All for Joomla All for Webmasters

ने.सं. ११३६ यंलागा अष्टमी

येँ, (नेपालभााषा टाइम्स)÷ तःभुखाय् लिपा शुरु जुइमाःगु पुनर्निर्माणया ज्याय् दक्ष जनशक्ति मदयाः समस्या जुयाच्वंगु सीदुगु दु । थुकिं यानाः छेँ दनेगु ज्या शुरु याःपिं मनूत नं दथुइ दीमाःगु अवस्था वयाच्वंगु दु ।
थनया १२ वडास्थित ओन्दे त्वालय् छेँ दनाच्वंम्ह बालकृष्ण शाही नं वंगु कार्तिकं ज्या शुरु याःगु खःसां ज्या याइपिं मदयाः आः तक दिनाच्वंगु दु । न्हापा ठेकेदारनाप सम्झौता जूगु इलय् खुलाया दुने फुक्कं ज्या क्वचायेकेगु सहमति जूगु खःसां ज्या शुरु यासांनिसें हे ठेकेदारं दक्ष जनशक्ति हये मफयाः खुलाया दुने निगू तल्ला हे ढलान याये मफुत । थुकिं यानाः दथुइ हे उम्ह ठेकेदारं ज्या त्वःताबिलसा मेम्ह ठेकेदार मालेत हे निला बिउगु खँ वय्कलं कनादिल ।
वय्कःया कथं दक्ष जनशक्ति मदयाः छखे छेँ दनेगु ज्या लिबाःगु दुसा मेखे गुलि लिबात उलि हे निर्माण खर्च अप्वइगु व बैंकया ब्याज समेत थहां वनीगु जुयाच्वंगु दु । ‘छेँ त्वःताः बालं च्वनाः दनेगु शुरु याना तर थुखे छेँ दने सिमधः उखे बाः पुलेमालाः मेगु हे चिन्ता जुयाच्वंगु दु ।’ वय्कलं दुःख प्वंकादी ।
अथेहे धाडिङय् छेँ जुयाः किपूया त्याङ्लाफाँटय् छेँ दनाच्वंम्ह अशोक श्रेष्ठया समस्या नं अथे हे दु । वय्कःया कथं सुथय् ज्या यायेत वःम्ह मनू जा नये धुंकाः लिहां मवसे मेथाय् वना बी । वय्कलं धयादी – ‘छम्ह हे ठेकेदारं तःथाय् ज्या कया तइ अले ज्या याइपिं मदु धकाः छम्ह निम्ह जक ज्या याइपिं छ्वया हइ, थथे यानाः ला गबले छेँ दनेगु क्वचाइ ?’
इन्जिनियर सुरेन्द्र खड्गीया धापू कथं २०७२ साल वैशाख १२ गते ब्वःगु तःभुखाचं दुनावंगु फुक्कं छेँ दनेगु खःसा सरकारं थनया ल्याय्म्हतय्त हे तालिम बीमाःगु आवश्यकता दु ।
मनूत थन ज्या मदु धकाः विदेश वनाच्वंगु दु । यदि उमित स्वलांनिसें खुला तक तालिम बिल धाःसा थन हे लछिया स्वीद्वः निसें पीद्वः तक अःपुक हे कमे याये फइगु अवस्था आः दु । यदि थनया ल्याय्म्ह पुस्तायात तालिम बीगु खःसा झिंन्यादँ तक ज्याया अभाव मजुइगु वय्कःया अनुमान दु ।
भुखाय् ब्वनेधुंकाः बुंगय् थम्हं पीम्ह स्थानीय वासिन्दायात दकःमि, सिँकःमिया तालिम बियागु खँ वय्कलं कनादिल । वहे इलय् येँय् नं थज्याःगु तालिम बीत कुतः यानागु खँ कनादिसें अबले नेवाः नुगः नांगु संस्थां थुकी चिउताः प्वंकूगु खःसां ज्यां निरन्तरता धाःसा काये मफुगु खँ वय्कलं कनादिल ।
मेखे ठेकेदारतय् धापू धाःसा मेगु हे दु । यक्वस्यां छेँ दनेगु तयारी याःसां थःपिंसं ज्या यायेमफुगु खँ येँया तुपेकया ठेकेदाज्यामि माक्व दु तर डण्डी चीपिं, दकःमि, फर्मा ताइपिं दक्ष जनशक्ति मदु अले ठेक्का कयां छु याये ?’ र राम श्रेष्ठं कनादी । ‘ज्या सःपिं हे मदु गथे यानाः ठेक्का कायेगु ?’ वय्कलं न्ह्यसः तयादी, ‘

