All for Joomla All for Webmasters

ने.सं. ११३६ यंलागा अष्टमी

एसएलसी निसें एमए तगि तक नेपालभाषा विषयय् अप्वः ल्याः हःपिंत लःल्हाइगु मोतिलानि सिरपाः शनिवाः छगू ज्याझ्वःया दथुइ लःल्हाःगु दु । ज्याझ्वलय् एसएलसीपाख ने.सं. ११३५ य् दकलय् ल्याः हःम्ह कन्या मन्दिर माविया सरिना महर्जन, ११३६ य् अप्वः ल्याःहःम्ह आदर्श मावि थिमिया अनिता प्रजापति, प्लस टुलय् अप्वः ल्याः हःम्ह मंगलोदय उमावि, किपूया निशा प्रधान, बिएय् अप्वः ल्याः हःम्ह पाटन क्याम्पसया बसन्तराज शाक्य, एमएय् ने.सं. ११३५ य् अप्वः ल्याः हःम्ह नेपालभाषा केन्द्रीय विभागया दीपा महर्जन व ने.सं. ११३६ य् दकलय् अप्वः ल्याः हःम्ह नेपालभाषा केन्द्रीय विभागया भरत महर्जनयात नगद व दसिपौ लःल्हाःगु खः ।


मोतिलानि सिरपाः गुथिया नायः प्रा प्रेमशान्ति तुलाधरया सभापतित्वय् जूगु ज्याझ्वलय् मूपाहाँ नेवाः बस्ती नेवाः स्कुल अभियानया संयोजक दीपक तुलाधरं दसिपौ लःल्हानादीगु खःसा सिरपाः दाता मोतिलानि ताम्राकारया म्ह्याय् मय्जु व सिरपाः गुथिया संरक्षक ज्ञानीसरोज तुलाधरं दां सिरपाः लःल्हानादीगु खः ।


ज्याझ्वलय् न्ववासें सिरपाः काःपिं विद्यार्थीपिंसं थुगु सिरपालं थःपिंत नेपालभाषा सेवा यायेत थप हःपाः बीगु खँ धयादीगु खः ।
सिरपाः दाता शिक्षाप्रेमी मोतिलानि ताम्राकारया किपाय् स्वांमां क्वखायेका न्ह्याःगु ज्याझ्वलय् दाता मोतिलानीया किजा सानुरत्न स्थापितं सुभाय् देछायादीगु खःसा दिव्या ताम्रकारं लसकुस यानादीगु खः ।


वल्र्ड नेवाः अर्गनाइजेशन नेपाः कन्ट्री च्याप्टरपाखें यायेत्यंगु हलिं नेवाः म्येँ कासाय् ब्वति कायेग निंतिं आवेदन बीगु ई थप याःगु दु । कन्ट्री च्याप्टरपाखें बुधवाः छगू पत्रकार सम्मेलन यासें आवेदन आः वइगु पोहलाथ्व २ (डिसेम्बर ३१, २०१६) तक दुतिनेफइगु खँ धाःगु दु । थुकिया लिसें म्येँ कासा जुइगु न्हि, अडिसन न्हि नं लिछ्याःगु जानकारी बिउगु खः ।

न्हूगु ईधलः कथं आः नेपालय् पोहलागा १ (जनवरी १३, २०१७) कुन्हु अडिसन जुइसा नेपालं पिनेयापिंसं अनलाइनपाखें पोहेलागा ८ व ९ (जनवरी २० व २१, २०१७) य् अडिसन बीफइ । फाइनल म्येँ कासा सिल्लागा १४ (फेब्रुअरी २५, २०१७) शनिवाः जुइ ।


