All for Joomla All for Webmasters

ने.सं. ११३६ यंलागा अष्टमी


संसारया हे दकलय् शक्तिशाली मनू जुइम्ह अमेरिकी राष्ट्रपति ल्ययेगु लागिं थौं (नेपाःया ई कथं बहनी) अन मतदान जुयाच्वंगु दु । चुनावया अन्तिम न्हि तक थ्यंबलय् रिपब्लिन उम्मेदवार डोनाल्ड ट्रम्प व डेमोक्रेटिक उम्मेदवार हिलारी क्लिन्टन निम्हेस्यां नं आक्रामक प्रचार याःगु दु ।


विश्वं हे उत्सुक जुयाः स्वयाच्वंगु थ्व चुनावय् अमेरिकाया नागरिक जुइधुंकूपिं छुं नेपाली मूलया मतदातातय्सं नं भोट बी खनी । अन च्वंपिं नेपाली मूलया मतदातातय् मत धाःसा न्हापा थें हे क्लिन्टन व ट्रम्प निम्हेसितं वनी कथं विभाजित जूगु दु । अथे खःसां मात्राया ल्याखं धाःसा अमेरिकी नेपाःमितय्सं ट्रम्पयात स्वयां क्लिन्टनयात अप्वः ययेकूगु खनेदु ।


ट्रम्प निर्वाचित जुल धाःसा वं पिनें वयाच्वंपिं आप्रवासीतय्त दुःख बीफु धइगु यक्व आशंका जूसां चीधंपिं व्यापारीतय्त यक्व कर छुट बीगु धाःगुलिं चीधंगु व्यवसाय यानाच्वंपिं नेपाःमितय्गु मत ट्रम्पपाखे वनीगु खनेदु ।


थ्व चुनावय् अप्वःस्यां ध्यान बियाः स्वयाच्वंगु छगू मेगु विषय धइगु अनया सुप्रिम कोर्टया छुं महत्वपूर्ण न्यायाधीशतय् नियुक्ति खः । राष्ट्रपति सु त्यात वं हे याइगु थ्व नियुक्तिपाखें आः निर्वाचित जुइम्ह राष्ट्रपति वनेधुंकाः तक नं ज्या यानाच्वनीगु जूगुलिं अन थ्यंक हे बिचाः यानाः भोट बीमाःगु खँ छुं अमेरिकी नेपाःमितय्सं धाःगु दु ।


थ्व पालय् गुलिखे अमेरिकन नेपाःमितय्सं पार्टीगत रुपं रिपब्लिन यःसां नं व्यक्तिगत रुपं ट्रम्प मयःगु जुयाः क्लिन्टनयात भोट बीगु मनस्थिति दयेकाच्वंगु नं खनेदु । उकथं हे अमेरिकाय् च्वंपिं नेवाःतय्सं नं अप्वः यानाः क्लिन्टनयात हे भोट बीगु तयारी यानाच्वंगु खँ सीदुगु दु । अन सक्रिय जुयाच्वंपिं छुं नेवाः कार्यकर्तातय्सं ला थःपिंसं छाय् क्लिन्टनयात भोट बी त्यना धकाः सामाजिक सञ्जालय् च्वयाः हे नं बिचाः प्रकट यानाच्वंगु दु ।

नेपाःया सरकार व नेतातय्सं चीनविरोधी गतिविधि यानाच्वंगु धासें चीनं आधिकारिक रुपं हे थःपिनिगु असन्तुष्टि प्वंकूगु दु । परराष्ट्र मन्त्रालयया स्रोतं धाःकथं चिनिया दूतावासं परराष्ट्र मन्त्रालयय् हे वयाः थःपिनि असन्तुष्टि प्वंकूगु खः ।


