All for Joomla All for Webmasters

ने.सं. ११३६ यंलागा अष्टमी

थौंकन्हय् सवारी साधनया लाइसेन्स कायेगु लागिं चान्हंनिसें हे लाइन च्वनेमाःगु समस्यायात ध्यानय् तयाः आः यातायात व्यवस्था विभागं अनलाइनपाखें हे लाइसेन्सया फाराम भरे यायेगु व्यवस्था यायेत्यंगु दु । आः वइगु छुं न्हि लिपा हे थ्व व्यवस्था यायेत्यंगु खःसा उकिया लागिं तयारी नं जुयाच्वंगु खँ सीदुगु दु ।


अनलाइन फाराम भरे यायेगु लागिं आवश्यक शफ्टवेयर जडानया ज्या जुयाच्वंगु खँ नं धाःगु दु । थ्व जडानया ज्या क्वचायेवं हे अनलाइन मार्फत फारम भरे याये फइ । अनलाइनं फाराम भरे याःसां लिखित जाँच व ट्रायल बीगु ज्या धाःसा येँय् हे जुइ ।
अनलाइन फाराम भरे यायेगु गथे ?


अनलाइनं फाराम भरे यायेत दकलय् न्हापां यातायात व्यवस्था विभागया वेबसाइट डब्लुडब्लुडब्लु डट डिओटिएम डट जीओभी डट एनपी चायेकेवं अन पिनेसं हे ‘अनलाइन सवारी चालक अनुमति पत्र’ धइगु खनेदइ । अन क्लिक् यायेवं भरे याये माःगु आवश्यक विवरणत खने दइ । फुक्कं विवरण भरे यानाः सेन्ट यायेगु । सेन्ट एसेप्ट जुइवं आवेदकयात छपाः भ्वं वइ । उकियात प्रिन्ट यानाः कायेगु । उकी फोटो व फिंगरप्रिन्टया वनेगु ई बियातःगु दइ । बियातःगु इलय् हे उगु भ्वं ज्वनाः सम्बन्धित कक्षय् वनेगु अन हानं फोटो र फिंगरप्रिन्ट कायेवं वयां कन्हय् कुन्हु हे जाँचय् सहभागी जुइफइ ।

च्यागूगु शताब्दीइ निर्माण जूगु ऐतिहासिक मरु सतः (काष्ठमण्डप) या जग खुल्ला याःगु लसताय् लाकाः थौं तःजिक सप्त विधानोत्तर पुजा जुयाच्वंगु दु । थौं सुथंनिसें सनिलय् तकं न्ह्याइगु थ्व पुजाय् आपालं गुरुपुरोहित व स्थानीय मनूतय्सं ब्वति कयाच्वंगु दु । पुजा ज्याझ्वः जुयाच्वंगुलिं मरु लागाय् दुहां वनीगु फुक्कं लँ थौैं बन्द याना तःगु दु । मरु सतः जीर्णोद्धार बारे जन चेतना थनेगु नं ताः तयाः थ्व पुजाया ग्वसाः जूगु खः ।


(किपा- तेज महर्जन/नेपालभाषा टाइम्स)

 

 

 

 

 

 

 
बु.सं. २५५७ व बु.सं. २५५८ स ‘सन्ध्या टाइम्स’ न्हिपती पिदंगु बुद्ध धर्म सम्बन्धी उत्कृष्ट च्वसुयात बीगु पंचवीरसिंह सिरपाः म्हिगः लःल्हात । मूपाहां जनकवि दुर्गालाल श्रेष्ठं सिरपाः त्याकादीपिं अमृतलक्ष्मी तुलाधर, अशोकानन्द वज्राचार्य, सुनिता मानन्धर व मणिरत्न शाक्यपिंत सिरपाः लःल्हानादीगु खः । युवा बौद्ध समूहया नायः त्रिरत्न तुलाधरया सभापतित्वय् जूगु उगु ज्याझ्वलय् सिरपाः दाता पंचवीरसिंह तुलाधर लिसें निर्णायकपिं अमिता धाख्वा, डा. गौतमवीर वज्राचार्य, लोचनतारा तुलाधरपिंसं नं नुगःखँ तयादीगु खः । ज्याझ्वलय् डा. केशवमान शाक्य व सम्पादक सुरेश मानन्धरंपिंसं नं न्ववानादीगु खः ।

