All for Joomla All for Webmasters

ने.सं. ११३६ यंलागा अष्टमी

नीन्यादँ लिपा भ्वँतय् ख्वाःपाः प्याखं

ने.सं. ११३७ पोहेलाथ्व नवमि, शनिवाः

भ्वँतय् झण्डै नीन्यादँ लिपा ख्पाःपाः प्याखं संचालन जुइगु जूगु दु । भ्वँतया लाय्कू व गणेद्यःयाथाय् ख्वाःपाः प्याखं क्यनेगु तयारी जुयाच्वंगु दु । झण्डै नीन्यादँ लिपा क्यनेगु तयारी जुयाच्वंगु ख्वाःपाः प्याखं स्वन्हुतक संचालन जुइ ।

डंगोल, महर्जन व तुलाधरतय्सं थ्व हे वइगु २६ गते क्यनेत्यंगु ‘श्वेतकाली न्यतमरु अजिमा’या देवगणया प्याखं क्यनेगु निंतिं तयारी नं शुरु जुइ धुंकूगु श्वेतकाली संरक्षण तथा व्यवस्थापन समितिया नायः सत्यनारायण डंगोलं कनादीगु दु । प्याखं क्यनेगु निंतिं नयेगु, च्वनेगु सुविधानापं स्वास्थ्य शिविर नं संचालनया निंतिं माःकथंया तयारी जुयाच्वंगु वय्कःया धापू दु ।

प्याखं क्यनेत तत्कालीन जुजुं ग्वाहालि याना वयाच्वंगु खःसां आः सरकार थःगु दायित्वपाखें लिचिलेत स्वयाच्वंगु द्वपं वय्कलं बियादीगु दु । गुथिया गुथ्यारत थःपिंसं हे व्यक्तिगत रुपं मुंकूगु स्वंगू लख तका दामं प्याखं क्यनेगु तयारी जुयाच्वंगु दु ।

यल, व किपुलिइ क्यने धुंकूगु प्याखं म्हिगः शनिवाः ख्वपय् क्यंगु खः । देसय् छुं कथंया दैवी विपत्ति मवयेमा नापं सकसिनं सुरक्षित रुपं जीवनयापन याये दयेमा धइगु धार्मिक विश्वासं ताःई न्ह्यवंनिसें थुगु प्याखं हुइकेगु याना वयाच्वंगु नाय डंगोलया धापू दु ।

थुगु ख्वाःपाः प्याखं अनुष्ठानिक व मनोरञ्नात्मक यानाः निगूकथं क्यनेगु याना वयाच्वंगु दुसा भ्वँतय् धाःसा अनुष्ठानिक विधिं जूवनाच्वंगु संस्कृतिविद् ज्ञानकाजी खिं मानन्धरं कनादी । तान्त्रिक विधिपाखें पुजा याइगु जूगुलिं अनुष्ठानिक धाःगु व प्याखं क्यनेगु निंतिं येँया न्यतं निसलं मल्याक सहभागि जुइगु मानन्धरं धयादिल ।

न्हापांगु न्हिकुन्हु विधिवत रुपं पुजा जुइगु व वयां लिपा देवी पदभार ग्रहण याये धुंकाः प्याखं हुलीगु वय्कलं धयादीगु दु । प्याखं क्वचायेकाः भ्वँतया आराध्य द्यः देवी चण्डेश्वरीया पुजा जुइगु खँ न्ह्यथँसें श्वेतकाली देवी चण्डेश्वरीया मां जूगुलिं भ्वँतय् हे उगु प्याखं क्यनीगु वय्कलं धयादीगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.