चीनं नेपाःया सरकार व नेतातय् गतिविधिया खँ न्ह्यथँसें नेपाःया ‘छगू चीन नीति’इ छु धारणा दु धकाः तकं न्यंगु खँ धाःगु दु । विशेषत नेपाली कांग्रेसया सभापति व पुलांम्ह प्रधानमन्त्री शेरबहादुर देउवा भारतय् वनाः स्वतन्त्र तिब्बतया पक्षय् ज्या यानाच्वंपिं संस्थाय् वनाः भाषण बिउवंगु लिसें नेपाःया आर्ट ग्यालरी जूगु ज्याझ्वलय् ताइवानया झण्डा ब्वयेकूगुलिं नेपाःया छगू चीन नीतिइ धारणा छु दु धकाः स्पष्ट यायेत धाःगु खः ।

अथेहे नेपालं वयेगु हे अनिश्चित तिनिम्ह चिनिया राष्ट्रपति वइबलय् बिदा बीगु धकाः याःगु घोषणा खनाः नं चीन तम्वःगु दु । थुकिं नेपालं चीनया मानमर्दन यायेत स्वःगु खँ चिनियाँ अधिकारीतय्सं धाःगु दु । अथेहे गृहमन्त्री विमलेन्द्र निधिं यानाच्वंगु ज्यायात कयाः नं चिनिया पक्षं विरोध प्वंकूगु खँ धाःगु दु । चिनिया अधिकारीतय्सं गृहमन्त्री निधिया चीनप्रति हे नकारात्मक धारणा दुगु धासें असन्तुष्टि प्वंकूगु खः ।


एमाले अध्यक्ष केपी ओलीया सरकार क्वथलाः वर्तमान सरकार दयेकेगुलिं मू भूमिका म्हितूम्ह निधिं भारतीय पक्षय् यक्व झुकाव तयाः न्हापा ओलीं यानाथकूगु वाणिज्य सन्धियात तकं मन्ह्याकूगु खँय् चिनिया पक्षं असन्तुष्टि प्वंकूगु खः ।


    विशेषतः कांग्रेस सभापति देउवा भारतय् न्यू इन्डिया फाउन्डेसनं याःगु ज्याझ्वलय् ब्वति काःगुलिं नं चीनं छगू चीनि नीति नेपाःया धारणा माग याःगु खः । न्यू इण्डिया फाउन्डेशनं याःगु ज्याझ्वलय् स्वतन्त्र तिब्बतया निंतिं गतिविधि यानाच्वंपिं तिब्बती निर्वासित सरकारया प्रधानमन्त्री लोब्साङ साङे नं उपस्थित दुगु खः । नेपालं न्हापांनिसें छगू चीन नीतिइ समर्थन याना वयाच्वंगु जूगुलिं निर्वासित तिब्बत सरकारया प्रतिनिधि दुगु ज्याझ्वलय् नेपाःया पुलांम्ह प्रधानमन्त्री जुइधुंकूम्ह नेता उपस्थित जूगु खँय् असन्तुष्टि प्वंकूगु खः ।


अथेहे चीन ताइवानयात नं थःगु हे देय् दुने लाः धाइ । नेपालं थुकिया समर्थन नं याना वयाच्वंगु खः । अथे खःसां छुं न्हि छगू आर्ट ग्यालरीइ जूगु ज्याझ्वलय् ताइवानया ध्वाँय् ब्वयेके बिउगु खँ नं चीनं असन्तुष्टि प्वंकूगु खः ।

नेपाल प्रहरीं एटिएम प्रयोगकर्तातय्त गुलि फु उलि याकनं थःपिनिगु पिन कोड हिलेत इनाप याःगु दु । नेपाल प्रहरीया केन्द्रीय अनुसन्धान ब्युरों एटिएम कार्डया डाटा व पिन खुयाः ध्यबा लिकयाच्वंपिं स्वम्ह विदेशी नागरिकतय्त ज्वनेवं थ्व इनाप याःगु खः ।     प्रहरीया कथं एटिएमपाखें ठगी याइपिं अन्तर्राष्ट्रिय गिरोह हे सक्रिय जुयाच्वंगु दु धासें एटिएमया पिनकोड हिलेत इनाप याःगु खः ।