न्हापांगु व निगूगु चरणया चुनाव बहिष्कार याःगु तराईया प्रमुख दल राष्ट्रिय जनता पार्टी नेपालं थौं निर्वाचन आयोगय् पार्टी दर्ता याइगु जूगु दु । उकिया लागिं पार्टीया नेता व कार्यकर्तात थौं सुथय् हे पार्टी ज्याकू बुद्धनगरय् मुंगु खः ।


तर राजपां थौं पार्टी दर्ता याःसां थ्व लिपा जुइगु चुनावय् ब्वति कायेगु लागिं धाःसा मखु धाःगु दु । राजपां हे बहिष्कार याःगु कारणं २ नम्बर प्रदेशया चुनाव असोजं यायेगु धकाः मिति बियातःगु दु । यदि थःपिंसं धया थें संविधान संशोधन मजुल धाःसा २ नम्बर प्रदेशय् जुइगु स्वंगूगु चरणया चुनावय् नं थःपिंसं ब्वति मकायेगु खँ राजपां धाःगु दु ।


राजपा नेता अनिल झां राजनीतिक दल जूगु कारणं निर्वाचन आयोगय् दर्ता याये माःगु औपचारिकता पूरा यायेत जक थःपिंसं पार्टी दर्ता यायेत्यनागु खः, चुनावय् हे ल्वायेत दर्ता यायेत्यनागु धाःसा मखु धयादीगु दु । वय्कलं धयादीगु दु, ‘पार्टी दर्ता यायेवं तुं चुनाव ल्वायेमाः धयागु मदु । चुनाव ल्वायेगु सम्बन्धी खँ सरकारया भूमिकां निर्धारण याइ ।’


लिसें राजपां पार्टीपाखें चुनाव बहिष्कार यायेगु धायेक धायेक नं निगूगु चरणया चुनावय् उम्मेदवार जूवंपिं कार्यकर्तातय्त कारवाही यायेगु खँ नं धाःगु दु । थ्वहे झ्वलय् राजपां थौं पार्टी दर्ता यायेगु धाःसां थौं केवल दर्ताया लागिं निवेदन जक बीगु खँ धाःगु दु । खुगू पार्टी जानाः दयेकूगु थ्व पार्टीया केन्द्रीय दुजःतय् ल्याः नं खुसःम्ह हे दुगु जुयाः थ्व फुक्क दुजःतय् नांधलः व पार्टीया विधान धाःसा कन्हय् जक बुझे यायेगु खँ धाःगु दु ।

परम्परागत नेवाः बाजं स्यनीपिं व स्यनाकाइपिं मदिक्क अप्वयेका यंकेगु ताः तयाः डल्लु आवास साँस्कृतिक ल्याय्म्ह पुचलं धिमे बाजं प्रशिक्षण सुरु याःगु दु ।
नेपाली संस्कृति संरक्षण व सम्वद्र्धन यायेगु ताः तयाः छुं न्हि न्ह्यव जक जूगु पुचः नीस्वंगु खः ।


