All for Joomla All for Webmasters

ने.सं. ११३६ यंलागा अष्टमी

नेवाःख्यः (282)

शताब्दी पुरुष सत्यमोहन जोशीयात थ्वहे भदौ ३० गते शुक्रवाः तःजिक हनेत्यंगु ज्याझ्वःया पूवंगु जानकारी म्हिगः हना ग्वसाः खलकं पत्रकार सम्मेलन यासें बिल । हना ज्याझ्वलय् राष्ट्रपति विद्यादेवी भण्डारी मूपाहां कथं झाइगु खँ कँसें ग्वसाः खलःया कजि लक्ष्मीदास मानन्धरं सत्यमोहन जोशीया थ्व हना ज्याझ्वः अतिकं लुमंकेबहः जुइक सम्पन्न जुइगु विश्वास प्वंकादिल ।ग्वसाः खलःया दुजः मल्ल के. सुन्दरं थ्व छगू राष्ट्रिय महत्वया घटना जूगु कारणं थुकियात राष्ट्रिय सञ्चार माध्यमतय्सं नं महत्वपूर्ण ढंगं थाय् बीत इनाप यानादिल ।

मेम्ह दुजः सुजिव वज्राचार्यं ज्याझ्वः बारे जानकारी बिसें वकुन्हु भाजु जोशीयात छेँनं कया हयाः बसन्तपुली थ्यंकेगु बारे खँ जुयाच्वंगु व वयां लिपा बसन्तपुलिंनिसें बग्गीइ तयाः सभागृह थ्यंकेगु व अन मूलुखांनिसें दुने थ्यंक बासा लायाः लसकुस यानाः यंकेगु ग्वसाः दुगु खँ कनादिल ।ज्याझ्वलय् नेवाः राष्ट्रिय पत्रकार दबूया नायः श्रीकृष्ण महर्जनं प्रेस विज्ञप्ति ब्वनाः न्यंकादिसें समाचार संकलनया लागिं सञ्चारकर्मीपिंत इनाप यानादिल ।

महाकवि सिद्धिदास महाजुया १५० दँ बुन्हि थुगुसी जापानय् नं हन । वल्र्ड नेवाः अर्गनाइजेशन जापानया ग्वसालय् वंगु शुक्रवाः छगू साहित्यिक ज्याझ्वः यासें बुन्हि हनेगु ज्या जूगु खः । ज्याझ्वलय् संस्थाया प्रतिनिधि जनकराज शाक्यं महाकविया म्हसीका बिसें नेपालभाषा साहित्य व जातिया उत्थानय् वय्कलं म्हितादीगु भूमिका बारे कनादिल । अथे हे प्रकाशलाल श्रेष्ठं नेपालं पिने च्वनाच्वंपिं नेवाःतय् म्हसीका ल्यंका तयेगु खःसा नेपालभाषा व साहित्यया संरक्षण जुइमाः धयादिल ।

सुनिल कुमार शाक्यया सभापतित्वय् जूगु उगु ज्याझ्वलय् शर्मिला शाक्यं लसकुस यानादीगु खःसा कृष्णवदन जोशी लिसें थीथी व्यक्तिपिंसं सिद्धिदास बारे बिचाः तयेगु व रचना पाठ यायेगु ज्या यानादीगु खः । जापानय् महाकवि सिद्धिदास महाजुया बुन्हि हंगु थ्वहे न्हापांखुसी खः । ज्याझ्वलय् जापानया तापााक तापाक थासय् च्वनाच्वंपिं समेत नेवाः साहित्यानुरागी व भाषासेवीपिनिगु उपस्थिति दुगु खः ।

वाङ्मय शताब्दीपुरुष डा. सत्यमोहन जोशीयात थ्वहे वइगु ने.सं. ११३७ यँलागा दसमि (भदौ ३० गते) शुक्रवाः तःजिक हनीगु जूगु दु ।नेवाः जागरण मञ्चया संयोजनय् भाजु लक्ष्मीदास मानन्धर संयोजक जुयाः नीस्वंगु ‘वाङ्मय शताब्दी पुरुष सत्यमोहन जोशी हना’ समितिं थुगु ज्याझ्वः तःजिक न्यायेकेगु निंतिं थीथी उपसमितित नीस्वंगु दुसा उगु उपसमितितय् मुँज्यात नं न्हिंन्हिं न्ह्यानाच्वंगु दु ।

