All for Joomla All for Webmasters

ने.सं. ११३६ यंलागा अष्टमी

अमेरिकाया फाडर्स डेया लसताय् नेवाः अमेरिकन दबूपाखें वंगु शनिवाः सिकागोया बंकरहिलय् गुभ्वँय् न्यायेकल । सिकागोय् च्वनाच्वंपिं सछिं मल्याक नेवाः व गैर नेवाःतय्सं ब्वति काःगु उगु गुँभ्वजय् लाखे व झ्यालिंचा प्याखं क्यनेगु लिसें समयब्व ब्वयेगु ज्या जूगु खः । गुँभ्वजय् उदय महर्जन लाखे व माया ब्यञ्जनकार झ्यालिंचा जुयाः प्याखं हुलादीगु खः ।

दबूया नायः श्रवणकुमार श्रेष्ठं लसकुस यानादीगु ज्याझ्वलय् ल्यू नयः सर्वज्ञधर तुलाधरं नेवाः अमेरिकन दबूया आःतकया उपलब्धी व हनाया बारे न्ववानादिल । नेवाः अमेरिकन दबूयात थुगुसी नेपालभाषा परिषदं चित्तधर हृदय सिरपाः लःल्हाःगु खः ।

 

माओवादी केन्द्रया भरतपुर जिल्ला संगठनं भरतपुर महानगरपालिकाया मतगणना इलय् मतपत्र खूगु थासय् हाकनं मतदान यायेमाःगु माग याःगु दु । जिल्ला संगठनं छगू विज्ञप्ति जारी यासें मतपत्र खूगु सम्बन्धित वडाय् हाकनं मतदान यायेमाःगु माग याःगु खः । जिल्ला संगठन समितिया इन्चार्य इश्वरी भट्टराइ नं हस्ताक्षर यानाः पिथँगु वक्तव्यय् मतपत्र खूगु द्वपनय् ज्वनातःपिं थः कार्यकर्ता द्रोणबाबु शिवाकोटी व मधु न्यौपानेयात नं तुरुन्त त्वःतेत माग याःगु दु ।

प्रम पुष्पकमल दाहालया म्ह्याय् रेणु दाहाल व एमालेया देवी ज्ञवाली दथुइ तीव्र प्रतिस्पर्धाया दथुइ जुयाच्वंगु मतगणनाय् ल्वापु जुयाः मतपत्र खुनाबिइवं थौं वंगु चान्हंनिसें मतगणना हे स्थगित जूगु दु । निर्वाचन आयोगया अधिकृतं थ्व घटनायात कयाः म्हिगः जारी याःगु सूचनाय् मतगणनास्थलय् ल्वापु यानाः गणनास्थल हे कब्जाय् कायेगु तकया कुतः याःगुलिं मतपत्र ल्याः खायेगु ज्या स्थगित याये माःगु खँ धयातःगु दु । आयोगं सुयातं दोष धाःसा बिउगु मदु ।

चितवन नपा वडा १९ या मतगणना जुयाच्वंगु इलय् थ्व घटना जूगु खः । निर्वाचन आयोगं आः मेगु सूचना पिहां मवःतले गणना मजुइगु खँ धाःगु दु । थ्व मतगणना जुयाच्वंगु इलय् तकं एमालेया उम्मेदवार देवी ज्ञवाली ७०० मतं न्ह्यःने लानाच्वंगु दु । आः वडा नं. १८ व १९ या जक मतगणना जुइ ल्यं दनि । थनया मतगणनाय् गबलें एमाले न्ह्यःने गबलें कांग्रेस–माओवादी न्ह्यःने लानाः तीव्र प्रतिस्पर्धा जुयाः अन्तिम इलय् तक नं सु त्याइ धकाः धाये मफयाच्वंगु खः ।

आः पुनः मतगणना कि पुनः मतदान ?