प्रहरीं येँया दरबारमार्ग, ठमेलया थीथी एटिएमपाखें पिन कोड खुइत क्यामरा लिसें थीथी सामग्री छ्यलाः ध्यबा खुया वयाच्वंपिं रोमानियाली नागरिकत घिता हुजुम, ओसिप मोरारु व एलेक्स क्रिष्टियन बुगाहिरुलानयात वंगु शुक्रवाः ज्वंगु खः ।

उमिपाखे. स्वंगू लाख च्याद्वः व न्यासः तका नेपाली ध्यबा, १०,९०५ युरो, ४७० फिलिपिनो ध्यबा, ३५३ पा एटिएम कार्ड, मोबाइल फोन खुगः, ल्यापटप निगः नं बरामद याःगु खः । उमिके न्यनेकने यानास्वःबलय् नेपालय् एटिएमपाखें पिन कोड खुयाः ध्यबा लिकायेत अन्तर्राष्ट्रिय गिरोह हे सक्रिय जुयाच्वंगु व गुलिखे एटिएमया पिनकार्ड खुयाः विदेशय् छ्वयेधुंकूगु जुइफुगुलिं याकनं पिन कोड हिलेत प्रहरीं धाःगु खः ।


छुं ई न्ह्यवनिसें बुल्गेरिया, टर्कि, रोमानिया आदि देय्या अन्तर्राष्ट्रिय ठगतय्सं पर्यटकय् भिसाय् नेपाः दुहां वयाः एटिएमपाखें ध्यबा खुइगु यानाच्वंगु खँ प्रहरीं धाःगु दु । निदँ न्ह्यव मंसिरय् २६ लाख नेपाली ध्यबा सहित टर्किया नागरिक, अथेहे २०७२ चैतय् १८ लाख नेपाली ध्यबा सहित बुल्गेरियाया नागरिक वंगु साउनय् निगू लाख ६४ हजार ध्यबासहित रोमानियाली नागरिकयात थथे हे एटिएमपाखें ध्यबा खुयाकाःगु द्वपनय् ज्वंगु खः ।

ने.सं. ११३७ कछलाथ्व ७

नेपाः पासा पुचः अमेरिकाया (एनपिपिए)या वह बुन्हि (रजत जयन्ती) तःजिक क्वचाःगु दु । पुचःया रजत जयन्ती वंगु नोवेम्भर ४ व ५ तारिखय् निन्हुयंकं तःजिक हंगु खः । न्हापांगु न्हि कुन्हु तःजिक म्हपुजा याःगु खःसा लिपांगु न्हि कुन्हु गणेद्यःया पुजा यासें मदनकृष्ण श्रेष्ठ व हरिवंश आचार्यया प्रहसन सहित तःजिगु साँस्कृतिक ज्याझ्वः न्ह्यब्वःगु खः ।


निन्हुयंकं जूगु ज्याझ्वलय् वाशिंगटन डिसीइ च्वनाच्वंपिं नेवाःत लिसें थीथी समुदायया नेपालीतय् तःजिगु सहभागिता दुगु खँ धाःगु दु । ज्याझ्वलय् पासा पुचःया ख्वाःपौ दबू नं पाहांपिंसं मंकाः कथं विमोचन याःगु खः ।


मेरिल्यान्ड राज्यया सिल्भर स्प्रिंगय् च्वंगु छगू स्कूलया जूगु ज्याझ्वलय् अमेरिकाया निंतिं नेपाली राजदूत अर्जुनकुमार कार्की, मदनकृष्ण श्रेष्ठ, हरिवंश आचार्य, सांसद सुशील श्रेष्ठ, महावाणिज्यदूत प्रेमराजा महत, संयुक्त राष्ट्र संघ युवा सम्मेलनया सभापति जोली अमात्य, वल्र्ड नेवाः अर्गनाइजेशनया नायm सिजन श्रेष्ठ, क्यालिफोर्निया स्टेट विश्वविद्यालयया डिन राम मालाकारपिं पाहाँ कथं झायादीगु खः ।


मदनकृष्ण श्रेष्ठ व हरिवंश आचार्य पासा पुचःया ब्वनाय् रजत जयन्तीया निंतिं विशेष ज्याझ्वः ज्वनाः अमेरिका वंगु खः । ज्याझ्वलय् वय्कःपिंसं नेवाः भासं छपु हास्य दोहरी लिसें नेपाली भासं विकास व भ्रष्टाचार नांया प्रहसन न्ह्यब्वःगु खः ।


