All for Joomla All for Webmasters

ने.सं. ११३६ यंलागा अष्टमी

‘लुँवहः व्यवसायीतय् समस्या गन खः अन हे’

नेपाल उद्योग वाणिज्य महासंघया अध्यक्ष पशुपति मुरारकां लुँवहः व्यवसायय् अनुगमन यायेमाः जक धाइ, तर अनुगमन यायेत निर्देशिका तकं तयार मजुइक गुकथं अनुगमन याइ धकाः न्ह्यसः तयादीगु दु ।

लुँवहः व्यवसायीतय्सं ताःई न्ह्यवनिसें माग यानाच्वंगु लुँवह सम्बन्धी ऐन आःतक पिहां मवःगु खँ न्ह्यथँसें वय्कलं महासंघय् खुदँया दुने वरिष्ठ उपाध्यक्ष व आः अध्यक्ष जुयागु इलं निसें दयाच्वंगु समस्या गन खः अन हे थानाच्वंगु टिप्पणी यानादीगु खः ।

नेपाल सुनचाँदी व्यवसायी महासंघया निक्वःगु महाधिवेशन व झिंप्यक्वःगु साधारण सभाय् न्ववानादिसें वय्कलं स्वंगू लाख स्वयां अप्वः मनूतय्त रोजगार बियाच्वंगु, दँय् च्यागू अर्बं मयाक राजश्व बीगु थ्व व्यवसाययात सरकारं वास्ता मयानाच्वंगु द्वपं नं बियादीगु खः ।

अथेहे वय्कलं प्रहरीं नं लुँवहः व्यवसायीतय्त ख्यानाच्वंगु खँ नं धयादीगु दु । तस्करी जुयावःगु लुँ धकाः ज्वनीगु अले बिल ज्वनाः वन धाःसां बिल हे खुनाः थ्व तस्करया हे लुँ खः धायेगु यानाच्वंगु द्वपं नं बियादीगु खः ।

थ्व झ्वलय् वय्कलं बैंकं जक मखु सम्बन्धी व्यवसायीतय्त नं लुँ आयात यायेत स्वीकृति बीमाःगु खँ नं धयादीगु खः ।

ज्याझ्वलय् सभापतिया थासं न्ववानादिसें नेपाल सुनचाँदी व्यवसायी महासंघया अध्यक्ष मणिरत्न शाक्यं महासंघपाखें वंगु स्वदँया दुने जूगु थीथी ज्या न्ह्यथनादिसें लुँवहः व्यवसायय् वयाच्वंगु थीथी समस्यायात नं कुलादीगु खः । थ्व झ्वलय् वय्कलं लुँवहः व्यवसाय सम्बन्धी निर्देशिका दयेके बीगु निंतिं महासंघपाखें मदिक्क कुतः जुयाच्वंसां आःतक सरकारं वास्ता मयानाच्वंगु खँ धयादिल ।
अथेहे बैंकतय्सं लुँ आयात यायेगुली मनोमानी यानाच्वंगु, बैंकं लुँ न्यायेत व्यवसायीतय्त समस्या जुयाच्वंगु , कालिगढीतय् समस्या जुयाच्वंगु खँ न्ह्यथनादिल । थ्व झ्वलय् वय्कलं नेपाली कालिगढतय् अभावं यानाः विदेशी कालिगढतय्सं जक दँय् १८ अर्ब दां ज्याला कथं नेपालं ध्यबा पिने यंकाच्वंगु खँ धयादीगु खः ।

उपप्रधान व गृहमन्त्री विमलेन्द्र निधि मूपाहाँ कथं झायादीगु ज्याझ्वलय् नेपाल राष्ट्र बैंकया डेपुटी गभर्नर चिन्तामणि शिवाकोटीं व्यापारीतय् माग कथं बैंकतय्त चिचिकूगु लुँ आयात यायेत नं स्वीकृति बी धुंकूगु खँ धयादीगु खः ।

ज्याझ्वलय् वरिष्ठ उपाध्यक्ष मोहन विश्वकर्मां सुभाय् देछायादीगु खः ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.