All for Joomla All for Webmasters

ने.सं. ११३६ यंलागा अष्टमी

रमेशकाजी स्थापितया न्यापु मुक्तक

मेसीन

जुयाच्वंगु थथे हे खः
तर याइगु सुनां यकिन ?
कुर्सि हे खः, नेतातय् निंतिं
नोट छापे यायेगु मेसीन ।

व्यक्तित्व

गुपिं मनूतय्गु ब्वहलय् दु
राष्ट्र उत्थानया दायित्व
भ्रष्टाचारया पर्याय जुइधुंकल
स्वैदिसँ उमिगु व्यक्तित्व

तलब

तलब बढे जुल वाह ! वाह !
किसंचा साप हे खुसि जुल
कन्हय्कुन्हु अखबारय् वल–
‘जाकि बजि चिनि च्या थिके जुल’

न्ह्यपु नःगु कविता

घौछि जायेधुंकल वं
जिगु न्ह्यपु नयाच्वंगु दु
मस्यू ला ?– वं ‘पलख’ नांगु
कविता न्यंकाच्वंगु दु

द्यः

सिन्हः छपता जक तिकाबीमाः
ल्वहंग्वारायात नं द्यः धयाबी
थः यःम्ह लिक्क दयेमाः– मनू
स्वाल्ल नायावनीगु घ्यः जुयाबी


थुपिं मुक्तक न्हापा विभिन्न इलय् छद्म नामं पिकयातये धुंगु खः
– च्वमि

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.