All for Joomla All for Webmasters

ने.सं. ११३६ यंलागा अष्टमी


सर्वोच्च शिखर सगरमाथाया जाः नापे यायेगु निंतिं भारतीय वइगु धाःगु पुचःयात नेपालं स्वीकृति मबिउनिगु खँ धाःगु दु ।
थगुने वैशाख १२ गते वःगु तःभुखाचं सगरमाथाया जाः चिजाः जूगु अनुमान यासें भारतं सगरमाथाया जाः नापे यायेगु खँ धाःगु दु । भारतीय सर्वेक्षक जनरल स्वर्ण सुब्बा रावं सगरमाथाया जाः नापे यायेत भारतं छगू अभियान दल नेपाः वनेत्यंगु खँ धाःगु खः । रावं भारतया सर्वे अफ इन्डिया नेपाः सरकारलिसे जानाः सगरमाथाया जाः नापे यायेत सैद्धान्तिक रुपं सहमत जुइधुंकूगु खँ धाःगु दु ।


तर बिबिसीलिसे खँ ल्हासें नेपाःया नापी विभागया उपप्रमुख गणेश भट्टं भारतलिसे अज्याःगु छुं कथंया सहमति सम्झौता मजूनिगु खँ धयादीगु दु । वय्कलं सगरमाथाया जाः नापे यायेगु ज्या नेपालं हे यायेगु निंतिं योजना दयेकाच्वनागु खँ धयादीगु दु ।
भारतं थीथी उपग्रहपाखें वःगु जानकारी कथं भुखाय् लिपा सगरमाथाया जाः चिजाः जूगु संकेत वःगु धासें हाकनं मापन यायेगु खँ धयाच्वंगु दु । खुइनीदँ न्ह्यव भारतीय सर्वेक्षण दलय् वःम्ह जर्ज एभरेस्टं न्हापांखुसी सगरमाथाया जाः नापे यानाः संसारया दकलय् तजाःगु च्वापुगुँ जूगु घोषणा याःगु खः ।


सगरमाथाया जाः ८८४८ मिटर (२९०२८ फिट) दुगु मान्यता बियातःगु दु । तर थगुने वंगु भुखाचं सगरमाथाया जाः छगू मिटर तक कुहां वंगु संकेत वःगु खँ भारतया सर्वेक्षकतय्सं धयाच्वंगु दु ।
भारतीय सर्वेक्षक रावं भुखाय् लिपा सगरमाथाया जालय् छुं हिउपाः वःगु दु मदु धकाः सिइकेत जमीन सर्वेक्षण व जीपिएस वा छुं हवाई सर्वेक्षणया आवश्यक दु धयाच्वंगु दु ।


सगरमाथा नेपाः व चीनया सीमाय् लाः । भारतं सगरमाथाया जाः मापन यायेगु नामय् चीनया लागाय् गुप्तचरी याइगु सम्भावना नं दुगुलिं भारतीय पुचःयात स्वीकृति बीगु खँय् चीनं विरोध यायेफुगु खँ धाःगु दु ।

 

पुलांम्ह सभासद लिसें नेपालभाषाया न्ह्यलुवा, विद्रोही कवि मदुम्ह बुद्ध साय्मिया लुमन्तिइ श्रद्धा काव्य नांया छगू ज्याझ्वः जुल । ईलोहं प्रकाशनया ग्वसालय् जूगु ज्याझ्वलय् नेपालभाषाया थीथी साहित्यकारपिंसं मदुम्ह साय्मिया रचनात पाठ यानादीगु खः ।