पत्रकार सम्मेलनय् न्ववासें हलिं नेवाः म्येँ कासाया कजि रश्मिला प्रजापतिं थ्व म्येँ कासाय् फुक्कं यानाः छगू लाख तका बराबरया सिरपाः बीगु जानकारी बियादीगु दु । याकः म्येँ जुइगु थ्व कासाय् मुख्यतः सः (गायन)या निंतिं धेंधेंबल्लाः जुइसा लय् व रचना विधाय् नं सिरपाः बी । वय्कःया कथं खुल्ला प्रतिस्पर्धा जुइगु थ्व कासाय् न्हूपिं, पुलांपिं न्ह्याम्हं गायकपिंसं ब्वति कायेफइ, तर म्येँ न्हापा पिहां मवःनिगु जुइमाः । अथेहे लोकम्येँ, आधुनिक, रक, पप न्ह्यागु विधाय् नं म्येँ हालेफइ ।


पत्रकार सम्मेलनय् न्ववानासें नेपाः कन्ट्री च्याप्टरया नायः पुष्कर माथेमां नेवाःतय्त छथाय् हयेगु छगू सशक्त माध्यम संगीत नं जूगुलिं विश्वन्यंकंयापिंसं ब्वति कायेफइकथं हलिं नेवाः म्येँ कासा यायेत्यनागु खँ धयादिल । थ्व कासाय् नेपाःया लिसें विश्वया थीथी थासय् च्वनाच्वंपिंसं ब्वति कायेफइ । अडिसन लिपा फाइनलया निंतिं ल्यःपिंसं नेपाः वयाः लाइभ पर्फम याइगु खँ नं पत्रकार सम्मेलनय् जानकारी बिउगु दु ।

सकिमिला पुन्हिया झ्वलय् सोमवाः येँ चाबही गणेद्यःयाथाय् हलिमलि ब्वयाः गणेद्यःया जात्रा जुल ।

किपा - रेखा शाक्य/नेपालभाषा टाइम्स

सरकारं एएफसी सोलिडारिटी कम्प त्याकूगु नेपाली टिमया सकलें दुजःपिंत म्हतिं स्वंगू स्वंगू लाख दां बीगु जूगु दु । युवा तथा खेलकूद मन्त्री दलजीत श्रीपाइलीं विजेता टिमय् दुथ्याःपिंत दां सिरपाः बीगु खँ धयादीगु खः । नेपाल त्याःगु खबर वयेवं प्रधानमन्त्री पुष्पकमल दाहालं खेलकूद मन्त्री श्रीपाइलीयात दां सिरपाः व्यवस्था यायेत निर्देशन बिउगु खः । प्रधानमन्त्रीं दाहालं हे म्हतिं स्वंगू स्वंगू लाख बीत निर्देशन बिउगु खः ।


थौ सनिलय् जूगु कासाय् नेपालं मकाउयात १–० गोलया ग्वाहालि बुकाः एएफसी सोलिडारीटी कप त्याकूगु खः । सन् १९९३ य् साफ च्याम्पियन्सीप त्याकेधुंकाः नेपालं त्याकूगु थ्व हे न्हापांगु एशियन फुटबल महासंघ (एएफसीं) याःगु आधिकारिक धेंधेंबल्लाः खः । अथेहे न्हापांगु महादेशीय उपाधि नं खः ।


मलेसियाया कुचिंगय् जूगु कासाय् नेपाःया निंतिं सुजल श्रेष्ठं छगू जक विजयी गोल याःगु खः । कासाया २९ औं मिनेटय् भरत खवासया पासय् सुजलं हेडपाखें गोल याःगु खः ।

चःमति नेवाः खलःया ग्वसालय् आः नकतिनि नेपाल संवत् ११३७ न्हूदँ क्यंगु लसताय् स्वनिगलं पिने येँ—हेटौंडा—येँ भिंतुना मोटरसाइकल ¥याली जुल । खलःया ग्वसालय् जूगु भिंतुना मोटरसाइकल ¥याली वंगु शनिवाः हेटौंडा वंगु खःसा आइतवाः लिहां वःगु खः । हेटौंडाय् खलःपाखें न्ह्यइपुक नेवाः भ्वय्या ग्वसाः ग्वःगु खः । व मकवानपुरया नेवाः सांस्कृतिक पुचःया मंकाः ग्वसालय् हेटौंडाय् जूगु न्ह्यइपुक सांगीतिक व सांस्कृतिक ज्याझ्वः जूगु खः ।

