All for Joomla All for Webmasters

ने.सं. ११३६ यंलागा अष्टमी

लोडशेडिङ हटे याःम्ह विद्युत प्राधिकरणया प्रमुख कुलमान घिसिङयात असहयोग यानाः लोडशेडिङ कायम हे याकेत स्वःपिं स्वम्ह बोर्ड सदस्यतय्त उर्जा मन्त्रालयं थौं गोरखापत्रय् सुचं छापे यानाः सार्वजनिक रुपं स्पष्टीकरण फ्वंगु दु ।

मन्त्रालयं बिउगु स्पष्टीकरणया पौ बुझे यानाः मकाःगु लिसें परिवारं नं असहयोग याःगु कारणं उर्जा मन्त्रालयं बोर्ड दुजःपिं लक्ष्मण अग्रवाल, मनोज कुमार मिश्र व सुरज लामिछानेयात पत्रिकाय् हे छापे यानाः स्पष्टीकरण माग याःगु खः । यदि उमिसं स्पष्टीकरण बुझे मयात वा यानां नं चित्त बुझे जूगु लिसः मबिल धाःसा मन्त्रालयं उमित चीकेगु तकया कारवाही याये फुगु खँ धाःगु दु ।

नेपाल संवत ११३७ लसताय् नेवाः अमेरिकन दबूपाखें शनिवाः ग्वसाग्वःगु छगू ज्याझ्वःया दथुइ केसरमान ताम्राकारयात हन । सरस्वती महर्जनं त्वाःदेवाय् मत च्याकाः उलेज्या यानादीगु उगु ज्याझ्वः गणेश व शंखधर साख्वाःया किपा पूजा यानाः न्ह्याकूगु खः । सिकागोया मिस्तय्पाखें लसकुस यानाः न्ह्याकूगु ज्याझ्वलय् सभापति श्रावणकुमार श्रेष्ठं दच्छिया गतिविधि व नेपालभाषा, कला व साहित्य बचे यायेत यानाच्वनागु थःपिति गतिविधि बारे ध्वाथुइकादीगु खः ।


ज्याझ्वःया मूपाहां कथं अमेरिकी राष्ट्रपति बाराक ओवामाया एडभाइजरी कमिसन अन एशियन अमेरिकन व प्यासिफिक आइसल्याण्डसया कमिसनर पदय् च्वनादीम्ह मय्जु सजित प्रधान झायादीगु खः । वय्कलं सिकागो नेवाः ल्याः खुगूगुया विमोचन नं यानादिल । वय्कःयात नायःपाखें हना पौ व उपहार नं लःल्हायेगु ज्या जूगु खः । वय्कलं सरकारी पदय् च्वनाः ज्या यानागुया अनुभव नं न्ह्यब्वयादिल । नेवाः अमेरिकन दबूया निवर्तमान नायः व सिकागो नेवाःया सम्पादक केशरमान तुलाधरयात वय्कलं सिकागोय् नेवाःत छधि छप्पं यायेगु ज्याय् ग्वाहालि यानादीगुलिं हनेज्या यानादीगु खः ।

 

माओवादी व कांग्रेसया सरकारं हःगु संविधान संशोधन प्रस्ताव विरुद्ध थौंकन्हय् देय्न्यंकं विशेष यानाः एमाले कार्यकर्तातय् नेतृत्वय् प्रदर्शन जुयाच्वंगु दु । थ्व झ्वलय् उमिगु प्रदर्शन हिंसात्मक नं जुया वःगु दुसा थीथी जिल्लाय् गाडी तोडफोड यायेगु ज्या नं याना हःगु दु ।
थ्व झ्वलय् एमाले कार्यकर्तातय्सं म्हिगः बुटवलया पुष्पलाल पार्कय् नं क्षति याना बिल । एमाले कार्यकर्तातय्सं कम्युनिष्ट पार्टीया संस्थापक पुष्पलाल श्रेष्ठया नामं तयातःगु उगु पार्कया पःखाः थुना बिउगु खः । उगु इलय् पुष्पलालया शालीक नं तोडफोड याइ धकाः प्रहरीं शालीकयात सुरक्षा बीमाःगु खः ।
अथे हे एमाले प्रदर्शनकारीतय्सं वहे पार्कय् कम्युनिष्ट पार्टीया चिं कथं तयातःगु इंचा–मुगःया लोगो नं लिकयाः वांछ्वया बिउगु दु । उमिसं अन इंचा–मुगः वांछ्वयाः उकिया थासय् नेपाःया राष्ट्रिय ध्वाय् तया बिउगु खः । न्हापा महेन्द्रया शालीक तयातःगु उगु थासय् गणतन्त्र वयेधुंकाः शालीक लिकयाः कम्युनिष्ट पार्टीया चिं कथं इंचा–मुगःया लोगो तयेगु ज्या जूगु खः ।