समितिं ब्यूगु जानकारी कथं भाजु जोशीयात तःजिक हनेगु नितिं येँया बसन्तपुरं न्हिनसिया १ ताः इलय् वय्कःया नेपाली सेनाया बग्गी व ब्याण्ड सहितया ¥यालीं नगर परिक्रमा लिपा राष्ट्रिय सभागृहय् हना ज्याझ्वः याइगु ग्वसाः दु । येँ महानगरपालिकाया ग्वाहालिइ जुइत्यंगु उगु हना ज्याझ्वलय् सांस्कृतिक बाजंया लिसें थीथी सांस्कृतिक झाँकीतय् ब्वज्या नं जुइसा धिमे, बाँसुरी, धाः बाजं लिसें थीथी सांस्कृतिक ज्याझ्वः व धार्मिक विधि कथं सम्मान यायेगु ज्या जुइ ।

ज्याझ्वलय् जनकवि दुर्गालाल श्रेष्ठं वाङ्मय शताब्दीपुरुष सत्यमोहन जोशीयात कयाः चिनादीगु कविता वाचन यानादी । ज्याझ्वलय् सत्यमोहन जोशीया जीवनी व वय्कलं आःतक यानादीगु योगदानया झलक लिसें वय्कलं च्वयादीगु सफूया ब्वज्या नं जुइ । हना ज्याझ्वः तःजिक यायेत नीस्वंगु आर्थिक समिति, मिसा परिचालन समिति, हल व्यवस्थापन समिति, संघसंस्था प्रतिनिधिनाप सहलह मुँज्या जुइधुंकूगु दुसा मेगु थीथी उपसमितिया मुँज्यात नं च्वनेत्यंगु दु ।

अथेहे, थीथी संस्थापाखें हना ज्याझ्वलय् हना देछायेगु विषयय् सार्वजनिक सुचं नं बिइत्यंगु दु । वाङ्मय शताब्दी पुरुष सत्यमोहन जोशी थौंकन्हय् ९८ दँय् च्वनादीगु दु । वय्कलं नेपाःया लोकसंस्कृतिया सामाजिक व दार्शनिक महत्वयात जनमानसय् लिसें कर्णाली लागाया अज्ञात संस्कृतियात सार्वजनिक यायेगु थेंज्याःगु तःजिगु ज्या यानादीगु दु ।

अथेहे, वय्कलं चीनय् नांजाःम्ह जूसां नेपालं ल्वःमंके धुंकूम्ह राष्ट्रिय विभूति अरनिको व वय्कःया अमर कृति स्वेतचैत्ययात नेपालय् पुनःपरिचित याकेगु ज्या नं यानादीगु खः । भाजु जोशीं नाटक प्रबद्र्धनया नितिं राष्ट्रिय नाटक महोत्सव थेंजाःगु ज्या न्ह्याकादिलसा राष्ट्रिय नाचघर, नेपालभाषा एकेदेमि थेंज्याःगु संस्था पलिस्था यायेगु ज्या नं यानादीगु खः ।

वय्कलं नेपालभाषा, नेपाली व अंग्रेजी नापं यानाः ६० गू सिबें अप्वः सफू च्वयादीधुंकूगु दु । सम्मान कथं वय्कः प्रतिष्ठित मदन पुरस्कारपाखें स्वक्वः तक विभूषित जुयादीम्ह छम्हयां छम्ह जक श्रष्टा खःसा वय्कःयात काठमाडौं विश्वविद्यालयं मानार्थ महाविद्यावारिधी लःल्हाःगु दु ।

