All for Joomla All for Webmasters

ने.सं. ११३६ यंलागा अष्टमी

लोडसेडिङ्ग जूगु मखु- प्राधिकरण


स्वनिगलय् लोडसेडिङ्ग जुइ मखुत धकाः बय्बय् जुयाच्वंगु इलय् म्हिगः सनिलय् ५ः४५ बजेपाखे आकाझाकां ४५ मिनेट तक मत वन । थथे आकाझाकां मत वनेवं नेपाल विद्युत प्राधिकरणया प्रबन्ध निर्देशक कुलमान घिसिङ्गं लोडसेडिङ्ग याये मखु धाःगु नं ‘हावाया खँ’ जक जुल धकाः टिप्पणी याना हल । तर म्हिगः मत वंगु धाःसा लोडसेडिङ्ग जूगु मखु धकाः विद्युत प्राधिकरणं स्पष्ट याःगु दु ।


प्राधिकरणया कथं मध्य मस्र्याङ्दी जलविद्युत आयोजनाया मत उत्पादन यायेगु प्रणालीइ समस्या वःगुलिं देन्यंकं हे मत सिउगु खः । थ्व आयोजनाया छगू युनिटय् समस्या वःगुलिं केन्द्रीय प्रशारण लाइनय् हे समस्या वःगु खँ प्राधिकरणया प्रवक्ता प्रवल अधिकारीं कनादीगु दु ।
वय्कःया कथं मध्य मस्र्याङ्गदीं ७० मेगावाट विद्यतु उत्पादन याइगुली ३५ मेगावाट उत्पादन याइगु छगू युनिटय् समस्या वःगु खः ।

‘छगू युनिटय् समस्या वःगुलिं देन्यंकं हे मत आपूर्ति बन्द जुल, तर प्राधिकरणं थ्व समस्या छुं ई लिपा हे समाधान यानाः मत सुचारु याःगु दु । छाय् समस्या वल धयागु बारे अध्ययन जुयाच्वंगु दु’ वय्कलं धयादिल ।


मेखे आकाझाकां थथे मत सिउगुलिं प्राधिकरणया प्रबन्धक निर्देशक घिसिङ्गं फेसबुकपाखें क्षमा फ्वनादीगु दु । वय्कलं थःगु फेसबुकय् च्वयादीगु दु, ‘प्राविधिक समस्यां यानाः मध्य क्षेत्रय् ‘सिस्टम कोलाय्प्स’ जूगु दु । थ्व दयेकेत छुं ई लगे जुइ । थुकिं ग्राहकतय्त जूगु मगाःमचाः प्रति क्षमा फ्वना ।’


वय्कःया थ्व पोस्टय् यक्वसिनं शेयर यानाः लिसः बियाहःगु दु । यक्वसिनं ४५ मिनेट मत वनाः तःधंगु समस्या मजूगु धासें देय्यात हे लोडसेडिङ्ग मुक्त यायेत वय्कःया कुतः सफल जुइमा धकाः भिंतुना देछायातःगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.