पासा पुचः अमेरिकायाया अध्यक्ष मय्जु सरोज प्रजापतिया सभापतित्वय् जूगु ज्याझ्वलय् बुद्ध भजन, पञ्च कुमारी चर्या प्याखं, धिमे प्याखं, चण्डिका प्याखं नं न्ह्यब्वःगु खः । अथेहे सृजन ताम्राकार, सरिस्मा अमात्य, सारना श्रेष्ठ, रामश्रेष्ठ, आशिस भडेलपिंसं म्येँ न्यंकूगु खःसा हास्य कलाकार रतन सुवेदीं प्रहसन क्यंगु खः । ज्याझ्वलय् प्रविन ताम्राकारं नेपाःया राष्ट्रिय म्येँ हाःगु खःसा साहारा जोशीं अमेरिकाया राष्ट्रिय म्येँ हाःगु खः ।

 


थ्वयां छन्हु न्ह्यव जूगु ज्याझ्वलय् मदनकृष्ण श्रेष्ठ व हरिवंश आचार्यपिंसं थः छेँजःपिंलिसें पासा पुचःया ज्याझ्वलय् मंकाः म्हपुजा याःगु खः । म्हपुजा ज्याझ्वलय् मदनकृष्ण श्रेष्ठं थःम्हं न्हापा नं अमेरिकाय् वयाः म्हपुजा यानागु लुमंकुसें म्हपुजा महत्वबारे कनादीगु खः ।

संविधान संशोधनया लागिं सरकारं तयार याःगु मस्यौदा धकाः म्हिगः विद्युत सञ्चारय् प्रचार जूगु ‘मस्यौदा दस्तावेज’ वास्तवय् गनं पिहां वल ? थ्व खँयात कयाः मधेसी मोर्चा दुने चर्चा शुरु जूगु दु ।
खास यानाः उगु मस्यौदाय् अंगीकृत नागरिकता कयातःपिं मनूतय्त नं देय्या उच्च पदय् नियुक्ति याये फइ धकाः च्वयातःगु छगू बुँदायात कयाः म्हिगः व्यापक आलोचना जूगु खः ।


तर लिपा वयाः पुष्टि जुल, उगु दस्तावेज न सरकारं जारी याःगु जुयाच्वन, न मधेसी मोर्चां प्राप्त याःगु जुयाच्वन । थ्व ला दथुं अथें हे सञ्चार माध्यमय् वःगु लानाच्वन । तर अज्याःगु ख हे मखुगु दस्तावेज सञ्चार माध्यमय् छाय् वल अले सुनां वयेकल ?
मधेसी व जनजाति नेतातय्सं थ्व दस्तावेज उकथं प्रचार याःगुया कारण संविधान संशोधनया ज्याय् पंगः थनेगु लागिं खः धकाः अनुमान याःगु दु । संविधान संशोधन यात धाःसा थज्याःगु गलत बुँदा नं दुथ्याकी, उकिं संशोधन धइगु याये हे मजिउ धइगु भ्रम बीगु लागिं संशोधन विरोधीतय्सं थ्व चाल म्हितूगु अनुमान नं थ्व नेतातय्सं याःगु दु ।


थ्व स्वयां न्ह्यः नं संविधान संशोधनया तयारी जूबलय् उकी हिन्दी भाषायात राष्ट्र भाषा दयेकीगु बुँदा नं दुथ्याकल धइगु हल्ला न्यंकेगु ज्या जूगु खः । तर अबले नं वास्तवय् अज्याःगु छुं हे ज्या मजूगु खः । संविधान संशोधनया ज्यायात बदनाम यायेगु लागिं अबले अज्याःगु हल्ला याःगु खँ लिपा सीदत ।


मधेसवादी नेतातय्सं थःपिनि मू माग धइगु २६ बुँदे मागपत्रय् स्पष्ट रुपं न्ह्यथनातयागु दु धासें अंगीकृत नागरिकता सम्बन्धी खँ उगु मागपत्रय् मदुगु खँ धाःगु दु ।