वाङमय शताब्दी पुरुष सत्यमोहन जोशीयात वइगु भदौ ३० गते तःजिक हनेगु निंतिं लक्ष्मीदास मानन्धरया अध्यक्षताय् नीस्वंगु ‘वाङ्मय शताब्दी पुरुष सत्यमोहन हना समिति’पाखें थीथी ख्यःया नेवाः ब्यापारीपिनि भेला यात ।
भेलाय् अध्यक्ष मानन्धर लिसें हना समितिया मू दुजः मल्ल के. सुन्दरं सत्यमोहन जोशीयात छाय् हनेमाः धयागु खँय् कनादीगु खःसा मू दुजः सुजीव बज्राचार्यं हना ज्याझ्वः बारे जुयाच्वंगु तयारीया जानकारी बियादीगु खः ।

उद्योगपति पद्मज्योति कंसाकारं सत्यमोहन जोशीयात तःजिक हनेगु निंतिं यानाच्वंगु ज्याखँया व्यवस्थापन पक्षय् ध्यान बीत इनाप यानादिल । नेवाः ब्यापारीपिंपाखें हनेज्याया निंतिं न्यागू लाखं मल्याक दां म्हःगु खः ।
नेवाः जागरण मञ्चया संयोजनय् नीस्वंगु सत्यमोहन हना ज्याझ्वः येँ महानगरपालिकाया ग्वाहालिं जुइत्यंगु खः । थुकिया निंतिं कन्हय् बिहिवाः राजनीतिक पार्टीया नेता व कार्यकर्ता नापं जनप्रतिनिधितय् भेला जुइत्यंगु दु ।

रमेशकाजीयात सत्यमोहन सिरपाः

देय्न्यंकंया नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूया भदौ १७ जुइगु न्याक्वःगु दँमुँज्याय् न्याम्ह पत्रकारतय्त सिरपाः लःल्हायेगु निर्णय याःगु दु । पत्रकार दबुलिं बिउगु जानकारी कथं ‘वाङ्मय शताब्दी पुरुष सत्यमोहन जोशी पत्रकारिता सिरपाः’ बरिष्ठ पत्रकार रमेशकाजी स्थापितयात बीगु जूगु दु ।

भाजु स्थापित सन्ध्या टाइम्स प्रकाशन प्रा.लि.या अध्यक्ष लिसें नेपालभाषा टाइम्स शुक्रवाःया तँसापौया सम्पादक खः । अथे हे ‘भिक्षु कुमार काश्यप स्मृति पत्रकारिता सिरपाः’ क्रियाशिल युवा पत्रकार राजेन्द्र मानन्धरयात बीगु निर्णय याःगु दु ।

उकथं हे ‘ज्ञानदेवी स्थापित स्मृति पत्रकारिता सिरपाः’ हेटौंडा वाःपौया सम्पादक मोहनमान सांगामीयात, बाबुराजा ज्यापु फोटो पत्रकारिता सिरपाः बरिष्ठ फोटो पत्रकार राजेन्द्र चित्रकारयात व पुरुषोत्तम–निरादेवी पत्रकारिता सिरपाः न्हापांम्ह नेवाः कार्टुनिष्ट मोहन श्याम खोकनायात लःल्हायेगु नेवाः पत्रकार राष्ट्रिय दबूया केन्द्रीय सचिवालयया बैठकं निर्णय याःगु दु ।

नेवाः पत्रकारतय्त हःपाः बीगु नापं सम्मान यायेगु कथं अथे सिरपाः बीगु निर्णय यानागु खः धाःगु दु । थुगुसीया दँमुँज्या नापं कार्यकारिणी सभाय् नेवाः पत्रकारतय्गु निंतिं ग्वाहालि यायेत पत्रकारिता कल्याणकारी कोष तकं घोषणा याइगु जूगु दु । उगु दँमुँज्याय् स्वनिगः नापं स्वनिगः पिनेया थीथी जिल्लापाखें पत्रकार दबूया जिल्ला कचापाखें नं ब्वति काइगु खँ धाःगु दु ।

नेवाः देय् दबूया नीस्वक्वःगु बुदिं म्हिगः नेपाः बैंक्वेटय् रक्षामन्त्री भीमसेनदास प्रधानया मू पाहांसुइ हन । ज्याझ्वलय् वय्कलं १५० क्वः हिदान यानादीम्ह हिदाता प्रेमसागर कर्माचार्य लगायत थीथी ब्यक्तित्वतय्त हनेज्या यानादिल । ज्याझ्वलय् न्ववासें वय्कलं आः नेपाल संवत्यात राष्ट्रिय संवत् कथं प्रचार यायेत न्हूदँ समारोह समितिइ गैर नेवाःयात अध्यक्ष दयेकेमाःगु खँ न्ह्यब्वयादिल ।