ज्याझ्वलय् ईलोहं प्रकाशनया नरेशवीर शाक्यं बुद्ध साय्मि मदुगु ईया लुमन्ति कनादीगु खःसा साहित्यकारपिं भूषणप्रसाद श्रेष्ठ, डा. पुष्पराज राजकर्णिकार, प्रतिसरा साय्मि, सौरभ शाक्य, डा. केशवमान शाक्य, रजनी मिला, प्रदिपरत्न शाक्य, शरद कसाः, इन्द्रप्रसाद रंजित, महेशमान लँजुवाः, राजभाई जकःमि, बुद्ध शाक्य, मोक्षबहादुर अमात्य, हेरारत्न शाक्य, ओमकाजी ताम्राकार लगायतं मदुम्ह कवि साय्मिया थीथी रचनात पाठ यायेगु, वय्कःलिसेया लुमन्ति इनेगु नापं वय्कःया कविता प्रभावित जूगु खँ कनादीगु खः । ज्याझ्वलय् आपालं साहित्यह्यःमिपिनिगु उपस्थिति दुगु खः ।

 

नेपाः राष्ट्रिय पार्टीया सांसद लक्ष्मण राजवंशीं गोप्य रुपं थःगु हे अलग्ग पार्टी दर्ता यानातःगु खँ सार्वजनिक जूगु दु । पहिचान विरोधी आन्दोलनय् लगे जुल धकाः पार्टीपाखें कारवाही जुइगु सम्भावना खंकाः वय्कलं वंगु पुस ४ गते हे ‘बौद्धिक जनतान्त्रिक परिषद्’ नामं निर्वाचन आयोगय् न्हूगु पार्टी दर्ता यानातःगु खः । न्हूगु पार्टी गठनया बारे वय्कलं पार्टी लगायत सुयातं नं जानकारी धाःसा बियातःगु मदु ।


एमाले नेतृत्वया गठबन्धनय् वंगु द्वपं बिसें नेपाः पार्टीपाखें वय्कःयात म्हीग तिनि पार्टीं निष्काशन याःगु खः । तर राजवंशीं न्हूगु पार्टी दर्ताया ज्या धाःसा लछि न्ह्यः हे याना तयेधुंकूगु जुयाच्वन ।

सूत्रतय्सं बिउगु जानकारी कथं न्हूगु पार्टी दर्ताया लागिं वय्कः थः हे निर्वाचन आयोग झाःगु खः । गोप्य रुपं दर्ता यानातःगु उगु पार्टीइ सु सु दु धइगु खँ सी मदुनि । सूत्रं धाः कथं थ्व नेपाः पार्टी थें नेवाः पहिचानलिसे सम्बन्धित पार्टी धाःसा मखु । थुकी नेवाः लगायत खय्, ब्रम्हू व मेमेगु जातियापिं मनूत नं दुजःया रुपय् दुथ्याकातःगु दु ।


निर्वाचन आयोगय् दर्ता जूगु वय्कःया पार्टीयात कयाः आयोगं संसद सचिवालयय् नं पत्राचार यायेधुंकूगु दु । संविधान कथं पार्टीया संसदीय दल टुक्रा यानाः नं न्हूगु पार्टी गठन याये जिउ । नेपाः पार्टीपाखें संसदीय दलया अध्यक्ष नं राजवंशीयात हे दयेका तःगु व वय्कः याकःचा हे जक पार्टीया सांसद जूगु कारणं वय्कः धइम्ह संसदीय दलया शतप्रतिशत संख्या खः । वय्कलं थ्वहे प्रावधानया लबः कयाः थःगु हे अध्यक्षताय् न्हूगु पार्टी गठन यानादीगु खः ।
वय्कलं न्हूगु पार्टी दर्ता याःगु ज्यायात नेपाः पार्टीया महासचिव डा. विजय सैंजुं धाःसा नेवाः मतदातातय्त याःगु गद्दारी खः धयादीगु दु ।


‘सदनय् नेवाःतय् सः तये फयेकेमा धकाः नेपाः पार्टीयात नेवाःतय्सं मत बिउगु खः, तर वय्कलं व फुक्क मतदातातय्त गद्दारी यानादिल’ महासचिव सैंजुं नेपालभाषा टाइम्स यात कनादिल ।
थनिं दत्या न्ह्यः संविधानसभा– पाखें न्हूगु संविधान जारी जूगु इलय् राजवंशीं सभासद्पाखें राजीनामा बी धकाः घोषणा यानादीगु खः । आः थः सांसद जुइ मखुत, पदय् नं च्वने मयल धकाः राजीनामा घोषणा याःम्ह राजवंशीं थौं ८५ वर्षया उमेरय् वयाः हानं न्हूगु पार्टी गठन याःगुलिं थ्व
वय्कःया पदलोलुपताया दसु खः धकाः नं डा. सैंजुं दावी यानादिल ।

