All for Joomla All for Webmasters

ने.सं. ११३६ यंलागा अष्टमी

नरः जात्रायात छाय् गनं मदुगु जात्रा धाल ?

येँया छगू पुलांगु व ऐतिहासिक नगर नरः (हाँडीगां) नं खः । थौंकन्हय् येँ महानगरपालिकाया वडा नं. ५ य् लाःगु थ्व थाय् किराँत व लिच्छवी इलय् हे तसकं नांजाःगु नगर खः । नरःयात सत्य युगय् ‘विजयपुर’ धाइगु खः । उब्ले भुइजःसि निसें शंखमुल तक छस्वाः जुइगु थ्व नगर च्वनाच्वंगु विश्वास यानातःगु दु । थन मनमहेश्वरी, तिसा पुखू, सत्यनारायण, धन गणेश, मोपता द्यः –भाटभटेनी) टुँडालदेवी व मेमेपिं द्यःत आः नं दनि । सत्यनारायणया जःखः उत्खनन यात धाःसा अझ नं कैलाशकुट भवनया अवशेष लुयावइगु खँ पुरातत्वविद् व स्थानीयपिंसं धायेगु याना वयाच्वंगु दु ।


थ्व नगरयात हाँडीगां छाय् धाल धयागु नं छगू किंवदन्ती दु । स्थानीय खुइस्वदँ टेकबहादुर डंगोलं थःत नं बाज्यापिंसं कनातःगु बाखं धकाः कनादी कथं न्हापा न्हापा महाद्यः चाहिउवःगु इलय् थाय्थासय् दान बिबिउं वःगु जुयाच्वन । उब्ले चाःया भारा दयेकीपिं कुम्हाः (प्रजापति)तय् बाहुल्यता दुगु थ्व थासय् थ्यंबलय् महाद्यवं भाजं अथवा हाँडी दान बियाथकूगु जुयाच्वन । उब्ले निसें थ्व थाय्यात हाँडीगां धाःगु हँ ।


मोहनी नखः क्वचायेवं नरलय् तःजिगु जात्रा सुरु जुइ । थ्व जात्रायात गनं मदुगु जात्रा हाँडीगामय् (कहिँ नभएको जात्रा हाँडी गाउँमा) धकाः धायेगु याना वयाच्वंगु दु । थ्व जात्रायात थथे गनं मदुगु जात्रा धायेगु यानाच्वंगुया नं किंवदन्ती दु ।


परापूर्वकालय् नरःया जुजु (नां उल्लेख मदु)या कलाः व वया पासाया नापनापं प्वाथय् दुगु जुयाच्वन । छन्हु निम्हेसिया दथुइ मचा बुइकेगु ईयात कयाः खँल्हाबल्हा जुयाच्वन । महारानीं पासायात ‘छं गथे यानाः मचा बुइकेगु’ धकाः न्यन । पासाम्ह नारांद्यःया भक्तिनी जूगुलिं वं नाराद्यवं लँपु चायेका बिउवं याउँक मचा बुइगु लिसः बिल । पासाम्हेसियागु खँ न्यनाः महारानीं मचा छकः बुइकेत नं नारांद्यःया ग्वाहालि माःगु ला धकाः कुंखिनाः धाल, ‘जिं झारा च्वनेबलय् फ्यतुइथें फ्यतुना ः याउँक मचा बुइके का ।’

 


महारानीं थथे धाःगु खँ नारांद्यःयाथाय् थ्यन । ई बिना वन, छन्हु निम्हेसियां मचा बुइकेगु न्हि नं वल । महारानीया पासाया धाःसा प्रसव बेदना जुयाः याउँक हे मचा बुल, तर महारानीया धाःसा प्रसव बेदना हे मजुल । ई बिना वनं नं मचा मबू । अथथे जुजुं झिनिदँ तक हे महारानीं मचा बुइकेमफुत । नारांद्यःयात अवहेलना याःगुलिं महारानीया जक मखु उब्लेया विजयपुरय् च्वंपिं मेमेपिं मिस्तय् नं प्रसव बेदना मजुल ।


