All for Joomla All for Webmasters

ने.सं. ११३६ यंलागा अष्टमी

गणतन्त्रय् फुलपाटी


मोहनि नखः शुरु जुइवं सकस्यां छेँय् छेँय् नःलास्वां पीगु ज्या जुल । वहे इलय् राष्ट्रपति विद्यादेवी भण्डारीं राष्ट्रपति निवासय् नं नःलास्वां पिनादीगु फोटो राससं सार्वजनिक यात । उकिया नापनापं हे छगू न्ह्यसः नं पिहां वल – थ्व नःलास्वां सुयागु ? राष्ट्रपति भण्डारीया थःगु निजी छेँयागु कि राष्ट्रपति भवनयागु ?
भण्डारीया थःगु निजी छेँयागु खःसा थ्व नःलास्वां वय्कलं थःगु छेँय् हे पिनादीमाःगु खः । (वय्कलं न्हापा लिपा छेँय् नःलास्वां पीगु यानादी वा यानामदी, व ला सी मदुनि ।) वय्कःया थःगु छेँ ला अझ हे दनि । राष्ट्रपति भवनया नःलास्वां खः धाये धाःसा थुकिं मेगु अनेक न्ह्यसः पिकया बी गुकिं नेपाःया संविधानय् उल्लेख जुयाच्वंगु धर्म निरपेक्ष धाःगु बुँदायात बांमलाक प्रहार याना बी ।


राष्ट्र हे धर्म निरपेक्ष जुइधुसेंलि राष्ट्रपति अथें हे धर्म निरपेक्ष जुइगु जुल । तर छम्ह धर्म निरपेक्ष राष्ट्रपतिं राष्ट्रपति भवनय् नःलास्वां पित धायेबलय् थ्व ला वय्कलं राष्ट्रपति भवनयात हे हिन्दूकरण यानादीगुया चिं जुल ।
थ्व स्वयां न्ह्यः वय्कलं राष्ट्रपति भवनय् तीज न्यायेकादीगु खः । तीज मिसातय्गु पर्व जूगु कारणं छम्ह मिसाम्ह राष्ट्रपतिं तीज माने याःगुयात तक आपत्ति मयाये । तर वय्कलं छम्ह हिन्दू नं जुयागु नातां राष्ट्रपति भवनय् हे नःलास्वां पिनादीगुलिं थ्व भवनयात हे हिन्दू भवन दयेकेगु कुतः जकं यानादीत्यंगु मखु ला ?


थुकिं प्रस्ट याइ, वय्कः हिन्दू धर्मया छम्ह कट्टर भक्त खः । खतुं थःगु हिन्दू धर्म प्रतिया भक्ति वय्कलं राष्ट्रपति जुयाः वःगु न्हापांगु तलब श्री पशुपतिनाथयात छानाः न्हापा हे प्रस्ट यानादीधुंकूगु खः । वयां लिपा पहाडी हिन्दू मिसातय्गु पर्व तीज न्यायेकाः प्रस्ट यानादिल । आः नःलास्वां पिनाः प्रस्ट यानादिल । थःगु ‘असली’ हिन्दू पहिचान ब्वयेत थुलिं अप्वः मेगु छु याये माल ?


आः मोहनिया मू पर्व वइ, चालं । वय्कःया चाहिँ टीका । वा, विजय दशमी । न्हापा जुजु दुबलय् ला ‘टीका’ कुन्हु हिन्दू जुजुं दँय्दसं नारायणहिति दरवारय् लाइन तयाः नागरिकयात सिन्हः तिकीगु खः । राजतन्त्र वनेधुंकाः हिन्दू जुजुं थ्व भाला पूर्व राष्ट्रपति डा. रामवरण यादवयात लःल्हाना थकूगु जुयाच्वन । आः रामवरण वनेधुंकाः राष्ट्रपति विद्या भण्डारीं चाहिँ अथे हे सिन्हः तिकादी लाकि तिकादी मखु ले ?


