All for Joomla All for Webmasters

ने.सं. ११३६ यंलागा अष्टमी

सदनय् दर्ता जुयाच्वंगु संविधान संशोधन प्रस्तावयात सदनय् प्रवेश याकेगु अन्तिम तयारी सत्तारुढ दलतय्सं शुरु याःगु दु । थ्व प्रस्तावया विरोधय् एमालें अवरोध यायेत स्वत धाःसा मार्शल लगे यानाः जूसां प्रस्ताव प्रस्तुत यायेगु तयारी सत्तारुढ दलतय्सं याःगु खँ सीदुगु दु । 

थ्वहे झ्वलय् आः संशोधन प्रस्ताव बारे थःपिं गुकथं न्ह्याः वने त्यना धकाः जानकारी बिसें सहमतिइ वये माल धकाः थौं कांग्रेस व माओवादीं एमालेलिसे अन्तिम वार्ता यायेत्यंगु खँ सीदुगु दु ।


सरकारं संशोधन प्रस्तावयात कन्हय्या बैठक पेश यायेगु तयारी यानाच्वंगु दु । संशोधन प्रस्तावया नापनापं सरकारं स्थानीय चुनावया मिति घोषणा यायेगु प्रस्ताव नं यंकेत्यंगु दु । उकिं एमालें निगुलिं प्रस्तावयात स्वीकार यानाः न्ह्याः वने माली धकाः थौं अन्तिम इनाप यायेत्यंगु खँ सीदुगु दु ।


म्हिगः व म्हीग मधेसी मोर्चालिसे माओवादी केन्दं व कांग्रेस नेतातय्सं यानाच्वंगु वार्ताय् संशोधन प्रस्तावयात परिमार्जन सहित पारित यायेगु खःसा थःपिं स्थानीय निकायया चुनावय् वयेत तयार दु धकाः मोर्चां सहमति क्यंगु कारणं सरकारं जबर्जस्ती जूसां प्रस्ताव पेश यायेगु निर्णय याःगु खः ।

न्हापा संविधान जारी याःगु इलय् नं छगू पक्षं विरोधय् नाराबाजी यानाच्वंगु दयेक दयेकं हे एमाले, कांग्रेस व माओवादी जानाःजबर्जस्ती जारी याःगु जुयाः आः संशोधन प्रस्तावयात नं वहे शैलीं सदनय् पारित याःसां जिउ धइगु नजिर न्ह्यःने तयाः सरकार न्ह्याः वनेत्यंगु खँ सूत्रं धाःगु दु ।


उखे एमालेया सचेतक भानुभक्त ढकालं धाःसा थःगु पक्षधर २०१ म्ह सांसदतय् मार्शल लगे यानाः पने मफइगु जूगुलिं यदि जबर्जस्ती प्रस्ताव हल धाःसा कन्हय् सदनय् मुठभेड जुइगु ख्याच्वः बियादीगु दु । सरकारं धाःसा एमाले मजुल धाःसा वयागु अवरोधयात वास्ता मयायेगु खँ धाःगु दु ।


विश्व पर्यटन दिवस–२०१६ या लसताय् थौं थनया बसन्तपुली धुँन्या ब्वज्या जुल । ज्यापु महागुथि येँ महानगर समितिया ग्वसालय् ब्वज्या जूगु खः । ‘ज्यापु जातिया उन्नति, झीगु देय्या समृद्धि’ धइगु नारा थ्वयेकाः येँ देय्या थीथी परम्परागत त्वाःया झिन्हय्गू खलकं धुन्या ब्वज्या याःगु खः ।


ब्वज्याय् न्यत, असं, महाबु, जमः, किलाघः, वटु, ओमबहाः त्वाःखलः, नर दथु त्वाः, पुखुद्यां, त्यरः, थबही (तजः), ध्वासतबी, थबही (चिजः), यटखा, न्हय्मू न्हय्त्वाः कुमाननि,  गोफः, न्हय्मू न्हय्त्वाः भलननिं ब्वति काःगु खः ।


ब्वज्याय्  नेपाःया परम्परागत थीथी शास्त्रीय हुलाप्याखं व लोकम्येँ नापं संगीत प्रवद्र्धन यायेगु आज्जु कथं चचा प्याखं धिमे प्याखं, हुलाप्याखं नं न्ह्यब्वःगु खः ।


किपा : तेज महर्जन/नेपालभाटाा टाइम्स

 

 