किरण महर्जनया अध्यक्षताय् नीस्वंगु थ्व पुचलं परम्परागत बाजं संरक्षण, उत्थान यायेगु लिसें संस्कृति व कला क्षेत्रय् विशेष योगदान बिया वयाच्वंपिं व्यक्तितय्त सम्मान यायेगु उद्देश्य तयातःगु दु ।
पुचलय् रविन महर्जन उपाध्यक्ष, अरिश महर्जन सचिव, त्रिश्ला ध्याक्वो सहसचिव, सन्देश महर्जन कोषाध्यक्ष व निरज श्रेष्ठ, रिकेश महर्जन, न्यूतन महर्जन, जेनिश महर्जन, एलिशा महर्जन व उमंग रंजित दुजः कथं च्वनादीगु दु । पुचलं  वइगु शनिवाः छगू साँस्कृतिक ज्याझ्वः नं यायेत्यंगु दु ।

विश्व–न्यंकंया मनूतय्त नेपालभाषा स्यनेगु लागिं वल्र्ड नेवाः अर्गनाइजेशन (डब्लुएनओं) नेपालभाषा कक्षा सञ्चालन याइगु जूगु दु । थ्वहे वइगु शनिवाः (जुलाई ८) निसें थ्व कक्षा शुरु जूगु दु । हरेक निवाःया छगू शनिवाः नेपाःया ई कथं बहनीया ८ः४५ बजे थ्व कक्षा शुरु जुइ ।

फेसबुकय् ई–दबू वा वेबसाइतपाखें थ्व कक्षाय् सहभागी जुइ फइगु खँ ग्वसाः खलकं धाःगु दु । थ्व कक्षा अमेरिकाय् च्वनाः नेवाः सम्बन्धी ज्या याना च्वनादीम्ह विज्ञ दया शाक्यं सञ्चालन यानादी । लगातार खुगू कक्षा काल कि नेवाः भाय् ल्हाये सइगु खँ वय्कलं कनादीगु दु । थ्व कक्षा अंग्रेजी भासं सञ्चालन जुइ ।

दीपायल सिलगढी नगरपालिकाय् ल्याः खानाच्वंगु मतपत्र गायब जुइवं गणना दिके माःगु अवस्था वःगु दु । उगु नगरपालिकाया वडा १ निसें ८ तक ल्याः खायेधुंकूगु खः । ९ वडाया गणना धाःसा दिउगु दु । उगु वडाया स्वंगू बुथया २० पाः मतपत्र गायब जुसेंलि गणना स्थगित यायेमाःगु खँ मुख्य निर्वाचन अधिकृत नरनारायण पौडेलं कनादिल ।

उगु वडाय् मुक्कं १०८८ मत कुतुं वंगु खः । उकी मध्ये २० पाः मतपत्र तनाच्वंगु खँ निर्वाचन अधिकृतया कार्यालयं धाःगु दु । वडा नं. ८ तकया मत ल्याः खाःबलय् नेपाली काँग्रेसया उम्मेदवार विजय खड्का (बाजीं) ३८५७ व उपप्रमुखया प्रोसिस महरां ३७८३ मत काःगु खः । अथे हे एमालेया उम्मेदवार मन्जु मलासीं ३८७२ मत व उपप्रमुखय् शिवराज खड्कां ४०४६ मत काःगु खः ।

धरानय् ४ घन्टागणना स्थगित
सुनसरी जिल्लाया धरान उपमहानगरपालिकाय् स्थगित जूगु मतगणना हानं शुरु जूगु दु । मतगणनायात एमालेया कार्यकर्तातय्सं थः यकःति याना यंकल धासें कांग्रेस कार्यकर्तातय्सं गणना बहिष्कार यायेवं मत ल्याः खायेगु ज्या स्थगित जूगु खः ।
मतगणनास्थलयात व्यवस्थित मयाःगु कारणं अन एमाले कार्यकर्तातय्सं हय्भुनाः गणनास्थल हे थःगु थें याना काःगुलिं कांग्रेस कार्यकर्तातय्सं विरोध याःगु खः ।

उमिसं गणनास्थल त्वःता वनेवं हानं सर्वदलीय बैठक च्वनाः स्थलयात व्यवस्थित यायेगु सहमति लिपा हानं गणना शुरु जूगु खः । थुकिं यानाः अन प्यघौ मत ल्याः खायेगु बन्द जूगु खः ।