सरकारं हःगु संविधान संशोधनया प्रस्तावप्रति नेवाःतय्सं नं असहमति प्रकट याःगु दु । नेवाः स्वायत्त राज्य मंकाः सघर्ष समितिया थौं च्वंगु मुँज्यां संविधान संशोधनया थ्व प्रस्तावय् नेवाः प्रदेश मदुगु कारणं थुकियात समर्थन याये फइ मखु धकाः निर्णय याःगु खः ।


लिसें थ्व संशोधन प्रस्तावया विरोधय् प्रदर्शन समेत यायेगु निर्णय नं समितिं याःगु दु । संघर्ष समितिया छगू घटक नेवाः देय् दबूया नायः नरेश ताम्रकारं नेपालभाषा टाइम्स यात कनादी कथं थ्वहे वइगु २१ गते मंगलवाः संविधान संशोधन विरुद्ध प्रदर्शन याइगु जूगु दु । वकुन्हु न्हिनय् २ बजे असनय् मुनाः संविधान संशोधन प्रयाप्त मजू, उकियात परिमार्जन यानाः नेवाः प्रदेश दुथ्याकेगु लिसें नेवाः स्वायत्त राज्य मंकाः संघर्ष समितिं न्ह्याका वयाच्वंगु मागयात सम्बोधन यायेमाः धकाः जुलुस पिकायेगु निर्णय जूगु दु ।

उगु जुलुसय् ब्वति कायेत सकल नेवाःतय्त संघर्ष समितिं इनाप नं याःगु दु । आन्दोलनरत संघीय गठबन्धनया म्हिगः च्वंगु मँुज्यां नं संविधान संशोधन प्रयाप्त मजू धासें थुकियात समर्थन मयायेगु निर्णय याःगु खः ।

सरकारं म्हिगः संविधान संशोधनया प्रस्ताव दर्ता यायेवं थौं सुथंनिसें प्रस्तावित ५ नम्बर व ४ नम्बर प्रदेशय् विरोध प्रदर्शन शुरु जूगु दु । म्हिगः दर्ता याःगु संविधान संशोधनया प्रस्तावय् ५ नम्बर प्रदेशया फुक्क हे पहाडी जिल्लात छुटे यानाः ४ नम्बरय् लाकूगु दु ।

प्रदेशया जिल्ला उखे थुखे यानाः प्रदेश टुक्रा यात धकाः थौं ५ नम्बर प्रदेशय् लाःगु बुटवल, दाङय् प्रदर्शन शुरु जूगु खः । थ्व प्रदर्शनय् विशेष यानाः प्रमुख प्रतिपक्षी एमालेया भ्रातृ संगठन अखिल व युवा संघया कार्यकर्तात कुहां वयाच्वंगु दु । थौं थाय्थासय् जूगु कोणसभाय् न्ववासें प्रदर्शनकारीतय्सं संशोधन लित मकाःतले अनिश्चितकाल तक रुपेन्देही बन्द यायेगु ख्याच्वः बिउगु दु ।