आशंका एमालेपाखेम्हिगः सार्वजनिक जूगु नकली दस्तावेज पित बीगु ज्याय् प्रमुख प्रतिपक्षी दल एमालेया ल्हाः दुगु आशंका यानाहःगु दु । उगु दस्तावेज पित बीगु ज्या विशेष यानाः एमाले समर्थित पत्रकार व सञ्चार माध्यमतय्सं याःगु खः । लिसें दस्तावेज सार्वजनिक जूगु बाघौ हे मजूनिवं एमालेया हे थीथी नेतातय्सं अंगीकृत नागरिकतय्त राज्यया उच्च पदय् नियुक्त यायेगु ज्या जुइत्यन धासें उकिया विरोध शुरु याना हःगु खः । एमालेया जिम्मेवार नेतात हे उकथं हालेगु शुरु जुइवं सरकारं नं अज्याःगु
दस्तावेज तयार हे मजूगु खँ स्पष्ट याःगु खः ।


उगु दस्तावेज सार्वजनिक याःपिं पत्रकार व सञ्चार माध्यमतय्सं दस्तावेज थःपिंत सुनां बिउगु खः धकाः आः तक स्रोत स्पष्ट याःगु मदुनि । उकिं नं थ्व ज्या एमालेया च्यानलं याःगु जुइमाः धकाः आशंका याना हःगु खः ।

नेपाल संबत् ११३७ न्हूदँ कुन्हु वल्र्ड नेवाः अर्गनाइजेशन नेदरल्यान्ड च्याप्टरं न्हूदँया लसताय् थीथी ज्याझ्वः यानाः मंकाः म्हपूजा याःगु दु ।

न्हूदँया लसताय् भिंतुना कालबिल ज्याझ्वः नं जूगु खः । ज्याझ्वलय् आमस्तरदम, रोटरदम, द हेग, उतरेख्त, लाइदन नापं नेदरल्यान्डया थीथी थासं वःपिं नेवाः लगायत मेमेगु जातिया नेपाःमिपिं नं मुंगु खः ।

ज्याझ्व न्ह्याके न्ह्यः वल्र्ड नेवाः अर्गनाइजेशनया संस्थापक नायः व सल्लाकार डा. बालगोपाल श्रेष्ठं नेपाल संबत् व म्हपूजाया महत्व बिषयय् ध्वाथुइकादीगु खः ।

थुगुसिया म्हपुजा च्याप्टरया दुजःपिं सुदर्शन बज्राचार्य, बिरेन्द्र श्रेष्ठ, बिनोद श्रेष्ठ, झलक श्रेष्ठ, सुरेश श्रेष्ठ, जितेन्द्र श्रेष्ठ, कृष्णहरि महर्जन, नितु श्रेष्ठ व श्रीलक्ष्मी श्रेष्ठपिनि संयोजनय् न्ह्यज्याःगु खः ।

मयजुपिं नितु श्रेष्ठ व अणु श्रेष्ठया ग्वाहालि कयाः सकसितं म्हपूजा याकेगु ज्या श्रीलक्ष्मी श्रेष्ठं यानादीगु खः । म्ह पूजा क्वचायेका नेवाः भ्वय् जूगु खः ।

 

 

 

 नेवाः मिसातय्त आर्थिक, सामाजिक व राजनैतिक रुपं सशक्तिकरण यायेगु तातुना नेवाः देय् दबूया विषयगत संगठन कथं नेवाः मिसा दबू गठन जूगु दु । म्हिगः देय् दबुली हे प्रारम्भिक अभिवेशन यासें रश्मिला प्रजापतिया अध्यक्षताय् मिसा दबू गठन याःगु खः । दबुली स्वीस्वम्ह केन्द्रीय दुजःपिं दुथ्याकूगु दु ।


