All for Joomla All for Webmasters

ने.सं. ११३६ यंलागा अष्टमी

देय् दबूया अधिवेशन मजूगुया रहस्य

नेवाःतय्गु राष्ट्रिय संगठन नेवाः देय् दबुलिं तःमुँज्या यायेगु धकाः क्वःछिनातःगु कार्तिक महिना दुने हाकनं नं तःमुँज्या मयात । थनिं खुदँ न्ह्यवंनिसें स्थगित जुयाच्वंगु तःमुँज्या न्ह्याकेगु कुतः सुंपाखें नं मजुल । छाय् मजुल ? छाय् मयात ? आः थ्व न्ह्यसलय् नं छुं जोश जांगर मंत । ‘नेवाः भाषा व जातिया उत्थान झीगु निंतिं सेवा व प्रेमया भावना खः, तर सुयागुं निंतिं थ्व हे कमाईया धन्दा जुसेंलि व देय् दबुली च्वनाः कवाज म्हिते दसेंलि छाय् अधिवेशन याना जुइ ?’ छम्ह देय् दबूया दुजलं पित बिउगु बिचाः खः थ्व ।


‘नेवाः देय् दबूया विधान न्ह्याथे यानाःसां पारित यायेगु जुइ, छ्यं हे तछ्यानाः जूसां थ्व विधान थौं पारित हे जुइ’ थ्व धापू नेवाः देय् दबूया छम्ह संरक्षकं नारायणघाटय् जूगु विधान अधिवेशनय् पित बिउगु अभिब्यक्ति खः । तर उम्ह संरक्षकं नेवाःतय्गु संगठनया विधान अधिवेशनय् ब्वति दुपिं सु नेवाःया छ्यं तछ्यानाः विधान पारित यायेगु धकाः अभिब्यक्ति बियादीगु खः, व धाःसा स्पष्ट मजुल । तर उगु विधान सभाय् ब्वति कायेत गां गामं वःपिं आधिकारिक प्रतिनिधितय्त नं अनेक बहाना न्ह्यब्वयाः विधानसभाया हलं पितिना हल । अधिवेशनय् ब्वति कायेके मबिसे देय् दबूया संशोधित विधान पारित जूगु घोषणा यात ।

विधान पारित जुल, उगु हे सभां आः वइगु कार्तिक महिनाया दुने अधिवेशन यायेगु प्रस्ताव नं पारित यात । तर कार्तिक महिना क्वचाये धुंकाः नं आः तक उगु अधिवेशन जुइगुया लक्षण धाःसा गनं खने मदुनि । आः हाकनं न्हूगु तिथि क्वःछित धयागु न्यने दु, तर आधिकारिक कथं घोषणा जूगु मदुनि । आः न्हूगु तिथि क्वःछिउगु हे खःसां वहे तिथिइ अधिवेशन जुइ धइगु खँयात पत्याः यायेगु छुं आधार नं लुइके फुगु मदुनि ।


नेवाः देय् दबूया अधिवेशन यायेत ताःमलाःगुया जिम्मेवारी सुयागु ? छ्यं तछ्यानाः जूसा विधान पारित यायेगु जुइ धकाः आँट यानादीम्ह संरक्षकयागु वा विधान संशोधनयात पारित यायेगु जिम्मेवारी काःगु पुचः देय् दबूया सल्लाहकारत दुथ्याःगु सहजीकरण पुचःयागु ? देय् दबूया अधिवेशन नियमसम्मत मजुल, दिनाच्वंगु तःमुँज्या यथाशिघ्र यायेमाल धकाः नीस्वनातःगु दवाव समूह अले उगु दबाब समूहलिसे सहज वातावरण दयेकेगु निंतिं देय् दबूया कार्यसमितिं निश्चित म्याद बियाः नीस्वनातःगु सहजीकरण पुचःया कुतलं नेवाः देय् दबूया विधान अधिवेशन क्वचायेधुंकूगु दु । उगु विधान अधिवेशनय् सहलह जुयाः दिनाच्वंगु तःमुँज्या निश्चित इलय् न्ह्याकेगु धयागु निर्णय नं विधान अधिवेशनय् हे घोषणा जुइधुंकूगु दु । अय्नं अधिवेशन याये मफुगुया जिम्मेवारी निश्चित रुपं हे सुयातं वनी ।