à अमृतलक्ष्मी तुलाधर
धर्मकीर्ति विहारया पुलांम्ह उपासिका मय्जु अमृतलक्ष्मी तुलाधर पुलां पुस्ताया छम्ह प्रतिनिधि च्वमि खः । थौं ७४ दँया बैंशय् थ्यनाच्वंम्ह वय्कलं थःगु इलय् झिंन्यादँ दुबलय् एसएलसी पास यानाः पद्मकन्या क्याम्पसय् आइए नं पास यानादिल । लिपा गृहस्थी जीवनय् तक्यँसेंलि ब्वनेगु त्वःतादीगु खःसां नं थःगु स्वअध्ययन धाःसा त्वःफिकामदी ।
धर्मकीर्ति विहारय् लय् न्याक्वः जुइगु बुद्धपुजाय् कनीगु बुद्ध उपदेशं प्रभावीतम्ह वय्कलं भन्ते गुरुमांपिनिगु उपदेश एकचित्तं न्यना वयाःलि छेँय् थ्यंकाः च्वयादी । बुद्ध शिक्षा कथं झीगु समाजया व्यवहार हिला यंकेमाःगु खँ हे वय्कःया च्वसुया मू उद्देश्य खः । वय्कलं थम्हं च्वयागु च्वसु पूज्य अश्वघोष महास्थविरयात क्यनेगु यानाः माःथाय् माःकथं भिंकेगु ज्या यानादी ।
वय्कःया च्वसु धर्मकीर्ति बौद्ध मासिक, उदाय समाः ख्वाःपौ, सन्ध्या टाइम्सय् इलय्ब्यलय् पिदं । धम्मावती गुरुमांया उपदेश न्यँन्यं ‘झी नेवाःत’ नांगु न्हापांगु च्वसु च्वयादीगु खः । झी नेवाःतसें भ्वय् व विधि व्यवहारय् जक ध्यबा फुकाच्वन धइगु खँ कुलाः उगु च्वसु च्वयादीगु खः । ‘धर्म यायेत ज्ञां दयेकेमाः’, ‘देय्यात ल्वःगु इहिपा’, ‘सम्यक चिन्तनं बिउगु सुवर्ण अवसर’ आदि सहित वय्कःया थ्यंमथ्यं स्वीपु पिदनेधुंकूगु दु । थुगुसी वय्कःयात ‘आकासय् ब्वइपिं झंगःतय् पलाःख्वाँय् सी दइमखु’ नांगु च्वसुया निंतिं बु.सं. २५५७या पंचवीरसिंह सिरपाः लाःगु खः ।
पिनें चर्चित रुपं छुं ज्याखँय् कत्ताना मच्वंसां नं छेँ दुने च्वनाः नं अध्ययन, चिन्तन व ध्यान भावना यायां थुकथं च्वसु च्वयाः थःगु प्रतिभा प्रस्फुटन यानाच्वंम्ह अमृतलक्ष्मी तुलाधर गृहिणीपिनि दथुइ चर्चा यायेबहम्ह, विहारय् वना थें बुद्ध शिक्षा नाला कयाच्वंम्ह व्यक्तित्व खः ।
à सुनिता मानन्धर
थौंकन्हय् जगतसुन्दर ब्वनेकुथिइ आखः ब्वंका वयाच्वनादीम्ह, सन्ध्या टाइम्सय् ‘जिमि बाज्यां मुलय् तयाः कनातःगु बाखं’या स्तम्भकार सुनिता मानन्धर छम्ह नेवाः भाय्या न्हू पुस्ताया प्रतिनिधि च्वमि खः । नेपालभाषाय् एमए, बुद्धिष्ट स्टडिजय् पीजीडी, नेपाल बौद्ध परियत्ति शिक्षाया परियत्ति सद्धम्म ‘कोविद’ । वय्कः मय्जुया च्वसा बौद्ध साहित्यय् मदिक्क न्ह्यानाच्वंगु दु । वय्कलं गुलि च्वया च्वनादिल धइगु खँ म्हुतुं धयाच्वनेम्वाः । थुगुसी स्वक्वःखुसी त्याकादीगु ‘पंचवीरसिंह सिरपा’लं हे यच्चुक क्यनाच्वंगु दु । ने.सं. ११२८, ने.सं. ११३२ व ने.सं. ११३५ स यानाः वय्कलं पंचवीरसिंह सिरपाः स्वक्वः तक त्याकादीगु जुल ।