मतपत्र ल्याः खायेगु स्थगित जुइवं आः अन पुनः मतदान यायेगु लाकि मतगणना जक यायेगु धइगु खँय् नं विवाद पिहां वःगु दु । एमालें १९ नम्बर वडाय् मतगणना सुचारु यायेमाःगु माग याःगु दुसा नेपाली कांग्रेसं थ्व वडाय् मतदान हे हानं शुरु यायेमाःगु माग याःगु दु । निगुलिं पार्टीं पिकाःगु अलग अलग वक्तव्यय् थ्व अलग अलग माग यानातःगु खः ।

एमालें मतपत्र खुइगु ज्याय् माओवादीया द्रोण शिवाकोटी, दिलीप न्यौपाने लगायतया कार्यकर्ताया ल्हाः दु धासें उमित कारवाही यायेमाःगु माग याःगु दु । एमालें थ्व घटनाया विरोधय् थौं नारायणघाटय् छगू प्रदर्शन समेत यायेत्यंगु दु । उखे माओवादी कार्यकर्तातय्सं धाःसा मसि लटपट जुयाच्वंगु छपाः मतपत्र सदर यायेगु लाकि बदर यायेगु धकाः पिहां वःगु विवादया दथुइ सातुमतु साःबलय् गूगु खः धकाः धाःगु दु ।

तर एमालें माओवादी कार्यकर्तातय्सं मतपत्र खुइगु धकाः न्हापा हे योजना दयेकाच्वंगु खँ थःपिंसं सिउ धाःगु दु । कांग्रेस–माओवादीया मंकाः उम्मेदवार रेणु दाहालं धाःसा थःपिं त्याइगु निश्चित खने दयेवं एमाले कार्यकर्तात आँटे चायाः थज्याःगु ज्या याःगु खः धकाः द्वपं बियादीगु दु ।

येँ (नेपालभाषा टाइम्स)÷ येँ महानगरपालिकाया मेयर उम्मेदवार एमालेया विद्या सुन्दर शाक्य व नेपाली कांग्रेसया राजुराज जोशी दथुइया मतान्तर कुहांवःगु दु । थौं सुथय् ९ बजे तक एमालेया शाक्य १४ हजार ५०० मतं न्ह्यःने लानाच्वंगु खःसां न्हिनय् १२ बजे तक थ्यंबलय् १२२५५ मतं जक न्ह्यःने लाःवंगु दु । कांग्रेस उम्मेदवार जोशीं मतान्तर म्हो याःसां त्याइगु सम्भावना धाःसा थ्यमथ्यं मदयेधुंकूगु दु ।
न्हिनय् १२ बजे तकया दुने थ्यमथ्यं १ लाख ५५ हजार मत गणना क्वचायेधुंकूगु दु । आः १७ हजार ति जक मत ल्याखाये ल्यं दनि । थ्व ल्याखं जोशी त्याकेगु खःसा ल्याखानाच्वंगु ८०÷९० प्रतिशत मत थःगु पक्षय् लाकेमाली । गुगु छुं नं कथं सम्भावना मदु । आः मतगणना जुयाच्वंगु थाय् १३, १५ वडा एमालेया बांलाःगु प्रभाव दुगु क्षेत्र खः । थनं कांग्रेसयात मत अप्वः वनीगु सम्भावना मदु । आःतकया गणना कथं नं थन एमालेयात हे मत अप्वः वनाच्वंगु दुसा वडाअध्यक्षया उम्मेदवारपिं नं विजय लँय् न्ह्याः वनाच्वंगु दु ।
उपमेयरय् धाःसा नेपाली कांग्रेसया हरिप्रभा खड्गी विजय घोषणा जक याये ल्यंदनिगु अवस्था दु । वय्कः त्यायेधुंकूगु दु । आःतकया मतगणना कथं वय्कः थः निकटम प्रतिद्वन्द्वी राप्रपाया राजाराम श्रेष्ठ स्वयां १८९७९ मतं न्ह्यःने लायेधुंकूगु दु । वय्कःया मत ४६६१२ थ्यनेधुंकूगु दुसा राप्रपाया २७६४३ जक दु ।

सक्व (नेपालभाषा टाइम्स)÷ सक्वया शंखरापुर नगरपालिकाया मेयर पदय् एमालेया सुवर्ण श्रेष्ठ त्याःगु दु । छुं ई न्ह्यव क्वचाःगु मतगणना कथं भाजु श्रेष्ठ ४८३३ मत हयाः मेयर पदय् विजयी जुयादीगु खः । वय्कःया प्रतिद्वन्द्वी नेपाली कांग्रेसया शंकर तिवारीं २९५० मत हःगु खःसा माओवादीया कृष्णराज सुवेदीं २४३७ मत हःगु खः ।
अथेहे उपमेयर पदय् नं एमाले हे त्याःगु दु । एमालेया शुक्रलक्ष्मी श्रेष्ठं ४५०१ मत हयाः उपमेयर पदय् विजयी जुयादीगु खः ।