 

 

 

संस्कृति, पर्यटन तथा नागरिक उड्डयन मन्त्रालयं लुम्बिनी विकास कोषया सदस्यसचिवया जिम्मेवारी नं कोषया उपाध्यक्ष भिक्षु निग्रोध (सिद्धार्थ महर्जन)यात हे बिउगु दु ।

लुम्बिनी विकास कोषया सदस्यसचिव अजितमान तामाङया राजीनामा माग यानाः कर्मचारीतय्सं आन्दोलन यानाच्वंगुलिं तामाङयात मन्त्रालयय् हे लित सःताः मेगु व्यवस्था मजूतलेया निंतिं वर्तमान उपाध्यक्ष भिक्षु निग्रोधयात हे सदस्यसचिवया नं जिम्मेवारी बिउगु खः ।
तामाङयात मन्त्रालय लित सःतेवं कर्मचारीतय्सं यानाच्वंगु फुक्कं आन्दोलन नं दिकूगु दु ।

सदस्यसचिवया राजीनामाया माग लिसें थीथी न्यागू माग तयाः कोषया कर्मचारी रवीन्द्रनाथ शुक्लां वंगु झिंछन्हु न्ह्यवंनिसें आमरण अनसन समेत च्वना वयाच्वंगु खः ।

कर्मचारीतय् मेगु मागयात कोषया कार्यकारी समितिं सम्बोधन याइगु खँ मन्त्रालयं धाःगु दु । कर्मचारी हडतालं यानाः लुम्बिनी विकास कोष हे अस्तव्यस्त जुयाच्वंगु दु ।

स्वनिगःया थीथी थासय् सतक विस्तारया नामय् जनताया छेँ थुनेगु व जग्गा हड्पे यायेगु ज्या जुयाच्वंगुया विरोधय् स्थानीय पीडिततय्सं थ्वहे वइगु पुस २० गते बुधवाः स्वनिगः बन्द याइगु जूगु दु ।
उपत्यकाव्यापी सडक विस्तार पीडित संघर्ष समितिं थौं येँय् छगू पत्रकार सम्मेलन यासें थुकिया जानकारी बिउगु खः । थ्व संघर्ष समितिइ स्वनिगःया कालिमाटी, थानकोट, गल्कोपाखा, थैब, जोरपाटी, नौखेल, खोना आदि लागाया सडक विस्तार पीडिततय्गु संघर्ष समिति व भुखाय् लिपाया पुनर्निर्माण पीडिततय्गु समेत यानाः २४ गू संस्था दुथ्याः । थ्व संस्थाया संयोजक कथं सुमन मानन्धरं पत्रकार सम्मेलनय् थःपिनि माग व संघर्षया ज्याझ्वः न्ह्यब्वयादीगु खः । अथे हे उकुन्हु जोरपाटीइ विरोध जूबलय् ज्वना यंकूम्ह स्थानीय सरोजकुमार श्रेष्ठं अनया अवस्था कनादीगु खः ।
संघर्षया ज्याझ्वः कथं थनिंनिसें १९ गते तक स्वनिगःन्यंकं प्रचारात्मक ज्याझ्वः यासें २० गते स्वनिगः बन्द यायेगु ग्वसाः याना तःगु दु ।
संघर्ष समितिं पित बिउगु प्रेस विज्ञप्तिइ जनताया निजी छेँ व जग्गा प्राप्त यायेबलय् उचित मुआब्जा बियाः जक सतक विस्तार या धयातःगु दु । सतक विस्तार यायेबलय् कानुनी प्रक्रिया पूरा याये माःगु, आधुनिक ट्राफिक प्रणाली लागू यायेमाःगु, सांस्कृतिक धार्मिक सम्पदाया सुरक्षा जुइमाःगु माग उकी नं यानातःगु दु ।

संसदया मंगलवाः च्वंगु बैठकं नेपाः राष्ट्रिय पार्टीया केन्द्रीय उपाध्यक्ष व पुलांम्ह सभासद् बुद्धरत्न मानन्धर (बुद्ध साय्मि) मदुगु दुःखय् श्रद्धाञ्जली प्वंकुसे. सर्वसम्मतिं शोक प्रस्ताव पारित याःगु दु ।
    सभामुख ओन्सरी घर्तीं सदनय् शोक प्रस्ताव न्ह्यब्वयादीगु खः । बैठकय् सांसदतय्सं थःथःगु थासं दनाः छगू मिनेट मौन धारण यासें दिवंगत आत्माया चिर शान्तिया कामना यानाः दुःखंकःपिं छेँजःप्रति बिचाः हायेकूगु खः ।