जापान हिकिभाया दुजः, लेखन प्रतिभाया तःमिम्ह सुनिता मानन्धर थीथी इलय् थीथी सिरपालं छायेपी धुंकूगु दु — चैन लाकौल सिरपाः (ने.सं. ११२६), लुम्बिनी नेपाली बुद्ध धर्म सोसाइटी व युवा बौद्ध समूह येँया ग्वसालय् जूगु निबन्ध प्रतियोगिताय् स्वक्वःतक ने.सं. ११२७ व ने.सं. ११२९ स लिउ व ने.सं. ११३२ य् न्हाप सिरपाः, शेरलक्ष्मी सिरपाः निक्वःतक ने.सं. ११२७ व ने.सं. ११२८, ईलोहं एल्भिस जोशी सिरपाः (ने.सं. ११२८), शेरबहादुर लक्ष्मीकुमारी सिरपाः न्हाप ने.सं. ११२९, धर्मादित्य धर्माचार्य सिरपाः ने.सं. ११२९, चिन्तनशील युवा समूहया ग्वसालय् जूगु बौद्ध वत्तृmत्वकला पर्वय् उत्कृष्ट थुकथं थीथी इलय् थीथी पत्रिकाय् च्वसु च्वयादीम्ह वय्कःया आतक स्वंगू कृति प्रकाशनय् वयेधुंकल । तुंथिइ कुतुंवंम्ह खिचा (मचाबाखं), बुद्धशिक्षा नाप सामाजिक सरोकार व अजाअजिं कनातःगु बाखं ।
à अशोकानन्द वज्राचार्य
त्रिभुवन विश्व विद्यालयपाखें एमएस्सी, बुद्धिष्ट फिलोसफीइ एमए यानादीम्ह वय्कः थौंकन्हय् लोटस् एकेदेमि कलेजया लेक्चरर खः । इलय्ब्यलय् बौद्ध च्वसु च्वया वयाच्वनादीम्ह वय्कः लुम्बिनी बौद्ध विश्व विद्यालयया सिनेटर खः । वय्कः थीथी बौद्ध विहार, बौद्ध संस्थाय् थीथी पदय् च्वनाः बुद्ध धर्म प्रचार प्रसारया ज्याय् सदां न्ह्यचिला च्वनादीम्ह खः । त्रिरत्नकीर्ति विहार किपू, सुलक्षण कीर्ति विहार च्वबहाः, बीएलआइए नेपाल च्याप्टरया आजीवन दुजः वय्कः धर्मोदय सभाया सचिव अले कुलेश्वर बुद्ध विहारया अध्यक्ष नं जुयादीधुंकल ।
आनन्द भुवन विहारपाखें अमृतोपदेश पुरस्कार २०६७ त्याकादी धुंकूम्ह वय्कलं बु.सं. २५५७या पंचवीरसिंह सिरपाः त्याकादीगु खः ।
à मणिरत्न शाक्य
थौंकन्हय् काठमाडौं युनिभर्सिटीया डिपार्टमेन्ट इन्भाइरोमेन्ट एण्ड इन्जिनियरिङय् भिजिटिङ प्रोफेसर जुयाच्वनादीम्ह मणिरत्न शाक्यजु बुद्ध धर्म व विज्ञानया स्वापू कुलाः थःगु च्वसा न्ह्याका वयाच्वनादीम्ह व्यक्तित्व खः । नेपाल सरकारया जल तथा मौसम विज्ञान शाखाया उपनिर्देशक जुयादीधुंकूम्ह वय्कः थौंकन्हय् नागरिक उड्डयन प्राधिकरण व थीथी हवाई सेवाया पाइलटतय्त मौसम सम्बन्धी तालिम बीगुली व्यस्त जुयाच्वनादीगु दु । त्रिभुवन विश्वविद्यालयापाखें वायुमण्डलीय भौतिकशास्त्र विषयय् एमएस्सी यानादीम्ह वय्कः महेन्द्र विद्याभूषण पदक ‘ख’पाखें विभूषितम्ह व्यक्तित्व खः । वय्कःया वैज्ञानिक च्वसु व बुद्ध धर्म सम्बन्धी च्वसु गोरखापत्र, नागरिक, सन्ध्या टाइम्स आदि थीथी पत्रिकाय् पिदनाच्वंगु दु ।
वय्कलं पंचवीरसिंह सिरपाः त्याकादीगु थ्व निक्वःखुसी खः (बु.सं. २५४८ व बु.सं. २५५८ स) । वय्कः थेंज्याःपिं वैज्ञानिक व्यक्तित्वपाखें हाकनं हाकनं बुद्ध धर्म सम्बन्धी च्वसु ब्वने दइगु आशा याये ।
न्ह्यब्वःम्ह ः लोचनतारा तुलाधर