ज्याझ्वलय् संगीता शाक्य, सानुबाबु महर्जन, सरस्वति मानन्धर लगायतं म्येँ न्यंकादीगु खःसा हेटौंडाया स्थानीय कलाकारपिंसं हुलाप्याखं न्ह्यब्वःगु खः । अथे हे ज्याझ्वलय् ¥यालीयात सुथां लाकेत ग्वाहालि यानादीपिं मोहनमान सांगामि व सुनकुमार मानन्धरयात सुभाय् पौ नं लःल्हाःगु खः ।


थ्व स्वयां न्ह्यः थनया चःमतिं न्ह्याःगु मोटरसाइकल ¥याली उद्योग मन्त्री नविन्द्रराज जोशी, पुलांम्ह राज्यमन्त्री तीर्थराम डंगोल, नेपाल ओलम्पिक कमिटीया नायः जीवनराम श्रेष्ठ, नेपालभाषा टाइम्स न्हिपौया सम्पादक सुरेश मानन्धर व क्यास्ट्रोल नेपालया अमरज्योति रंजितपिंसं मंकाः कथं रिबन चानाः उलेज्या यानादीगु खः ।

 

 

यदि सरकारं याकनं हे संविधान संशोधन यानाः थःपिनि माग पूरा मयात धाःसा देशय् ‘संयुक्त राष्ट्रिय आन्दोलन’ यायेगु ख्याच्वः संघीय गठबन्धनं बिउगु दु ।

मधेसी मोर्चा समेत दुथ्याःगु संघीय गठबन्धनपाखें थौं प्रधानमन्त्रीयात छगू ज्ञापनपौ लःल्हासें थ्व ख्याच्वः बिउगु खः । सरकारं संविधान संशोधनया लागिं छुं ज्या मयाःगु खँय् असन्तुष्टि प्वंकुसें संघीय गठबन्धनया नेतातय्सं थौं प्रधानमन्त्रीयात ख्याच्वः बिउगु खः ।
थौं प्रमयात बिउगु ज्ञापनपत्रय् सरकारयात संविधान संशोधनया प्रस्ताव दर्ता यायेत १५ न्हुया अल्टिमेट बिया तःगु दु । १५ न्हु थ्व ज्या मजुल धाःसा आन्दोलन शुरु यायेगु ख्याच्वः उकी बियातःगु खः ।

आः जुइगु आन्दोलन देय्या फुक्कं आदिवासी जनजाति, दलित मधेसी आदि राष्ट्रियता दुपिं समुदायं याइगु जूगुलिं थुकियात ‘जनआन्दोलन’ मधासे ‘राष्ट्रिय आन्दोलन’ धइगु नां बियागु खँ संघीय गठबन्धनं धाःगु दु ।

गठबन्धनं बिउगु मागपत्रय् संविधान संशोधन यायेबलय् उकी राज्य पुनर्संरचना आयोगं तयार याःगु प्रतिवेदन कथं पहिचानय् आधारित १० प्रदेश दयेमाःगु खँ न्ह्यथनातःगु दु । संघीय गठबन्धनं आन्दोलन याःगु इलय् सरकारयात पेश याःगु २६ बुँदाया मागपत्रया न्हापांगु बुँदाय् हे राज्य पुनर्संरचना आयोगं तयार याःगु प्रतिवेदन कथं १० प्रदेशया राज्य जुइमाः धयातःगु दु ।

प्रधानमन्त्री पुष्पकमल दाहालं थः १० प्रदेशया अवधारणा प्रति सहमत दुसां थौंया परिस्थितिइ उकियात लागू याकेगु सम्भव मदुगु जूगुलिं भविष्यय् थ्व ज्या नं याये फइ कथं संघीय आयोगया अधिकार क्षेत्र विस्तार याये माली धइगु प्रस्ताव तयादीगु खः । कन्हय्
प्रदेशया संख्या थपे याये माल धकाः थ्व ज्या संघीय आयोगपाखें याये दइ कथं उकिया अधिकार थपे यायेगु कथं जक संविधान संशोधन यायेगु खँ प्रम दाहालं कनादीगु खः । तर संघीय गठबन्धनं धाःसा उकथं जुइगु संविधान संशोधनयात स्वीकार याये फइ मखु धासें प्रदेश थपे यायेगु ज्या लिपा मखु आः हे जुइमाः धकाः नं अडान काःगु खः ।