    शोक प्रस्तावय् ‘व्यवस्थापिका संसदया थ्व बैठकं क्रान्तिकारी कविया रुपय् म्हसिका दुम्ह नेपाः राष्ट्रिय पार्टीया उपाध्यक्ष व पार्टीयापाखें २०६४ सालया संविधान सभा निर्वाचनय् येँ जिल्लापाखें समानुपातिक दुजलय् निर्वाचित मानन्धरया ७३ दँया वैशय् उच्च रक्तचाप व नुगःचु सम्बन्धी ल्वय्या उपचारया झ्वलय् यलय् च्वंगु अल्का अस्पतालय् २०७३ पुस १० गते न्हिनय् ४ बजे मदुगुलिं शोक प्वंकाच्वना व वय्कःया दिवंगत आत्माया चिर शान्तिया कामना यासें शोक सन्तप्त परिवारप्रति बिचाः हायेका’ धकाः न्ह्यथनातःगु दु ।


    मदुम्ह कवि साय्मिया अन्त्येष्टि मंगलवाः पशुपतिइ जूगु खः । थ्वयां न्ह्यव न्यूरोडया भुगोलपार्कय् वय्कःयात थीथी व्यक्तित्वपिं लिसें नेपालभाषा कार्यकर्ता, न्ह्यलुवाः, साहित्यकार, थःथिति, नेपाः राष्ट्रिय पार्टीया दुजःपिंसं श्रद्धाञ्जली देछाःगु खः । वय्कःयात श्रद्धाञ्जली देछायेत एमाले नेता माधव नेपाल, संघीय समाजवादी पार्टीया अध्यक्ष उपेन्द्र यादव, जनमोर्चाया चित्रबहादुर केसी, पद्मरत्न तुलाधरपिं भुगोलपार्कय् झाःगु खः ।

 

 

 

स्वनिगलय् लँ तब्या यायेगु नामय् धमाधम छेँ थुनेगु व उकिया लागिं गुरिल्ला शैलीं चिं तयेगु ज्या जुयाच्वंगु दु । वंगु छुं दिं न्ह्यः जक चाबहीनिसें सुन्दरीजल तक ल्वाभः सहितया प्रहरी पाः तयाः छेँ थुनेगु चिं तया थकल । अले उकिया छुं दिं लिपा हे स्थानीय पीडिततय्सं चक्का जाम यात । थःपिनिगु छेँ थुने दइ मखु, जग्गा अथें काये दइमखु धकाः । उकियात धाल मनूतय्सं विकास विरोधी गतिविधि । थ्व ला छगू उदाहरण जक खः । थुगु हे कथंया समस्या तःदँ न्ह्यववंनिसें हे स्वनिगःया थाय्थासय् जुयाच्वंगु दु ।

थक्वाःया स्थानीय मनूतय्गु जग्गा बिना मुआब्जा कयाः लँ तब्या यायेत्यंगु दु । तर स्थानीय मनूतय्सं लँया तकं कर पुलेगु यानाच्वनागु, आः वयाः हाकनं लँ तब्या यायेगु धकाः प्रहरीं बल प्रयोग यानाः इलय् ब्यलय् तनाव बियाच्वंगु दु । थुज्वःगु कथंया समस्या स्वनिगःया निगू दर्जनं मल्याक थासय् जुयाच्वंगु दु । कलंकी, नैकाप, सतुंगः, थक्वाः, नागढुंगा, कालिमाटी, त्रिपुरेश्वर, सितापाइला, भिमढुंगा, बालाजु, बुंग, ख्वना, जोरपाटी, बौद्ध, सुन्दरीजल, पशुपति, जल, थैब, थसि, लुभु, सक्व, चापागाउँ, च्वबाहाः, फँपि, ख्वप, गल्खोपाखा लगायतया थासय् थुकथंया समस्या जुयाच्वंगु दु ।