५ नम्बर प्रदेशं पहाडी जिल्लात चीकल धकाः उखे दाङय् नं थौं सुथय् प्रदर्शन जूगु दु । एमाले समर्थित विद्यार्थी व युवा संघया कार्यकर्तातय्सं थौं सुथय् १० निसें ११ बजे तक चक्का जाम यानाः प्रदर्शन याःगु खः । ५ नम्बर प्रदेशं प्यूठान, रुकुम थेंज्याःगु जिल्ला टुक्रा यात धाःसा दाङ नं प्रभावित जुइ धासें अन प्रदर्शन याःगु खः । थौं चक्का जाम जक याःगु खःसां कन्हय्निसें दाङ जिल्ला हे बन्द यायेगु ख्याच्वः उमिसं बिउगु दु । ५ नम्बर प्रदेशय् लाःगु पाल्पा, गुल्मी, अर्घाखाँची, कपिलवस्तु, नवलपरासी जिल्लाय् नं संशोधन विरुद्ध प्रदर्शन जुयाच्वंगु सीदुगु दु ।

शनिवाः माओवादी केन्द्र बाहेक मेगु पार्टी व उद्योग वाणिज्य संघ जानाः पाल्पा जिल्ला बन्द घोषणा याःगु दु । येँया माइतिघर मण्डलाय् एमालेया स्वम्ह सांसदत विश्राम चौधरी, दुमन थापा व राधाकृष्ण कँडेलपिंसं प्रदर्शन याःगु दु ।

चाबही गणेद्यः व भैलः द्यःया जात्राया निंतिं ग्वाहालि यानादीपिंत श्री चन्द्रविनायक तथा भैरवनाथ जात्रा समन्वय समितिं सुभाय् पौ देछाःगु दु । म्हिगः गुह्येश्वरी ात्राया झ्वलय् समितिपाखें छगू लसता भ्वय् न्यायेकुसें सुभाय् पौ लःल्हानादीगु खः ।


पशुपति क्षेत्र विकास कोषया सदस्य सचिव गोविन्द टन्डन मू पाहाँ कथं झायादीगु ज्याझ्वलय् जात्राय् ग्वाहालि यानादीपिं थीथी व्यक्तित्व, खलः पुचःयात सुभाय्पौ देछाःगु खः ।
ज्याझ्वलय् आकिवं जात्रा व्यवस्थित यायेगु निंतिं समितिइ न्हूगु पुचः न्ह्याज्यायेत सचिव जितेन्द्र श्रेष्ठं इनाप यानादीगु खः ।

वि.सं. २०६८ या तथ्याङ्क कथं नेपाःया जनसंख्याय् ५ प्रतिशत (१३,२१,९३३) जनसंख्या दुपिं नेवाःत नेपाःया ७५ जिल्लाय् हे न्यनाच्वंगु दुसां दकले अप्वः च्वनाच्वंगु आदिभूमि नेपाःगाः खः । नेपाःगाःया भूमिपुत्र, नेपाः देय्या पर्याय हे नेवाः खः । पृथ्वीनारायण शाहं नेपाःगाः व बाइसे चौबिसे राज्य त्याकाः नेपाः छगू यायेगु अभियान कथं पूर्व मेचीनिसें पश्चिम महाकाली तकया लागा हे नेपाः जुल । थ्व सिबें न्ह्यः नेपाः धाल कि नेपाःगाःयात जक धाइगु खः । अले थनया बासिन्दायात नेवाः धाइगु खःसा बासिन्दां ल्हाइगु भाय्यात नेपालभाषा धाइगु खः । पूर्व मेचीनिसें पश्चिम महाकालीतक हे सभ्य व संस्कृतिया तःमिपिं जाति नेवाः खः । आःतक नं नेपाःया म्हसीका धाल कि नेवाः संस्कृतिया नां वइ ।