थौं सकिमना पुन्हि । थौं बहनी स्वनिगःया थीथी थासय् थीथी देगःया पिने थीथी बूबः तयाः दयेकीगु हलिमलि ब्वयेगु ज्या जुइ । कलात्मक हलिमलि दयेकाः द्यःया न्ह्यःने ब्वयेगु व लिपा वहे घाराघुरु यानाः नयेगु नेवाःतय् छगू बिस्कं संस्कृति खः ।

थौंया हे दिनय् स्वनिगःया प्यम्ह नारायणद्यः सीकः वनेगु नं परम्परा दु । थौं छन्हुं हे चाँगु नारायण, इचंगु नारायण, शेष नारायण व विशंखु नारायण द्यःयाथाय् वनः पुजा याइगु चलन दु ।

उखे च्वबाहालय् जुयाच्वंगु मेला नं थौं हे क्वचाइ । अन वंगु एकादशिकुन्हुंनिसें माय् अप्सं च्वंपिंत थनेगु ज्या नं थौं हे जुइगु खः ।

 

यलया प्रमुख जिल्ला अधिकारी ऋषिराम शर्मां नेपाःया मौलिक संवत् नेपाल संवतयात सरकारं मान्यता बीधुंकूगुलिं चलनचल्तीइ हयेत तःधंगु समस्या मजुइगु खँ धयादीगु दु । छुं प्राविधिक समस्यायात समाधान यानाः नेपाल संवत्यात सहज रुपं प्रचलनय् हयेफइगु खँ वय्कलं धयादीगु दु । अथेहे वय्कलं स्थानीय निकायय् स्थानीय बासिन्दातय् बाहुल्यता दत धाःसा भाषागत समस्या ज्यनाः स्थानीयत लाभान्वित जुइगु ज्या यायेत नं अःपुगु खँ धयादीगु दु ।

नेपाल संवत् ११३७ न्हूदँया लसताय् ताम्रकार समाजपाखें याःगु चियापान समारोहय् भिंतुना देछायेगु झ्वलय् वय्कलं थ्व खँ धयादीगु दु । ज्याझ्वलय् न्ववानादिसें समाजया अध्यक्ष रविन्द्रराज ताम्रकारं नेपाल संवत्या प्रवर्तक शंखधर साख्वाःयात राष्ट्रिय विभूति व नेपाल संवत्यात राष्ट्रिय संवत् घोषणा यानाः सरकारी स्तरपाखें मान्यता दयेधुंकूगुलिं थुकियात प्रचलनय् हयेत दबाब बीमाःगु खँ धयादीगु खः । नेपाःया मौलिक संवत् व सकलें नेपाःमितय् संवत् जूगुलिं थुकियात प्रवद्र्धनया निंतिं राष्ट्रिय व अन्तर्राष्ट्रिय कुतः जुइमाः बिचाः वय्कलं तयादीगु खः ।

ज्याझ्वलय् नेवाः देय् दबूया नायः नरेश ताम्रकार, समाजया उपाध्यक्ष विनोद ताम्रकार, ज्यापु समाजया अध्यक्ष प्रेम महर्जन, न्हूँद समारोह समिति यलया अध्यक्ष मोतिलाल शिल्पकार, तवः समाजया अध्यक्ष तेजरत्न ताम्रकार, नेपालभाषा मंकाः खलःया अध्यक्ष ऋषि प्रसाद श्रेष्ठ, शम्भु गोविन्द ताम्रकारपिंसं नेपाल सम्वत, राष्ट्रिय विभुति शंखधर साख्वा बारे न्ववानादीगु खः ।