सतक पीडितपाखें समस्याय् लानाच्वंपिं धकाः थुगु लागाया स्थानीय मनूत संगठित जुयाः संघर्षय् कुहां वयाच्वंगु दु । उमिसं थःपिनिगु जग्गा कयाः लँ तब्या यानां विकास जुइ मखु धयाच्वंगु दुसा मेपिंसंं धाःसा उमित विकास विरोधी धयाच्वंगु दु । गबले डा. बाबुराम भट्टराई प्रधानमन्त्री जुयाः लाजिम्पाट लागाय् बल प्रयोग यानाः लँ तब्या यात अबलेनिसें हे स्वनिगलय् लँ तब्या यायेगु निंतिं छेँ थुनेगु, जग्गा कायेगु ज्याय् राज्यपक्षं तीव्रता बियाहःगु खनेदु ।

न्हापा लिपा अथे मजू । तर न्हापांगु संविधानसभाया अन्तिम इलय् वयाः न्हूगु संविधान दयेकेगु ज्या हे छखे त्वःताः तत्कालिन प्रम भट्टराईनं सतक विस्तारय् विशेष हे बः बियादीगु खः । अबले छगू कथं धायेगु खःसा स्वनिगः पिनें वयाच्वंपिं मनूतय्सं ला बाबुराम भट्टराईयात तकसं बांलाःम्ह मनू धकाः चर्चा याःगु खः । अले विकास यायेगु खःसा बाबुराम भट्टराई हे माः धइगु बिचाः नं तया हःगु खः । उगु ल्याखं पिनें वयाः थन च्वनाच्वंपिं हरेक राजनीतिक पार्टीया नेता कार्यकर्ताया समर्थन बाबुराम भट्टराईयात दुगु स्वयेबलय् निक्वःगु संविधानसभाया चुनावय् माओवादीयात स्वनिगलं यक्व हे भोट वयेमाःगु खः । तर चुनाव जूबलय् ला स्वनिगलं हे माओवादी पत्तासाफ जुल । स्वनिगः पिनें नं माओवादीयात भोट मवल । न्हापांगु तःधंगु पार्टी स्वंगूगु तःधंगुली कुहां वये माल ।


अथे हे २०७२ बैशाख १२ गते तःभुखाय् लिपाया स्वनिगःयात लुमंकल धाःसा स्वनिगलय् ला लँ तसकं यक्व दु, गाडी तसकं म्हो दु अले मनूत नं तसकं म्हो जक । अबले सतक हे सुनसान । छाय्धाःसा स्वनिगलं पिनेयापिं फुक्क मनूत स्वनिगः त्वःताः थःथःगु थासय् बिसिउँ वन । भुखाय् ब्वये धुंकाः स्वनिगलय् ल्यनाच्वंपिं धइपिं थनया हे आदिवासी नेवाःत व स्वनिगलय् छेँ दुपिं जक खः । अबले स्वनिगःयात माया यानाः च्वनाच्वंपिं मनूत, अबलेया लँया अवस्था, गाडीयात स्वल धाःसा आःया सतक हे माःगु सिबें अप्वः खनेदु । उकथं हे यदि मोहनीनिसें स्वन्ति तकया ईयात स्वल धाःसां स्वनिगःया लँ खाली खाली जुइगु, मनूत म्हो जुइगु नापं छगू कथं सुनसान थें जुइगु । थुगु ल्याखं स्वल धाःसां नं आःया अवस्थाय् स्पष्ट रुपं धायेफइ कि स्वनिगलय् पिनें वयाच्वंपिं मनूत च्वनाच्वंगुलिं हे लँया समस्या, गाडीया समस्या जुयाच्वंगु खः । उकिं वास्तवय् स्वनिगलय् लँ तब्या यायेगु धइगु स्वनिगलं पिनेपाखें वयाः स्वनिगलय् च्वनाच्वंपिनिगु नितिं खः ।

दकले अप्वः सतक तब्या यायेमाल धकाः सः तयेगु ज्या उमिसं हे यानाच्वंगु दु । वहे स्वनिगलं पिनेया मनूत न्यायालय, प्रशासनंनिसें राजनीतिक पार्टीइ तकं हालिमुहाली जुयाच्वंगु दु । उमिसं थ्व इलय् सतक विस्तार यायेमाः धकाः धयाच्वंगु दु । सर्वोच्च अदालतं मुआब्जा बिया जक सतक विस्तारया ज्या न्ह्याकी धकाः बिउगु अन्तरिम आदेशयात तकं उल्लंघन यानाः प्रहरी छ्यलाः जनताया छेँ थुनाच्वंगु दु । उकिया अर्थ सर्वोच्चया अन्तरिम आदेश तकं अवज्ञा यानाच्वंगु दु । अदालत बन्द जुइगु सार्वजनिक विदा व शनिवाः लाकाः छेँ थुनेगु ज्या यानाच्वंगुलिं स्पष्ट जू कि छेँ थुनाः सतक तब्या यायेगु ज्याय् खने मदइगु शक्तिया नं ल्हाः दु ।