आदिबासी भूमिपुत्रपिं न्ह्यागु हे थासय् नं आर्थिक सामाजिक रुपं लिउने लाइगु सत्यया खँ खः । थथे लिउने लाइगुया मू मू कारणत मध्ये थःपिंसं हे थःगु गाः म्हुइगु नं छगू खः । पिनें वःपिं मनूत संघर्षशील, मेहनती व लगनशील जुइसा आदिबासीपिनि थःगु पूर्खाया सम्पत्ति, नये, त्वने, पुनेगु सुख सुविधा व अल्छी नापं म्हो जक मेहनत याइगु जूगुलिं थथे जुइगु खः । मनूत छपलाः न्ह्यःने थ्यंकेगु लागि समस्या नाप ल्वायेगु शक्ति दयेमाः, गुगु शक्ति भूमिपुत्रपिंके म्हो जुइ । नेपाःगाःया भूमिपुत्र नेवाःतय्गु नं समस्या थ्वहे खः कि नयेगु, त्वनेगु व च्वनेगु लागि माःगु पूवनाच्वंगु दु गुकिं यानाः म्वायेगु लागि उलि संघर्ष हे यायेम्वाः । सहज रुपं म्वायेगु लकस तयार जुयाच्वंगु दु । तर पिनें वःपिं मनूतय् नयेगु लागि नसा, च्वनेगु लागि थाय्बाय् व पुनेगु लागि वसः मदुगु कारणं नेपाःगाः दुने स्थापित जुइगु लागि जीवन संघर्षपूर्ण, कष्टकर हे प्रगतीया माध्यम खः ।


छुं नं छगू थासय् छम्ह मनू विस्थापित मजुइकं मेम्ह मनू स्थापित जुइ हे मखु । थ्व खँ पिनें वःपिं गैर नेवाःतय्सं बांलाक थू । उकिं पंचायत ब्यवस्था मदयाः बहुदल वल, राजतन्त्र मदयाः गणतन्त्र वल । सिसि न्ह्याक्व हे बांलाःसां अय्लाः पुलां हे खः । उकिं दक्व गैर नेवाःतय्गु नीति छगू हे खः नेवाःतय्गु फुक्क संरचना स्यंकेगु । विभिन्न कथंया राजनैतिक दलत नीस्वन । भाषिक, जातीय संगठनत राजनैतिक पार्टीतय्गु भातृ संगठन नं म्हुकंचा थें बुया वल । थ्व फुक्क नेवाःतय्त न्हुयाः नेवाःतय्त हे राज्य यायेगु षडयन्त्र जक खः । अले थुकिया हे लिउ लिउ जुइपिं छम्ह निम्ह नेवाःत नं अवसर कायेफइ ला धकाः ब्वाँय् जूपिं जक खः । धाथें हे नेवाःतय्गु हक अधिकारया लागि ज्या याइपिं मखु । न त इमिके योजनात दु । राजनैतिक पार्टीया भातृ संगठन किसिया क्यनेगु वा जक खः । गुगुं पार्टीं ला सीदयेक हे गैर नेवाःतय्त नेवाः संगठनया इन्चार्ज नेवाः राज्यया इन्चार्ज धकाः हे क्वःछिना तल । थुलि जुलं नं नेतातय्गु माकुगु खँय् अविश्वास याये मफु ।


दकलय् न्हापां नेवाः जुजुपिं मल्लतय्सं दयेकातःगु राज्य संरचना ध्वष्ट यायेत नेवाः पण्डितत छ्यलाः कानूनया भ्वं खस भाषां हिले सिधयेकाः सरकारी ज्याय् खस बाहेक नेवाः भाय् छ्यलेगु बन्द याना बिल । वयां लिपा भर्नाकुलरया ब्यवस्था यानाः स्कूल, कलेजय् नेपालभाषा ब्वनेगु ब्यवस्थायात नं राष्ट्रिय शिक्षा नीति दयेकाः लिकयाः ऐच्छिक रुपं तया बिल । ऐच्छिक विषय कथं ब्वने दुगु नं गणित विषयनाप ल्वाकाः विद्यार्थीतय् छनौटय् मलाकेगु षडयन्त्र याना बिल । कलेजय् मानविकी शास्त्रय् ब्वने दुगु ब्यवस्था जक जुयाच्वंगुयात आः वयाः मानविकी ब्वंकेगु कलेजय् नं लिकया बिल । त्रिचन्द्र, रत्नराज्य, सरस्वती कलेजय् ब्वनेगु ब्यवस्था हे लिकया बिल । आः वयाः पद्मकन्या, भक्तपुर व पाटन क्याम्पसय् जक ब्वनेगु दुगुली नं येँय् व भक्तपुर कलेजय् लिकयाः पाटन कलेजय् जक सीमित यायेगु क्वःछीधुंकूगु दु ।