 

स्वनिगःया नांजाःगु मरि पसः ‘स्वीट केभ’या न्हूगु आउटलेट येँया बसन्तपुली चायेकूगु दु । वंगु यःमरि पुन्हि निसें बसन्तपूया डिडिसि न्ह्यःने लाय्कू रेस्टुरेन्ट तयातःगु भवनय् चायेकूगु थ्व शाखाय् उलेज्याया लसताय् पुस ४ गतेतक २५ प्रतिशत छुट बियाच्वंगु दु ।
स्वीट केभया प्रबन्धक सुमन मानन्धरं स्वनिगःया थीथी थासय् स्वीट केभया शाखा विस्तार यायेगु योजना कथं बसन्तपुली न्हूगु आउटलेट चायेकागु खँ कनादिल । बसन्तपूया आउटलेटय् परम्परागत नेवाः मरिचरि लिसें इन्डियन मरि, बेकरी, डेरीया ज्वलंत नं दइगु खँ वय्कलं कनादिल ।


अथेहे थुगु शाखापाखें नं भेज क्याटरिङ्ग, लञ्च बक्स तयार यायेगु निसें ब्याहाया इलय् लाखा बीत माःगु फुक्क ज्वलं तयार यानाः फ्रि डेलिभरी तकं यानाच्वंगु खँ नं प्रबन्धक मानन्धरं कनादिल । स्वीट केभपाखें ब्याहाया निंतिं फुक्क तयारी यायेगु कथं वेडिङ्ग प्लानिङ्गया ज्या नं यानाच्वंगु खँ वय्कलं कनादीगु दु ।

यदि आः वइगु पुसनिसें चैत महिना तक प्यला लोडशेडिङ चीके फत धाःसा वयां लिपा देशय् लोडशेडिङ धइगु हे मजुइगु दावी नेपाल विद्युत प्राधिकरणया निर्देशक कुलमान घिसिङं धयादीगु दु । प्राधिकरणं मंसिर लछि लोडशेडिङ यायेगु हे मखु धकाः प्रतिवद्धता प्वंकू कथं मंसिरय् लोड शेडिङ मजुल । आः न्ह्यःने वयाच्वंगु पुसं निसें चैत महिना तक नं लोडशेडिङ मदयेकेगु लागिं प्राधिकरणं कुतः यानाच्वंगु दु धासें घिसिङं उकिं थुगुसी प्राधिकरणं लोडशेडिङया तालिका हे मदयेकेगु निर्णय यानागु जानकारी नं बियादिल ।


उखे प्राधिकरणया पुलांम्ह निर्देशक मुकेश काफ्लें यदि फागुन–चैतय् नं धाथें लोडशेडिङ मजुल धाःसा थः छुं नं कथंया सार्वजनिक पदय् धइगु हे च्वने मखु धकाः घिसिङयात चुनौती बियादीगु दु । काफ्लें नं येँय् छगू पत्रकार सम्मेलन हे यासें लोड शेडिङ हटे याये फइ मखु धकाः थ्व चुनौती बियादीगु खः । उर्जा मन्त्री जनार्दन शर्मां काफ्लेयात चीकाः घिसिङयात कार्यकारी निर्देशक दयेकूगु खः ।

