All for Joomla All for Webmasters

ने.सं. ११३६ यंलागा अष्टमी

बैंक निक्षेपय् ब्याज न्हियान्हिथं

तरलता अभाव जुइवं बैंकतय्सं थौंकन्हय् चिचिधंगु त्यासा तकं मबीगु याना हःगु दु । लिसें बैंकया ब्याज नं न्हियान्हिथं थकया हयाच्वंगु दु ।
स्वला प्यला न्ह्यव तक मुद्दती खाताय् तकं ३–४ प्रतिशत तकं ब्याज ब्याज मबिइगु वाणिज्य बैंकतय्सं थौंकन्हय् १० निसें सोढ १० प्रतिशत तक ब्याज बीगु यानाच्वंगु दु । अथेहे कल खाताय् तकं थ्यंमथ्यं ९ प्रतिशत तक ब्याज थ्यंकेधुंकूगु दु । अथे खयां नं बैंकतय्सं संस्थागत निक्षेप मुंकेत थाकुयाच्वंगु दु ।


तरलताया अभावं थौंकन्हय् ओभर ड्राफ्ट व शेयर धितोय् बीगु त्यासा पूवंक धयाथें बन्द यायेधुंकूगु दु । लिसें चिचिधंगु त्यासा नं ठप्प हे यानातःगु दु । उलि जक मखु आः पुलांगु त्यासा नं ब्याज अप्वयेकेगु तयारी सुरु जुइधुंकूगु दु ।
रेमिट्यान्स दुहां वयेगु म्हो जूगु व सरकारं नं विकास खर्च मयाःगुलिं बैंकय् तरलता अभाव जुया वनाच्वंगु खः । बैंकय् ध्यबा दुहां वयेगु म्हो जुयाच्वंगु हे इलय् थ्व पुस महिनाय् अग्रिम कर व राजश्व पुलेमालीगु जूगुलिं तरलताया समस्या झन हे तच्वइगु खँय् बैंकतय्सं चिन्ता प्वंका हयाच्वंगु दु । थ्व हे अवस्थां यानाः आः निक्षेपय् ब्याज १२ प्रतिशत तक थ्यनेफुगु अनुमान यानाहःगु दु । बैंकतय्सं आः थःपिनिगु शाखा कार्यालयपाखें आवास कर्जा तकं मबीगु यानाहयेधुंकूगु दु ।


बैंकय् ब्याज अप्वःगुलिं साधारण शेयर लगानीकर्तात नं बैंकय् निक्षेप तःवनाच्वंगुलिं शेयर कारोवार नं म्हो जुया वयाच्वंगु दु । साधारण लगानीकर्तातय्सं ब्याजया कारणं निक्षेप तःवनाच्वंसां ततःधंगु संस्थागत निक्षेप मदुगुलिं यानाः बैकतय्त तरलताया समस्या जुया हे च्वंगु दु । बैंकतय्सं आः पुलांगु निक्षेप नं नविकरण यायेबलय् अप्वः ब्याज बीगु सुरु यानाहलकि त्यासाय् कयाच्वंगु ब्याज दर नं अप्वयावनीगु खँ धाःगु दु । आःतक म्हो ध्यबां जक कयातःगु निक्षेप हे त्यासाय् वनाच्वंगुलिं ब्याज थहां मवंसां पुस लिपा निक्षेप नविकरण जुइधुंकाः त्यासाया ब्याज नं थहांवनीगु खँ धाःगु दु ।


बैंकय् तरलता समस्या समाधान यायेत सरकारं विकास खर्च अप्वयेकेमाःगु दु । लिसें रेमिट्यान्स नं दुहां वयेमाःगु दु । तर आः थथें सरकारं विकास खर्च अप्वयेकीगु छुं खनेमदुगुलिं थ्व समस्या गुलि तक दइगु धयागु धायेफुगु अवस्था मदुनि ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.