All for Joomla All for Webmasters

ने.सं. ११३६ यंलागा अष्टमी

फुटबलय् आः छु ले ?

छु नेपाःया फुटबलं चुलाकूगु थ्व आतकया हे दकलय् तःधंगु सफलता खःला ? नेपालं एएफसी सोलिडारिटी कप त्याके धुंकाः ब्वलंगु न्ह्यसः खः थ्व । साफ च्याम्पियनसिप तःधं कि सोलिडारिटी कप ? साफ च्याम्पियनसिप नांकथं दक्षिण एसियाली देय्या दथुइ जुइगु धेंधेंबल्लाः खः । सोलिडारिटी कप धाःसा एसियाली फुटबल महासंघ (एएफसी) या औपचारिक च्याम्पियनसिप । थुकी ब्वति काइगु टिमत दक्वं एसियाया दकलय् कमजोर टिमत ।


अथे धइगु विश्वकप र एसियाकपया छनोटया न्हापांगु चरणय् हे पराजित टिमत । थ्व ल्याखं नेपाःया फुटबल सोलिडारिटी कपया सफलतां थुलिमछि लय्तायेमाःगु खःला ? थ्व बहस छुं मखुसां सामाजिक संजालय् न्ह्यानाच्वंगु दु । कासा ख्यःया छता नियम दु । व खः, त्याःगु धइगु त्याःगु हे जुइ, बूगु स्वयांं छपलाः न्ह्यःने ।


छुं नं च्याम्पियनसिप धइगु म्हिताः हे त्याइगु खः । अथें मनय् म्हिताः त्याइगु मखु, उकिया निंतिं मैदानय् कुहां वयेमाः, विपक्षी नापं धेंधेंबल्लाः यायेमाः । सोलिडारिटी कप नेपाःया फुटबलया निंतिं छगू तःधंगु लसताया ल्याखं न्ह्यःने वःगु दु ।


नेपाःया फुटबलया स्थिति गन थाय् लाक्क दुगु खः, थ्व ल्याखं टिमं म्हितीगु धइगु नं थज्याःगु हे च्याम्पियनसिप खः । उकिं सोलिडारिटी कपया महŒव मदु धकाः ख“ ल्हायेगु खःसा उकिया छुं अर्थ मदु । धाइनापं कि, ‘छुं नं देय् गथे च्वं धकाः सिकेगु खःसा उगु देय्या कासा ख्यः गथे च्वं धकाः स्वयेमाः ।’ छुं मखुसां आर्थिक ल्याखं झीगु देय्सिबें च्वय् लाःगु मेगु देय्या टिमयात बुकाः नेपालं सोलिडारिटी कप त्याकूगु खः, उकिं थुकियात च्वछायेगु हे बांलाः, आलोचनाया भाय् छ्यलेगुया छुं अर्थ मदु !


नेपालं त्याकूगु सोलिडारिटी कपयात कयाः बहस याना च्वनेगु स्वयांं बरु आः धाथें ध्यानय् तयेमाःगु विषय मेगु दु । व खः, झीथाय् च्वंगु छगू जक अन्तर्राष्ट्रियस्तरया धायेछिंगु दशरथ रंगशालाया स्थिति । भुखाय् ब्वये धुंकाः थ्व रंगशाला नं फुटबल हे याये मजिउगु स्थितिइ दु । भुखाय् ब्वःगु उलिमछिं ई वने धुंकल, तर उकिया पुनःनिर्माण यायेगु बारे छुं संकेत आतक नं मदुनि । अझ धायेगु खःसा पुनःनिर्माणय् सम्बन्धित निकाय वा सरोकारवालातय् मिखा तकं वंगु मदुनि । थ्व ल्याखं नेपालय् जुइमाःगु वा याये माःगु छुं छुं अन्तर्राष्ट्रिय च्याम्पियनसिपत तकं वयाच्वंगु मदु ।


उकिसनं नेपाःया घरेलु फुटबल तक नं ध्वस्त जुइगु स्थिति ब्वलंगु दु । फुटबलया मू आधार जुयाच्वंगु लिग फुटबल नं खालि बी व सी डिभिजनय् जक सीमित जुयाच्वंगु दु । लगभग निश्चित थें हे जुइधुंकूगु थुगुसीया ए डिभिजनया फुटबल नं आः जुइमखुत । अले थ्व गबलय् जुइ, उकिया नं छुं संकेत तकं वयाच्वंगु मदु ।


थुकिं यानाः ए डिभिजनया कासामित धमाधम पलायन जुयावनाच्वंगु दु । गुलि नं कासामित ल्यं दनि, इपिं नं बेरोजगार जुयाच्वंगु दु । थ्व ल्याखं स्वयेबलय् नेपाःया राष्ट्रिय टिम जक त्याना च्वन धाःसां नं थुकिया अर्थ छु दु धकाः ?


मिसातय् साफ च्याम्पियनसिप थ्व हे सकता ख“या दथुइ मिसातय् साफ च्याम्पिनसिपया ‘ड्र’ नं पिहां वःगु दु । भारतया सिलगढीइ जुइगु धेंधेंबल्लाखय् नेपाः अःपुगु पुचलय् लाःगु दु । पुचः ‘ए’य् नेपाः नापं श्रीलंका, माल्दिभ्स व भुटान लाःगु दु । थ्व ल्याखं नेपाः अःपुक हे सेमिफाइलन थ्यनी धायेछिं ।


मेगु पुचलय् डिफेन्डिङ च्याम्पियन भारत, बंगलादेश व अफगानिस्तान दु । नेपाःया टिमया तयारी नं निवाः न्ह्यः निसें न्ह्याये धुंकूगु दु । थ्व पालय् टिमया प्रशिक्षक खः, पुलांम्ह राष्ट्रिय कासामि कुमार थापा ।


twitter : @himeshratna

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.