All for Joomla All for Webmasters

ने.सं. ११३६ यंलागा अष्टमी

जयबागेश्वरीइ नवदुर्गा प्याखं

पशुपतिया जयबागेश्वरीइ ख्वपया नवदुर्गा प्याखं सुरु जूगु दु । ख्वपया नवदुर्गा प्याखंया द्यःगणपिं म्हिगः थन थ्यंकःबिज्याःगु खः । दँय्दसं थिंलाथ्व नवमी कुन्हु नवदुर्गा प्याखं थन बिज्याइगु खः ।
ख्वपं न्यासिवःपिं द्यःगणं सिफलय् थ्यंकाः द्यः वसः पुनाः थाय्थासय् द्यः ल्हानाः जयबागेश्वरीया दबुली थ्यंकःबिज्याःगु खः । जयबागेश्वरीइ द्यः ल्हाये सिधयेकाः वसपोलपिंत स्थानीयावासीपिंसं ध्यबा, काप, गा, कसिली आदि तयाः पुजाबिउगु खः । स्थानीयपिंसं पुजा बीधुंकाः दकलय् लिपा अनया वैद्य खलकं पुजा बिउगु खः । थ्व झ्वलय् खा बलि बियाः समय्बजि देछाःगु खः ।


सकसिगुं पुजा फयेधुंकाः द्यःगण पशुपनि वनेगु लँपुइ वनाः बलिया निंतिं सुंगुर माःवनी, अले थ्व बलि कायेधुंकाः सिबालय् वनाः उकुन्हुया प्याखं क्वचायेकी ।
द्यःगण जयबागेश्वरीइ बिज्यायेगु निंतिं छवाः न्ह्यः हे थन वयाः थःपिं वयेत्यनागु जानकारी बी । वसपोलपिं बिज्याइगु जुइवं स्थानीयपिं माःकथं हलंज्वलं तया यायेगु याइ ।


नवदुर्गा द्यःगणय् झिंगुम्ह दुजः दु । खिम्जा, तम्जा, क्याम्जा, भैलःद्यः, महाकाली, बाराही, धुम्बा, सिम्बा, बालकुमारी आदिया लिसें बाजंगुरु, बाजं थाइपिं दुथ्याः ।
थौं थन महालक्ष्मी मूर्ति थापना यानातःगु न्ह्यःने लँपुइ च्वनाः प्याखं हूगु खः । प्याखं सिधयेकाः वैद्य खलःपाखें पुजा फयेधुंकाः थौं हे जयबागेश्वरीइ प्याखंया विर्सजन याइ ।


जयबागेश्वरीइ प्याखं क्वचायेधुंकाः कन्हय् सुथय् द्यःगण लिहां बिज्याइसा वइगु घ्यःचाकु संल्हु निसें ख्वपया नीछगू थीथी थासय् प्याखं हुइकी । थ्व झ्वलय् ख्वप देशं पिने यंकाः नं प्याखं हुइके यंकी । न्हि कथं सांगा,प नाला, चाँगु, पन्ति, धौख्यः आदि थासय् नं प्याखं यंकी ।
देशय् ल्वय्, भय व मेगु छुं कथं नं हानी नोक्सानी मजुइमा धयागु ल्याखं नवदुर्गा प्याखं हुइकेगु याना वयाच्वंगु धापू दु ।

 

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.