पृथ्वीनारायण शाहया बुन्हि वंगु छुं दँ न्ह्यवंनिसें विवादास्पद जुजुं वयाच्वंगु दु । हरेक पुस २७ गते थ्व विवाद पिहां वइ । छझाः चकाचर्की जुइ । अले मेगु दँ तकया लागिं स्थगित जुइ । तर थुगुसीया वहसय् निता विशेष घटना जुल । छता, पृथ्वीनारायण शाहया बुन्हि न्यायेकेमाः धाइपिनि कित्ताय् पुलांम्ह जुजु ज्ञानेन्द्र शाह नं सामेल जू वल । निता, पुस २७ गते सरकारं सार्वजनिक बिदा बियाः समारोह न्यायेकेमाः लाकि म्वाः धइगु विषयय् सुझाव बीत छगू समिति गठन यायेगु ज्या जुल । निगुलिं घटना पृथ्वीनारायण शाहया बुन्हि न्यायेकेमाः धाइपिनि लागिं सुखद् खः । अले राज्ययात अग्रगामी लँय् यंकेमाः धाइपिनि लागिं दुःखद् ।


पुस २७ गतेया समारोह वास्तवय् पृथ्वीनारायण शाह प्रति सम्मान प्रकट यायेमाः लाकि म्वाः धइगु न्ह्यसलय् जक सीमित मजू । थ्व मूलतः देय्या राष्ट्रियतायात छु मिखां स्वयेगु व राष्ट्रवादयात गुकथं व्याख्या यायेगु धइगु सवाललिसे स्वानाच्वंगु विषय खः । थौंकन्हय् देय्या राष्ट्रवादया व्याख्या यायेगु दृष्टिकोणय् तीव्र ध्रुवीकरण वयाच्वंगु दु । थ्व ध्रुवीकरणय् नेपाः राज्यया व्याख्या, नेपाःया राष्ट्रियतायात स्वयेगु दृष्टिकोणया अन्तरविरोध समेत सुलाच्वंगु दु । पृथ्वीनारायणया बुन्हि न्यायेकेमाः वा न्यायेकेम्वाः धइगु खँ राष्ट्रवादया व्याख्याय् वःगु थ्व ध्रुवीकरणया प्रकट रुप जक खः ।


पृथ्वीनारायण शाहयात राष्ट्र निर्माता धायेमाः लाकि म्वाः धइगु थ्व विवादया छगू कित्ताय् राप्रपा सम्पूर्ण पार्टी, एमालेया केपी ओली प्रभृत्ति व कांग्रेसया अर्जुननरसिहं प्रभृत्तिया छुंं ब्राम्हणवादी अगुवात च्वनाच्वंगु दु । थुगुसी थ्व कित्ताय् पुलांम्ह जुजु ज्ञानेन्द्र शाह नं ‘ज्वाइन’ जुयादिल । अर्थात नेपाःया राष्ट्रवादयात स्वयेगु दृष्टिकोणया सन्दर्भय् थ्व खस ब्राम्हणवादी नेतात व पुलांम्ह जुजु छगू हे कित्ताय् च्वं वःगु खने दत ।


देशय् राजतन्त्र वंसां नं ‘राजां’ गुगु थितिया व्यवस्था याना थकूगु खः, व आः तकं ज्यूँकात्यूँ कायम हे दनि धइगु खँया थ्व नमूना खः । राजतन्त्र वनेधुंकूसां नं देशय् ‘राजाया तन्त्र’ यात हे माने याइपिं व माने यायेमाः धाइपिं तत्वत अझं ल्यनाच्वंगु जुयाच्वन । अझ उपिं देय्या राज्यसत्ताय् हे हावी जुयाच्वंगु जुयाच्वन । जब गणतन्त्र नेपालय् ‘राजाया तन्त्र’ हे लागू यायेमाः धाइपिं तत्वत पुलांम्ह राजालिसे हे जानाः छगू कित्ताय् च्वं वइ, तब देशय् राजतन्त्र धाथें चिला वन धकाः गय् यानाः धाये फइ ?