जनताया सम्पत्तिया रक्षा दायित्व राज्यया खः । जनताया सम्पत्तियात बिना मुआब्जा कायेगु, माःगु कथंया कानुनी प्रक्रिया कथं न्ह्याः मवनेगु अले सर्वोच्चया आदेश तकं उल्लंघन यानाः विकासया नामय् सतक तब्या यायेत जनताया छेँय् डोजर चले यायेगु ज्या वास्तवय् गैर कानुनी अले अप्रजातान्त्रिक नापं तानाशाही प्रबृत्ति हे खः । थ्व इलय् सतक विस्तारपाखें पीडिततय्सं चलनचल्तीया भावं मुआब्जा बीमाः धकाः माग यानाच्वंगु जायज खः धकाः थुइकेमाः । विकासया नामय् स्वनिगःवासीयात विस्थापित यानाः मेपिंत मोज मस्ती यायेगु थाय् दयेके बीगु जुइ मखु अले स्वनिगःया सम्पदांनिसें हरेक ख्यलय् लिच्वः लाइगु कथंया ज्या याके बी मजिउ धकाः थुइकेमाःगु ई वःगु दु ।

स्वनिगःया प्रत्येक नेवालं आःया हे अवस्था कथं स्वनिगलय् यातायातया साधन दुत हयेगु ज्या जुयाच्वन धाःसा न्ह्याक्व हे लँ तब्या याःसां स्वनिगलय् मगाइगु अले आः थःपिनिगु छेँ मलाः धकाः ढुक्क जुयाच्वंपिनि छेँ नं छुं दँ लिपा सतक तब्या यायेगु नामय् अले विकासया नामय् डोजरया पेलानय् लाइ तिनि धकाः थुइकेमाःगु खँय् निगू मत दइ मखु । उकिं थौं सतक विस्तारया नामय् पीडित जुयाच्वंपिं, विस्थापित जुइत्यंपिनिगु नितिं थःथःगु थासं नं सः तयेमाःगु अवस्था दु । सतक विस्तार यायेगु झ्वलय् जनताया जग्गा कायेगु छेँ थुनेगु खःसा इमित मुआब्जा बीमाःगु, विस्थापित जुइपिंत पुनस्र्थापना यायेमाः धइगु खँय् छगू हे मत जुया वनेमाः । पिनें वयाच्वंपिनिगु सुविधाया नितिं सतक विस्तार यायेगु खःसा जिमित आवश्यकता मदु धकाः सः तयेगु नापं नेपाः संघीय गणतन्त्रय् वनेधुंकूगु अवस्थाय् प्रदेश प्रदेशय् हे विकास याना वनेमाःगु नापं स्वनिगः केन्द्रित असन्तुलित विकास याये मजिउ धकाः पतिं धस्वाकेमाः ।

नेपालभाषा केन्द्रीय विभागं थः पुलांम्ह प्रमुख मदुम्ह कृष्णबहादुर श्रेष्ठयात लुमंकल । न्हापा विभाग गठन जुइ स्वयां न्ह्यः समिति जुयाच्वंगु इलय् नायः जुयादीम्ह भाजु श्रेष्ठया बारे वयकःया कायभाजु कुमुद श्रेष्ठं च्वयादीगु सफू ‘बाः लुमंकाः’ थौं छगू ज्याझ्वःया दथुइ विभागय् विमोचन जुल । प्रा.डा. सुन्दरकृष्ण जोशी मूपाहां जुयादीगु उगु ज्याझ्वलय् सफूया बारे विभागीय प्रमुख डा. चन्द्रमान वज्राचार्यं न्ववानादीगु खः । ज्याझ्वः लुमंति दबूया नायः रामेश्वर मिश्रण श्रेष्ठया सभापतित्वय् जूगु खः ।

थौंकन्हय् सवारी साधनया लाइसेन्स कायेगु लागिं चान्हंनिसें हे लाइन च्वनेमाःगु समस्यायात ध्यानय् तयाः आः यातायात व्यवस्था विभागं अनलाइनपाखें हे लाइसेन्सया फाराम भरे यायेगु व्यवस्था यायेत्यंगु दु । आः वइगु छुं न्हि लिपा हे थ्व व्यवस्था यायेत्यंगु खःसा उकिया लागिं तयारी नं जुयाच्वंगु खँ सीदुगु दु ।