थ्वहे प्रसंगय् पूर्व राष्ट्रपति रामवरण यादवलिसे स्वाःगु छगू घटना लुमनी । छक्वः तराईलय् जक न्यायेकीगु छगू पर्वय् पूर्व राष्ट्रपति यादव कःसिइ च्वनाः चन्द्रमा पुज्यायेत ठिक्क जुयाच्वंगु लानाच्वन । उकिया लागिं प्रेसयात नं सःतातःगु खः । तर राष्ट्रपति भवनया छुं कर्मचारी व छुं सल्लाहकारत जानाः राष्ट्रपतियात सल्लाह बिल खनिं, ‘राष्ट्रपतिज्यू, छि ला समग्र नेपाःया राष्ट्रपति, थथे तराईया छगू पुचलं जक न्यायेकीगु पर्व छिं नं न्यायेकल धइगु समाचार वन धाःसा छितः राष्ट्रया नेता मखु, वहे समुदायया जक नेता धकाः थुइकी । प्रेस सःतेगु बांलाइ मखु ।’


राष्ट्रपति भाजुं प्रेसयात च्या जक त्वंकाः लित छ्वयादिल । गथे राष्ट्रपति छगू जक क्षेत्रया प्रमुख मखु अथे हे छगू जक धर्मया प्रमुख नं मखु । थःत छगू जक धर्मया प्रमुखया रुपय् स्थापित यायेगु गल्ती पुलांम्ह राष्ट्रपतिं गथे यानादीगु खः, वहे गल्ती आः वर्तमान राष्ट्रपतिं नं लिसा कयादिल ।
थ्वहे इलय् प्रधानमन्त्री पुष्पकमल दाहालया न्ह्यःने छगू प्रस्ताव वंगु खँ वल, मोहनिया सप्तमि कुन्हु गोरखां येँय् तक राजकीय सम्मान बियाः दुत हइगु फूलपाती आः बन्द याःसां जिल । राज्यं फूलपातीयात नं छगू राष्ट्रिय पर्वया रूपय् हे हनेगु यानाच्वंगु दु । नेवाः न्ह्यलुवा भाजु राजेन्द्र श्रेष्ठया धापू न्यनेगु खःसा फूलपाती धइगु गोरखा राज्यं नेवाः राज्य उपर लादे यानातःगु सांस्कृतिक उपनिवेशया चिं खः । फूलपाती नेवाः लगायत छुं नं आदिवासी जनजातिया पर्व मखु । थ्व पहाडी खस आर्यतय् पर्व खः । स्याक्वत्याक्व व कूछिभ्वय् ‘मोहनि’ नखःया अंग खःसा फूलपाती ‘दशैँ’ नखःया अंग खः । खस आर्य समुदायं थ्व कुन्हु स्वां व हः थःथःगु छेँय् दुकायेगु ज्या याइ । गोरखाया जुजु पृथ्वीनारायण शाह गोरखा त्वःताः येँय् च्वं वयेवं गोरखास्थित थःगु दरवारया स्वां व हः येँय् हयाः दुकायेत थ्व फूलपाती हयेगु यानातःगु खः ।

थ्व जुजुया फूलपाती जूगुलिं थुकियात गुर्जुया पल्टन समेत तयाः राजकीय सम्मान बियातःगु जुल । आः देशय् राजतन्त्र मंत । हनुमानध्वाखा दरवारय् शाहत मच्वने नं धुंकल । तर नं गोरखां हइगु फूलपाती धाःसा अझं दुहां वया हे च्वन तिनि । देशय् गणतन्त्र वयेधुंकूसां नं झीसं न गोरखां वःगु भाषायात पने फत, न गोरखां वःगु धर्मयात पने फत, न गोरखां वःगु संस्कृतियात पने फत, न गोरखां वइगु फूलपातीयात हे पने फत । गोरखां वःम्ह जुजुयात पितिना छ्वःसां गोरखां वःगु भाषा, संस्कृति, संस्कार जक मखु फूलपाती तक नं यदि शितल निवासयात प्रिय हे जुयाच्वनीगु खःसा देश गणतान्त्रिक, धर्म निरपेक्ष व संघीय प्रणालीइ दुहां वंगुया छुं अर्थ दइ तिनि ला ?

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.