 यदि दथुइ छुं कथंया विलम्ब मजुल धाःसा थ्वहे वइगु निवाःया दुने संघीय समाजवादी फोरम व नयाँ शक्ति नेपाल पार्टी दथुइ एकीकरण जुयाः न्हूगु पार्टी गठन जुइगु निश्चित जूगु दु ।विशेष सूत्रं धाःकथं आः निर्माण जुइगु न्हूगु पार्टीया नां ‘संघीय समाजवादी फोरम नयाँ शक्ति’ जुइ । थुकिया एकीकरण घोषणा पत्र तयार जुइधुंकूगु दु ।
पार्टीया राजनीतिक सिद्धान्त ‘संघीय समाजवाद’ जुइ । थुकी संघीयता सम्बन्धी सिद्धान्त संघीय समाजवादी फोरमपाखें व समाजवाद सम्बन्धी सिद्धान्त नयाँ शक्तिपाखें समिश्रण यानाः दयेकूगु दु ।पार्टीया चुनाव चिं ल्हातं ज्वनाच्वंगु मशाल जुइसा ध्वाँय् ह्याउँगु पृष्ठभूमिइ तुयुगु नगु (तारा) तयेगु खँ नं क्वःजिउगु दु ।
सैद्धान्तिक खँय् सहमति जुइधुंकूगु दुसा नेतृत्वया खँ धाःसा समाधान जुइमफुनि । आःतक वयाच्वंगु प्रस्ताव कथं पार्टीया कार्यकारी अध्यक्ष फोरमया नायः उपेन्द्र यादव जुइसा नयाँ शक्तिया नायः डा. बाबुराम भट्टराईयात राष्ट्रिय अध्यक्ष अथवा सर्वोच्च नेताया पद बीगु खँ जुयाच्वंगु दु । तर उकी सहमति धाःसा कायम जुइमफुनि ।


आः वइगु १५ गते तकया दुने हे पार्टी एकीकृत यानाः सम्भावना दुसा चुनावय् ब्वति कायेगु तकया खँय् सहमति जुइधुंकूगु खँ नं सूत्रं धाःगु दु ।

मोर्चा एकताया निंतिं बैठक

स्थानीय चुनाव बहिष्कार याना वयाच्वंगु मधेसी मोर्चा दथुइ नं एकता यायेगु निंतिं थौं बैठक च्वनेत्यंगु दु । मोर्चाय् आवद्ध संघीय समाजवादी बाहेक मेगु खुगू मधेसी दलया शीर्ष नेतात बैठक च्वनेत्यंगु खः । संघीय समाजवादी बाबुरम भट्टरईया नयाँ शक्ति लिसे एकीक®ण यायेत्यंगुलिं मधेसी दललिसे एकताय् मवनीगु जूगु दु । तमलोपाया अध्यक्ष महन्थ ठाकुरया छेँय् च्वनेत्यंगु बैठकय् तमलोपा लिसें सद्भावना पार्टी, रष्ट्रिय मधेस सद्भावना पार्टी, फो®म गणतान्त्रिक, त®ाई मधेस सद्भावना पार्टी व नेपाल सद्भावना पार्टीया शीर्ष नेतात सहभागी जुइ । बैठकय् एकीकरणया मोडल व संगठनात्मक संरचनाबार सहलह जुइ धाःगु दु । बैठकय् एकताया दछि तक चक्रिय प्रणालीइ पालंपाः अध्यक्ष ल्ययेगु वा छम्हेसित सर्वमान्य अध्यक्ष दयेकेगु बार सहलह जुइ धाःगु दु ।

ख्वपया प्यंगू नगरपालिकाय् मेयर जुइगु निंतिं प्रमुख पार्टीया स्थानीय नेतातय् दौडधुप सुरु जूगु दु । ख्वपय् ख्वप नपा लिसें मध्यपुर थिमि, सूर्यविनायक व चाँगुनारायण यानाः प्यंगू नगरपालिका दु । थुपिं मध्ये ख्वप नपा बाहेक मेगु स्वंगू नपाय् मेयर जुइगु निंतिं स्थानीय नेतात थःथःगु पार्टीपाखें टिकट कायेत ब्वाँय् वनेगु सुरु यानाहःगु दु ।


