All for Joomla All for Webmasters

ने.सं. ११३६ यंलागा अष्टमी

फजुल खर्च

‘यो मां, थौं छकः चाःहिउ वने नु ले ! तसकं म्हाइपुल धया जितः’ महेशं मांम्हेसित धाल । न्ह्याब्लें छेँय् जक च्वनाः म्हाइपुल खइ का धकाः वयात पितयंकेत मांम्ह तुरन्त तयार जुल ।
मांया नुगः । थः मस्तय्गु लसताय् हे थःगु लसता खंकीम्ह । मस्तय् नं मां धालकि मेगु छु मानि । न्ह्याक्व हे तःधिकः जूसां मांया न्ह्यःने ला मचा हे जुयाबीगु । धाये सातकि इच्छा पूवंकाबीम्ह मां मस्तय्गु निंतिं पसः वनीम्ह पासा नं ला जुल नि ।


अहो ! बजाः भाः ला गपाय्च्व थिके जुयाच्वंगु । अय्सां थः काय् महेशया निंतिं मांम्हं धाःधाःगु लं, लाकां, पाइन्ट न्यानाबिल । झिंन्यासः दां साहुयात पुलाः मां–काय् निम्हं पिहां वल । लँय्सं च्वंगु होटल खनाः निम्हेसियां नयेपित्याः थें जुयावल । निम्हं दुहां वन । महेशचित यःगु वं धाःगु नसा नकल । प्वाः जायेकाः निम्हं अनं पिहां वल । लँय् ववं मांम्हेस्यां हिसाब यात, ‘अहो ! ध्यबा ला यक्व हे फुत खनी !’ महेशचिया ख्वालय् छक्वः पुलुक्क मिखा ब्वल । न्हून्हूगु लं, लाकां, न्याये दयाः वया ख्वाः पुन्हिया तिमिला थें चक्कं । मचा खनाः मांम्ह नं दंग ।


मोहनिबलय् थें हुलमुलगु लँय् महेशचां उखेंथुखें मिखा ब्वयावल । छम्ह फ्वगिं छगू होटलय् पिने झिपतिं स्वानाः बिन्ति यानाः थःगु प्वाःया पित्याः लंकेत साहुयात आशाकुति मिखां स्वयाच्वन । कालाकुल हाःसःया दुने व फ्वगिंया सः तनावनाच्वन । वयात सुनांनं वास्ता यानाच्वंगु मदु । थज्याःगु लकस खनाः महेशचिया नुगलय् माया दासि वल । ‘आसे न्हिं मां ! व फ्वगिंयात न्ह्यागुसां छगू न्यानाबी !’ महेशचां खल्तीं नीतका दां लिकात । पलाः न्ह्याकेत सन । मांम्हं महेशया लप्पा ज्वनाः सालाकाल । ‘का म्वाः । ध्यबा बाः वः ला ? न्ह्याम्हेस्यां सां न्यानाबी हे बी नि । फजुल खर्च याये जिउगु ला ।’


मांम्हं हक्कल । मांम्हेसिया थज्याःगु खं यानाः महेशचिया नुगः पाउँल । मायां जाःगु मिखां महेशचां मांम्हेसिया ख्वालय् स्वल । निम्हेस्यां मिखा ल्वानाः प्यंगः जुल । सखे महेशचां मांम्हेसित छगू न्ह्यसः तयाच्वंगु दु ‘फजुल खर्च छुकियात धायेगु ? हथाय् हे मजूसां न्यानाबिउगु वसः ज्वलंयात लाकि पित्याःम्ह व फ्वगिंया नसायात ?’

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.