ज्याझ्वलय् महानगरीय प्रहरी परिसरया प्रमुख प्रहरी वरिष्ठ उपरिक्षक पिताम्वर अधिकारी, सहायक प्रमुख जिल्ला अधिकारी कृष्ण प्रसाद आचार्य, ललितपुर उद्योग वाणिज्य संघका अध्यक्ष सविन श्रेष्ठ लिसें थीथी जातिय समाजया अध्यक्ष व प्रतिनिधित लिसें थीथी संघसंस्थाया प्रतिनिधि, ताम्रकार समाजया दुजःपिनि उपस्थिति दुगु खः ।

ख्वपय् थौं छम्ह वेँचाः खिचां मनूतय्त न्यानाः आतंक न्यंकूगु दु । ख्वपया भाने धाःथासं वःम्ह उम्ह खिचां सुथबःछिया दुने नीम्हं मल्याक मनूतय्त न्याःगु खः । खिचां न्याःपिं मध्ये ४८ दँया कमला कुसी व ४८ दँया हे रामकृष्ण प्रजापतियात टेकु अस्पतालय् भर्ना याःगु दु । थुलिमछि मनूतय्त घाःपाः याःम्ह उम्ह खिचायात आतकं नियन्त्रण यायेमफुनिगु खँ धाःगु दु ।


खिचां न्याःपिं मध्ये कमला कुसी बांमलाक घाःपाः जूगु खः । तुमचो धाःथाय् खिचां न्याःम्ह वयागु जवगु तुतिया लापाता हे लिहांवःगु खः । वयात अनं च्याम्हसिंहय् च्वंगु जनस्वास्थ्य केन्द्रय् हःगु खःसा अन वासः याये मफयाः वया लिसें रामकृष्ण प्रजापतियात टेकु अस्पताल छ्वःगु खः । खिचां न्यापिं सकलें जनस्वास्थ्य केन्द्रय् वासः याकाच्वंगु दु ।


थांै सुथय् ६ बजे पाखे दकलय् न्हापां कलेज वनेत्यंम्ह २१ दँया सपना गोसाइयात भाने धाःथासय् न्याःगु खः । अन न्ह्याःवंम्ह खिचां ब्रह्माणी, तुमचो, च्याम्हसिंह लागाय् लक्ष्मी प्रजापति, आशाराम दुवाल, चन्द्र लक्ष्मी तुलसी, लक्ष्मीप्रसाद कुसी, कान्छि ज्याक्वपिंत न्याःगु खः । थुपिं सकसितं जनस्वास्थ्य केन्द्रय् इन्जेक्सन बियाः तयातःगु दुसा मेपिं सामान्य घाःपाः जूपिं झिम्हं मल्याक मनूतय्त वासः यानाः छेँय् लितछ्वयेधुंकूगु दु ।
भाने धाःथासं मनूतय्त न्यानाः च्याम्हसिंहय् थ्यंम्ह खिचा हाकनं अनं लिहां वयाः हाकनं भाने धाःथासं हे बिसिउँ वंगु खँ धाःगु दु ।


खिचां आतंक न्यंकेवं स्थानीय मनूतय्सं खिचायात ज्वनेत स्वःगु खः । तर असफल जुइवं थौं बन्द जूगुलिं सुरक्षाया निंतिं च्वनाच्वंपिं सशस्त्र प्रहरीयात सःतूगु खः । तर उमिसं नं खिचायात नियन्त्रण कायेमफुत । उमिसं थःपिंके गोली कयेकेगु अधिकार मदु धासें सेनाया ग्वाहालि फ्वंगु खः । तर खिचा धाःसा अनं गांपाखे बिसिउँ वंगु खः । गामय् बिसिउँ वंगुलिं खिचायात नियन्त्रणय् कायेमफुनि ।


मेखे ख्वपवासीत धाःसा उम्ह खिचा हाकनं लिहां वयाः आतंक न्यंकीगु खँय् चिन्तित जुयाच्वंगु दु ।