आइतवाः गठन जूगु दबुली न्वकु कस्तुरी श्रेष्ठ च्वनादीगु दुसा पूर्व भेग व पश्चिम भेगपाखें छम्ह छम्ह न्वकु तयेगु खँ धाःगु दु । अथेहे मू छ्याञ्जे नीना डंगोल च्वनादीगु दुसा छ्याञ्जे विद्या श्रेष्ठ महर्जन, पश्चिम भेग छ्याञ्जे सरिता श्रेष्ठ जुयादीगु दु ।

छ्याञ्जेय् पूर्व भेगपाखें नं छम्ह दुथ्याकीगु तिनि । अथेहे दांभरिं शान्तिं वैद्य च्वनादीगु दुसा स्वनिगःपाखें केन्द्रीय दुजलय् श्रििमला सुवाल, सविता मुनिकार, कविता श्रेष्ठ, रचना शर्मा, गीता खड्गी, हिसिलिना शाक्य वज्राचार्य, मन्दिरा राजभण्डारी, अन्जु श्रेष्ठ, प्रकृति तुलाधर, अमिता महर्जन च्वनादीगु दु ।

पूर्व पश्चिमपाखें केन्द्रीय दुजलय् विमला प्रधान–इटहरी, रन्जना अमात्य (विराटनगर), इन्दु श्रेष्ठ –धरान), सौन्दर्य शाक्य (पाल्पा), गणेदवी श्रेष्ठ (भरतपुर) पिं च्वनादीगु दु ।प्रारम्भिक अधिवेशनं याकनं प्देश समिति व जिल्ला समिति गठन यानाः खुलाया दुने राष्ट्रिय अधिवेशन यायेगु नं क्वःछिउगु दु ।

नयाँ शक्ति नेपालया नेवाः राष्ट्रिय परिषदया ग्वसालय् वंगु शुक्रवाः अन्तक्र्रियात्मक भिंतुना कालबिल ज्याझ्वः जुल । जातीय मुक्तिया आन्दोलनय् नेवाःतय् भूमिका विषयय् अन्तक्र्रियात्मक ज्याझ्वः जूगु खः ।


नेपाल संवत् न्हूदँ ११३७ या लसताय् जूगु ज्याझ्वलय् मूपाहाँ कथं झायादीम्ह नयाँ शक्तिया संयोजक बाबुराम भट्टराईनं पृथ्वीनारायण शाहया पलेसा मल्लकालय् हे नेवाः जुजुपिनि नेतृत्वय् राज्यया एकीकरण जूगु खःसा देय्या अवस्था थौंकन्हय् थें मजुइगु खँ धयादिल । वय्कलं धयादिल, ‘यदि मल्लकालय् हे नेपाःया एकीकरण जूगु खःसा थौंकन्हय् नेपाःया स्तर नं युरापेली देय्तय् समान जुइगु जुइ ।’


उगु इलय् हे व्यापारीक अर्थतन्त्रया विकास जुइधुंकूगु जूगुलिं यदि मल्ल जुजुया नेतृत्वय् एकीकरण जूगु खःसा आः औद्योगिक अर्थतन्त्र जुइगु व देय्या विकास उन्नत जुइगु बिचाः वय्कलं तयादीगु खः ।


परिषद्या संयोजक पञ्चलाल महर्जनया सभापतित्वय् जूगु ज्याझ्वलय् नयाँ शक्तिया जातीय विभागया परशुराम तामाङ्ग, वरिष्ठ पत्रकार राजेन्द्र महर्जन, अधिवक्ता दीपेन्द्र झापिंसं नं न्ववानादीगु खः ।
ज्याझ्वलय् १८ वडाया पुलांम्ह अध्यक्ष व समाजसेवी चन्द्रानन्द नेवाःयात नं हनेज्या याःगु खः ।

 

अतिकं तामझामपूर्वक जूगु भारतीय राष्ट्रपति प्रणव मुखर्जीया नेपाः भ्रमण गुलि उपलब्धीपूर्ण जुल, अले थ्व भ्रमणं नेपाःयात छु सन्देश बिया थकल ? वय्कः लिहां झायेवं कुटनीतिक व राजनीतिक ख्यलय् थुकिया विश्लेषण शुरु जूगु दु ।
राष्ट्रपति मुखर्जीं येँया पशुपति व जनकपुरया रामजानकी देगलय् विशेष पुजा यानादीगु तर बुद्धया जन्मस्थल लुम्बिनीया भ्रमण यानामदीगु खँय् थन दकलय् टिप्पणी जुयाच्वंगु दु ।

