All for Joomla All for Webmasters

ने.सं. ११३६ यंलागा अष्टमी

ज्यापु दिवस एकता कि विभाजन ?

थौंकन्हय् नेवाः समाजय् चर्चा जुयाच्वंगु विषय ज्यापु दिवस खः । ज्यापु दिवसयात थःथःगु मिखां स्वयाच्वंगु दु । ज्यापु दिवस मूल रुपं येँ महानगर दुनेया ज्यापुतय्सं हना वयाच्वंगु जूसां नं स्वनिगःन्यंकं हे नेवाःतय्गु दथुइ चर्चा जुयाच्वंगु दु । गबलेनिसें ज्यापु दिवस हन अबलेनिसें खास हे उलि चर्चा मजूसां ज्यापु दिवसयात राज्यं राष्ट्रिय दिवसया रुपय् मान्यता बिउगु अले सार्वजनिक रुपं ज्यापु दिवस हनेगु ज्या यासांनिसें हे दकले अप्वः नेवाः समुदायय् चर्चाया विषय जुया वयाच्वंगु दु । ज्यापु दिवस हंसांनिसें हे नेवाः समुदाय दुने जक मखु नेवाः दुने नं ज्यापुतय्गु दथुइ हे चर्चा व बहसया विषय जूगु खः ।

ज्यापु दिवसयात ज्यापुतय्त विभाजित यायेत राजनीतिक योजना कथं न्ह्यःने हःगु दिवसया रुपय् ब्याख्या याइपिं ज्यापुत नं मदुगु मखु । अले राजनीतिक पहुँच दुपिं छगू राजनीतिक पार्टीया नेतातय्गु कुतलं थःपिनिगु हे कब्जाय् ज्यापु संस्कृतिया निंतिं वःगु ध्यबा लाकाः ज्यापु दिवस हंगु खः धकाः तकं ज्यापुतय्सं हे धायेगु याना वयाच्वंगु दु । थ्व खँ थनिं झिंन्यादँ न्ह्यवंनिसेंया खः । अबले तत्कालिन प्रधानमन्त्री गिरिजा प्रसाद कोइरालां ज्यापु जातिया संस्कृतियात संरक्षण सम्वद्र्धन व विकास यायेत राज्यपाखें आर्थिक ग्वाहालि यायेगु घोषणा यानादीगु अले वहे ध्यबा कायेगु सवालय् येँया ज्यापुत विभाजित जुया वंगु व अन्ततः नारायण परिवार क्लब व श्रीज्यापु महागुथिपाखें ज्यापु संस्कृति विकास कोष नीस्वनाः येँया परम्परागत ज्यापु त्वाःयात ग्वाहालि यायेगु लिसें ज्यापु दिवस हना वयाच्वंगु खः ।


विवादया दथुइ हःगु ध्यबा अले वहे ध्यबायात छ्यलाः ज्यापु दिवस हना वयाच्वंगुलिं हे ज्यापुतय् दथुइ नं थ्व दिवस विवादय् लानाच्वंगु दु । छगू इलय् ला ज्यापु महागुथिं ज्यापु दिवसयात बहिष्कार तकं याःगु खः । अन्ततः लिपा वयाः ज्यापु महागुथिं नंं ज्यापु दिवसयात स्वीकार यातसा ज्यापु दिवसयात छगू कथं उत्सवया रुपय् हनेगु ज्या याःगु खनेदु । ज्यापुतय् दथुइ विवाद ज्यना वन अले येँया सकल ज्यापुतय्सं स्वीकार याना वनाच्वंगु जूसां नं मेमेथाय् च्वंपिं ज्यापुतय्सं धाःसा आः तक नं थुकियात येँया ज्यापुतय्गु जक दिवस कथं नं कया वयाच्वंगु दु । ज्यापु संस्कृति विकास कोष येँया ज्यापुत जक च्वनाः दयेकातःगु अले वहे कोषपाखें ज्यापु दिवस हना वयाच्वंगुलिं मेमेगु लागाया ज्यापुतय्सं थुकथं स्वइगु नं स्वाभाविक हे खः ।

आः वयाः येँया ज्यापुतय्गु परम्परागत खलःयात जक मखु थीथी लागाया खलःयात नं सिरपाः बीगु ज्या यानाहःगु दुसा उकिं यानाः येँया ज्यापुतय्गु नुगः तफाः जुया वल धकाः मेमेथाय् च्वंपिं ज्यापुतय्सं धायेगु याना हयाच्वंगु दु । अय्नं गुलि नुगः चकंकाः मेमेथाय् च्वंपिं ज्यापुतय्त नं दुथ्याकुसें ज्यापु दिवस समारोह समिति दयेकाः दिवस हनेमाःगु खः अथे जुयाच्वंगु मदुनि ।


