All for Joomla All for Webmasters

ने.सं. ११३६ यंलागा अष्टमी

काभ्रेपलाञ्चोकया बिर्तादेउरालीइ जूगु बस दुर्घटना सीपिनि ल्याः ३३ म्ह थ्यंगु दु । येँ नं दोलालघाटया कात्तिके देउराली धाःथाय् वनाच्वंगु बा. २ ख १०६ नम्बरया बस थौं सनिलय् दुर्घटना जूगु खः । ओभर लोड जूगु बस पाखा थहां वनेमफयाः भीरं कुतुं वनाः दुर्घटना जूगु खः । दुर्घटनाय् मेपिं ४३ म्ह घाःपाः जूगु दु ।


    ७५ म्ह स्वयां अप्वः च्वनावंगु बस पाखाय् थहां वनाच्वंगु इलय् इन्जिन बन्द जूगु खः । चालकं हाकनं स्टार्ट यायेगु निंतिं लिखतं बस क्वत हयाच्वंगु इलय् ब्रेक मज्वनेवं सतकं ५०० मिटर क्वय् कुतुंवंगु खँ धाःगु दु । छतय् तकं जायेक मनू च्वनावःगु बसय् जाकि नं बोरा बोरा तयाहःगु खँ धाःगु दु । ओभरलोड जुयाः बस पाखां थहां वनेमफुगुलिं दुर्घटनाय् लाःगु खँ प्रहरीं धाःगु दु ।


दुर्घटनाय् सिकिस्त घाःपाः जूपिंत सेनाया हेलिकप्टरं उद्धार यानाः येँय् वासः याकेत हःगु दु । हेलिकप्टरं हःपिं २८ म्ह मध्ये झिंच्याम्हेसित वीर अस्पतालया ट्रमा सेन्टरय् उपचार याकाच्वंगु दुसा झिम्हेसित टिचिङ्ग अस्पतालय् वासः याकाच्वंगु दु । मेपिं घाःपाः जूपिं झिंन्याम्हेसित धुलिखेल अस्पतालय् वासः याकाच्वंगु दु ।


दुर्घटनाय् घाःपाः जूपिंत स्वयेगु निंतिं गृहमन्त्री विमलेन्द्र निधि ट्रमा सेन्टर व टिचिङ्ग अस्पताल वंगु दु । अन वय्कलं घाःपाः जूपिंके गुकथं दुर्घटना जूगु धकाः न्यनेकने यानादीगु खः ।

दुर्घटनाय् घाःपाः जूम्हेसित टिचिङ्ग अस्पताल हयाच्वंगु । किपा ः रासस

नेवाःतय्गु जीवन्त व अमूर्त संस्कृति दाफा बाजंयात च्वन्ह्याकेगु व न्हूपुस्ताया दथुइ थुकियात प्रचार प्रसार यायेगु ताःतुनाः न्हापांखुसी ‘नेपालमण्डल दाफा महोत्सव’ याइगु जूगु दु ।
नेपालमण्डल टेलिभिजनया ग्वसालय् व ललितपुर मलया विशेष ग्वाहालिइ जुइगु महोत्सव वइगु असोज महिनानिसें मंसिरतक स्वलायंकं जुइ । असोजनिसें प्रत्येक वाःपतिकं निन्हुयंकं महोत्सव जुइगु ग्वसाः खलकं जानकारी बिउगु दु ।


महोत्सव ताःलाकेया निंतिं आः नकतिनि वरिष्ठ संस्कृतिविद् लिसें शताब्दी पुरुष सत्यमोहन जोशीया नेतृत्वय् छगू निर्देशन समिति दयेकूगु दु । समितिं महोत्सव ताःलाकेया निंतिं नीति नियमत दयेकाः वनी धाःगु दु ।
निर्देशन समितिइ ललितपुर मलया नेपाल डंगोल व नेपालमण्डल टेलिभिजनया प्रबन्ध निर्देशक भाइकाजी महर्जन ‘नयन’ च्वनादीगु दुसा छ्यांजेय् श्रीकृष्ण महर्जन च्वनादीगु दु ।


अथे हे दुजलय् वरिष्ठ वाद्यवादक न्हुछेबहादुर डंगोल, रामकृष्ण दुवाल, प्रा. सुवर्ण शाक्य, संस्कृतिविद् डा. चुन्दा वज्राचार्य, मोहन ब्यञ्जनकार, गणेशराम लाछि, एकाराम सिंह, ओम धौभडेल, धर्म मुनिकार, त्रिरत्न मानन्धर व लक्ष्मीप्रसाद डंगोल च्वनादीगु दु । निर्देशन समितिइ आःयात झिंन्याम्ह खःसां लिपा आवश्यकता कथं मेपिं थप याना यंकेगु छ्यांजे महर्जनं ‘नेपालभाषा टाइम्स’यात जानकारी बियादीगु दु ।


