All for Joomla All for Webmasters

ने.सं. ११३६ यंलागा अष्टमी

गन दु नेवाःतय् राष्ट्रिय संगठन देय् दबू

गन दु नेवाःतय् राष्ट्रिय संगठन नेवाः देय् दबू ? थ्व न्ह्यसः जि ब्यक्तियागु मखुसें नेवाः देय् दबूया संरक्षक मल्ल के. सुन्दरं छगू सभाय् दनाः थःगु नुगःखँ न्ह्यब्वयेगु झ्वलय् बिउगु अभिब्यक्ति खः । नेवाः देय् दबू विधान सम्मतकथं न्ह्यानामच्वंगु व अन जुइमाःगु सामान्य विधिवत ज्या नं मजुयाच्वंगुया अभिब्यक्तिकथं थ्व न्ह्यसः ब्वलंगु खः । नेवाः देय् दबू नेवाःतय्गु राष्ट्रिय संगठन खः ।

छम्ह संरक्षकया थ्व अभिब्यक्तियात सामान्यकथं काये फइगु स्थिति मदु । नेवाःतय्गु राष्ट्रिय संगठनया नामं विविध गतिविधि जुयाच्वंगु दु तर थुकिं लाकाच्वंगु नेवाःतय्त लानाच्वंगु लिच्वः सकरात्मक जुयाच्वंगु मदु । थ्वयागु खुक्वःगु तःमुँज्या स्थगन जुयाच्वंगु झिदँ मयाये धुंकूगु दु । उगु ईया तःमुँज्या छाय् लिछ्यात धयागु आधिकारिक कथं सुनां नं लिसः बियाच्वंगु मदु । अले तःमुँज्या छाय् यायेत ताःमलात, थुकिया जिम्मेवारी सुनां काइगु धकाःया लिसः नं सुयाकें मदु । नेवाः देय् दबूया विधानयात भिंके धुंकाः नं थुकिया तःमुँज्या यायेगुपाखे सम्बन्धित मनूतय्सं ध्यान बियाच्वंगु खने मदु ।


छम्ह संरक्षकं हे थःत संरक्षण यायेत भाला बियातःगु संस्थाया स्थिति छु खः धयागु अवस्थाय् कन्नाचायापुक्क न्ह्यसः तयेमाःगु स्थिति गनं ब्वलन, छाय् ब्वलन धयागु आः विश्लेषण यानाः भिंकेमाःगु स्थिति नं वयाच्वंगु दु । नेवाःतय्गु राष्ट्रिय संगठन जूगु नातां हरेक नेवाःया हक अधिकार संरक्षण व सुरक्षित यायेमाःगु स्थिति दु । नेवाःतय्गु भाषा, जातिया अधिकार संरक्षण व राज्यं बियातःगु भाषिक, शैक्षिक अधिकारयात नालाः थुकिया विकास यायेगु, मगाःमचाःगु अधिकार प्राप्ती यायेगु थुकिया मू तातुना खः । अझ नेपाः विविध जातजातिया देय् जूगु कारणं मेमेगु जातिया मनूत नाप नं समन्वय यानाः फुक्क जातजातिया अधिकार समानरुपं राज्यपाखें कायेमाःगु अवस्थाय् नेवाः देय् दबू गन थ्यनाच्वन धयागु न्ह्यसः ब्वलनीगु धयागु थ्व संस्थाया संचालन नितान्त मखुगु लँय् थ्यनाच्वन धयागु आभास बी ।


नेवाः देय् दबूया विधान अपूर्ण जूगु व उकियात भिंकेमाःगु आवश्यकतायात वाःचायेकाः नारायणघाटय् विधान अधिवेशन जुयाः थुकिया अभिलेखीकरण स्थानीय जिल्ला विकासय् जुइधुंकूगु खँ पिदनाच्वंगु दु । उकिं थुगु विधान आः पूर्णतया लागू जुइधुंकूगु अवस्थाय् दु । विधान अधिवेशनया इलय् हे आः तःमुँज्या कार्तिक महिनाय् जुइ धयागु ई क्वःछिनाः जानकारी याकूगु खःसा कार्तिक महिनाय् तःमुँज्या यायेत देय् दबुलिं छु छु गृहकार्य यात धयागु खँ गनं पिदंगु खने मदु । क्वःछिनातःगु इलय् तःमुँज्या यायेमफुगु खँय् आधिकारिक कथं थुकिया सुचं तकं पित बिउगु खने मदुसा आः मेगु ई गबले धयागु न्ह्यसःया लिसः सुयाके दु ? न्यनेदु कथं क्वःछिनातःगु इलय् तःमुँज्या याये मफयेवं दबूया केन्द्रीय समितिया मुँज्या ला च्वन, तर उगु मुँज्याय् नेवाः देय् दबूया चलनकथं सकल सल्लाकारत नं दुथ्याके माःगु मुँज्याय् ‘थुपिं न्ह्याबलें अलमलया जक खँ ल्हाइपिं’ धकाः मुँज्याय् मसःतूगु खँ सल्लाहकारतय्गु दथुइ हे नं चर्चाया विषय जुयाच्वंगु दु ।


