All for Joomla All for Webmasters

ने.सं. ११३६ यंलागा अष्टमी

छाय् कुहां वयाच्वन शेयर बजाः

नेपाल धितोपत्र बोर्डं छुं न्हि न्ह्यवतिनि लगानीकर्तातय्त वक्तव्य हे पिकयाः हतोत्साहित जुइमाः, बजाः सुधारया निंतिं ज्या जुयाच्वंगु धाःसां शेयर बजाः कुहां वनेगु धाःसा जारी हे जुयाच्वंगु दु । शेयर बजाः कुहां वनाः नेप्से परिसूचक वंगु लछिया दुने २०० अंकं कुहां वयेधुंकूगु दु । नेप्से कुहां वयेगु झ्वलय् म्हिगः जक २१.८८ अंकं कुहां वयाः १५२२.८० अंकय् थ्यंगु दु ।


स्वला न्ह्यव तक वंगु सेप्टेम्बर ५ य् नेप्से थहां वनाः १८३८ अंकय् तक थ्यनेधुंकूगु खः । थ्व ल्याखं स्वलाया दुने नेप्से ३०० अंकं कुहां वयेधुंकूगु दु । थौंकन्हय् नेप्से जक कुहां वयाच्वंगु मखुकि शेयर कारोवार नं म्हो जुया वयाच्वंगु दु । न्हापा लिपा जूसा नेप्से कुहां वःसां शेयर कारोवार दामय् धाःसा उलि हिउपाः मवइगु खः । वंगु वालं निसें कारोवार दां नं म्हो जुया वःगु खः । कारोवार कुहां वयेगु झ्वलय् आइतवाः मुक्कं ४० करोड ५५ लाख तका बराबरया जक शेयर कारोवार जूगु खः ।


बजाः विश्लेषकतय्सं नं थौंकन्हय् छाय् बजाः कुहां वयाच्वंगु खँ धायेफयाच्वंगु मदु । धितोपत्र बोर्डं छवाः न्ह्यव जक शेयर कारोवार जुइगु फुक्क धयाथें कम्पनीया स्थिति बांलागुलिं हतोत्साहि जुइमाःगु आवश्यक मदु धकाः धाःसां नं बजाः कुहां हे वनाच्वंगु दु । नेपाल हल्लाया भरय् हे बजाः थहां कुहां जुइगु खँ शेयर विज्ञतय्सं धाःगु दु । विशेषतः बजारय् राजनीतिक हल्लां हे नं बजाः थत–क्वत यायेगु यानाच्वंगु खँ धाःगु दु ।


छुं नं खँय् राजनीतिक दलतय् मिले जुइगु खनेदत धाःसा नं बजाः थहां वनीगु व छुं खँय् मतभेद पिहां वयेवं हाकनं कुहां वनेगु नं जुयाच्वंगु दु । थौंकन्हय् संविधान संशोधनया खँय् तःधंगु राजनीतिक दलतय् दथुइ मतभेद पिहां वयाच्वंगु दुसा तराई लागाय् आन्दोलन नं जुयाच्वंगु दु । बजाः कुहां वयेगुली संविधान संशोधन विधेयकं नं भूमिका म्हिताच्वंगु विश्लेषकतय् धापु दु ।


थौंकन्हय् बजारय् तरलताया अभाव जुयाच्वंगुलिं बैंकतय्सं ब्याजदर अप्वयेकाच्वंगु दु । उकिं लगानीकर्तात शेयरय् भविष्य बांलाःगु मदु धासें धमाधम शेयर मियाः बैंकय् हे ध्यबा मुंकेत हथाय् चायाच्वंगु दु । थौंकन्हय् बैंकतय्सं मुद्दतीइ ९–१० प्रतिशत ब्याज बीगु सुरु यानाहयेधुंकूगु दु । उकिं लगानीकर्ता जोखिम नालेगु स्वयां याउँक ब्याज नयाः च्वनेगु मनस्थिति खनेदयाच्वंगु दु । थुकिया लिसें चुक्तापुँजी अप्वयेकेगु झ्वलय् फुक्क धयाथें वित्तीय संस्थातय् हकप्रद व बोनस शेयर पितबिउगु दुसा थुपिं शेयर धमाधम सुचीकृत जुयावयेवं माग स्वयां अप्वः आपूर्ति खनेदुगु दु । थुकिं नं बजाः कुहां वयेत भूमिका म्हिताच्वंगु खँ विश्लेषकतय्सं धाःगु दु ।


थौंकन्हय् थुकथं बजाः कुहां वयाच्वंगुलिं शेयर कारोवारीतय्सं बजारय् मन्दी हे वयेत्यंगु विश्लेषण नं यानाहःगु दु । छम्ह शेयर कारोवारीं धाःगु दु, ‘थौंकन्हय् शेयर न्यायेपिं स्वयां मीपिं अप्वयाच्वंगु दु । न्याइपिं छुं भचा दुसां नं उमिसं ध्यबा अप्वः पुलाच्वंगु मदु । आःया अवस्था स्वयेबलय् ला बजारय् मन्दी हे वयेत्यंगु खनेदु ।’

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.