महोत्सवया हे तयारीया निंतिं आः याकनं हे थीथी जातीय खलः, पुचः नापं दाफा संस्कृति म्वाका वयाच्वंगु खलःया प्रतिनिधिपिं दुथ्याकाः छगू तःजिगु भेला यायेत्यंगु दु । निर्देशन समितिया छयांजे महर्जनं कनादी कथं वइगु असोजनिसें मंसिर महिनातक वाःपतिकं निन्हु महोत्सव यायेगु तयारी जुयाच्वंगु जानकारी बियादीगु दु । महोत्सवय् स्वनिगःया नापं स्वनिगःपिनेयापिंत नं सहभागि याकेगु तयारी जुयाच्वंगुलिं गुलिया सहभागिता दइ धइगु यकीन मजूनिगु वय्कलं धयादीगु दु ।

रियो ओलम्पिकया सकल दर्शकतय्त लय्तायेकुसें उसेन बोल्टं १०० मि दौडय् स्वर्ण त्याकूगु दु । लिसें बोल्टं स्वक्वःतक लगातार स्वर्ण त्याकुसें १०० मिटर ब्वाज्याय् स्वंगू स्वर्ण त्याकूगु कीर्तिमान नं तःगु दु ।
२९ दँया बोल्टं ९.८१ सेकेन्डं दौड पुरा यासें थः प्रतिद्वन्द्वी जस्टिन गाट्लिनयात लिउने लाकूगु खः । बोल्टं थ्वयां न्ह्यव बेइजिङ्ग व लन्दन ओलम्पिकय् नं स्वर्ण त्याकूगु खः ।

थुपिं निगुलिं ओलम्पिकय् स्वंगू स्वंगू स्वर्ण त्याकूम्ह बोल्टं रियोय् नं स्वंगू हे स्वर्णया लक्ष्य ज्वनावःगु दु । आः वं २०० मिटर व ४०० मिटर रिलेय् स्वर्णया निंतिं धेंधेंबल्लाः याइ ।
‘जिं अझ तीव्र गति कायेगु लक्ष्य तयागु खः, न्ह्यागुसां स्वर्ण त्याःगुलिं लय्ता’ बोल्टं धाःगु दु, ‘जिं थन गुगु प्रदर्शन याये धकाः वयागु खः, अले जिं फुगु यानागु दु ।’

नेवाः अधि कार कायेगु खःसा आः वृहत रणनीति हे दयेकाः न्ह्याः वनेमाःगु बिचाः प्वंकूगु दु । अधिकारया निंतिं छप्पँ छधी जुइमाःगु इलय् नेवाःत झन झन असंगठित जुया वनाच्वंगुलिं अधिकारया निंतिं बृहत रणनीति दयेकाः न्ह्याः वनेमाःगु बिचाः अमेरिकाय् च्वनाः नेवाःतय् बारे चिउताः प्वंका वयाच्वनादीम्ह डा. रोशन श्रेष्ठं प्वंकादीगु खः ।


नेवाः स्वायत्त राज्य मंकाः संघर्ष समितिया ग्वसालय् थौं जूगु ‘थौंया राजनीतिया लिच्वः व नेवाःया भविष्य’ विषयय् थःगु बिचाः प्वंकुसें मू वक्ता डा. श्रेष्ठं थ्व खँ धयादीगु खः ।
स्वनिगलय् दुहां वःपिं आप्रवासीतय् बारे इलय् हे बिचाः याये मफुगुलिं समस्या झंझं तच्वया वनाच्वंगु खँ न्ह्यथँसें वय्कलं धयादिल, ‘आप्रवासीत लिसें स्वनिगलय् तःधंगु अर्थतन्त्र नं दुहां वल । थुकिया लिसें नेवाःतय् लजगाः, आम्दानीया स्रोत नं तनावन । नेवाःतय् लजगाः, कमाइया स्रोतयात नं ध्यान बीमफुत धाःसा नेवाः आन्दोलन जक धयां मनू मुंके फइ मखु ।’