मध्यपुर थिमि नपाय् कांग्रेसपाखें मेयर जुइगु निंतिं अष्टकुमार कवेया नां न्ह्यःने वयाच्वंगु दु । वय्कः कांग्रेस जिल्ला सभापतिया निंतिं उम्मेदवार नं जुइधुंकूम्ह खः । तर वय्कःया लिसें थिमिइ नगर समिति सभापति सुरेन्द्र श्रेष्ठ, पुलांम्ह मेयर मदनकृष्ण श्रेष्ठ, मुरारी आचार्य, केदार खड्का व गोकुल शर्मा नं टिकट कायेत ब्वाँय् वनाच्वंगु दु ।


एमालेपाखें धाःसा नगर कमिटी अध्यक्ष मदनसुन्दर श्रेष्ठं मेयरय् ल्वाइगु थ्यंमथ्यं पक्का दुगु खँ धाःगु दु । थन एमालेपाखें वय्कः हे छम्हेसिनं जक मेयरया निंतिं दावी यानाच्वंगु दुसा पार्टीं नं वय्कःयात हे न्ह्यःने हयाच्वंगु दु । उकिं वय्कलं मेयर जुइगु निंतिं भोट फ्वनेगु हे सुरु यायेधुंकूगु दु ।
ख्वपया हे सूर्यविनायक नगरपालिकाय् कांग्रेसपाखें निशान ढुंगेल, विष्णुराज कार्की, राजु खड्का, नारायणभक्त खायमली व सुशील बस्नेतं टिकटया दावी यानाच्वंगु दु । अथेहे एमालेपाखें शशीजंग थापा, बासुदेव खड्का, राजकुमार जोशी व किरण थापा न्ह्यःने वयाच्वंगु दु ।


अथेहे चाँगुनारायण नगरपालिकाय् मेयरया निंतिं कांग्रेसपाखें कृष्णलाल भँडेल, सुरु बानियाँ, जीवन खत्री, शिवहरि केसी व यादव अधिकारीं दाबी यानाच्वंगु दुसा एमालेपाखें सोम मिश्र, हरिशरण लामिछाने, रमेश बुढाथोकी, दामोदर दंगाल, श्रीभक्त कासिछवाया नां न्ह्यःने वयाच्वंगु दु ।
मेखे नेपाल मजदुर किसान पार्टीं ख्वपय् चैत्य राज शाक्य व थिमिइ रमेश थापा श्रेष्ठयात थनीगु खँ धाःगु दु । पार्टीं याकनं हे थः सकलें उम्मेदवारतय् नां घोषणा याइगु खँ धाःगु दु ।


कांग्रेस व एमालेय् मेयर जुइपिं ग्वाःग्वाः पिहां वयाच्वंसां माओवादी केन्द्र दुने धाःसा आः तक सुयात उम्मेदवार दयेकेगु धयागु बारे सहलह तकं मजूनिगु खँ धाःगु दु । अथे हे संघीय समाजवादी फोरम, नयाँ शक्ति पार्टीया उम्मेदवारतय् बारे नं खास चर्चा जूगु खने मदुनि । (रासस)

 

नेपाल लिपि गुथिया म्हिगः जूगु तःमुँज्यां भाषासेवी निरञ्जन तबःयात न्हूम्ह नायः ल्यःगु दु । म्हिगः जूगु तःमुँज्यां तबःया नेतृत्वय् न्हूगु ज्यासना पुचः ल्यःगु खः । उकी अनिल स्थापित व महेशमान डंगोल ‘लँजुवाः’ पिं न्वकु, पवित्र कसाः
छ्यांज्ये, उत्तम साय्मि दांभरि व मू दुजलय् कमलतारा तुलाधर, विमला मानन्धर, मैयाँ महर्जन, राजु नापित, रमेशमान पिया व निर्मल वज्राचार्यपिं च्वनादीगु दु । तःमुँज्या ग्वसाः खलःया नायः प्रज्ञारत्न शाक्यया अध्यक्षताय् जूगु उगु तःमुँज्या लिपा न्हूम्ह नायः निरञ्जन तबं आः थःपिंसं यायेत्यनागु ज्याया योजना बारे कनादीगु खः । पुलांम्ह नायः शरद कसाः ‘कसाःछेँ’ आकाझाकां मदयाः गुथिया नायः पद प्वनाच्वंगु खः।