स्कूल स्कूलय् नं गुंगू झिगू तगिमय् ऐच्छिक विषय कथं ब्वने दुगु थासय् नं मुख्य विषय नाप ल्वाकाः ब्वनेगु हे मदयेका बिउगु दुसा, नेपालभाषा ब्वंकेगु लागि आःतक स्कूलय् गनं नं शिक्षक छम्हया नं दरबन्दी ब्यवस्था यानातःगु मदु । वास्तवय् भाषा ल्यंका तयेगु खःसा मचांनिसें हे मातृभाषा अनिवार्य कथं ब्वनेगु ब्यवस्था याये माःगु खः । सरकारया नीति कथं मातृभाषा वा ब्यवसायिक विषय ब्वनेगु ब्यवस्था दःसां दीर्घकाल तक न्ह्याइकथं गनं ब्यवस्था जुयाच्वंगु मदु । दीपक तुलाधरया कुतलं नेवाः बस्ती नेवाः स्कूल अभियान कथं सच्छिं मल्याक स्कूलय् नेपालभाषा छगू नं दुथ्याका तःगु दुसा नेपालभाषा ब्वने दुगु थाय् जगत सुन्दरय् नं नेवाः मचात सिबें गैर नेवाःतय्सं नेपालभाषा ब्वनाच्वंगु दु ।

माध्यमिक स्तरय् छगू निगू थासय् ऐच्छिक विषय कथं म्होसिनं नेपालभाषा ब्वनाच्वंगु दु । प्लस टुलय् गनं नेपालभाषा ब्वंकेगु ब्यवस्था यानाच्वंगु मदु । वंगु दँय् सिक्किमया निशा प्रधान छम्हेसिनं किपूया मंगल उच्च माध्यमिक विद्यालयय् ब्वनाः पास यानाः मोतिलानी सिरपाः शनिवाः काःगु दु ।


थःगु बाहुल्यता दुगु थाय् काठमाडौं महानगरपालिकाय् नेवाः भाय् व धनुषा नगरपालिकाय् मैथली सरकारी ज्याय् छ्यले दइगु ब्यवस्था याःगु इलय् नं निम्ह ब्रम्हूतय्सं सर्वोच्चय् मुद्दा तयाः खारेज याना बिल । आः वयाः छुं दिं न्ह्यः यल उप महानगरपालिकाया तःबहालय् जूगु सार्वजनिक सुनुवाई ज्याझ्वलय् सेवाग्राहीतय्सं अनया कर्मचारीतय्सं नेवाः भाय्या खँ ल्हाइगु कारणं ज्या मछिन उकिं नेवाः भाय् ल्हायेगु बन्द यायेमाल धकाः नेवाःतय्गु नैसर्गिक अधिकारतक नं लाका कायेगु कुतः जुल ।


थ्व धइगु नेवाःतय्गु सहनशीलता, वेवास्ता, थःगु भाषाप्रति कम मायामोह, पराधिन मानसिकताया उपज खः । दच्छिया छकः नेपाल संवत्या इलय् भाषाया अधिकारया लागि तिंन्हुइपिं नेवाःतय्गु भाषिक चेतना मदुगुया उपज हे थौंया अवस्था खः ।
आः वयाः गनं भ्वजय् वंसा मचातनाप खँ ल्हायेमाःसा खस भाय् ल्हायेमाः, नेपालभाषा ब्वंकीगु स्कूलय् मचात भर्ना मयासे बोर्डिङ्ग स्कूलय् हे तयेमाः, भाषिक कार्यकर्तापिनिगु छेँय् तक नं मचातय्त खस भाय् ल्हायेमाः । खस भाय् मल्हासे नेवाः भाय् मचांनिसें स्यन कि लिपा खस भाय् ल्हाय् सइमखु धइगु गलत मानसिकताया कारणं नेवाःतय्गु थुगु अवस्था सिर्जना जूगु खः ।