अथे जूबलय् थ्व श्रृष्टिया नियमविपरीत जुल धकाः जुजुं सकसितं भेला सःतल । छु जुयाः थथे जूगु धकाः जोशीयात स्वकूबलय् नारांद्यः थःत अपहेलना याःगुलिं तंचायाः हिमालय पवर्तय् तपस्या च्वंवंगु व वसपोलया हे कोपभाजन जूगुलिं विजयपुरय् च्वंपिं मिस्तय्सं मचा बुइकेमफुगु खँ सिइकल ।


थ्व संकटं पार यायेत नारांद्यःयात हे नेपाल मण्डलय् बिज्याकेमाःगु जुल । श्रृष्टिया नियम सुचारु यायेत नारांद्यःयात तपं थनेगु निंतिं सकले द्यःपिं हिमालय पवर्त वनाः बिन्ति भाव यात । तर नारांद्यःयात लय्तायके मफुत । अन्तय् विश्वकर्मा द्यः स्वयम बिज्यानाः नारांद्यःयात ह्ययेकेभनं बिन्त यात, ‘प्रभु छलपोलयात नेपाल मण्डल बिज्याकेत गनं मदुगु खतय् तयाः, गनं मदुगु स्वांमालं छाय्पियातःगु खतय् तयाः जात्रा याये ।’


विश्वकर्माया खँ न्यनाः नारांद्यवं उगु खः गज्याःगु जुइ धकाः स्वये धकाः दकलय् न्हापां खः निं दयेकी धकाः उजं बिल । नारांद्यःया उजंकथं विश्वकर्मां खःया स्वरुप तयार यात । विश्वकर्मा स्वतँजाःगु ग्वलाःगु खः दयेकल, उकी गजू क्वचायेकाः, जवंखवं निपु खिपः तल । थ्व खिपः सालेवं खः पृथ्वी चाःहिउ थें चाःहिलीगु जुल । अथेहे खःया गाःवंगु ब्वय् तुयुगु चाकलाःगु कापतं भुनाः हिमालय पर्वतया रुप बिल ।

खतय् धुपी स्वां तयाः महाभारत पर्वत प्रतिक दयेकलसा स्वतँजालय् म्हासुगु सीया स्वां (गुकियात स्वर्ण स्वां वा मैन स्वां नं धायेगु याः) तयाः झःझः धायेकल । थ्व हे खः चाःचाःहिइकाः हिमालय पर्वतय् वनाः नारांद्यःयात काःवन । गनं मदुगु खः खनाः नारांद्यः नं लय्तायाः थुगु खतय् ज्वनाः नेपाल मण्डल कुहांबिज्यात । नारांद्यः नेपाल मण्डल वयेवं मचा बुइके मफयाच्वंम्ह महारानीया नं याउँक मचा बुल । तर झिनिदँ तक मांया प्वाथय् च्वंम्ह जूगुलिं महारानीं ग्वाय् हे बुइधुंकाः मचा बुइकल । अथेहे नरलय् च्वंपिं मेमेपिं मिस्तय् नं याउँक हे मचा बुल । थथे मिस्तय्सं याउँक मचा बुइकेफुगुलिं श्रृष्टिया नियम हाकनं न्ह्याःवन धकाः नरलय् थीथी बाजं थानाः गनं मदुगु जात्रा (कहिँ नभएको जात्रा) न्यायेकेगु यात ।


थुगु जात्रायात ब्रह्मा, विष्णु व उमामहेश्वरया जात्रा नं धायेगु याः । लिसें थ्व जात्राया इलय् चोक्ते नारांद्यःया नं जात्रा जुइ । थ्व जात्रा गुब्लेनिसें, सु जुजुया पालं निसें सुरु जुल धयागु छुं अभिलेख लुयावःगु मदुनि । तर जात्राया इलय् दयेकीगु स्वंगू द्यःखः मध्ये विष्णु द्यःया मूर्ति तइगु खतय् ८३८ च्वयातःगु दु । थ्व नेपाल संवत् खः वा मेगु छुं संवत खः सीमदुनि ।

 

 

 

 

Rate this item
(1 Vote)
Login to post comments
Go to top

Copyright © 2016  nepalbhasa.com. All rights reserved.