एमाले अध्यक्ष केपी शर्मा ओलीया जीवनीयात कयाः फिल्म दयेकीगु जूगु दु । दिपेन्द्र प्रसाद दाहालं निर्देशन याइगु थ्व फिल्मय् लिपांगु ईया दृश्यय् धाःसा अध्यक्ष ओली थम्हं हे अभिनय यानादीगु खँ नं धाःगु दु ।

‘रातो सूर्य’ नां तयाः दयेकीगु थ्व फिल्मय् ल्याय्म्हम्ह ओलीया भूमिका धाःसा कलाकार अनुपम शर्मां म्हितादी । १६ निसें ४५ दँ दुम्ह ओलीया भूमिका शर्मां म्हितीसा ४५ निसें ६५ दँ तकया भूमिका ओली थम्हं हे म्हितादी ।


फिल्मय् शुटिङया लागिं ओलीं झिन्हु ई बीमाःगु जुयाः वय्कलं ई बियादीवं हे शुटिङ शुरु याना छ्वयेगु खँ निर्देशक दाहालं कनादीगु दु ।

संसदय् दर्ता जुयाच्वंगु संविधान संशोधनया प्रस्तावयात ‘स्थगित’ यानाः आः स्थानीय निकायया चुनावय् निं वनेगु धकाः तःधंगु स्वंगू दल दथुइ सहमति जुल धकाः पिहां वःगु समाचारयात कयाः मधेसी मोर्चां आपत्ति प्वंकूगु दु ।
तःधंगु स्वंगू दलया थ्व सहमति बारे छलफल यायेत थौं तमलोपाया ज्याकुथी मधेसी मोर्चाया बैठक च्वनेत्यंगु दु ।


सूत्रतय्सं धाःकथं थ्व सहमति बारे मधेसी मोर्चां प्रधानमन्त्री पुष्पकमल दाहाल व नेपाली कांग्रेसया सभापति शेरबहादुर देउवायात स्वापू तयाः न्यनेकने यायेगु कुतः यानाच्वंगु दु । प्रम दाहाल थौं सिरहा वनाच्वंगुलिं नापलाये फयाच्वंगु मदु ।
सत्तारुढ दल माओवादी व कांग्रेसं प्रमुख प्रतिपक्षी एमालेलिसे जानाः संविधान संशोधनया प्रस्तावयात छखे लाकाः स्थानीय चुनावय् ध्यान बीत्यंगु द्वपं नं मोर्चां बिउगु दु । यदि समाचारय् वः थें तःधंगु दलत चुनावय् निं वनेत्यंगु खःसा अज्याःगु चुनाव थःपिंत स्वीकार्य मजुइगु खँ नं मोर्चां धाःगु दु ।


म्हिगः वालुवाटारय् तःधंगु स्वंगू दलया शीर्ष नेतातय् दथुइ जूगु वार्ताय् थज्याःगु सहमति जूगु खँ पिहां वःगु खः। मोर्चां यदि सरकारं संविधान संशोधनया हाल दर्ता जुयाच्वंगु प्रस्तावयात छुं भचा परिमार्जन यानाः पारित यात धाःसा वयां लिपा थःपिं स्थानीय निकायया चुनावय् नं वये फइगु संकेत बिउगु दु ।


स्वंगू तःधंगु दल जानाः आःयात स्थानीय निकायया चुनाव निं यायेगु, बाँकी चुनावया लागिं वर्तमान संसदया म्याद दछि थपे यायेगु व उकी एमालेयात नेतृत्व याके बीगु भागबन्डाया सहमति जुयाच्वंगु द्वपं नं मोर्चां बिउगु दु । यदि संशोधनयात निष्क्रिय यानाः चुनावय् वनेत्यंगु खःसा मोर्चां न्हूगु रणनीति दयेकीगु खँ नं धाःगु दु ।

थौं ज्यापु दिवसया लसताय् येँय् तःजिगु र्‍याली पिहां वल । थुगुसीया ज्यापु दिवस ग्वसाः खलः कमलादि गणेश जमःमि गुथिया ग्वसालय् कमलादिं हे ¥याली शुरु जूगु खः । थीथी बाजं व झाँकी सहित पिहां वःगु थ्व ¥याली बसन्तपुली थ्यंकाः सभाय् परिणत जुइ । सभाय् प्रधानमन्त्री पुष्पकमल दाहाल मूपाहां कथं झायादी । ज्याझ्वलय् समाजया थीथी ख्यलय् थीथी योगदान दुपिंत हनीगु नं ग्वसाः दु ।