अनलाइन फाराम भरे यायेगु लागिं आवश्यक शफ्टवेयर जडानया ज्या जुयाच्वंगु खँ नं धाःगु दु । थ्व जडानया ज्या क्वचायेवं हे अनलाइन मार्फत फारम भरे याये फइ । अनलाइनं फाराम भरे याःसां लिखित जाँच व ट्रायल बीगु ज्या धाःसा येँय् हे जुइ ।
अनलाइन फाराम भरे यायेगु गथे ?


अनलाइनं फाराम भरे यायेत दकलय् न्हापां यातायात व्यवस्था विभागया वेबसाइट डब्लुडब्लुडब्लु डट डिओटिएम डट जीओभी डट एनपी चायेकेवं अन पिनेसं हे ‘अनलाइन सवारी चालक अनुमति पत्र’ धइगु खनेदइ । अन क्लिक् यायेवं भरे याये माःगु आवश्यक विवरणत खने दइ । फुक्कं विवरण भरे यानाः सेन्ट यायेगु । सेन्ट एसेप्ट जुइवं आवेदकयात छपाः भ्वं वइ । उकियात प्रिन्ट यानाः कायेगु । उकी फोटो व फिंगरप्रिन्टया वनेगु ई बियातःगु दइ । बियातःगु इलय् हे उगु भ्वं ज्वनाः सम्बन्धित कक्षय् वनेगु अन हानं फोटो र फिंगरप्रिन्ट कायेवं वयां कन्हय् कुन्हु हे जाँचय् सहभागी जुइफइ ।

च्यागूगु शताब्दीइ निर्माण जूगु ऐतिहासिक मरु सतः (काष्ठमण्डप) या जग खुल्ला याःगु लसताय् लाकाः थौं तःजिक सप्त विधानोत्तर पुजा जुयाच्वंगु दु । थौं सुथंनिसें सनिलय् तकं न्ह्याइगु थ्व पुजाय् आपालं गुरुपुरोहित व स्थानीय मनूतय्सं ब्वति कयाच्वंगु दु । पुजा ज्याझ्वः जुयाच्वंगुलिं मरु लागाय् दुहां वनीगु फुक्कं लँ थौैं बन्द याना तःगु दु । मरु सतः जीर्णोद्धार बारे जन चेतना थनेगु नं ताः तयाः थ्व पुजाया ग्वसाः जूगु खः ।


(किपा- तेज महर्जन/नेपालभाषा टाइम्स)

 

 

 

 

 

 

 
बु.सं. २५५७ व बु.सं. २५५८ स ‘सन्ध्या टाइम्स’ न्हिपती पिदंगु बुद्ध धर्म सम्बन्धी उत्कृष्ट च्वसुयात बीगु पंचवीरसिंह सिरपाः म्हिगः लःल्हात । मूपाहां जनकवि दुर्गालाल श्रेष्ठं सिरपाः त्याकादीपिं अमृतलक्ष्मी तुलाधर, अशोकानन्द वज्राचार्य, सुनिता मानन्धर व मणिरत्न शाक्यपिंत सिरपाः लःल्हानादीगु खः । युवा बौद्ध समूहया नायः त्रिरत्न तुलाधरया सभापतित्वय् जूगु उगु ज्याझ्वलय् सिरपाः दाता पंचवीरसिंह तुलाधर लिसें निर्णायकपिं अमिता धाख्वा, डा. गौतमवीर वज्राचार्य, लोचनतारा तुलाधरपिंसं नं नुगःखँ तयादीगु खः । ज्याझ्वलय् डा. केशवमान शाक्य व सम्पादक सुरेश मानन्धरंपिंसं नं न्ववानादीगु खः ।

