All for Joomla All for Webmasters

ने.सं. ११३६ यंलागा अष्टमी

लमि यात्रा

मिसां मिजंयात तमं थुकलं बिल ।
सुथया ई दिल्ली विमानस्थलय् नेपाः वयेत झ्वः छुनाच्वंपिं निम्ह नेपाःमि । छम्ह मिसा छम्ह मिजं । मिजंया मिखा अनायास हे मिसाया बांलाःगु नुृगःपाय् तक्यंगु जुयाच्वन । न्हापां ला म्हुतुइ ई बुयावयाः थु याःगु थें मिजंया मती । तर मिसां ला सिइक चायेक हे अथे याःगु जुयाच्वन । बांमलाःगु दृष्टिं स्वल धयाथें मिसां घृणा पिब्वःगु जुयाच्वन ।


मिजंयात सुख मंत । मस्वयेमाःगु ला छु थें, स्वये लात धयाथें मिजं पस्ताय् चाल । मनय् अनेतने खँ वायेकाः निम्हं न्ह्याःवल । जहाज गल ।
संजोग धायेगु ला छु धायेगु थ्व ? दुने निम्हं नापं च्वनेमाःपिं जुल । उमि सिट ल्यां ७ क व ७ ख जुयाच्वन । पलख लिपा जहाज ब्वल । निम्हेसियां ख्वाः पाउँ, खिउँ । मिसाया ख्वालय् अझ नं तं ल्यहेँ ल्यहेँ पुयाच्वन तिनि । मिजंयात मछिन । मिसाया म्हय् थी थें ग्यानाः मिजं जहाजया सिटय् कय्कुनाःफ्यतुत । भचा तं नं वयेकल । ‘क्यने थें ब्वया वइम्ह नं व हे । स्वल धकाः तंचाइम्ह नं व हे ।’ गां त्वपुया मतःगु चीज मस्वये धाःसां खनाच्वन । मिजंया छु याये गुखे स्वये जुल । वं झ्यालं पिने स्वल ।


दिल्लीं पूर्व स्वया वयाच्वंगु जहाज लखनउ पुल । गुंलाया ई । सुपाँचं भुनातःगु सर्गः । फत्तले, जित्तले सुपाँय् छलय् यानाः जहाज न्ह्याका हयाच्वन । सुपाँचय् दुहां वनीबलय् जहाज सनीगु ला स्वाभाविक हवाइ प्रक्रिया खः । तर नेपाः दुहां वये त्यंबलय् जहाज थुलि ग्यानापुक सन कि यात्रु सकलें थारान्हुल । सातु हे वन । जहाज हे कुतुं वं थें उमिं हंसं थाय् त्वःतल । चिल्लाय् दंगु सः तायेदत । ग्यानाः गुलिसिनं मेचया ल्हाः दिकेथाय् कत्ताक्क ज्वनसा गुलिसिनं मिखा तिस्सिनाः द्यः लुमंकल । व बांलाःम्ह मिसा ला ग्यानाः लिक्क दुम्ह मयःम्ह मिजंयाके हे प्यपुंवन । छुं ई न्ह्यव तक महिताः थें व्यवहार क्यना वयाच्वंपिं निम्हं थुगु घटना लिपा अतिकं मिलय् जूपिं थें सतिना बिल । स्वल धकाः तंचाःगु चीजं मिजंया म्हय् स्पर्शयातं नं मिसाया आपत्ति मजुल ।


‘गपाय्सकं संकूगु का जहाज !’ मिसाया म्हुतुं मचायेक हे खँ स्वाल्ल हायावल ।
‘अँ... मौसम बांमलाः । टर्बुलेन्सय् लाइबलय् थथे हे खः,’ न्हापा नं जहाज गये नंम्ह मिजनं थम्हं सिउगु खँ कन ।
बुलुहुं जहाज थातं च्वन । स्थिति सामान्य जुल । यात्रु मग्यात ।


‘नेवाः खँ सिउम्ह जुयाच्वन, छेँ गन थें छिगु ?’ मिसाया खँ ल्हाये मंदत ।
‘फसिक्यब, पुलांगु रञ्जना हल दुथाय्’ मिजनं न्हूसतक लिक्क दुगु थःगु त्वाःया नां कन ।
‘खः ला ?’ मिसा अजू चाल । ‘अन ला जिमि पाजुपिं नं दु । तीर्थ नारायण... पाजुया नां,’ न्हापांनिसें म्हसिउम्ह थें खँ ल्हाये वल मिसाया ।


‘का... तीर्थनारायण दाइयात ला जिं नं म्हसिउ’ ख्वाः चकंकाः मिजनं न्यन, ‘साय्मि खः, खला ? छि नं साय्मि लात ला छु ?’ खँ स्वानावःलिसे मनू सतिना वल ।
‘अँ...’ मिसां याउँक धाल ।
‘जि नं साय्मि । रबि साय्मि जिगु नां’ मिजनं ल्हाः न्ह्याकल ।


‘जि सन्ध्या मानन्धर’ ल्हाः मिले यायां मिसायात मयःम्ह मिजं नं ययावल । नुगः दुने गनं तकुस्वां ह्वल । गोदावरी च्वय्या फूच्व पुलेवं जहाज क्वत हल । जहाज क्वय् दिके हःसां मन इमि च्वय् हे ब्वयाच्वन ।
प्यला लिपा इमि इहिपा जुल ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.