लजगाः, नये–त्वने ज्याय् आप्रवासी अतिक्रमणं यानाः लजगाः बचे यायेत निं जुइमाःगुलिं नेवाःत अधिकारया आन्दोलनय् कुहां वये मफुगु खँ न्ह्यथँसें वय्कलं ‘नेवाःतय्त अधिकारया निंतिं थनेगु खःसां नेवाः न्ह्यलुवाःपिं गांगामय् दुहां वनाः उमित जुयाच्वंगु समस्या थुइकेगु कुतः यायेमाः, अले जक उपिं आन्दोलनय् कुहां वइ ।’


ज्याझ्वलय् न्ववासें नेपाःया विपद व्यवस्थापन विशेषज्ञ रुप प्रधानं आउटर रिंगरोडं नेवाःतय्त थःगु थासं झन विस्थापित यानायंकीगु जूगुलिं थुकी विरोध यायेमाःगु बिचाः प्वंकादिल । ‘आउटर रिंगरोड नं आप्रवासीतय्त थन स्थापित यायेगु निंतिं जक जूगुलिं थ्वयात तुरुन्त दयेके मजिउ’ वय्कलं धयादिल ।


नेवाः स्वायत्त राज्य संघर्ष समितिया अध्यक्ष राजभाई जकःमिया सभापतित्वय् जूगु ज्याझ्वलय् नेवाः देय् दबूया नायः नरेश ताम्राकारं नं नुगःखँ प्वंकादीगु खः ।

 

थनया ताहाचः खुसिबही लागाय् वइगु गुंपुन्हिकुन्हु ‘खुसिबही महोत्सव याइगु जूगु दु । खुसिबही टोल सुधार समिति तथा धार्मिक पर्यटकीय स्थल संरक्षण समितिया ग्वसालय् उकुन्हु ‘खुसिबही महोत्सव–२०७३’या नामं उगु ज्याझ्वः यायेत्यंगु खः ।


ऐतिहासिक खुसिबहीया महत्वयात न्ह्यःने हयेगु नापं अनच्वंगु सम्पदा व संस्कृतियात संरक्षण यायेगु नापं उगु थाय्यात हे पर्यटकीया क्षेत्रया रुपय् प्रवद्र्धन यानाः विकास यायेगु ल्याखं नेवाःतय् सांस्कृतिक महत्वं जाःगु पर्व गुंपुन्हिया लसताय् लाकाः उगु महोत्सव यायेत्यंगु खः 


गुंपुन्हिया इलय् येँ देय्या परम्परागत बौद्ध विहारलिसें बहाःबहिलिइ दीपंकर बुद्ध (बहीद्यः)लिसें मेमेपिं द्यः ब्वयेगु याइ । खुसिबहिलिइ धाःसा थुपिं द्यःपिं बाहेकं लुँ आखः व वीरकुश महाराजया ख्वाःपाः (तेमां ख्वाःपाः), मल्लकालीन मिसातय् ज्वः नये नकिं, ज्या थकिं नं ब्वयेगु याइ । गुंपुन्हिया लसताय् लाकाः याइगु महोत्सवय् खुसिबहिलिइ दीपंकर बुद्धया दर्शन यायेगुनापं अनया ऐतिहासिक विहार, धार्मिक व सांस्कृतिक सम्पदाया अवलोकन यायेगु नापं थीथी व्यापारिक स्टलया नं तइगु जूगु दु ।


अथे हे ऐतिहासिक आजुमांख्यः लागाय् थीथी कासा म्हितेगुलिसें मनोरञ्जन, हस्तकला व नसाज्वलंया स्टल नं दइगु ग्वसाः खलकं जानकारी बिउगु दु । थुकथं हे नेपाः डान्स एकेदमि व शीर्षक सांगीतिक पुचलं सांगीतिक ज्याझ्वः न्ह्यब्वइगु नापं महोत्सव अवलोकनर्तातय् निंतिं निःशुल्क फेस पेन्टिङ, लैंचा तयेगु नं व्यवस्था यानातःगु दु । आजुमांख्यलय् महायानी व वज्रयानी बौद्ध परम्पराया निम्ह तान्त्रिक द्यः खः ।


महोत्सव आयोजनां स्थानीय उद्योग, व्यवसाययात प्रवद्र्धन यायेगु ज्याय् ग्वाहालि जुइगु नापं स्वच्छ व सभ्य समाज निर्माणय् ग्वाहालि जू वनीगु विश्वास ग्वसाः खलःया अध्यक्ष सिद्धिरत्न शाक्यं प्वंकादीगु दु ।

