All for Joomla All for Webmasters

ने.सं. ११३६ यंलागा अष्टमी

सहकारीइ जक २ खर्बया बचत

सहकारी ख्यलय् वंगु आर्थिक दँय् जक निगू खर्ब निगू अर्ब बचत परिचालन जूगु दु । सहकारी विभाग व थ्वया मातहातया ज्याकुथिं आर्थिक दँ २०७२÷७३य् संचालन याःगु कार्यक्रम बारे ग्वसाः ग्वःगु वार्षिक समिक्षा गोष्ठीइ सरकारं न्ह्यःने हःगु ‘तीन खम्बे’ आर्थिक नीतिया दुगःक्वँय् कथं जुयाच्वंगु सहकारीं थ्व बचत परिचालन याःगु खँ धाःगु खः ।
सहकारीया वित्तीय कारोवार सम्बन्धी विवरणय् सहकारी संघसंस्थातय् सेयर पूँजी जक ६३ अर्ब, सहकारी कोषय् दुगु ६ अर्ब ८० करोड दुगु व लगानी १ खर्ब ८८ अर्ब थ्यंगु जानकारी बिउगु खः ।

थौंकन्हय् नेपालय् प्रारम्भिक सहकारी संस्थातय् ल्याः ३३ हजार २८९ गू दु । अथेहे जिल्ला संघ ७० गू, विषयगत जिल्ला संघ २५३ गू, विषयगत केन्द्रीय संघ २० गू, राष्ट्रिय सहकारी संघ व राष्ट्रिय सहकारी बैंक छगू छगू दु । अथेहे देय्न्यंं सहकारी संघसंस्थाय् २३ लाख ९० हजार ९४९ म्ह मिसा व २८ लाख, ९ हजार ८३८ म्ह मिजं दुजः जुयाच्वंगु दु । वंगु आर्थिक दँय् जक सछिगू सहकारी संस्थात मर्ज जूगु दु ।

गोष्ठीया उलेज्या यासें सहकारी तथा गरिबी निवारण मन्त्री हृदयराम थानीं सहकारी ख्यलय् खनेदुगु विकृत व विसंगति अन्त्य यायेगु निंतिं कर्मचारीत छपलाः न्ह्याःवन धाःसा थः निपलाः न्ह्याःवनाः ग्वाहालि यायेगु प्रतिबद्धता प्वंकादीगु दु । वय्कलं धयादिल, ‘देय् दयेकेग भावना ज्वनाः मंकाः जिम्मेवारी, इमान्दारी व लगनशील जुयाः ज्या याये आवश्यक दु । छिकपिनि ग्वाहालि दुसा जि १८ घण्टा तक ज्या यायेत तयार दु ।’

गरिबीलिसे स्वाःगु योजना व कार्यक्रमयात मन्त्रालय मातहत हयेत थःम्हं फक्व कुतः यायेगु खँ न्ह्यथँसें मन्त्री थामीं नीति दयेकेगु तर कार्यान्वयनय् ध्यान मबीगु झीगु चरित्र हिलेमाःग आवश्यक दु धयादिल ।राष्ट्रिय सहकारी संघया उपाध्यक्ष व सांसद ओमदेवी मल्लं सहकारी ख्यलय् छाय् समस्या वल, छु चुनौति दु व आः गुकथं न्ह्याःवन धाःसा लक्ष्यकथं लिच्वः चूलाकेफइ धयागु बारे कर्मचारीतय् सकारात्मक कुतः आवश्यक दु धयादिल ।

वय्कलं धयादिल, ‘समस्या जक क्यनाः सहकारी ख्यः ला खतम का धयाः गुबलें बांलाःगु लिच्वm वइमखु । समस्या क्यनेगु, समाधानया लँपु मज्वनेगु प्रवृत्ति चिइके माः ।’ अथेहे सहकारी तथा गरिबी निवारण मन्त्रालयया सचिव शंकरप्रसाद अधिकारीं अर्थतन्त्रया नियामक निकायया रूपय् दुगु सहकारी विभागया कर्मचारीयात सहकारी ख्यलय् लिच्वः वइकथं जय यायेत निर्देशन बियादिल । सहकारी विभागया रजिष्ट्रार केशवप्रसाद रेग्मीं सहकारीया विकास व विस्तार लिसें विसंगति नं अप्वया वःगु धासें थुकियात चिइकेत अनुगमन संयन्त्र अझ सुदृढ यानायंकेगु प्रतिबद्धता प्वंकादिल ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.