बज्र क्रियशन प्रा.लि.पाखें इन्डिजिनस टेलिभिजनय् छवाःयंकं ‘नेवाःलय’ नामं नेपालभाषाया ज्याझ्वः सुरु जूगु दु । म्हिगः नांजाःम्ह हास्य कलाकार मदनकृष्ण श्रेष्ठं न्हिं बाघौ प्रशारण जुइगु उगु नेपालभाषा ज्याझ्वःया सुरु यानादिल । बहनी ६ः३० बजेनिसें बाघौ न्ह्याइगु उगु ज्याझ्वः आइतवाःनिसें सनिवाः तक फरक फरक ज्याझ्वः कथं न्ह्यब्वइ ।

सिटी म्याक्स सिनेमा हलय् जूगु समारोहय् बिउगु जानकारी कथं आइतवाः नेवाः बिजिनेश, सोमवाः ख्यालि एक्सपे्रस, मंगलवाः संगीत ख्यः, बुधवाः नेवाः नन्स्टप म्यँे, बिहिवाः झीगु संकिपा, शुक्रवाः नेवाः ग्लामरस किपा व सनिवाः जिगु एस.एम.एस. नामं ज्याझ्वः न्ह्याकेत्यंगु खः । बज्र क्रियशनया नायः शैलेश डंगोलया सभापतित्वय् जूगु ज्याझ्वः उलेज्या समारोहय् मूपाहां श्रेष्ठं ज्याझ्वः न्ह्याकामिपिंत सम्मान नं यानादिल ।

नेवाः न्ह्यलुवा मल्ल के. सुन्दरं भावनात्मक चेतना ब्वलंकेत टेलिभिजनं ग्वाहालि याइगु विश्वास प्वंकादिल । २९ वडा अध्यक्ष कुशबहादुर ढकाल, सिने पत्रकार विजयरत्न असंबरे, भाषासेवी पवित्र बज्राचार्य व संगीतकार अमरराज शर्मापिसं नं नुगःखँ कनादीगु ज्याझ्वलय् नेवाः संकिपा समाजया अध्यक्ष सुरेन्द्र तुलाधर व राजेन्द्र महर्जनं भिंतुना देछानादीगु खः ।

वडाय् निर्वाचित प्रतिनिधि व कर्मचारी दथुइ अधिकारया अन्यौल

स्थानीय तहया चुनाव लिपा निर्वाचित जुया वःपिं जनप्रतिनिधि व ताः इलंनिसें प्रशासन चले याना वःपिं कर्मचारी दथुइ ज्या यायेगु अधिकारया खँय् मनमुटाव शुरु जूगु खँ सीदुगु दु । येँ महानगरपालिका अन्तर्गत लाःगु थीथी वडाय् न्हापा हे दुपिं सचिव व निर्वाचित वडा अध्यक्षतय् दथुइ छु छु ज्याय् वडाध्यक्षं सही यायेगु व छु छु ज्याय् सचिवं सही यायेगु धइगु खँय् अन्यौल जूगु व गनं गनं थ्वहे खँयात कयाः द्वन्द्व समेत पिहां वःगु खँ सीदुगु दु ।

खास यानाः वडा ज्याकूपाखें याइगु छगू मू ज्या धइगु छेँ दनीबलय् तयार याइगु नक्सायात स्वीकृति बीगु खः । थ्व स्वीकृति बीगु नक्साय् सुनां सही यायेगु धइगु खँय् थीथी वडाय् वडाध्यक्ष व सचिव दथुइ अन्यौल पिहां वःगु खँ सीदुगु दु ।
वडाय् निर्वाचित जनप्रतिनिधि मदुगु जुयाः ताः ई न्ह्यवंनिसें सचिवं हे नक्साय् सही याना वयाच्वंगु खः ।