बलिउड सुपरस्टार शाहरूख खान हानं अमेरिकी सुरक्षा अधिकारीया हिरासतय् लाःगु दु । अमेरिका वंम्ह खानयात लस एञ्जल्स एयरपोर्टय् अध्यागमन विभागया सुरक्षा अधिकारीतय्सं छझाः हिरासतय् कयाः न्यनेकने याःगु खः ।
थःत हिरासतय् काःगुयां तुरुन्त लिपा हे खानं ट्टिर मार्फत थः हिरासतय् लानाच्वंगु जानकारी बिउगु खः । खानयात छुं ई हिरासतय् कयाः प्रहरीं त्वःतूगु खँ भारतीय सञ्चार माध्यमतय्सं नं धाःगु दु ।

ट्विटरय् शाहरूख खानं च्वःगु दु – जि पूर्ण रुपं सहमत दु, गुगु कथंया संसार थौंकन्हय् दु उकी सुरक्षाया सम्मान जिं याना, तर हरेक पटक अमेरिका वयेबलय् अमेरिकी अध्यागमन विभागं हिरासतय् काइबलय् जि यक्व हे हैरान जुयागु दु ।
थ्व स्वयां न्ह्यः सन् २०१२ य् नं खानयात अमेरिकाया न्यूयोर्क विमानस्थलया अध्यागमन विभागय् सुरक्षा अधिकारीतय्सं ज्वनाः करिब निघौ हिरासतय् काःगु खः । खानयात याःगु उगु अभद्र व्यवहारयात कयाः भारतीय सरकारं कुटनीतिक रुपं असन्तुष्टी नं प्वंकूगु खः ।

 

बन्द सत्र यायेत हल तकं मदु

नेपाली कांग्रेसया भातृ संगठन नेवि संघया थन न्ह्यानाच्वंगु महाधिवेशन भद्रगोल जक मखु आः गय् यानाः न्ह्याकेगु धइगु अन्यौलय् समेत लाः वंगु दु । थुकिं यानाः छन्हु सञ्चालन जुयाः दथुइ स्थगित जूगु बन्द सत्र आः रद्द हे यानाः महाधिवेशन समापन याये माःगु स्थिति पिहां वःगु दु ।


महाधिवेशनया बन्द सत्र सञ्चालन यायेगु धकाः भृकुटीमण्डपया हल बुक यानातःगु खः । तर छन्हु थपे यानाः नं महाधिवेशन सिमधःगु कारणं भृकुटी मण्डपया हल त्वःतेमाःगु अवस्था वःगु दु । अनया हल थनिंनिसें मेपिंसं बुक याना तयेधुंकूगु दु ।  संघं प्रज्ञा भवनया हल काः वंगु खःसा अन नं बुक जुइधुंकूगुलिं  हल काये मफइगु अवस्था जू वन ।


पार्टीया सानेपास्थित थःगु हे ज्याकू धाःसा बन्द सत्र यायेत मबीगु खँ धाःगु दु । नेवि संघं थःगु हे पार्टी ज्याकूया हल फ्वंबलय् कार्यकर्तातय्सं तोडफोड याइ धइगु ग्याःचिकुं यानाः सभापति शेरबहादुर देउवां हे पार्टीया हल बी मते धकाः निर्देशन बियादीगु खँ सीदुगु दु ।
पार्टी ज्याकूया हलय् बन्द सत्र याके मबिउसां मतदान यायेत धाःसा उपलब्ध याकीगु जूगु दु । अन मतदानया लागिं माःगु तयारीया ज्या समेत शुरु जुइधुंकूगु दु । शुक्रवाः मतदान यायेगु ग्वसाः दयेकूगु खःसां थौं तक नं बन्द सत्रया अन्यौल दनिगु कारणं मतदान शनिवाः जक याये फइगु सम्भावना ब्वलंगु दु ।

तर बन्द सत्र धाःसा याये मफइगु सम्भावना अप्वया वंगु खँ धाःगु दु । पूर्वनिर्धारित ज्याझ्वः कथं महाधिवेशन म्हिगः हे समापन जुइमाःगु खः ।पं लः, धः व मतया व्यवस्था यायेगु खः । तर थःपिंसं थ्व ज्या सिधयेकाखतं थुगु मुक्कं लागायात हे ठमेलया न्हूगु स्वरुप कथं विकास याना यंकेगु ताः तयाः स्थानीय इन्जिनीयर, डाक्टर आदि पेशाया मनूतय् छगू पुचः समेत दयेकागु खँ न्हूम्ह संयोजक तुलाधरं ‘नेपालभाषा टाइम्स’ यात कनादिल ।   

Page 23 of 23
Go to top

Copyright © 2016  nepalbhasa.com. All rights reserved.