All for Joomla All for Webmasters

ने.सं. ११३६ यंलागा अष्टमी

पतञ्जलीं नेपालय् छगू लाख रोजगार बीगु

बिबिसी÷ भारतय् तसकं लबः नयाच्वंगु पतञ्जली आयुर्वेद लिमिटेडया नेपालय् च्वंगु उद्योगया मू लगानीकर्तां नेपालय् नं जडीबुटीया खेती यानाः छगू लाख परिवारयात रोजगारी बीगु खँ धाःगु दु ।
पतञ्जलीया प्रविधि व थःगु डेढ अर्ब लगानीइ स्थापित उगु उद्योगया फुक्कं लबः सामाजिक ज्याय् छ्यलेगु खँ नं व्यवसायी उपेन्द्र महतों धयादीगु दु ।


प्रधानमन्त्री प्रचण्डं भारत भ्रमणया इलय् पतञ्जलीया संस्थापक बाबा रामदेवं नेपालय् आयुर्वेद व वैदिक शिक्षा विस्तार यायेगु जानकारी बिउगु खः । लिसें नेपालय् जूगु लबः फुक्कं नेपालय् हे खर्च यायेगु घोषणा नं याःगु खः ।
निवाः न्ह्यव प्रधानमन्त्री प्रचण्डयात हरिद्वारय् च्वंगु पतञ्जली योगपीठय् लसकुस यासें बाबा रामदेवं खाद्यान्न व जडीबुटी प्रशोधन याइगु थःगु मू कारखाना नं चाःहिकूगु खः । अन हे जूगु विशेष समारोहय् रामदेवं हरिद्वारय् थें तःधंगु फुड एण्ड हर्बल पार्क नेपालय् संचालन यानाः पतञ्जलीयात भारत पिने नं विस्तार यायेगु अभियान न्ह्याकेगु घोषणा यानादीगु खः ।


‘पतञ्जली आयुर्वेदया देशं पिने व दकलय् तःधंगु कारखाना दकलय् न्हापां नेपालय् चायेकेत्यनागु दु । वइगु महिना अर्थात वइगु नोवेम्भरय् निसें थुकिया सुरुवात यायेत्यनागु दु । थ्व धुंकाः थ्व ज्या अझ न्ह्याः वनी ।’ सन् २००६ य् स्थापित पतञ्जली आयुर्वेद लिमिटेडयात भारतय् दकलय् तीव्र गतिं नाफा कमे यानाच्वंगु कम्पनी खः । वंगु जुलाइलय् भारतीय पत्रिका इण्डिया टुडें छगू विस्तृत लेख प्रकाशन यासें पतञ्जलीं तसकं चलनचल्तीया उपभोग्य वस्तु उत्पादनया साम्राज्य हे दयेकूगु न्ह्यथँगु खः ।


बाबा रामदेवया सतिम्ह ग्वाहालिमि व पतञ्जली आयुर्वेदया प्रबन्ध निर्देशक नेपाली मूलया आचार्य बालकृष्णयात लोकंह्वाःगु अन्तर्राष्ट्रिय पत्रिका फोब्र्सें भारतया हे ४८ औं धनी मनूया धलखय् दुथ्याकूगु खः । फोब्र्सं वयाके थ्यंमथ्यं निगूत्या खर्ब बराबरया सम्पत्ति दुगु खँ न्ह्यथँगु खः । जडीबुटी ल्वाकछ्यानातःगु दन्त मञ्जननिसें श्रृंगारया सामान, चाउचाउनिसें जाम, अले साब्वं निसें जुस तक उत्पादन यानाच्वंगु पतञ्जलीं थ्यंमथ्यं स्वसःत्यागू ताजिया सामान उत्पादन यानाच्वंगु दु । छुं ई न्ह्यव तिनि थ्वं स्वदेशी जिन्स कापः उत्पादन यायेगु घोषणा नं याःगु खः ।