 

 

नेपाल उद्योग वाणिज्य महासंघया अध्यक्ष पशुपति मुरारकां लुँवहः व्यवसायय् अनुगमन यायेमाः जक धाइ, तर अनुगमन यायेत निर्देशिका तकं तयार मजुइक गुकथं अनुगमन याइ धकाः न्ह्यसः तयादीगु दु ।

लुँवहः व्यवसायीतय्सं ताःई न्ह्यवनिसें माग यानाच्वंगु लुँवह सम्बन्धी ऐन आःतक पिहां मवःगु खँ न्ह्यथँसें वय्कलं महासंघय् खुदँया दुने वरिष्ठ उपाध्यक्ष व आः अध्यक्ष जुयागु इलं निसें दयाच्वंगु समस्या गन खः अन हे थानाच्वंगु टिप्पणी यानादीगु खः ।

नेपाल सुनचाँदी व्यवसायी महासंघया निक्वःगु महाधिवेशन व झिंप्यक्वःगु साधारण सभाय् न्ववानादिसें वय्कलं स्वंगू लाख स्वयां अप्वः मनूतय्त रोजगार बियाच्वंगु, दँय् च्यागू अर्बं मयाक राजश्व बीगु थ्व व्यवसाययात सरकारं वास्ता मयानाच्वंगु द्वपं नं बियादीगु खः ।

अथेहे वय्कलं प्रहरीं नं लुँवहः व्यवसायीतय्त ख्यानाच्वंगु खँ नं धयादीगु दु । तस्करी जुयावःगु लुँ धकाः ज्वनीगु अले बिल ज्वनाः वन धाःसां बिल हे खुनाः थ्व तस्करया हे लुँ खः धायेगु यानाच्वंगु द्वपं नं बियादीगु खः ।

थ्व झ्वलय् वय्कलं बैंकं जक मखु सम्बन्धी व्यवसायीतय्त नं लुँ आयात यायेत स्वीकृति बीमाःगु खँ नं धयादीगु खः ।

ज्याझ्वलय् सभापतिया थासं न्ववानादिसें नेपाल सुनचाँदी व्यवसायी महासंघया अध्यक्ष मणिरत्न शाक्यं महासंघपाखें वंगु स्वदँया दुने जूगु थीथी ज्या न्ह्यथनादिसें लुँवहः व्यवसायय् वयाच्वंगु थीथी समस्यायात नं कुलादीगु खः । थ्व झ्वलय् वय्कलं लुँवहः व्यवसाय सम्बन्धी निर्देशिका दयेके बीगु निंतिं महासंघपाखें मदिक्क कुतः जुयाच्वंसां आःतक सरकारं वास्ता मयानाच्वंगु खँ धयादिल ।
अथेहे बैंकतय्सं लुँ आयात यायेगुली मनोमानी यानाच्वंगु, बैंकं लुँ न्यायेत व्यवसायीतय्त समस्या जुयाच्वंगु , कालिगढीतय् समस्या जुयाच्वंगु खँ न्ह्यथनादिल । थ्व झ्वलय् वय्कलं नेपाली कालिगढतय् अभावं यानाः विदेशी कालिगढतय्सं जक दँय् १८ अर्ब दां ज्याला कथं नेपालं ध्यबा पिने यंकाच्वंगु खँ धयादीगु खः ।

उपप्रधान व गृहमन्त्री विमलेन्द्र निधि मूपाहाँ कथं झायादीगु ज्याझ्वलय् नेपाल राष्ट्र बैंकया डेपुटी गभर्नर चिन्तामणि शिवाकोटीं व्यापारीतय् माग कथं बैंकतय्त चिचिकूगु लुँ आयात यायेत नं स्वीकृति बी धुंकूगु खँ धयादीगु खः ।

ज्याझ्वलय् वरिष्ठ उपाध्यक्ष मोहन विश्वकर्मां सुभाय् देछायादीगु खः ।

 

Page 7 of 23
Go to top

Copyright © 2016  nepalbhasa.com. All rights reserved.