All for Joomla All for Webmasters

ने.सं. ११३६ यंलागा अष्टमी

पुस दुने पेट्रोल पाइपलाइन दयेकेगु सुरु

पेट्रोलियम पदार्थ सहज आपूर्तिया निंतिं नेपाः व भारतया मंकाः लगानीइ दयेकेत्यंग रक्सौल–अमलेखगंज पेट्रोलियम प्रोडेक्ट पाइप लाइन’ प्यला दुने सुरु जुइगु जूगु दु ।
विस्तृत परियोजना प्रतिवेदन वयेवं निर्माण ज्या सुरु यायेगु कथं सम्झौता जूगु थ्व परियोजनाया फुक्क धयाथें क्षेत्रया् अध्ययन थ्यंमथ्यं पूवनेधुंकूगुलिं वइगु पुस १५ गते निसें हे दयेकेगु सुरु यायेत्यंगु खः ।


नेपाल आयल निगमया कथं जनघनत्व व चाया सर्वेक्षण, परियोजना निर्माणस्थलय् लाःगु सिर्सिया खुसिइ ‘हाइड्रोलोजिकल टेस्ट’ आदिया सर्वेक्षण ज्या अन्तिम चरणय् थ्यनेधुंकूगु दु ।
जनघनत्व सर्वेक्षणय् परियोजनाया जःखः लाःगु बस्तीया अवस्था व अन लाइगु लिच्वः बारे अध्ययन जुयाच्वंगु दु । पाइप लाइन दयेकेथाय्या जमीनया अवस्था बारे नं अन्तिम प्रतिवेदन वयेत्यंगु दु । अथेहे पाइप लाइन निर्माण क्षेत्रय् लाःगु सिर्सिया खुसिया बहाव, आदिया अध्ययन नं पूवनेत्यंगु दु ।


निगमया प्रवक्ता भानुभक्त खनालया कथं थ्वहे भदौ २५ गते दुने विस्तृत परियोजना प्रतिवेदन वइगु जूगु दुसा थ्व प्रतिवेदन वयेधुंकाः प्राविधिक पक्षय् छुं भचा अध्ययन यायेमाली तिनि । वइगु कात्तिक÷मंसिर दुने प्रतिवेदनया अन्तिम रुप वइगु व पुस दुने दयेकेगु ज्या हे सुरु यायेगु खँ निगमं धाःगु दु । थुकिया निंतिं सरकारं परियोजनायात माःगु जग्गा धाःसा उपलब्ध यानाबीमाःगु खँ प्रवक्ता खनालं धयादीगु दु । परियोजनाया निंतिं सरकारं ३३.६ हेक्टर जमिन निगमयात उपलब्ध यानाबीमाः ।
थ्यंमथ्यं ३७.३४ किमि रक्सौलनिसे अमलेखगन्जतकया पाइप लाइ नदयेकेगु सन्दर्भय् नेपाः व भारत दथुइ जूगु सम्झौताय् प्यंगू अर्ब ४० करोड दां तुइगु अनुमान यानातःगु दु । सम्झौता कथं भारतं भारु दुई अर्ब (नेपाली दां ३ अर्ब २० करोड) लगानी याइसा नेपालं छगू अर्ब २० करोड लगानी याइ ।


ज्या सुरु जूगु ३० महिना दुने परियोजना दयेके सिधयेकेगु खँ सम्झौताय् दुथ्याकातःगु दु । सम्झौता कथं थ्व परियोजनाय् अत्याधुनिक प्रयोगशाला, यक्व भण्डारण क्षमाया दुगु ट्यांकी व स्वचालित इन्धन लोडिङ्ग प्रणाली नं जडान जुइ ।
प्रवक्ता खनालया कथं भारतय् थ्व परियोजना स्वयां तःधंगु पाइपलाइन दयेकेगु ज्या म्होचा इलय् हे क्वचायेकूगु उदाहरण दुगुलिं थ्व परियोजनाय् नं छुं पंगः मवल धाःसा क्वःछिनातःगु इलय् हे क्वचाइगु खँ धाःगु दु । थ्व परियोजना पूवन धाःसा नेपाःयात भारतं पेट्रोलियम पदार्थ हयेबलय् गाडीइ खर्च जूगु इन्धन जक न्हिं २९ लाख २० हजार बचत जुइ ।


वातावरणीय व आर्थिक रुपं नेपाःयात थ्व परियोजनां यक्व लबः दुगुलिं थुकियात राष्ट्रिय गौरवया आयोजनाय् दुथ्याकेत इनाप यानागु खँ प्रवक्ता खनालं धाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.