All for Joomla All for Webmasters

ने.सं. ११३६ यंलागा अष्टमी

फुक्क जातिया छथाय् हे नःलास्वां !

हरेक मोहनिबलय् मनूतय् छेँय् छेँय् नःलास्वां पीगु ज्या जुइ । तर नुवाकोटया बेलकोट धाःगु थासय् धाःसा उगु लागाया सकलें मनूत छथाय् हे च्वनाः मंकाः रुपं नःलास्वां पी । थ्व चलन थुगुसी नं कायम हे जूगु दु ।
पृथ्वीनारायण शाहया पालंनिसें थज्याःगु चलन शुरु जूगु खः धाइ । नेपाः त्याकेधुंकाः पृथ्वीनारायण शाहं थःगु जीवनया अन्तिम ई नुवाकोटय् हे फुकूगु खः ।


थ्व मंकाः नःलास्वां पीगु ज्याय् बेलकोटया ब्राम्हण, क्षेत्रींनिसें स्थानीय दलितत तकं छथासं च्वनाः नःलास्वां पी । अनया स्थानीय निरांजना भगवतीया ख्यलय् थथे नःलास्वां पीगु खः ।
थुकी आः नं स्थानीय ब्राम्हण, क्षेत्रींनिसें कयाः स्थानीय तामाङ, मगर, नेवाः, राई लिम्बु व दलितत तकं समावेश जुयाच्वंगु दु । उमिसं छगू हे थासय् नःलास्वां पिनाः न्हिंन्हिं अन हे वयाः पुजा याइ । दशमि कुन्हु सकलें अन हे वयाः थःथःपिनि नःलास्वां क्वकयाः पुजाआजा यासें सिन्हः तीगु ज्या जुइ ।


स्थानीय ब्राम्हणतय्सं थ्व पर्वय् सुनां सुयातं नं थीत्यः मत्यः धइगु भावना मतसे पुजा याइगु जूगुलिं थ्व छगू सकस्यां लागिं नालेबहःगु उदाहरण जुयाच्वंगु खँ कन । अन नःलास्वां पिउ वइपिंसं छुं भेदभाव मतइगु व अथे नःलास्वां पी मालाः मछिं नं मतायेकीगु खँ नं धाःगु दु ।
स्थानीय दलिततय्सं नं अन नःलास्वां पिउ वनेबलय् सुनां नं थःपिंत अलग्ग तयेगु ज्या मयाइगु खँ कन ।
विज्ञतय्सं धाः कथं नेपाःया मेमेगु नं थीथी थासय् थथे मंकाः रुपं नःलास्वां पीगु ज्या जुयाच्वंगु खनेदु । तर उकिया बारे प्रचार धाःसा मजूगुलिं मनूतय्सं सीके फयाच्वंगु मदु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.