आः निर्वाचित जनप्रतिनिधि वयेधुंकूसां नं सचिवतय्सं जनप्रतिनिधियात सही यायेगु कानून आः तक बने मजूनिगु जुयाः थःपिंसं हे सही याये दयेमाः धकाः सही मयाकुसे तयातःगु लूगु दु । खास यानाः न्हूपिं वडाध्यक्ष वःगु वडाय् सचिवं अज्याःगु अधिकार थःपिंसं हे कायेगु यानाच्वंगु दु ।

न्हापा छक्वः वडाध्यक्ष जुइधुंकूपिं हे हानं निर्वाचित जुया वःगु वडाय् धाःसा वडाध्यक्षं जबर्जस्ती हे सचिवपाखें अज्याःगु अधिकार थःपिंपाखे सालाः ज्या यायेगु ज्या यानाच्वंगु दु ।सूत्रतय्सं बिउगु जानकारी कथं थज्याःगु हे समस्या उखे महानगरपालिकाया ज्याकुथी नं वयाच्वंगु दु । महानगरपालिका ज्याकुथी छु छु ज्या निर्वाचित मेयरं यायेगु व छु छु ज्या कार्यकारी अधिकृत वा मेपिं कर्मचारीतय्सं यायेगु खः धइगु खँय् अन्यौल पिहां वयाच्वंगु खँ सीदुगु दु ।

२५ गते न्हापांगु नगर परिषद्

येँ महानगरपालिकाया न्हापांगु नगर परिषद् थ्वहे असारया २५ गते च्वनीगु जूगु दु । मनपाय् निर्वाचित पदाधिकारी वयेधुंकाः जुइत्यंगु थ्व न्हापांगु नगर परिषद् बैठक खः । थ्व बैठकं मनपाया बजेट पारित यायेगु लिसें थीथी नीतिगत खँत पारित यायेगु ज्या जुइ । न्हापांगु नगर परिषद् जूगु कारणं थ्व सौहार्द्रपूर्ण ढंगं न्ह्याः वनीगु आशा याना तःगु दु । थुकी हे मनपाया न्हापांगु बजेट नं वइगु जूगुलिं मनपां छु छु खँयात प्राथमिकता बी व बजेटयात माःगु श्रोत गनंं गनं चूलाकी धइगु खँ महत्वपूर्ण जुइगु खँ धाःगु दु ।

कपिलवस्तुया वाणगंगा नगरपालिका वडा नं. ११ या वडा अध्यक्षय् त्याःम्ह माओवादी उम्मेदवार सोमनाथ अर्याल ख्वये ला न्हिले लाया अवस्थाय् लाःगु दु । थौं मतगणना क्वचायेकाः वडा अध्यक्ष विजयी घोषणा जूम्ह अर्यालया नकतिनि स्वला दुम्ह काय म्हिगः मदुगुलिं ख्वये ला न्हिले लाया अवस्थाय् लाःगु खः ।

छखे वडाध्यक्षय् त्याःगु लसता दुसा मेखे काय मदुगु दुःख । ‘स्तब्ध दु, काययात छुं मजूगु जूसा गुलि लय्ताइगु जुइ’ मिखाय् जायेक ख्वबि तयाः विजयी घोषणा जूगु न्यनाच्वंम्ह अर्यालं धयादिल । अर्याल चुनावय् व्यस्त जुयाच्वंगुलिं कलाःम्ह मचाबू लहीत गुल्मीया सिमलटारे वनाच्वंगु जुयाच्वन । अन मचायात खोप बीधुंकाः ज्वर वयेगु सुरु जुयाः निमोनियां थिल ।

चुनावया लिच्वः वयाच्वंगु इलय् मचायात तुरुन्त पाल्पा वा बुटवलया अस्पताल यंकेमाःगु खबर वल । मचायात अस्पताल यंकाः ५ मिनेट जक आइसीयुलय् तःबलय् मदुगु खबर वल ।ब्याहा याःगु नीदँ तक मचा मदयेका च्वनेमाःम्ह अर्यालया कलातं स्वला न्ह्यः तिनि काय बुइकूगु खः । स्वला तिनि दुम्ह काय मदुगु छन्हु लिपा हे वडा अध्यक्ष अत्यधिक मतं त्याःगु घोषणा जुल ।