भाषा उत्थानया दुगःक्वँय् धइगु अर्थतन्त्र खः । अर्थतन्त्र बांलाके फत कि थःगु पहिचान ल्यंकेगु लागि नं भाषाप्रति अनुराग अप्वया वइ । भाषा नाप संस्कृति स्वानाच्वंगु दइ । भाषा व संस्कृति हे जातीय पहिचान खः । भाषिक पतनयात उत्थान यायेगु लागि नेवाःतय्सं बिस्कं नीति योजना दयेकाः न्ह्याः वनेमाःगु खनेदु ।


दकलय् न्हापां दलीय मोहयात त्वःताः मूलतः भाषिक कार्यकर्ता जुइधुंकाः तिनि निगूगु ज्याय् राजनैतिक दलया कार्यकर्ता जुइमाः । भाषिक कार्यकर्ता व भाषा विज्ञ वा प्राज्ञिक दुथ्याःगु समिति दयेकाः योजनात दयेमाः । छुं नं भाषा राजनीतिपाखें अलग जुइ फइ मखु । उकिं सरकारयात भाषा नीति दयेकाः लागू याकेगु लािग निरन्तर दबाव बियाच्वनेमाः ।


दकलय् न्हापां शिक्षा नीतिइ त्रिभाषा नीति नेपाली, मातृभाषा व मेगु छगू यःगु भाषा अनिवार्य रुपं ब्वनेगु ब्यवस्था जुइमाः ।सु जातिया गन गुलि बाहुल्यता दु स्वयाः सरकारी संघसंस्था निकायय् दोभाषेया ब्यवस्था जुइमाः । नेपालभाषा ब्वने धुंकाः मेगु भाषा विषयय् थें हे सरकारी ज्या यायेत मान्यता बिउगु जुइमाः ।


लोकसेवाय् नेपालभाषां नं जाँच बीगु ब्यवस्था जुइमाः ।थुज्वःगु नीति दयेकाः लागू याके फःसा जक नेवाःत व नेपालभाषाया अस्तित्व लिपा तक ल्यनाच्वनी मखुसा भाषाया अनुरागं जक भाषा ल्यंकेमाल धकाः हालां भाषा ल्यनी मखु । गथे सरकारी संस्थाय् नेवाःतय्सं नेवाः भाय् ल्हाइबलय् गैर नेवाः तय्त ज्यामछिं खस भाय् हे मसःपिंत सरकारी ज्या यायेत संस्थाय् वनेबलय् गथे जुइ गबलें बिचाः ला ? नेवाःतय्गु हे जग्गाया रिकर्ड तइगु थाय् गुथि संस्थानय् जागिर नयेत नेवाः ब्वनातःम्ह मजिउ, लिपि ब्वनेमाःगु पुरातत्वय् नेवाः ब्वनातःम्ह मजिउसा नेवाः भाषा छाय् ब्वनी ? थुज्वःगु खँय् बिचाः यानाः राजनैतिक कार्यकर्ता, प्राज्ञिकपिं छथाय् च्वनाः धात्थेंया पुचः दयेकाः न्ह्याःवने फःसा उपयुक्त ई नं थ्वहे खः । थुकिया लागि भाषिक संघसंस्था, राजनैतिक दलया भाषिक पुचःत नापं भाषाय् चिउताः दुपिं प्राज्ञिकपिंत इनाप यानाच्वना ।

