयाः पास जूपिं निजी व सामुदायिक विद्यालयया निम्ह निम्ह विद्यार्थीपिंत सम्मान याःगु खः । सामुदायिक विद्यालयपाखे प्रकाश माविया संगीता कर्माचार्य, बेनी सामुदायिक विद्यालयया विवेक श्रेष्ठ व निजी स्कूलपाख वेस्ट प्वाइन्टया सिद्धार्थ श्रेष्ठ व कृतिया श्रेष्ठयात झिंन्यासः÷झिंन्यासः दां सहित सम्मानित याःगु खः ।

 

 

नेपाल संवत् ११३७ न्हूदँया लसताय् येँया भिंद्यःत्वालं मोटरसाइकल र्‍याली न्ह्यात । र्‍याली मरु, यटखा, क्षेत्रपाटी, थँबही, थँहिति जुयाः थीथी थाय् चाःहिउगु खः । 

किपा - तेज महर्जन/नेपालभाषा टाइम्स

 

 

 

 

 

 

नेपाल संवत् ११३७ न्हूदँया लसताय् बसन्तपुली तःजिक साँस्कृतिक र्‍याली जुल । र्‍याली लिपा जूगु न्हूदँ राष्ट्रिय समारोह समितिया भिंतुना ज्याझ्वः प्रधानमन्त्री पुष्पकमल दाहाल उलेज्या यानादिल । साँस्कृतिक ¥याली व समारोहया किपा ।

बसन्तपुली न्ह्याःगु न्हूदँ र्‍याली नीन्याद्वलं मल्याक मनूत न्हूदँया भिंतुना देछासें सहभागी जूगु खः । र्‍याली धिमि, धाः, नाय्खिं खिं लिसें थीथी बाजं थानाः नेवाः वसः पुनाः ल्याय्म्ह, ल्यासे, मस्त, मिस्त, ज्याथजिथिपिनि तःध.गु सहभागीता दुगु खः । बसन्तपुली न्ह्यागु र्‍याली क्वचाबलय् थ्यंमथ्यं निघौ बिउगु खः ।

किपा फुक्कं रेखा शाक्य, नेपालभाषा टाइम्स

 

 

 

 

 

 


स्वन्तिबलय् जुइगु मयति अजिमा द्यःया जात्रा जुयाच्वंगु दु । जात्राया झ्वलय् थौं मरःजा नकी । थन मरःजा नकेबलय् मिसामस्तय्त जक नकी ।
जात्राया झ्वः म्हिगः गणेद्यः, महालक्ष्मी व पञ्चकुमारी द्यः गमय् तःगु खः । मालीगामय् च्वंगु द्यःछेँय् नं खतय् तयाः द्यः क्वबिया हयाः मयतिया देगलय् द्यः थापना याःगु खः ।

थौं लक्ष्मीपुजा कुन्हु मरःजा नकेधुंकाः बहनी देगलय् थापना यानातःगु द्यःयात थना हयाः द्यः व खतं देगः स्वचाः चाहिइका जात्रा सुरु याइ ।


म्हपुजा कुन्हु मयति द्यःया मू जात्रा जुइ । थुकुन्ह द्यःखःयात डिल्लीबजाः, ज्ञानेश्वर हाकुतां जुयाः मालीगामय् द्यःछेँ तक जात्रा यानायंकी । मू जात्रा कुन्हु द्यःजात्राय् वःपिंत जाबुँ धकाः जा नं नका छ्वयेमाः ।
थ्व द्यःया जात्रा याइपिं गुथ्यार व द्यःयात किजापुजा कुन्हु जक म्हपुजा याइ । अले थ्वयां कन्हय् कुन्हु किजा पुजा याइ । किजापुजा धुंकाः द्यःयात हाकनं द्यःछेँय् हे यंकाः तयेयंकी ।

 

 

 

 

 

Page 10 of 23
Go to top

Copyright © 2016  nepalbhasa.com. All rights reserved.