तर त्याःसां अर्यालं ख्वालय् अबिरं इलाः विजयोत्सव न्यायेके धाःसा मखन ।मेखे फुङलिङ नगरपालिकाय् उपमेयरय् त्याःम्ह बमबहादुर भट्टराईया मां नं विजयी घोषणा जुइ च्याघौ न्ह्यः मंत । म्हिगः बहनी १० बजे मत ल्याः खानाच्वंथाय् च्वनाच्वंम्ह भट्टराई मां मदुगु खबर वयेवं अनं दनावंगु खः । मतगणनास्थलं दनावंगु च्याघौ लिपा सुथय् ६ बजे भट्टराई त्याःगु घोषणा जुल ।


वइगु बैशाख ३१ गते जू वनाच्वंगु स्थानीय तहया निर्वाचनया निंतिं दलत उम्मेदवार ल्ययेगु ज्याय् सक्रिय जुयाच्वंगु दु । थ्व हे झ्वलय् येँ महानगरपालिका २४ वडा (साविकया २५ व २६ वडा)या निंतिं नेकपा एमालेपाखें सर्वसम्मत रुपं उम्मेदवारतय् नां सिफारिस यायेगु ज्या जूगु दु ।
एमालेपाखें २४ वडाया निंतिं सर्वसम्मत रुपं वडा अध्यक्षया निंतिं बालकृष्ण श्रेष्ठयात ल्यःगु दुसा अथे हे दुजलय् विनोद तुलाधर, सुमन स्थापित व मिसा दुजलय् लक्ष्मी महर्जनया नां सिफारिस याःगु दु ।

ने.सं. ११३७ सिल्लागा द्वादशि, विहीवाः

प्रेस काउन्सिल नेपालया अध्यक्ष बोर्णबहादुर कार्कीयात मिसा उत्तरदायी पत्रकार आचारसंहिता २०७३ प्रतिवेदन लःल्हाःगु दु । प्रेस काउन्सिलया दुजः नापं मिसा समाचार सम्प्रेषणसम्बन्धी विशेष आचारसंहिता निर्माण कार्यदलया संयोजक शुभेच्छाविन्दु तुलाधरं छगू ज्याझ्वःया दथुइ काउन्सिलया अध्यक्ष कार्कीयात प्रतिवेदन लःल्हानादीगु खः ।

प्रतिवेदन लःल्हानाकासें काउन्सिलया अध्यक्ष कार्कीं मिसासम्बन्धी समाचार सम्प्रेषणया व्यवसायिक पक्षयात मर्यादित, जवाफदेही, प्रभावकारी व परिणाममुखी दयेकेत दक्वं संचारमाध्यम व पत्रकारतय् हकय् तत्काल लागू जुइकथं प्रतिवेदन कार्यान्वयनय् हयेगु प्रतिवद्धता प्वंकादिल ।

प्रेस काउन्सिल ऐन २०४८ या ७ ख या अधिकार प्रयोग यानाः दयेकातःगु आचारसंहिताय् मिसातय् हक, हित, समानताया प्रवद्र्धन मिसातय् पेशागत हित, उत्तरदायित्व व जवाफदेहीताया पक्षयात कःघानाः उगु प्रतिवेदन तयार याःगु खः ।

प्रतिवेदन तयार यायेत गठन यानातःगु कार्यदलया दुजलय् अधिवक्ता डा. सुरेन्द्र भण्डारी, नेपाल पत्रकार महासंघया सचिव नापं काउन्सिलया दुजः संगीता खड्का व सदस्य सचिवय् दीपक खनालपिं दी ।
महेन्द्रराज सिंहपाखें

Page 1 of 11
Go to top

Copyright © 2016  nepalbhasa.com. All rights reserved.