All for Joomla All for Webmasters

ने.सं. ११३६ यंलागा अष्टमी

यलया मिस्त थःगु हे व्यवसायय्

यल उद्योग वाणिज्य संघया ग्वसालय् जूगु छगू ज्याझ्वलय् यलया मिसापिं उद्यमी । यल उद्योग वाणिज्य संघया ग्वसालय् जूगु छगू ज्याझ्वलय् यलया मिसापिं उद्यमी । किपा- तेज महर्जन

थःगु उमेरया पासापिं धमाधम विदेश वनाच्वंगु इलय् यलया मनिषा ताम्राकार धाःसा छम्ह सफल उद्यमी जुयाः नां कमे याये चाहे जुयाच्वंगु दु । न्यादँ न्ह्यव थःपिनिगु पारिवारिक व्यवसाय हस्तकला ख्यलय् ल्हाः तयादीम्ह मनिषा थ्व हे पेसाय् निरन्तरता बीगु बिचारय् दु ।
नेपाल उडक्राफ्ट नांया पारिवारिक व्यवासायिक संस्थायात अझ च्वन्ह्याकेगु ताम्रकारया बिचाः दु । थः नं मिसा जूगुलिं अप्वः मिस्तय्त रोजगारी बिइगु वय्कःया योजना दु । वय्कलं धयादिल, ‘थौंकन्हय् झिम्ह मिस्तय्सं ज्या यानाच्वंगु दु, थुकियात अझ अप्वयेकेगु जुइ ।’
२९ दँ न्ह्यवंनिसें हस्तकलाया ज्या सुरु यानादीम्ह यलया हे यमुना वज्राचार्यं व्यवसाय हे सुरु याःगु खुदँ दत । यमुनां इहिपा धुसांनिसें हस्तकलासम्बन्धी ज्या सुरु यानादीगु खः ।


हस्तकलाया ज्या सुरु याःबलय् वय्कःयात न्हापा थःम्हं उत्पादन यानागु सामग्री बजारय् गुकथं यंकेगु धयागु जानकारी मदु । लिसें थः उद्यमी जूगु तकं होस मदु । खुदँ न्ह्यव वय्कः यल उद्योग वाणिज्य संघ थेंज्याःगु संस्थाय् आवद्ध जुयादिल । थ्व लिपा वय्कः नेपालय् जक मखु विदेशय् जूगु थीथी सम्मेलन व गोष्ठीइ नं सहभागी जुयादीगु दु । वय्कलं धयादिल, ‘झ मिस्त छँेनं पिहां वयेगु ह्वःताः दत धाःसा यक्व हे सयेके सीकेफइ ।’


ताम्रकार व वज्राचार्य मय्जुपिं थें मिसा उद्यमीत अप्वया वयाच्वंगु दु । थःगु हे शीप व लगानीपाखें आत्मनिर्भर जुइपिं मिस्तय् ल्याः दँय्दसं अप्वया वनाच्वंगु दु । थःगु व्यवसायपाखें आम्दानी दइगु निसें सामाजिक प्रतिस्था नं दइगु मिस्तय् अनुभव दु । मिस्तय् लगानीइ संचालन जुयाच्वंगु व्यवसायय् ज्यामित नं अप्वः मिसापिं हे दु । थः मिसा जूगुलिं नं मिस्तय्त हे ज्या बीगु उमिगु इच्छा जुयाच्वंगु दु ।


यलया हे जरिना श्रेष्ठं इहिपा न्ह्यव थान्का सम्बन्धी ज्या यानादी । इहिपा लिपा वय्कः लुँवह व्यवसायय् दुहां झाल । वय्कःया थःगु बिस्कं हे कम्पनी दु । छेँजःपिनि ग्वाहालि मदुसां व्यवसाय सुरु यानाच्वंपिं व संचालन यानाच्वंपिं मिस्त समाजय् यक्व हे दु । छेँजःपिनि ग्वाहालिं व्यवसाय सुरु यायेबलय् अझ सहज जुइगु अनुभव श्रेष्ठं कनादी, ‘व्यवसाय सुरु यायेधुंकाः आम्दानी यायेफइ । तर मिस्तय्त सुरुइ पुँजी हयेत धाःसा तसकं थाकुइ ।’

यल उद्योग वाणिज्य संघ कार्यसमिति सदस्य लजना श्रेष्ठं यल जिल्लाय् हे मिसापिं उद्यमीतय् ल्याः अप्वयाच्वंगु खँ कनादी । वय्कलं धयादिल, ‘यल उद्योग वाणिज्य संघय् जक १६४ म्ह मिसा दुजः दु ।’ उत्पादनय् मिस्तय् नं योगदान दुसां व्यवस्थापन तक पहुँच धाःसा म्हो जुयाच्वंगु दु । यल हस्तकला सम्बन्धी ज्याय् मिस्त अप्वः आवद्ध जुयाच्वंगु दु ।


नेपाल उद्योग वाणिज्य महासंघ कार्यसमिति दुजः कमला श्रेष्ठं मिसापिं उद्यमी आत्मनिर्भर जुइमफुगु खँ कनादिल । वय्कलं धयादिल, ‘थम्हं कमे यानागु ध्यबा भाःतयात हे लःल्हायेगु व गुलि खर्च यायेगु धकाः न्यनीपिं मिस्त यक्व हे दु ।’ वय्कलं थम्हं प्यंगू दशक न्ह्यः मुक्कं झिद्वः दामं व्यवसाय सुरु यानागु खँ कनादिल ।


राज्यं नं मिसापिं उद्यमीतय्त प्राथमिकता बिउगुलिं मिसापिं उद्यमीत दँय्दसं अप्वया वयाच्वंगु दु । मिसा हिंसा म्हो यायेत नं उमित आर्थिक रुपं सक्षम याये आवश्यक जुइ । अबु वा भाःतया नामय् सम्पत्ति दइगुलिं मिस्तय्सं त्यासा हे कयाः व्यवसाय सुरु धाःसा यायेफुगु अवस्था मदु । वय्कलं धयादिल, ‘यक्व मिस्त जोखिम कायेत ग्याः । उमित आत्मविश्वास अप्वयेकेमाःगु आवश्यक दु ।’

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.