देय् दबूया विधान अधिवेशनया न्हूगु ब्यवस्थापनया कारणं आः देय् दबूया स्वरुप पूर्णरुपं हे हिलीगु जुयाच्वंगु दु । थीथी जिल्लाय् नीस्वनातःगु देय् दबूया जिल्ला निकायतय्गु अधिवेशन जुयाः अनं प्रतिनिधित वयेमाःगु आःया ब्यवस्था दु । उकिं न्हापा दयाच्वंगु खलःपुचःतय्गु प्रत्यक्ष अधिवेशनय् दयाच्वंगु पहुँचयात निषेध याना बिउगु दु । थ्व कारणं आः तःमुँज्याय् प्रतिनिधि जुया वइपिं फुक्क हे जिल्ला अधिवेशनय् जुइगु चुनावं त्याका वयेमाःपिं जुयाच्वंगु दु । तर विडम्बनाया खँ धायेमाः आः तःमुँज्या याइपिं पदाधिकारीत, ग्वसाः खलः सकलें न्हापायागु हे विधान अन्तर्गत ल्ययातःपिं मनूत जुइगु जुयाच्वंगु दु । थ्व बेमेलया सम्बोधन गुकथं जुइगु खः धयागु जिज्ञासा सकल दुजःपिंसं याना वयाच्वंगु दु ।


देय् दबूया अधिवेशन मयासे पुलांगु हे कार्यसमितिं ज्या यानाच्वंगु धयागु अन दुगु सम्पत्तिइ रजाइँ यानाच्वंगु खः धयागु बिचाः अधिकांश दुजः सदस्यतय्गु दु । विधान अधिवेशनं दिनाच्वंगु तःमुँज्या न्ह्याकेगु निंतिं यथेष्ट लँपु क्यना बीधुंकाः नं दिनाच्वंगु तःमुँज्या नियमित मयायेगु धयागु दुषित मनसायया लिच्वः खः । यदि मखु धयागु खःसा उलिमछि ई दुने तःमुँज्या छाय् मजुल धयागु जिम्मेवारीपूर्वक थुकिया लिसः पिदनेमाःगु खः । नारायणघाटया विधान अधिवेशनय् आः नेवाः देय् दबूया तःमुँज्या सुचारु जुइ मफुत, याके मबिल धाःसा १३ लाख नेवाःतय्सं सह याइ मखु धयागु अभिब्यक्ति बिउपिं हस्तीतय्सं आः छु लिसः बी ? व वा थ्व कारणं तःमुँज्या जुइ मफुत, आः न्हूगु तिथि घोषणा लिपा तःमुँज्या क्वःछिनागु इलय् याये धयागु फुस्कुलुगु लिसलं नेवाःत संगठित जुइ मफइगु निश्चित दु । नेवाःतय्गु राष्ट्रिय संगठनयात थौं थुलि थासय् थ्यंकेगु निंतिं सकल सचेत नेवाःतय्गु हिचःति थुकी हायाच्वंगु दु । सुयागुं लहडया भरय् वा सुयागुं जीवन निवृत्तिया निंतिं नेवाः देय् दबूया स्रोत आधार जुइ मफइगु खँयात सकसिनं वाःचायेकाच्वंगु दु ।


नेपाःया न्हू संविधानय् ब्वलनाच्वंगु पहिचानया हाथ्या न्हंकेगु निंतिं नं नेवाःतय्गु राष्ट्रिय संगठन नेवाः देय् दबूया सशक्तीकरणया आवश्यकता दु । पहिचानया निंतिं संघीयताया सः थ्वयेकाच्वंपिं झी नेवाःतय्सं देय्या सम्पूर्ण नेवाः लगायत आदिवासी जनजातित छथासं मुनाः आःया स्थिति सामना यायेमाःगु इलय् अनं छुं नं अनावश्यक कथंया पंगःत थनेगु वा वयाच्वंगु खःसा उकियात चीकाः न्ह्याःवनेगु सोचयात सकसिनं नाला कायेमाः । मात्र भाषण, आश्वासनया भरय् नेवाःतय्गु राष्ट्रिय संगठनयात त्वःता तये मफइगु खँय् सकल नेवाः अधिकारकर्मीत सचेत जुइमाः । माःकथंया पलाः न्ह्याकेगु निंतिं तत्पर जुइमाः ।
This email address is being protected from spambots. You need JavaScript enabled to view it.

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.