All for Joomla All for Webmasters

ने.सं. ११३६ यंलागा अष्टमी

हनुमानध्वाखाय् गुह्येश्वरी द्यः

थौं हनुमानध्वाखाय् गुह्येश्वरी द्यःया पुजा जूगु दु । वंगु चान्हय् जात्रा यानाः हनुमानध्वाखाय् बिज्याकूम्ह गुह्येश्वरी द्यःयात थौं सर्वसाधारणं पुजा याःगु खः । म्हिगः गुह्येश्वरीया जात्रा लिपा चान्हय् हे हनुमानध्वाखाय् हयाः जगतनारायण द्यःया फलय् गुह्येश्वरी द्यःयात बिज्याकूगु खः ।

गुह्येश्वरी द्यःयात हनुमानध्वाखाय् बिज्याकेगु धकाः कलशय् गुह्येश्वरीया प्रतिक थापना यानाः खतय् तयाः हइगु खः ।

जात्राया झ्वलय् दकलय् न्हापां हनुमानध्वाखाया तलेजु भवानीयात कलशय् थापना यानाः खतय् तयाः गुह्यश्वेरीइ यंकी । अन गुह्येश्वरीया पुजारीं कलशय् गुह्येश्वरीया प्रतिक थपना यानाः कलश नापं भैरवया प्रतिमूर्ति तयाः गोप्य पुजा याइ । पुजा सिधयेकाः पशुपति, सिफल जुयाः जात्रा यानाः खःयात हनुमानध्वाखाय् हइगु खः ।

थ्व जात्रायात तलेजु भगवानीं थः तता गुह्येश्वरीयात नापलाःवंगु धकाः नं धायेगु याः । थ्व जात्रायात मल्ल कालंनिसें सुरु जूगु धयातःगु दु । जात्राया झ्वलय् पशुपतिया अमालकोटया कर्मचारी व स्थानीय ज्यापुतय्सं बाजं थानाः द्यः जात्रा याइ ।

 

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.