किपा फुक्कं- तेज महर्जन/नेपालभाषा टाइम्स

 

 

 

 

 

 

 

 

 

 

 

ज्यापु संस्कृति विकास कोषया आव्हानय् थुगुसी कमलादि गणेश जमःमि गुथिया संयोजनय् ज्यापु दिवस न्यायेकीगु जूगु दु । कन्हय् जुइगु ज्याझ्वलय् प्रधानमन्त्री पुष्पकमल दाहालयात मूपाहां कथं ब्वना तःगु दु । कमलादि गणेद्यःया थासं सांस्कृतिक ¥याली पिकयाः बसन्तपुली थ्यंकाः सभा याइगु ग्वसाः दु । उगु हे ज्याझ्वलय् भाषा आन्दोलनया न्ह्यलुवा व मानवाधिकारवादी नेता पद्मरत्न तुलाधरयात ‘ज्यापु प्रज्ञा’ सम्मान लःल्हाइगु ग्वसाः दु । नापं समाजया थीथी ख्यलय् योगदान दुपिंत थीथी सम्मान बीगु नं ग्वसाः दु ।


अथेहे यःमरि पुन्हिया लसताय् नेवाः पत्रकार राष्ट्रिय दबू येँ कचापाखें पम्परागत ढंगं त्यःछिंत्यः फ्वं वनीगु जूगु दु । कन्हय् न्हिनय् ३ बजे थनया इतुम्बहालय् मुनाः थ्व त्यःछिंत्यः फ्वनेगु शुरु जुइ । अनंलि किलागः, भ्याःचाद्यः, वंघः, मखं, मरु, चिकंमुगः, न्हूघः, क्वहिति, भिंद्यःत्वाः, मरु, यट्खा, त्यंगः, क्षेत्रपाटी, स्वांछपु गणेद्यः, थँहिति, नःघः, थाय्मरु, न्हाय्कंत्वाः जुयाः असनय् थ्यंकाः क्वचायेकी । रुटय् लाःपिंसं फुगु ग्वाहालि यानादीत नं पत्रकार राष्ट्रिय दबुलिं इनाप याःगु दु ।

 

नेपाली कांग्रेस व माओवादी केन्द्र जानाः हःगु संविधान संशोधनया प्रस्ताव करिब करिब प्mलप शो जू वनीगु अवस्थाय् थ्यन धाःसां जिउ । थ्वयात थौंकन्हय् सुनां नं हिट यानाच्वंगु दुसा व प्रमुख प्रतिपक्षी एमाले व छुं पहिचान विरोधी नेतातय्सं जक यानाच्वंगु दु । संसदय् दर्ता जूगु संविधान संशोधनया प्रस्तावयात आदिवासी जनजाति व मधेसी दलतय्सं पूवंक हे अस्वीकार याःगु कारणं उकिया बारे आः व्याख्या याना च्वनेमाःगु आवश्यकता मंत । अथे खःसां उगु संशोधन प्रस्तावया विरोध यायेगु त्वहः तयाः थौंकन्हय् पश्चिम नेपाःया छुं पहाडी जिल्लाय् गुगु मदिक्क प्रदर्शन जुयाच्वन, उकियात धाःसा मखंछु याना वनेगु सखे उचित जुइ मखु । सदनय् दर्ता जुयाच्वंगु संशोधन प्रस्ताव राजनीतिक जक मखु अंकगणितीय ल्याखं नं असफल जुइगु जुल धइगु खँ प्रस्ट जुइधुंकाः नं प्रदर्शन धाःसा जारी हे जुयाच्वन । आखिर थ्व प्रदर्शनं बीत स्वयाच्वंगु सन्देश छु खः, आः उकी ध्यान वने माःगु खनेदु ।