नेवाः देय् दबूया अधिवेशन सुचारु व ब्यवस्थित जुइमाल धयागु खँयात कयाः ‘दवाव समूह’ गठन जुयाच्वंगु दु । तर छगू इलय् देय् दबूया पदाधिकारी व मेमेपिंसं थुकियात प्रतिद्वन्द्वीया रुपय् जक काःगु खनेदत । दवाव समूहं विधान अधिवेशनया इलय् हे तःमुँज्या ग्वसाःया निंतिं स्वतन्त्ररुपं ग्वसाः खलः नीस्वनेमाःगु मागयात वास्ता मयासे न्ह्याःवंगु कारणं हे आः नं तःमुँज्याया तिथि अन्यौलय् लानाच्वंगु खः ।


आःया तःमुँज्या नेवाः देय् दबूया थीथी जिल्ला कचापाखें जिल्ला अधिवेशन यानाः न्हूपिं प्रतिनिधित वयेमाःगु अवस्था दु तर केन्द्रीय दुजःत न्हापायापिं हे ल्यनाच्वनीगु खँ नं तसकं हे अनुपयुक्त व विधान भावना अःखः खः । न्हापायापिं कार्यसमितिया पदाधिकारीपिं आः नं यथास्थिति पदाधिकारी जुयाच्वनेगु तर जिल्लांनिसें वइपिं जिल्ला सदस्यपिं सकलें अधिवेशन यानाः न्हूपिं वयेमाः धयागु विधान सम्मत खँ मजुल । उकिं आःया कार्यसमिति भंग यानाः तःमुँज्याया ग्वसाः खलः नीस्वनेगुया विकल्प मदु ।


नेपालभाषा ख्यःया वरिष्ठ व जिम्मेवार मनूत नेवाः देय् दबूया सल्लाहकार व संरक्षककथं विद्यमान जुयाच्वंगु अवस्थाय् आः थुमित हे बर्जित यानाः ज्या सना पुचःया मुँज्या च्वनेगु धयागु खँ छुं बांलाःगु संकेत बियाच्वंगु खनेमदुसा मात्र तःमुँज्या घोषणां अन दयाच्वंगु विवाद क्वचाइ धयागु खँ पत्याः याये फइ मखु । देय् दबूया केन्द्रीय कोषाध्यक्षं अन जुयाच्वंगु गतिविधिप्रति असन्तुष्ट जुयाः अनया आर्थिक कारोवारय् थःगु संलग्नता मदयेधुंकूगु खँ पिदनाच्वंगु इलय् देय् दबू दुनेया आर्थिक गतिविधि गुकथं न्ह्यानाच्वन ? थ्व नं उत्सुकताया विषय जुइगु स्वाभाविक हे खत ।
देय् दबुलिं सल्लाहकारतय्त बहिर्गमन यायेगु, क्वःछिनातःगु इलय् तःमुँज्या मयायेगु आदि ज्यां नेवाःतय्गु राष्ट्रिय संगठनया हैसियत ल्यंकेगुया निंतिं नं अन आः हस्तक्षेपकारी भूमिकाया आवश्यकता सकसिनं खंकाच्वंगु दु ।


आःया इलय् नेवाः देय् दबूया अस्तित्वया निंतिं हे नं तःमुँज्या ग्वसाः खलः नीस्वनाः तःमुँज्याया तयारी यायेमाःगु आवश्यकता दु । बरु आःया ईयात देय् दबू दुने ब्वलनाच्वंगु संक्रमणकालीन ईकथं ध्यानय् तयाः ज्या सना पुचः दयेकाः नं न्ह्याःवने फइगु स्थितियात चिन्तन यायेमाःगु आवश्यकता दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.