à अमृतलक्ष्मी तुलाधर
धर्मकीर्ति विहारया पुलांम्ह उपासिका मय्जु अमृतलक्ष्मी तुलाधर पुलां पुस्ताया छम्ह प्रतिनिधि च्वमि खः । थौं ७४ दँया बैंशय् थ्यनाच्वंम्ह वय्कलं थःगु इलय् झिंन्यादँ दुबलय् एसएलसी पास यानाः पद्मकन्या क्याम्पसय् आइए नं पास यानादिल । लिपा गृहस्थी जीवनय् तक्यँसेंलि ब्वनेगु त्वःतादीगु खःसां नं थःगु स्वअध्ययन धाःसा त्वःफिकामदी ।
धर्मकीर्ति विहारय् लय् न्याक्वः जुइगु बुद्धपुजाय् कनीगु बुद्ध उपदेशं प्रभावीतम्ह वय्कलं भन्ते गुरुमांपिनिगु उपदेश एकचित्तं न्यना वयाःलि छेँय् थ्यंकाः च्वयादी । बुद्ध शिक्षा कथं झीगु समाजया व्यवहार हिला यंकेमाःगु खँ हे वय्कःया च्वसुया मू उद्देश्य खः । वय्कलं थम्हं च्वयागु च्वसु पूज्य अश्वघोष महास्थविरयात क्यनेगु यानाः माःथाय् माःकथं भिंकेगु ज्या यानादी ।
वय्कःया च्वसु धर्मकीर्ति बौद्ध मासिक, उदाय समाः ख्वाःपौ, सन्ध्या टाइम्सय् इलय्ब्यलय् पिदं । धम्मावती गुरुमांया उपदेश न्यँन्यं ‘झी नेवाःत’ नांगु न्हापांगु च्वसु च्वयादीगु खः । झी नेवाःतसें भ्वय् व विधि व्यवहारय् जक ध्यबा फुकाच्वन धइगु खँ कुलाः उगु च्वसु च्वयादीगु खः । ‘धर्म यायेत ज्ञां दयेकेमाः’, ‘देय्यात ल्वःगु इहिपा’, ‘सम्यक चिन्तनं बिउगु सुवर्ण अवसर’ आदि सहित वय्कःया थ्यंमथ्यं स्वीपु पिदनेधुंकूगु दु । थुगुसी वय्कःयात ‘आकासय् ब्वइपिं झंगःतय् पलाःख्वाँय् सी दइमखु’ नांगु च्वसुया निंतिं बु.सं. २५५७या पंचवीरसिंह सिरपाः लाःगु खः ।
पिनें चर्चित रुपं छुं ज्याखँय् कत्ताना मच्वंसां नं छेँ दुने च्वनाः नं अध्ययन, चिन्तन व ध्यान भावना यायां थुकथं च्वसु च्वयाः थःगु प्रतिभा प्रस्फुटन यानाच्वंम्ह अमृतलक्ष्मी तुलाधर गृहिणीपिनि दथुइ चर्चा यायेबहम्ह, विहारय् वना थें बुद्ध शिक्षा नाला कयाच्वंम्ह व्यक्तित्व खः ।
à सुनिता मानन्धर
थौंकन्हय् जगतसुन्दर ब्वनेकुथिइ आखः ब्वंका वयाच्वनादीम्ह, सन्ध्या टाइम्सय् ‘जिमि बाज्यां मुलय् तयाः कनातःगु बाखं’या स्तम्भकार सुनिता मानन्धर छम्ह नेवाः भाय्या न्हू पुस्ताया प्रतिनिधि च्वमि खः । नेपालभाषाय् एमए, बुद्धिष्ट स्टडिजय् पीजीडी, नेपाल बौद्ध परियत्ति शिक्षाया परियत्ति सद्धम्म ‘कोविद’ । वय्कः मय्जुया च्वसा बौद्ध साहित्यय् मदिक्क न्ह्यानाच्वंगु दु । वय्कलं गुलि च्वया च्वनादिल धइगु खँ म्हुतुं धयाच्वनेम्वाः । थुगुसी स्वक्वःखुसी त्याकादीगु ‘पंचवीरसिंह सिरपा’लं हे यच्चुक क्यनाच्वंगु दु । ने.सं. ११२८, ने.सं. ११३२ व ने.सं. ११३५ स यानाः वय्कलं पंचवीरसिंह सिरपाः स्वक्वः तक त्याकादीगु जुल ।