वास्तवय् पुलांम्ह जुजु व केपी ओलीया दथुइ लोकतन्त्रयात स्वयेगु दृष्टिकोण पाःगु खःसां वा गणतन्त्रयात स्वयेगु दृष्टिकोण पाःगु खःसां राष्ट्रवादयात स्वयेगु दृष्टिकोण धाःसा छफुति हे मपाःगु जुयाच्वन । राष्ट्रवादयात स्वयेगु दृष्टिकोण निगुलिं तत्वया छगू हे जुयाच्वन ।
आः थ्वहे सन्दर्भय् झीसं थुइकेमाःगु खँ वइ, झी नेवाः लगायत आदिवासी जनजातितय्सं राष्ट्रवादयात स्वयेगु दृष्टिकोण छु खः ले ? राष्ट्रवादया व्याख्या यायेबलय् झीसं धायेगु खँ व ज्ञानेन्द्र–केपीपिंसं धाइगु खँय् पाःगु छु खः ले ? थुकी झी स्पष्ट जुइमाःगु आवश्यकता दु ।


नेपालय् राष्ट्रवादया व्याख्या गनंनिसें शुरु जुल धकाः विश्लेषण यायेबलय् दकलय् न्हापां वइगु नां धइगु जुजु पृथ्वीनारायण शाह हे खः । छाय्धाःसां पृथ्वीनारायण शाहं हे ‘राष्ट्र’ निर्माण याःगु धकाः विश्लेषण याना तःगु दु । वयां लिपा जंगबहादुरं नेपाः व तत्कालिन ब्रिटिश इण्डियायात अलग्ग तयेगु लागिं नेपाली राष्ट्रवादयात छुं भचा स्पष्ट यायेत स्वःगु खनेदु । अनं लिपा नेपाली राष्ट्रवादया पूवंक व्याख्या याःम्ह जुजु महेन्द्र हे खः । जुजु महेन्द्रं प्रतिपादन याःगु राष्ट्रवादयात झीथाय् ‘महेन्द्रीय राष्ट्रवाद’ नं धायेगु याः । महेन्द्रीय राष्ट्रवाद प्रतिपादन याःम्ह जुजु महेन्द्र खःसां थ्व राष्ट्रवादया आधारभूमि धाःसा पृथ्वीनारायण शाह व जंगबहादुरया राष्ट्रवाद हे खः । नेपालय् आः तक टिके जुयाच्वंगु राष्ट्रवाद धइगु नं थ्वहे खः ।
झी नेवाः लगायत आदिवासी जनजातिं व्याख्या यानाच्वंगु राष्ट्रवाद थ्व राष्ट्रवाद सिबें बिलकुल हे अलग्ग खः । अझ अःखः हे धाःसां जिउ । ‘महेन्द्रीय राष्ट्रवाद’ मूलतः जुजुया मिखां संकथित राष्ट्रवाद खः । थुकिया आधार धइगु जुजु खः । अर्थात छम्ह जुजुयात थःगु देशया अस्तित्व कायम याना तयेगु लागिं छु छु तत्व आवश्यक जुइ, व व हे तत्वत जक तयाः निर्माण यानातःगु राष्ट्रवादया भाष्य हे महेन्द्रीय राष्ट्रवाद खः । थज्याःगु राष्ट्रवादय् दकलय् प्रमुख खँ धइगु भूमि जुइ । भूमि मदयेक राष्ट्र जुइ फइ मखु धइगु उमिगु तर्क जुइ । उकिं उगु भूमि व उगु भूमि बचे यायेत माःगु थीथी तत्वया छगू स्वरुप हे उमिगु राष्ट्रवादया मूल आधार जुइ । थ्व राष्ट्रवादया मू आधार छग्वारा भूमि जक जुइगु कारणं उमित छगू भाषा, छगू संस्कृति, छगू भेषभूषा व छगू शासन व्यवस्था दःसा गाः । अन जनता गौण विषय जुइ ।