नेवाः देय् दबूया नायः नरेश ताम्रकारया सभापतित्वय् जूगु समारोहय् नेवाः न्ह्यलुवापिं तीर्थराम डंगोल, डा. महेशमान श्रेष्ठ, नेपाः राष्ट्रिय पार्टीया नायः डा. विजय सैंजू, नेपालभाषा केन्द्रीय विभागया प्रमुख प्रा. डा. चन्द्रमान श्रेष्ठ, हिदाता प्रेमसागर कर्माचार्यं नं न्ववानादीगु खः ।

लोककवि राजभाई जकःमिं चित्तधर हृदय बारे कविता न्यंकादीगु उगु ज्याझ्वलय् देय् दबूया मध्यमाञ्चल न्वकु चन्द्रमान राजभण्डारीं लसकुस यानादीगु खःसा उपप्रधानमन्त्री तथा शिक्षामन्त्री गोपालमान श्रेष्ठया भिंतुना पौ ब्वनेगु व जगतसुन्दर ब्वनेकुथिया थीथी हुलाप्याखं न्ह्यब्ययेगु ज्या नं जूगु खः ।

गुंलाजःछि थाइगु गुंला बाजंया छगू विशेष प्रस्तुती कन्हय् स्वयम्भूइ याइगु जूगु दु । येँया स्वंगू गुंला बाजं खलःया मंकाः ग्वसालय् उगु बाजं ब्वज्या यायेत्यंगु खः । ताम्राकार गुंला बाजं खलः, असं बाजं गुथि व तेबहाः गुंला बाजं खलःपाखें छक्वलं गुंला बाजं थानाः थ्व ज्याझ्वः यायेत्यंगु खः । थुकी छगू खलःया बाजं मेगु खलकं थायेगु व गुलिं मंकाः कथं थायेगु ज्या जुइ धाःगु दु ।

नेपाल लिपिया परिमार्जित वर्णमान पिदंगु दु । म्हिगः छगू ज्याझ्वःया दथुइ येँ महानगरपालिकाया मेयर विद्यासुन्दर शाक्य, यल महानगरपालिकाया मेयर चिरिबाबु महर्जन, किपू नगरपालिकाया मेयर रमेश महर्जन व चन्द्रागिरि नगरपालिकाया मेयर घनश्याम गिरिं मंकाः कथं न्हूगु वर्णमालाया विमोचन यानादीगु खः ।


नेपाल लिपि गुथिं पिथंगु स्वक्वःगु संस्करणय् संस्कृत परम्परा सिबें पाक्क नेपालभाषा मौलिक पहः कथं निथी सः, माग्वः खुग्वः व बाग्वः स्वीगः माःहनाः वर्णमाला परिमार्जन याःगु खः । थुकिया लिसें नेपाल–भाषा महाप्राण वर्ण न्यागः आखः ‘ङ्ह, न्ह्, म्ह, ¥ह् व ल्ह’ स्वतन्त्र छगः आखः कथं दुथ्याकातःगु दु ।


ज्याझ्वलय् नेपाल लिपि सयेकेगु एनिमेटेड भिडियोनं सार्वजनिक याःगु खः । थ्व एनिमेशन स्वयाः लिपि आखः अथें च्वये फइगु खँ धाःगु दु ।


नेपाल लिपि गुथिया नायः निरञ्जन ताम्राकारया सभापतित्वय् जूगु ज्याझ्वलय् न्ववासें येँ मनपाया मेयर शाक्यं नेपालभाषा व नेवाः संस्कृति विकास, संरक्षणया निंतिं मनपां बजेट हे फ्यानाः ज्या यानाच्वनागु धासें थज्याःगु ज्याय् मनपां माःकथं ग्वाहालि याइ धयादिल ।
यल मनपाया मेयर महर्जनं मनपाय् नेवाः भाय् सःम्ह कर्मचारीसहित नेवाः डेस्क चायेकागु जूसां आःतक नेवाः भासं छगू हे निवेदन मवःनिगु खँ न्ह्यथँसें नेवाः भासं निवेदन तयेत इनाप यानादिल ।