जापान हिकिभाया दुजः, लेखन प्रतिभाया तःमिम्ह सुनिता मानन्धर थीथी इलय् थीथी सिरपालं छायेपी धुंकूगु दु — चैन लाकौल सिरपाः (ने.सं. ११२६), लुम्बिनी नेपाली बुद्ध धर्म सोसाइटी व युवा बौद्ध समूह येँया ग्वसालय् जूगु निबन्ध प्रतियोगिताय् स्वक्वःतक ने.सं. ११२७ व ने.सं. ११२९ स लिउ व ने.सं. ११३२ य् न्हाप सिरपाः, शेरलक्ष्मी सिरपाः निक्वःतक ने.सं. ११२७ व ने.सं. ११२८, ईलोहं एल्भिस जोशी सिरपाः (ने.सं. ११२८), शेरबहादुर लक्ष्मीकुमारी सिरपाः न्हाप ने.सं. ११२९, धर्मादित्य धर्माचार्य सिरपाः ने.सं. ११२९, चिन्तनशील युवा समूहया ग्वसालय् जूगु बौद्ध वत्तृmत्वकला पर्वय् उत्कृष्ट थुकथं थीथी इलय् थीथी पत्रिकाय् च्वसु च्वयादीम्ह वय्कःया आतक स्वंगू कृति प्रकाशनय् वयेधुंकल । तुंथिइ कुतुंवंम्ह खिचा (मचाबाखं), बुद्धशिक्षा नाप सामाजिक सरोकार व अजाअजिं कनातःगु बाखं ।
à अशोकानन्द वज्राचार्य
त्रिभुवन विश्व विद्यालयपाखें एमएस्सी, बुद्धिष्ट फिलोसफीइ एमए यानादीम्ह वय्कः थौंकन्हय् लोटस् एकेदेमि कलेजया लेक्चरर खः । इलय्ब्यलय् बौद्ध च्वसु च्वया वयाच्वनादीम्ह वय्कः लुम्बिनी बौद्ध विश्व विद्यालयया सिनेटर खः । वय्कः थीथी बौद्ध विहार, बौद्ध संस्थाय् थीथी पदय् च्वनाः बुद्ध धर्म प्रचार प्रसारया ज्याय् सदां न्ह्यचिला च्वनादीम्ह खः । त्रिरत्नकीर्ति विहार किपू, सुलक्षण कीर्ति विहार च्वबहाः, बीएलआइए नेपाल च्याप्टरया आजीवन दुजः वय्कः धर्मोदय सभाया सचिव अले कुलेश्वर बुद्ध विहारया अध्यक्ष नं जुयादीधुंकल ।
आनन्द भुवन विहारपाखें अमृतोपदेश पुरस्कार २०६७ त्याकादी धुंकूम्ह वय्कलं बु.सं. २५५७या पंचवीरसिंह सिरपाः त्याकादीगु खः ।
à मणिरत्न शाक्य
थौंकन्हय् काठमाडौं युनिभर्सिटीया डिपार्टमेन्ट इन्भाइरोमेन्ट एण्ड इन्जिनियरिङय् भिजिटिङ प्रोफेसर जुयाच्वनादीम्ह मणिरत्न शाक्यजु बुद्ध धर्म व विज्ञानया स्वापू कुलाः थःगु च्वसा न्ह्याका वयाच्वनादीम्ह व्यक्तित्व खः । नेपाल सरकारया जल तथा मौसम विज्ञान शाखाया उपनिर्देशक जुयादीधुंकूम्ह वय्कः थौंकन्हय् नागरिक उड्डयन प्राधिकरण व थीथी हवाई सेवाया पाइलटतय्त मौसम सम्बन्धी तालिम बीगुली व्यस्त जुयाच्वनादीगु दु । त्रिभुवन विश्वविद्यालयापाखें वायुमण्डलीय भौतिकशास्त्र विषयय् एमएस्सी यानादीम्ह वय्कः महेन्द्र विद्याभूषण पदक ‘ख’पाखें विभूषितम्ह व्यक्तित्व खः । वय्कःया वैज्ञानिक च्वसु व बुद्ध धर्म सम्बन्धी च्वसु गोरखापत्र, नागरिक, सन्ध्या टाइम्स आदि थीथी पत्रिकाय् पिदनाच्वंगु दु ।
वय्कलं पंचवीरसिंह सिरपाः त्याकादीगु थ्व निक्वःखुसी खः (बु.सं. २५४८ व बु.सं. २५५८ स) । वय्कः थेंज्याःपिं वैज्ञानिक व्यक्तित्वपाखें हाकनं हाकनं बुद्ध धर्म सम्बन्धी च्वसु ब्वने दइगु आशा याये ।
न्ह्यब्वःम्ह ः लोचनतारा तुलाधर

 

Page 4 of 23
Go to top

Copyright © 2016  nepalbhasa.com. All rights reserved.