ज्यापु दिवसयात नेवाः दुने दुथ्याका स्वल धाःसा ज्यापु बाहेकयापिंसं अःपुक स्वीकार यानाच्वंगु मदु । बरु ज्यापुतय्सं ज्यापु दिवस हंगुलिं नायःतय्सं पाहांचःह्रेयात नायः दिवस धकाः हन । आः मेमेपिंसं नं थःथःगु दिवस हन धाःसा नेवाः दुने ज्यापु, नायः, स्यस्यः, साय्मि, तुलाधर, बज्राचार्य, शाक्य लगायत ला दइ तर नेवाःत धाःसा दइ मखु धइगु तर्क नं तयेगु याना हयाच्वंगु दु । उकिं ज्यापु दिवसयात नेवाः दुने हे तःधंगु विरोध दु धकाः थुइकेमाःगु अवस्था दु । नेवाः ख्यःया न्ह्यलुवात नापं कार्यकर्तातय् दथुइ ज्यापु दिवसयात गुलि विरोध जुइ व स्वयेगु खत धाःसा ज्यापु दिवसय् सहभागी जुइपिं हे दइ मखुला धइथें च्वनीगु तर ज्यापु दिवसय् धाःसा द्वलंद्वः ज्यापुत बाजं थानाः सतकय् कुहां वयाच्वंगु खनेदु ।

थुगु ल्याखं स्वयेबलय् नेवाः ख्यःया न्ह्यलुवा व कार्यकर्तात बाहेक नं येँय् यक्व हे ज्यापुत दुगु जुयाच्वन । ज्यापु दिवसायात आः नेवाः दिवसया रुपय् हनेमाः धाइपिं नं मदुगु मखु । अले ज्यापु दिवसं यानाः नेवाःतय्त विभाजित याइपिनिगु नितिं लँपु जुयाच्वन धाइपिं नं मदुगु मखु ।


अथे नेवाः दुने अले ज्यापु दुने नं विभाजित यानाच्वंगु दिवस धकाः मनूतय्सं थुइकाच्वंगु जूसां नं उकियात सदुपयोग यानाः समग्र नेवाःतय्गु नितिं दिवस हने फइगु सम्भावना नं मदुगु मखु । छुं नं कथंया समस्या वल धाःसा समस्या खनाः ग्यानाः मखु उकियात अवसर नापं हाथ्याया रुपय् कयाः ईयात ल्वः कथं समस्या समाधान याना वने फत धाःसा उकिं समग्र समाजया नितिं हे तःधंगु उपलब्धी जुइ । स्वनिगः दुने नेवाःतय्गु ल्याः स्वयेगु खःसा दकले अप्वः ज्यापुत दु अले ज्यापुतय्सं हे नेवाःतय्गु अधिकारया नितिं अप्वः जिम्मेवारी कयाः न्ह्याः वनेमाःगु खँय् सुयां निगू मत दइ मखु । नेवाः भाय् धइगु ज्यापुतय्गु नं भाय् खः अले नेवाःतय्गु संस्कृति धइगु हे ज्यापुतय्गु संस्कृति खःसा नेवाःतय्गु पहुँच राज्यया हरेक निकायसं थ्यनीगु धइगु हे ज्यापुतय्गु पहुँच थ्यनीगु खः धकाः थुइकेमाः । उकिं नेवाःतय्गु हक अधिकारया खँ ल्हायेगु धइगु ज्यापुतय्गु नं हक अधिकारया खँ ल्हायेगु खः सः थ्वयेकेगु खः ।


ज्यापु दिवस हनाच्वंपिं ज्यापु संस्कृति विकास कोषया न्ह्यलुवातय्सं आः तक नं ज्यापु दिवस धइगु सांस्कृतिक उत्सवया रुपय् जक नालाच्वंगु दु । उमिसं लिउने लानाच्वंपिं ज्यापुतय्त न्ह्यःने हयेगु नितिं, संस्कृति संरक्षण व सम्वद्र्धनया नितिं खः धकाः जक थुइकेगु बाहेक नेवाःतय्गु हक अधिकारया नितिं सः थ्वयेकेगु छगू सांस्कृतिक उत्सवया रुपय् कयाच्वंगु मदु । यदि थ्व इलय् ज्यापु दिवसयात नेवाःतय्गु भाषा, संस्कृतिनिसें राज्यया हरेक निकायसं समानुपातिक समावेशिताया नितिं सः थ्वयेकेगु माध्यमया रुपय् ज्यापु दिवस हने फत धाःसा अवश्य नं ज्यापु दिवसयात ज्यापुतय्सं जक मखु फुक्क नेवाःतयसं हे थःपिनिगु कथं नाला काये फइगु अवस्था वइ ।

उकिं दिवसयात सांस्कृतिक उत्सव अले न्हूगु संस्कृतिया रुपय् जक मकासे थौंया इलय् ल्वयेक नेवाःतय्गु मंकाः सः थ्वयेकेगु छगू माध्यम कथं न्ह्यःने यंकेफत धाःसा ज्यापु दिवसं विभाजन मखु ज्यापुतय्गु एकता जक मखु नेवाःतय्गु हे एकता यायेगु ज्या जुइ । थुकथं वन धाःसा ज्यापु दिवसयात नेवाः मखुपिंसं नेवाःतय्गु दिवसया रुपय् नाला काइ अले नेवाःतय्त विभाजित यायेगु कुतः याइपिं पराजित जुइ । मखुसा ज्यापु दिवसया खँयात हे ज्वनाः नेवाःतय्त विभाजित याना यंकीगु सम्भावना दइ मखु धाये फइगु अवस्था मदु । उकिं थुगु विषययात कयाः ज्यापु दिवस हना वयाच्वंपिं नापं नेवाः न्ह्यलुवातय्सं नं बिचाः यायेमाः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.