येँ (नेपालभाषा टाइम्स)÷सक्वया शंखरापुर नगरपालिका कायम हे जुइमाः धइगु माग यासें थनिंनिसें थनया रत्नपार्क लागाया शान्तिबाटिकाय् रिले अनसन शुरु जुल । शंखरापुर नगरपालिका कायम जुइमाः धकाः संघर्ष यायेत गठित नागरिक समाजया अग्रसरताय् थौं नेपाली कांग्रेसया नेता व कार्यकर्तात अन अनसन च्वंगु खः । थौं २ नम्बर क्षेत्रया कांग्रेस सांसद दिपकप्रसाद कुइँकेलं उगु अनसनया उलेज्या यानादीगु खः । प्यन्हु तक जुइगु थ्व अनसनय् थौं कांग्रेस, कन्हय् एमाले, कंस माओवादी व प्यन्हु राप्रपाया नेता कार्यकर्तात अनसन च्वनीगु ग्वसाः दु । सरकारयात निरन्तर दबाब बीगु लागिं थौं खुल्ला रुपं अनसन शुरु याःगु खः ।

येँ (नेपालभाषा टाइम्स)÷सरकारं संविधान संशोधन प्रस्तावयात वेवास्ता यानाः चुनावया मिति घोषणा याःगु धासें मधेसी मोर्चा लगायत संघीय गठबन्धनं सरकारयात बियातःगु समर्थन लित कायेगु तयारी याःगु दु ।
थौं च्वंगु संघीय गठबन्धनया बैठकय् सरकारयात बियातःगु समर्थन लित कायेगु प्रस्ताव वःगु खँ सीदुगु दु । मधेसी मोर्चा व गठबन्धनय् दुथ्याःगु थीथी दलया समेत यानाः ४२ म्ह सांसदतय्गु समर्थन वर्तमान सरकारयात दु ।


उकिं आः सरकारयात छगू अल्टिमेटम बियाः उलि तकया दुने नं संविधान संशोधनया ज्या मयात धाःसा ४२ म्हं सभासद्पाखें सरकारयात बियातःगु समर्थन लित कायेगु प्रस्ताव बैठकय् पेश जूगु खः । न्हिनय् न्हिनय् १ बजे तक गठबन्धनया बैठक जारी हे दनि 


सरकारं स्थानीय चुनाव घोषणा यायेवं उकिया विरुद्ध गज्याःगु कार्यक्रम न्ह्याकेगु धइगु बारे सहलह यायेत थौं संघीय गठबन्धनया बैठक च्वंगु दु । गठबन्धन संयोजक उपेन्द्र यादव विरामी जुयाच्वंम्ह थःथिति स्वयेत भारतया न्हूदिल्ली वनाच्वंगु कारणं गठबन्धनया बैठक च्वने मफयाच्वंगु खः ।


सरकारं संविधान संशोधनयात वेवास्ता यासें चुनावया मिति घोषणा याःगु धासें गठबन्धनं असन्तोष प्वंका वयाच्वंगु खः । चुनावया मिति घोषणा जुइवं हे मधेसी मोर्चां आन्दोलनया ज्याझ्वः घोषणा याःसां संघीय गठबन्धनं धाःसा औपचारिक धापू पित मबिउगु खः ।
गठबन्धनया थौं च्वंगु बैठकं चुनाव बहिष्कारयात कयाः थीथी ज्याझ्वःत नं तयार याइगु खँ धाःगु दु ।


ख्वप(नेपालभाषा टाइम्स)÷ उसाँय् मफयाच्वंम्ह साहित्यकार रामशेखर नकःमियात नेपालभाषा साहित्य तःमुँज्यां छगू लाख व द्वःछि तका दां ग्वाहालि याःगु दु । म्हिगः सुथय् क्यान्सर अस्पलताय् वनाः वय्कःया हे ल्हातय् तःमुँज्याया नायः जनकवि चन्द्रबहादुर उलकं उगु दां लःल्हानादीगु खः । तःमुँज्याया सांस्कृतिक विधा मूल्यांकन यायेगु ज्याय् स्वीन्यादँ तक ज्या यानादीम्ह वय्कःया सुस्वास्थ्यया कामना यासें तःमुँज्यां तत्कालया लागिं थ्व दां ग्वाहालि यानागु खँ तःमुँज्याया दुजः राजेन्द्र श्रेष्ठं कनादिल । म्हिगः तःमुँज्याया दुजःपिनि छगू पुचः अस्पताल वनाः रामशेखरयात नापलानादीगु खः ।

Page 2 of 23
Go to top

Copyright © 2016  nepalbhasa.com. All rights reserved.