तर झी नेवाः लगायत आदिवासी जनजातिं दयेकीगु राष्ट्रवाद थथे जुइ मखु । झीगु राष्ट्रवाद जुजुया मिखां स्वयेबलय् खनीगु राष्ट्रवाद मखु, जनताया मिखां स्वयेबलय् खनीगु राष्ट्रवाद जुइ । जनता धायेबलय् केवल पहाड, जंगल व खुसि जक मखु । जनता धायेसातकि उमिगु भाषा, संस्कृति, रहनसहन, कला व समग्रय् सभ्यता नं घाना वइ । उकिं झीसं धायेगु राष्ट्रवादया आधार धइगु अन च्वनीपिं जनताया विविधताय् आधारित जुइ । थ्व विविधताया एकता (एकरुपता मखु) हे झीगु राष्ट्रवादया आधार जुइ । अय् जुयाः छुं ई न्ह्यः नेपाः राष्ट्रिय पार्टीं ‘जनताया राष्ट्रवाद’ धइगु अवधारणा नं छक्वः न्ह्यःने हःगु खः ।

वास्तवय् राज्य पुनर्संरचनाया अर्थ थ्व राष्ट्रवादयात स्वयेगु दृष्टिकोणया हे पुनर्संरचना जुइ माःगु खः । तर झीथाय् राष्ट्रवाद पुलांगु हे कायम यानाः उकिया दुने दुथ्याइगु छगू निगू तत्व जक हिलेगु ज्या जुल । गथे कि एकात्मक व्यवस्थाया थासय् संघात्मक, राजतन्त्रया थासय् गणतन्त्र, हिन्दू राष्ट्रया थासय् धर्म निरपेक्षता । तर समग्र राष्ट्रवादया ‘फ्रेम’ धाःसा वहे । अय् जुयाः देशय् परिवर्तन वल धाःसां नं उकिया आभास झीत मजूगु खः । राष्ट्रवादया पुलांगु हे फ्रेमयात स्वीकार याइपिं जुयाः हे थौं गणतन्त्रवादी व राजतन्त्रवादी नं छगू हे कित्ताय् च्वं वःगु खः ।

नेपाः राष्ट्रिय पार्टीं थः छम्ह जक सांसद लक्ष्मण राजवंशीयात पार्टीया मानार्थ सदस्य व सांसद पदं निष्काशन याना छ्वःगु दु । बुधवाः च्वंगु पार्टीया केन्द्रीय बैठकं वय्कःयात सर्वसम्मतं निष्काशन याना छ्वयेगु निर्णय याःगु खः ।


संसदय् दर्ता जुयाच्वंगु संविधान संशोधनया प्रस्ताव बारे पार्टीपाखें बिउगु लिखित निर्देशनयात समेत वेवास्ता यानाः नेवाः प्रदेश व पहिचानया लागिं जुयाच्वंगु आन्दोलनया विरोधीतय्गु गठबन्धनय् वनाः पहिचान विरोधी गतिविधि याना जूगु कारणं पार्टीपाखें वय्कःयात निष्काशन यायेगु निर्णय याःगु खः ।


सदनय् संविधान संशोधन प्रस्ताव दर्ता जुइवं उकिया विरोधय् आन्दोलनय् कुहां वःगु एमाले नेतृत्वया गठबन्धनय् च्वनाः सांसद राजवंशीं सदन व सतकय् न्ववायेगु ज्या याना जूगुलिं वय्कःयात पार्टीं निष्काशन याना छ्वःगु खँ पार्टीया महासचिव डा. विजय सैंजुं थौं जारी यानादीगु प्रेस वक्तव्यय् उल्लेख यानातःगु दु ।