भारतया प्रधानमन्त्री नरेन्द्र मोदी वःबलय् नं पशुपतिइ हे पुजा यानादीगु व आः राष्ट्रपति वःबलय् नं पशुपतिइ हे (व नं गर्भगृह थ्यंक हे दुहां वनाः) पुजा यानादीगु खँयात यक्वस्यां आलोचना याःगु दु । पशुपतिया गर्भगृहय् दुहां वनाः आः तक नेपाःया हे सुं नेतां पुजा याःगु अभिलेख मदुनि ।


राष्ट्रपति मुखर्जीयात शुरुइ जनकपुर, पोखरा व लुम्बिनी नं भ्रमण याकेगु ज्याझ्वः दयेकातःगु खः । तर अन्तिमय् लुम्बिनी भ्रमण रद्द जुल । लुम्बिनी बुद्धया जन्मभूमि जूगु व थ्व तथ्ययात आः तक नं भारतं स्वीकार मयाःनिगु कारणं हे वय्कलं लुम्बिनीया भ्रमण यानामदीगु विश्लेषण थन याना हःगु दु ।


अथे हे भारतया राष्ट्राध्यक्षयात नेपाःया शहीद स्मारकय् यंकाः शहीदपिनि लुमंतिइ स्वां देछाकेगु ज्याझ्वः मतःगु खँय् नं आलोचना जूगु दु । भारतय् सुं नं विदेशी राष्ट्राध्यक्ष वल धाःसा अनया रामघाट यंकाः महात्मा गान्धीया स्मारकय् स्वां छाकीगु चलन दु ।
थ्व भ्रमणय् नेपालं क्यंगु ‘अति चाकडी’ यात गुलिसिनं भारतया आन्तरिक राजनीतिलिसे स्वानाः थुकिं भारत सरकार लय्मताइगु विश्लेषण नं याना हःगु दु ।

थौंकन्हय् भारतय् भाजपाया सरकार दुसा राष्ट्रपति मुखर्जी कंग्रेस (आई) पाखें राष्ट्राध्यक्ष जूम्ह खः । आः वय्कःया कार्यकाल नं १८ महिना ति हे जक ल्यं दनि । वय्कःयात याःगु अति चाकडीयात भाजपाया संस्थापन पक्षं अन्यथा काये फुगु दावी विश्लेषकतय्सं याना हःगु दु ।

विराट नेपालभाषा साहित्य सम्मेलन गुथिं नेपाल संवत ११३७ न्हूदँया लसताय् भिंतुना कालबिल व सांगीतिक–साहित्यक ज्याझ्वः जुल ।

विराट नेपालभाषा साहित्य गुथिया नायः कृष्णभक्त बोडेया सभपातित्वय् जूगु ज्याझ्वलय् प्रदीप शाक्य, विजयरत्न असंबरे, शाक्य सुरेन, शरणहरी ज्यापु, रेखा शाक्य, भरत महर्जन, माणिक उरायलगायतयापिंसं चिनाखं, चिबाखं न्यंकूगु खः । अथेहे पवित्र कसाः, रानी महर्जनलिसें मेमेपिंसं थीथी म्येँ न्यंकूगु खः ।


किपुया इन्द्रेणी संस्कृति समाजपाखें लसकुस म्येँ हालाः न्ह्याःगु ज्याझ्वलय् नेपालभाषा मंकाः खलःया छ्याञ्जे नरेशवीर शाक्य, नेपालभाषा मंकाः खलः यलया नायः ऋषिप्रसाद जोशी, साहित्यकारपिं स्नेह साय्मि, वीरप्रसाद भन्सालीपिं पाहाँ कथं झायादीगु खः ।

 

Page 9 of 23
Go to top

Copyright © 2016  nepalbhasa.com. All rights reserved.