प्रदेश दयेकेबलय् पहाड व तराई छुटे याये मजिउ धइगु माग तयाः पिहां वयाच्वंगु थ्व ‘राष्ट्रवादी’ ¥यालीया फ्रन्ट लाइनय् च्वना वइपिं नेतातय् ख्वाःपाः स्वयादिसँ, फुक्क हे पहाडे जक । थ्व ला ५ नम्बर प्रदेशया पहाडेतय्गु जक प्रदर्शन जुल । थुकी ५ नम्बर प्रदेशया मधेसीत ग्व ? दछि न्ह्यः मधेसय् मधेसीतय्सं जक पिकाःगु प्रदर्शनया काउन्टरय् पिहां वःगु पहाडेतय्गु प्रदर्शन खः लाकि मखु थ्व ? यदि मधेसीतय्सं पिकाःगु प्रदर्शन राष्ट्रघाती खःसा पहाडेतय्सं पिकाःगु प्रदर्शन जक गय् राष्ट्रवादी जुइ ?


५ नम्बर प्रदेशया पहाडी व तराई भूमि छुटे याये मजिउ धइगु खःसा अज्याःगु ज्याया लागिं ५ नम्बर प्रदेशय् च्वनीपिं मधेसी जनताया सहमति कायेमाः लाकि म्वाः ? ५ नम्बरया पहाडेतय्गु निर्णय हे मधेसीया नं निर्णय जुइ फइ मखु ।


पहाडी जिल्लापाखें छुटे जुयाः अलग्ग प्रदेश दयेकेगु मधेसी जनताया माग खः । अथे यानाः प्रदेश दयेके फत धाःसा अन थःपिनिगु हे शासन जुइ व प्रदेशया विकास याये फइ धइगु उमिगु दावी खः । तर पहाडीतय्सं अथे याके बी मखु धइगु तर्क तयाः थ्वप्रदर्शन यानाच्वन । उकिं थ्व प्रदर्शन धइगु थःगु अधिकार कायेगु लागिं जुयाच्वंगु प्रदर्शन मखु, बल्कि मेपिंत अधिकार बी मजिउ धकाः जुयाच्वंगु प्रदर्शन खः । थःत माःगु अधिकारया दावी यायेगु हक सकसिकें दु । तर कर्पिंत अधिकार बी मते धकाः माग यायेगु हक सुयाकें मदु । 

५ नम्बर प्रदेशं तराईया जिल्ला छाय् छुटे जुइ मजिउ धइगु खँय् पहाडेतय्गु छगू हे जक तर्क दु, कन्हय् थ्व भूमि भारतय् ल्वाकज्याः वनी । थ्व तसकं प्रतिगामी तर्क खः । तराईया अलग्ग प्रदेश दयेकेमाः धाइपिंत राष्ट्रघाती धकाः द्वपं बीगु तर्क खः थ्व । यदि अथे हे खःसा चीनलिसे सीमा स्वाःगु पहाडी भूमि जक कन्हय् चीनय् ल्वाकज्याः मवनी धइगु छु ग्यारेन्टी ? सम्पूर्ण नेपाली राष्ट्रवादया ठेकेदार पहाडीत जक खः ला ?


तराई व पहाडी जिल्ला अलग अलग प्रदेशय् लात धायेवं थ्व निगू प्रदेश थःथवय् दुश्मन हे जुइमाः धइगु मदु । उमि छगुलिं मेगुयात वास्ता हे मयासे च्वनेमाः धइगु मदु ।
आः खँ जुयाच्वंगु धइगु ला प्रदेश विभाजन यायेगु खः । देश विभाजन यायेगु मखु । तर ५ नम्बरया पहाडीतय्सं थौंकन्हय् थज्याःगुनक्सां प्रचार यानाच्वंगु दु मानौं आः प्रदेश मखु देश हे टुक्रा जुइत्यंगु दु । ५ नम्बर प्रदेश कुचा जुयाः ४ य् लायेमा वा ३ य् लायेमा, आखिर लाइगु ला व नेपाः दुने हे खः ।