सांसद राजवंशीयात निष्काशन यायेधुंकाःलि नेपालभाषा टाइम्स अनलाइनलिसे खँ ल्हासें पार्टीया महासचिव डा. विजय सैंजुं सांसद राजवंशीं पहिचानया लागिं जुयाच्वंगु आन्दोलन व नेवाः अधिकारया लागिं जुयाच्वंगु आन्दोलनयात हे धोका बिउगुलिं वय्कःयात निष्काशन यायेत पार्टी बाध्य जूगु खँ कनादिल ।  

ह्यूमत मिसा पुचःया ग्वसालय् म्हिगः शनिवाः वृहत जीवित देवी कुमारी पुजा जुल । पुचःया ग्वसालय् थ्व निक्वःखुसी कुमारी पुजा जूगु खः ।


कुमारी पुजाय् थ्यंमथ्यं ७५० म्हेसिनं ब्वति काःगु खः । थीथी बाजं सहित बसन्तपूया लाय्कू कुमारी, मखं, किलाघः, तोखा, सक्व, बुंगः, यलय् वनाः जीवित कुमारीपिं लिसें पुजा याःगु खः । पुजाया झ्वलय् कुमारीयाथाय् समय्द्वँ छाःगु खःसा पुजाय् वःपिंसं थीथी ज्वलं छाःगु खः ।
पुजाय् ब्वति काःपिंत सक्वय् समय् बजि नकूगु खःसा पुजा क्वचायेधुंकाः नेपाः ब्यांक्वेटय् भ्वय् नकूगु खः ।

 

सतक विस्तारया नामय् सरकारं सर्वसाधारण जनतायात छेँ थुनाः जग्गा लुटे यानाच्वंगु ज्याया विरोधय् स्थानीय सतक विस्तारपाखे पीडिततय् उपत्यकापीडित संघर्ष समितिया आह्वानय् थौं जूगु स्वनिगः बन्दय् प्रहरीं व्यापक हस्तक्षेप यानाः आपालं बन्दकारीत ज्वना यंकूगु दु ।
बन्दया झ्वलय् थौं न्हिनय् असनं नेवाः ग्वाहालि पुचःया ग्वसालय् कोण सभा यानाः न्ह्यावग जुलुसय् नं टंकेश्वरय् थ्यंकाः प्रहरीं हस्तक्षेप यानाः पत्रकारतलिसें झिंनिम्हं मयाक ज्वनायंकूगु दु ।


न्हिनय् टंकेश्वर पत्रकारत उदेन न्हूसाय्मि, बिगेन तुलाधर, भागवत प्रधान लिसें शेषनारायण महर्जन, रविन्द्र श्रेष्ठ, श्यामकृष्ण प्रजापति, सुदय सिलाकार, गोर्कि श्रेष्ठ, नमस्ते साय्मि, मनिष, निरन चित्रकारपिंत ज्वंगु खःसा मम्ह छम्हेसिया नां सीमदुनि । थन ज्वंपिंत नं महेन्द्र पुलिस क्लबय् यंकूगु दु ।


कालिमाटी लागाय् प्यम्ह मनू तकं मुंके मबिसे बन्द निस्तेज यायेगु कुतः प्रहरीं याःगु खः । न्हिनय् तकया दुने स्वनिगःया थीथी लागाय् आपालं कार्यकर्तात ज्वना यंकूसां बन्द धाःसा शान्तिपूर्ण रुपं न्ह्यानाच्वंगु दु । बन्दं यानाः स्वनिगःया जनजीवन पूर्ण रुपं प्रभावित जूगु दु ।