दंगु भावं पतञ्जलीया उत्पादनया लोकंह्वानाच्वंगुलिं दैनिक उपभोग्य सामग्री उत्पादन यानाच्वंगु बहुराष्ट्रिय कम्पनीतय्त भारतीय बजार वाथावाथा कंकाच्वंगु दु । भुखाय् व भारतीय नाकाबन्दीं यानाः छुं ई लिज्यांवंगु पतञ्जली अन्तर्गतया नेपाःया बाराय् स्थापना याःगु कारखानां थ्यंमथ्यं न्यय्गू ताजिया खाद्यान्न व श्रृंगारया सामान वंगु खुला न्ह्यवनिसें उत्पादन याना वयाच्वंगु दु । थ्यंमथ्यं छगूत्या अर्ब लगानीं न्यागूत्या विघा जमीनन्यंक दयेकातःगु उगु उद्योग उलेज्या यायेत वइगु नोवेम्भरय् बाबा रामदेव नेपाः वयेत्यंगु दु । थ्व उद्योगं झिंच्यागू विघा जग्गा बालं कयाः कुनु (एलोभेरा) खेती यानाच्वंगु दु ।

नेपाल ग्राम उद्योग नांया थ्व उद्योगया मू लगानीकर्ता व्यवसायी उपेन्द्र महतों कृषिइ आधारित उद्यमयात प्रवद्र्धन यानाः देन्यंकं रोजगारीया अवसर अप्वयेकेगु उद्देश्य थःपिनिगु दुगु खँ कनादीगु दु ।
वय्कलं धयादिल, ‘नेपालय् स्वरोजगारया दकलय् बांलाःगु लँ कृषि खः । जडीबुटी व थीथी नगदेबालीया वैज्ञानिक ढंगं उत्पादन मयातले व बजाः सुनिश्चित मयाःतले कृषिइ हिउपाः वइमखु । व गुकथं यायेफइ धकाः पतञ्जलीया सहकार्ययय् म्होतिं नं छगू लाख परिवारयात जडीबुटीलिसे स्वायेगु कुतः न्ह्याकागु दु ।’


प्रधानमन्त्री प्रचण्डया हरिद्वार भ्रमणया इलय् बाबा रामदेवं पतञ्जलीं नेपालय् उद्योगया लिसें आयुर्वेद कलेज व विश्वविद्यालय नं चायेकेगु खँ कनादीगु खः । लिसें वय्कलं थः मेमेगु बहुराष्ट्रिय कम्पनीं थें लबः जक नयेत ज्या मयायेगु खँ कनादीगु खः ।
योगगुरु रामदेवं धयादीगु दु, ‘जिमिगु सिद्धान्त गरिब देशं ध्यबा कमे यानाः थःगु देशय् हयेगु मखु । उकिं नेपालय् स्थापना यानागु उद्योगं गुलि नं नाफा जुइ, शतप्रतिशत नेपालीतय् सेवाय् हे छ्यलेगु जुइ । छतका ध्यबा नं जिमिसं भारत हयेगु जुइमखु । बरु थनं हे छुं रकम नेपाःया सेवाय् खर्च यायेगु जुइ ।’


भारतीय व्यवसायीतय्त सम्बोधन यायेगु झ्वलय् परराष्ट्रमन्त्री प्रकाशशरण महतं पतञ्जलीं थें मेमेपिंसं नं नेपालय् लगानी यायेत आह्वान यानादीगु खः । ज्याझ्वलय् न्ववानादिसें प्रधानमन्त्री प्रचण्डं बाबा रामदेवयात योग व उद्योग स्वयोत सफल छम्ह कम्युनिष्ट कथं चित्रण यानादिल । लिसें प्रधानमन्त्रीं जुडिबुटीया उपभोग यानाः नेपाःयात समृद्धिपाखे न्ह्याकेफइगु व थुकिया निंतिं छिगु पलाःयात थःगु समर्थन दइ धयादिल । वय्कलं धयादिल, ‘थन जितः नेपालं तःधंगु मात्राय् जडीबुटी वइगु क्यंगु दु । धाथें नेपालय् हे थज्याःगु कारखाना दत धाःसा उकिं नेपाली जनताया समृद्धिइ यक्व ग्वाहालि याइ । स्वामीजी नेपालय् कारखाना चायेकी, सामान अनं हे झिके याये धयादीगु दु । जिगु पाखें पूवंक कुतः जुइगु विश्वास बियाच्वना ।’

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.