हानं ५ नम्बरया तराई जिल्ला अलग्ग जुल धायेवं उगु जिल्लात हे अनं लिकयाः मेथाय् तये यंकीगु ला मखु नि । भूमि ला अनया अन हे लानाच्वंगु दइ । निगू प्रदेश विकासया लागिं ग्वाहालि कालबिल यायेबलय् सीमा स्वाःगु प्रदेशत हे मिले जुइमाः । सीमा मस्वाःगु प्रदेशपाखें तःधंगु ग्वाहालि चूलाके फइ मखु । गथे सीमा स्वाःगु देश जूगु कारणं नेपालं चीन व भारतपाखें हे अप्वः ग्वाहालि कायेमाःगु खः अथे हे सीमा स्वाःगु प्रदेश जूगुया ल्याखं कन्हय् ४ व ५ नम्बर प्रदेश दथुइ हे ग्वाहालि कालबिल जुइ ।


प्रदेश छुटे जुयाः थःगु पहिचान अनुकुल अलग्ग प्रदेश दयेकेगु थ्व ज्या नेपालय् जक जुयाच्वंगु मखु । संसारया न्ह्यागु देशय् नं थज्याःगु क्रम चले जुयाच्वंगु दनि । छुं दँ न्ह्यः तिनि भारतया आन्ध्र प्रदेशपाखें तेलंगाना छुटे जुयाः अलग्ग प्रदेश निर्माण जूगु खः । भारतया पश्चिम बंगालय् आः नं पहाडी लागा अलग्ग जक तयाः गोर्खाल्याण्ड प्रदेश दयेकेमाः धकाः आन्दोलन जुयाच्वंगु दनि । अलग्ग गोर्खाल्याण्ड जुइमाः धइगु थ्व आन्दोलनयात नेपाःया पहाडी समुदायया नं हार्दिक समर्थन दु । पाय्छि अज्याःगु हे आन्दोलन थौं नेपाः दुने हे जुयाच्वंगु इलय् धाःसा वहे पहाडी समुदायं अजूचायापुक विरोध यानाच्वंगु दु ।


५ नम्बर प्रदेशपाखें तराईया भूमि छुटे याये दइ मखु धकाः थौंकन्हय् गुपिं पार्टी व व्यक्तितय्सं आन्दोलन यानाच्वंगु खः, उमिगु पृष्ठभूमि छक्वः स्वये । देशय् संघीय प्रणालीया वहस शुरु जूगु इलय् थुपिं फुक्क हे संघीय प्रणालीया विरोधय् बिचाः तःपिं खः । छगू कथं धायेगु खःसा थुपिं संघीय प्रणालीया विरोधीत खः । आः ५ नम्बर प्रदेशं तराईया जिल्ला अलग्ग यायेगु धायेवं वहे संघीय प्रणालीया विरोधीत दकलय् अप्वः सतकय् कुहां वयाच्वंगु दु ।

थुपिं वास्तवय् ५ नम्बर प्रदेशं पहाड व तराई छुटे याये मजिउ धायेत सतकय् कुहां वयाच्वंपिं मखु । थुपिं ला मूलतः संघीय व्यवस्था धइगु ज्या लगे मजू, थ्व व्यवस्थां ल्वापु पिकाइ धकाः क्यनेगु लागिं जक सतकय् कुहां वयाच्वंपिं खः । ५ नम्बर प्रदेशयात ‘बचे यायेगु’ थुमिगु उद्देश्य मखु । थुमिगु मूल उद्देश्य संघीय प्रणालीयात हे असफल धकाः साबित यायेगु खः । एमाले अध्यक्ष केपी ओलीं ला नकतिनि धाये नं धुंकूगु दु, संघीय प्रणालीयात जिमिसं बाध्यतावस जक स्वीकार यानागु खः ।

थःपिंसं बाध्यतावस स्वीकार यानागु थ्व प्रणालीयात असफल साबित यायेगु अवसरया रुपय् उमिसं संविधान संशोधनया मुद्दायात प्रयोग याःगु खः । उकिं उमिसं यानाच्वंगु थ्व प्रदर्शन संविधान संशोधनया विरोधय् स्वयां नं संघीय प्रणालीया हे विरोधय् खः । संघीय व्यवस्थायात बदनाम यायेगु उद्देश्यपाखे थ्व आन्दोलन उन्मुख जुयाच्वंगु दु । उकिं ५ नम्बर प्रदेशय् दुपिं संघीयता पक्षधरत नं उमिसं पिकयाच्वंगु थ्व भ्रमय् च्वने मजिउ ।

Page 5 of 23
Go to top

Copyright © 2016  nepalbhasa.com. All rights reserved.