All for Joomla All for Webmasters

ने.सं. ११३६ यंलागा अष्टमी

मरु सतलय् १३०० दँ लिपा न्हापांगु पुजा

ऐतिहासिक मरु सतलय् कन्हय् छगू तःजिगु ज्याझ्वःया दथुइ सप्तविधानोत्तर पुजा यायेत्यंगु दु । मरु सतःया मण्डलाकार जग खुल्ला याःगु लसताय् लाकाः थ्व तःजिगु पुजा यायेत्यंगु दु । मरु सतःया थ्व जग खुल्ला यायेधुंकाः थ्व सतः च्यागूगु शताब्दीइ दयेकूगु खः धइगु खँ पुष्टि जूगु खः । वहे च्यागूगु शताब्दीइ (थनिं करिब १३०० दँ न्ह्यः) सतः दयेकूगु ई धुंकाः सम्भवतः कन्हय् हे थुकिया निक्वःगु पुजा जुइत्यंगु खँ ग्वसाः खलः ‘काष्ठमण्डप पुनः निर्माणया निंतिं अभियानं’ धाःगु दु ।


वंगु तःभुखाचं ध्वस्त जूगु मरु सतः पुनर्निर्माणया लागिं जागरण थनेगु ताः तयाः नं थ्व पुजाया ग्वसाः ग्वःगु खः ।
थ्व पुजाय् वज्रयान बौद्ध परम्पराया नांजाःम्ह विद्वान यज्ञमानपति वज्राचार्य मू पुजारी जुयादी । लिसें थुकी मेपिं ३० म्ह पुजारीतय्सं नं ब्वति कयादी । थुकी मरु सतःयात घेरे यानाः तयातःपिं च्याम्ह भैरवपिनि नं पुजा जुइ ।
पुजा शुरु जुइ न्ह्यः येँया झिंच्यागू बाहाःया थाय्पापिंत मरु सतलय् विधिवत् रुपं बिज्याकाः लसकुस याइगु नं ज्याझ्वः दु । कन्हय् सुथय् ८ बजेनिसें सनिलया ५ बजे तक पुजा न्ह्यानाच्वनी ।


छुं ई न्ह्यः तिनि मरु सतःया बारे जूगु अनुसन्धानं थ्व सतः च्यागूगु शताब्दीइ अतिकं तान्त्रिक विधिं निर्माण जूगु खँ
पुष्टि जूगु खः । थ्व सतः सिख्वंमूबहाःया तान्त्रिक लीलावज्रं निर्माण याःगु अनुमान दु । थ्व पुजा लिपा मरु सतः पुनर्निर्माणया निंतिं जनसाधारणय् जागरण ब्वलंके फइगु आशा याना याना तःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.