ज्याझ्वलय् लिपि गुथिया संरक्षक दुर्गालाल श्रेष्ठ, नेवाः न्ह्यलुवा मल्ल के सुन्दरं नं न्ववानादीगु खःसा न्वकु अनिल स्थापितं सुभाय् बियादिल ।

ने.सं. ११३७ गुंलाथ्व दशमि, बुधवाः

नेपालभाषाया मेगु छगू ऐतिहासिक संकिपा च्वापुफय्या शुभमुहूर्त म्हिगः थनया लगं त्वालय् च्वंगु तःबहालय् जुल । महाजु फाउन्डेशन ख्वपपाखें दयेकेत्यंगु थुगु संकिपा थीथी प्यंगू भासं निर्माण जुइ ।

शुभमुहूर्तय् नेपालभाषा एकेदेमिया सदस्य सचिव मल्ल के. सुन्दरं निर्देशन, सिद्धिदास प्रतिष्ठानया नायः नरेन्द्रभक्त हाडां क्ल्याप बियादीगु खःसा नेवाः न्ह्यलुवा डा. महेशमान श्रेष्ठं क्यामराया स्वीच अन यानादीगु खः । अथे हे ज्याझ्वःया मूपाहां येँ महानगरपालिकाया प्रमुख विद्यासुन्दर शाक्यं नैंक्याः तछ्यानाः मंकाःकथं संकिपाया शुभमुहूर्त यानादीगु खः । उगु इलय् संकिपाया कलाकारतय्सं थःथःगु भूमिका निर्वाह यानाः अभिनय नं न्ह्यब्वयादीगु खः ।

ज्याझ्वलय् नवासें मूपाहां येँ मनपाया प्रमुख शाक्यं मौलिक बाखंया लिधंसाय् संकिपा निर्माण यायेमाःगु खँय् बः बियादिल । लिसें वय्कलं भाषा व संस्कृतिया प्रवद्र्धन जुइकथंया संकिपा निर्माणया निंतिं ग्वाहालि यायेगु जुइ धयादिसें संस्कृति संरक्षणय् स्थानीय सरकारया भूमिका दइगु जूगुलिं संकिपापाखें संस्कृति प्रवद्र्धन याये फत धाःसा उकिं नं अपेक्षा याःकथंया लक्ष्य हासिल याये फइ धयादिल ।

अथे हे संकिपाया पटकथा च्वमिलिसें परिकल्पनाकार ओमचरण अमात्यं संकिपा दुने ऐतिहासिक पक्षयात कयाः नुगःखँ तयादीगु खः ।

खस् नेपाली, नेपालभाषा, अंग्रेजी व चिनिया भासं निर्माण जुइगु संकिपा थ्व हे वइगु असोज २५ गतेनिसें नियमित रुपं तिब्बतया ल्हासा, येँय्, मनाङ–मुस्ताङय् तकं शुटिंग जुइगु निर्माण पक्षं जानकारी बिउगु दु । आशाकाजी थकु, राजेन्द्रमान शाक्य, सुशील राजोपाध्याय, पल्पसा डंगोल, मञ्जु श्रेष्ठ, निकी महर्जन, सुरज व्यञ्जनकार, राजेन्द्र महर्जन, सुरेश महर्जन, डोमा शेर्पा लगायतया कलाकारतय् अभिनय दइगु संकिपाया निर्देशक प्रदीप खड्गी खः । शंकर महर्जनं छायांकन यानादीगु संकिपाया निर्माण नियन्त्रण महेश हाडां यानादी ।

नेपालभाषा साहित्यया ख्यलय् जि वया ला लछि मदुनि म्येँया बाखंया लिधंसाय् निर्माण जुइगु संकिपा करिब स्वंगू करोडया लागतय् निर्माण जुइगु जानकारी निर्माण पक्षं बिउगु दु ।

Page 1 of 22
Go to top

Copyright © 2016  nepalbhasa.com. All rights reserved.