किपा साभार- फेसबुक

बन्दयात दमन यायेगु झ्वलय् प्रहरीं थौं सुथय् हे सितापाइलां विश्वराम बलामि, करुणा बलामि व राम बलामियात ज्वना यंकूगु दुसा किपुलिं साहित्यकार पत्रकार नजरराम महर्जनयात ज्वंगु दु । कालिमाटीइ सुथय् लँय् अथें मुनाच्वन धकाः सुमन श्रेष्ठ, रामशरण साय्मि, किरण श्रेष्ठ, अमर श्रेष्ठ व कृष्ण श्रेष्ठयात ज्वना यंकूगु दु । अथे हे सामाखुसिइ सुरेन्द्र श्रेष्ठ, रामचन्द्र श्रेष्ठ, समिर शाही व पंचनारायण डंगोलयात ज्वना यंकूगु दुसा ज्याथाय् अमुल मानन्धरयात ज्वना यंकूगु दु ।


मेखे भूगोल पार्कं पिहां वःगु जुलुसय् हस्तक्षेप संघर्ष समितिया संयोजक सुमन मानन्धर लिसें दिलबहादुर मानन्धर, मनरत्न शाक्य, जुजुकाजी महर्जन, रोमन शाक्य, सुबिन मानन्धर, दिव्या श्रेष्ठ, अमृत माननधर, राजुमान शाक्य, ज्यापु महेश, सुरेन्द्रभक्त श्रेष्ठ आदिपिं १८ म्हेसित ज्वनाः भृकुटीमण्डपया पुलिस क्लबय् कुनातःगु दु ।

 


सुथय् बन्दया आह्वान यासें स्थानीयवासी–तय्सं सिन्हः तिनाः धिमे थानाः जुलुस पिकाःगु खःसा लिपा मरुइ उकियात नं पना बिल । न्हिनय् ग्वाहालि पुचःया ग्वसालय् असनं तःधंगु जुलुस पिकायेगु तयारी जूगु दु ।
बन्दया झ्वलय् मध्यपुर थिमि लागाय् नं पूवंक बन्द जुयाच्वंगु दु । अरनिका राजमार्गय् सलंसः बन्दकारीत सतकय् कुहां वयाच्वंगु दु ।

 

किपा साभार- फेसबुक


अथेहे रिंगरोड दुनेया गांगामय् नं पूवंक बन्द जुयाच्वंगु दु । जल, थैब, बादेगां, गोदावारी लागा नं पूवंक बन्द जुयाच्वंगु खँ सीदुगु दु । अथेहे तोखा, सतुंगः, नैकाप आदि थासय् नं पूवंक हे बन्द जुयाच्वंगु दुसा थन नं प्रहरीं हस्तक्षेप यानाच्वंगु खँ सीदुगु दु ।

थौं जुयाच्वंगु बन्दया समाचार संकलनय् वंपिं नेवाः पत्रकारतय्त तकं प्रहरीं ज्वना यंकूगुलिं नेवाः पत्रकार राष्ट्रिय दबुलिं विरोध प्वंकूगु दु । थौं समाचार संकलनय् वंपिं नेपालभाषा वाःपौया उपसम्पादक उदेन न्हूसाय्मि, लहना वाःपौया सुरेन्द्रभक्त श्रेष्ठ,  उपत्यका एफएमया विगेन तुलाधर व ज्वजलपा वाःपौया नजरराम महर्जनयात नं प्रहरीं ज्वना यंकूगु खः । दबूया नायः श्रीकृष्ण महर्जनं थुकियात प्रेस स्वतन्त्रताया हनन धासें तुरुन्त त्वःतेत माग यानादीगु दु ।

आवंलि न्हूगु पासपोर्ट कायेत मोबाइल पाखें हे आवेदन फारम जायेके फइगु जूगु दु । परराष्ट्र मन्त्रालयया राहदानी विभागं पासपोर्टया निंतिं आवेदन बीत आइओएस व एन्ड्रोइड मोबाइल चले जुइगु एप छ्यःगु खः । थ्व एप पाखें मोबाइलं हे आवेदन फारम जायेकाः दर्ता नं याकेफइ ।

म्हिगः छगू ज्याझ्वःया दथुइ मोबाइल एप्स नेपाल पासपोर्ट नांया एप परराष्ट्र मन्त्री प्रकाशशरण महतं सार्वजनिक यानादीगु खः । थ्व एपपाखें पासपोर्टया शुल्क पुलेगु, किपा बीगु, पतिंचिं तयेगु व नगारिकताया प्रमाणपत्र बुझे यायेगु बाहेक मेगु फुक्कं सुविधा कायेफइगु खँ धाःगु दु ।