प्रमुख प्रतिपक्षी एमालें साथ बी मखु धाःसां नं सरकारपाखें कन्हय् संविधान संशोधनया प्रस्ताव दर्ता यायेत्यंगु खः । तर दुई तिहाई बहुमत मदयेकं पास मजुइगु थ्व प्रस्ताव छुं जुयाः विफल जुल धाःसा सरकार छु जुइ ? प्रधानमन्त्रीं राजीनामा बी मालीगु अवस्था वइ लाकि थ्वहे सरकार निरन्तर जुइ ? प्रधानमन्त्री दाहालं थुगुसी थुकिया बारे समेत बिचाः यानादीगु खँ सीदुगु दु ।


थ्वहे बारे खँ ल्हायेत वय्कलं कन्हय् सुथय् पार्टीया हेडक्वार्टर बैठक सःतादीगु दु । संविधान संशोधनया प्रस्तावयात प्रमुख प्रतिपक्ष एमालें साथ मबिउसां नं संसदय् दुई तिहाई बहुमत हयेगु आँट प्रधानमन्त्रीं यानादीगु दु । एमाले अलग जुयाः नं संसदय् दुथ्याःगु चिचीधंगु दलत छथाय् च्वन धाःसा दुई तिहाई बहुमत खाः वइगु सम्भावना दुगुलिं हे प्रधानमन्त्रीं थ्व पलाः ल्ह्वंगु सूत्रया दावी दु ।

छुं जुयाः राप्रपा, मधेसी मोर्चा व मेगु चीधंगु दलतय् समर्थन काये मफुत धाःसा संशोधन प्रस्ताव विफल नं जुइफु । अज्याःगु अवस्थाय् पार्टीपाखें छु निर्णय याये माली धइगु बारे गम्भीर छलफल यायेत वय्कलं हेडक्वार्टरलिसे सहलह यायेत्यंगु खँ धाःगु दु ।

सत्तारुढ पार्टीत माओवादी व कांग्रेस जानाः तयार याःगु संविधान संशोधनयात एमालें अस्वीकार यायेवं आः एमालेयात त्वःताः जूसां संशोधनया प्रस्ताव न्ह्यःने यंकेत्यंगु खँ सीदुगु दु ।
निगू राप्रपाया एकीकरण लिपा थ्व पार्टी लगायत मेगु चिचीधंगु दलत छथाय् च्वन धाःसा दुई तिहाई खाः वइगु खने दुगुलिं आः एमालेयात त्वःताः जूसां संविधान संशोधनया प्रस्ताव न्ह्यःने यंकेगु तयारी शुरु जूगु खँ सूत्रं धाःगु दु ।


निगू राप्रपाया दथुइ म्हिगः जूगु एकीकरणया घोषणा सभाय् न्ववासें अध्यक्ष कमल थापां मधेसी मोर्चां ल्ह्वनाच्वंगु मागयात समाधान मयाःतले स्थानीय चुनाव सम्भव मजुइगु बिचाः प्वंकादीगु खः । वय्कलं मोर्चाया माग कथं जुइत्यंगु संविधान संशोधनया प्रस्तावय् थःपिनिगु छु भूमिका जुइ धइगु खँ धाःसा स्पष्ट यानामदी । अथे खःसां सत्तारुढ पार्टीया थीथी च्यानलतय्सं वय्कःयात स्वापू तयाः संविधान संशोधनया प्रस्तावय् समर्थन याये माल धकाः खँ धाःसा न्ह्याकेधुंकूगु जानकारी नं सूत्रं बिउगु दु ।


म्हिगः वालुवाटारय् च्वंगु स्वंगू तःधंगु दलया शीर्ष नेतातय् बैठकय् संविधान संशोधन बारे खँ मिले मजुइवं न्हूगु समीकरणया खोजी जूगु खः ।
थ्व झ्वलय् माओवादीपाखें संसदय् दुथ्याःगु चीधंगु दलतलिसे नं नियमित स्वापू तयाः संविधान संशोधनय् समर्थन कायेत स्वयाच्वंगु खँ नं सूत्रं धाःगु दु ।

‘संशोधनयात संघीय गठबन्धनया नं समर्थन मदु’

माओवादी व कांग्रेसं थौंकन्हय् न्ह्यःने हयाच्वंगु संविधान संशोधनया प्रस्तावयात एमालें विरोध यानाच्वंगु ला ख हे खत, उकियात स्वयम् संविधान संशोधनया माग यानाच्वंगु संघीय गठबन्धन आवद्ध पार्टीतय्सं नं समर्थन मयाःगु खँ सीदुगु दु ।
गठबन्धन आवद्ध संघीय समाजवादी फोरमया सहअध्यक्ष राजेन्द्र श्रेष्ठं ‘नेपालभाषा टाइम्स’ लिसे खँ ल्हासें माओवादी व कांग्रेसं तयार याःगु थ्व संशोधन प्रस्तावय् थःपिंसं माग याना वयाच्वनागु खँ मदुगु कारणं उकी थःपिंसं नं समर्थन याये फइगु सम्भावना मदु धयादिल ।

वय्कलं धयादिल, ‘एमाले मदुसां दुई तिहाई मत वइगु सम्भावना ला दु, तर थ्व संशोधनयात जिमिसं हे मत बीगु खँ जुइ मखु, अले गय् यानाः दुई तिहाई वइ ?’
थःपिंसं १० प्लस १ प्रदेश दुगु राज्य पुनर्संरचना जुइमाः धकाः तयाच्वनागु प्रस्तावयात थ्व संशोधनं नं सम्बोधन मयाःगु बिचाः वय्कलं तयादिल ।

 इच्छाशक्ति म्हो जूगु कारणं हे मिस्त थः हे उद्योग व्यवसायी वये मफयाच्वंगु खँ धाःगु दु । यल उद्योग वाणिज्य महासंघया ग्वसालय् सोमवाः जूगु मिसा सशक्तिकरणया निंतिं मिसापिं उद्यमी–व्यवसायीलिसे जूगु अन्तक्र्रिया ज्याझ्वलय् न्ववासें नेपाल उद्योग वाणिज्य महासंघया महिला उद्यमी विकास समितिया सभापति कमला श्रेष्ठं थ्व खँ धयादीगु खः ।


ज्याझ्वलय् न्ववानादिसें वय्कलं मिस्तय् उद्योग व्यवसाय् वयेमफयाच्वंगु दकलय् तःधंगु कारण उमिगु थःगु इच्छाशक्ति हे कमजोर जूगुलिं खः धयादिल । मिस्त उद्योग–व्यवसायय् वयेगु निंतिं मेगु यक्व हे चुनौति दु तर आःया इलय् मिस्त नं शिक्षित जूगुलिं थःगु हे उद्यम व्यवसाय यानाः मिसा सशक्तिकरणपाखे न्ह्याः वनेमाः धयादिल ।


ज्याझ्वःया उद्देश्य बारे कनेगु झ्वलय् यल उद्योग वाणिज्य संघया मिसा समितिया संयोजक लजना श्रेष्ठं यलय् ज्या यानाच्वंपिं उद्यमी व्यवसायीतय् ल्याखय् मिस्त मुक्कं ८ प्रतिशत जक दुगु खँ न्ह्यथँसें मिस्तय्त नं उद्योग व्यवसायय् न्ह्यःने हयाः मिसा सशक्तिकरण यायेगु निंतिं थुगु ज्याझ्वःया ग्वसाः ग्वयागु जानकारी बियादिल ।


ज्याझ्वलय् महिला उद्यमी फोरमया अध्यक्ष रिता भण्डारी, साना तथा घरेलु उद्योग कार्यालय यलया प्रमुख उद्यमी अधिकृत रोशनी कुमारी श्रेष्ठ व सन्तोषी रानां कार्यपत्र न्ह्यब्वयादीगु खः ।
महिला उद्यमी विकास समितिया सभापति श्रेष्ठं उलेज्या यानाः न्ह्याःगु ज्याझ्वलय् संघया अध्यक्ष सविन श्रेष्ठं लसकुस यानादीगु खः ।

Page 6 of 23
Go to top

Copyright © 2016  nepalbhasa.com. All rights reserved.