थ्व एप सुरु जुइवं आः कम्प्युटरं आवेदन फारम जायेकाः प्रिन्ट यानाः बुझे यायेमाःगु व्यवस्था बुलुहुं चिलावनीगु खँ धाःगु दु । मोबाइलपाखें हे पूर्वक फारम जायेकाः दर्ता यात धाःसा मोबाइलय् हे बारकोड वइ । थ्व बार कोड ज्वनाः शुल्क, किपा व नागरिकयाता प्रमाणपत्र लःल्हानाः पतिं चिं तयाः पासपोर्ट कोफइगु खँ विभागं धाःगु दु । विभागय् बाहेक मोबाइलपाखें दोहा, रियाल, जेद्दा, आबुधाबी, लन्दन, कुवेत, वाशिंगटन डिसी, न्यूयोर्क व हंगकंगय् च्वंगु नेपाली नियोग व कन्सुलरय् नं आवेदन बीफइगु खँ धाःगु दु ।


    एपया निंतिं एप स्टोर वा प्ले स्टोरय् वनाः लभउबउिबककउयचत मालाः डाउलोन यायेफइ ।


    एप सार्वजनिक यायेगु ज्याझ्वलय् न्ववानादिसें विभागया महानिर्देशक सुशीलकुमार लम्सालं विभागपाखें बीगु सेवाय् सुधार यानायंकेगु कुतः कथं एप सेवा सुरु जूगु खँ कनादिल ।


स्वनिगः बन्दया प्रचार यानाच्वंगु इलय् ज्वंम्ह किरण साय्मि व जितेन्द्र वज्राचार्य लिसें ड्राइभर कुमार लामायात थौं बहनी त्वःतूगु दु । भाजु साय्मियात बन्दया प्रचार यानाः माइकिङ्ग यानाच्वंगु इलय् गाडी, गाडीया ड्राइभर सहित कालिमातिं ज्वंगु खः । अथे भाजु वज्राचार्ययात असनं ज्वंगु खः ।


उपत्यकाब्यापी सडक विस्तार पीडित संघर्ष समितिया ग्वसालय् बुधवाः जुइत्यंगु स्वनिगः बन्दया प्रचारया निंतिं थौं बहनी सक्व, सतुंगल डल्लु आदि थासं मशाल जुलुस पिकाःगु दु । बन्दया आह्वान यानाः सक्वय् पिकाःगु जुलुसय् प्रहरीं हस्तक्षेप याःगु सीदुगु दु । प्रहरीं हस्तक्षेपय् लानाः जुलुसय् सहभागी छुं मनूत घाःपाः जूगु खँ धाःगु दु ।


अथेहे प्रचारया निंतिं थाय्थासय् कोणसभा नं जूगु सीदुगु दु । कोणसभाय् न्ववाःपिं सडक विस्तार पीडिततय्सं मआब्जा तकं मबिसे थःपिनिगु छेँ, जग्गा लाका कयाः सडक विस्तार यानाच्वंगुलिं थःपिं विरोधय् कुहां वयेमाःगु खँ धाःगु दु ।


बुधवाः जुइगु बन्दया समर्थनय् नेपाः राष्ट्रिय पार्टी, संघीय समाजवादी फोरम नेपालया नेवाः प्रदेश समिति, नेकपा–माओवादी (नेवाः प्रदेश), आदिवासी जनजाति महासंघ, नेवाः स्वयात्त राज्य मंकाः संघर्ष समिति, नेवाः देय् दबू, नेवाः देय् गुथि नेपालमण्डल, हलिं नेवाः गुथि, ज्यापु महागुथि कीर्तिपुर नगर समितिं वक्तव्य पिथँगु दु ।

Page 3 of 23
Go to top

Copyright © 2016  nepalbhasa.com. All rights reserved.